O LAFI kova so ko Prevod Nevo sveto tano prevedimo sar „vrda“, ki izvorno čhib šaj te mislinel pe ko različna vrste kočie (Apo. 8:28, 29, 38). Ama, mislinela pe kaj o Etiopjani vozingja pe ki kočija koja so sine pobari taro okola so koristinena pe sine ki vojna ili bašo trke. Te dikha nesave pričine so anena amen ko asavko zaklučok.

O Etiopjani sine baro službeniko kova so cidingja ko jekh baro drumo. Ov sine službeniko e etiopsko caricake hem sine čhivdo te arakhel celo lakoro barvalipe (Apo. 8:27). O avdisutno Sudan hem o najjužno delo taro avdisutno Egipet angleder sine delo tari Etiopija. Iako o Etiopjani najverojatno na vozingja pe celo vreme ki isto kočija džikote patujnela sine, ama sigurno lelja but bukja pea so valjangje leske bašo baro drumo. Ko prvo veko tari a.e., nesave kočie kola so koristinena pe sine bašo prevoz sine len štar trkalakija hem sine učharde. Ko jekh lil pišinela: „Asavke kočiencar šaj sine te ingarel pe but bagaži hem o patujbe sine udobno agjaar o manuša najverojatno šaj sine te patujnen but podur“ (Acts—An Exegetical Commentary).

O Etiopjani čitinela sine keda o Filip reslja le. Ko izveštaj pišinela: „O Filip prastandilo dži ki kočija hem šungja sar [o službeniko] čitinela ko glaso taro proroko o Isaija“ (Apo. 8:30). Ko adava vreme, o kočie bašo patujbe na sine kerde te vozinel pe lencar sigate. Adaleske so akala kočie patujbaske sine bavna, o službeniko šaj sine te čitinel, a o Filip šaj sine te resel le prastandor.

O Etiopjani „zamolingja e Filipe te uklel ki kočija hem te bešel uzi leste“ (Apo. 8:31). Obično ki jekh kočija trkake, o vozačija tergjovena sine. Ama, ki jekh kočija patujbaske sine dovolno than te šaj te bešen hem o službeniko hem o Filip.

Ko sklad adalea so pišinela ko Apostolija 8-to poglavje hem o istoriska dokazija soj tane dostapna, ko amare poneve publikacie o Etiopjani tano sikavdo ki kočija koja soj pobari taro okola so koristinena pe sine baši vojna ili baši trka.