1. Sar zamislinea tuke e Jehova?

 DALI nekogaš probingjan te zamisline sar izgledinela o Jehova? Sar zamislinea le keda molinea tut leske? Iako amen našti te dikha le, sepak i Biblija opišinela le ko različna načinija. Bašo Jehova vakerela kaj tano „kham hem štiti“ hem „jag so gltinela“ (Ps. 84:11; Evr. 12:29). O Ezekiel ki jekh vizija opišingja e Jehovaskiri prisutnost sar safiri, parno zlato so svetinela hem vinožito so but svetinela (Ezek. 1:26-28). Akava šaj te bajrarel amaro poštovanje sprema o Jehova, pa čak te bajrarel amari dar sprema leste.

2. Soske šaj nesavenge te ovel pharo te oven paše e Jehovaja?

² Adaleske so našti te dikha e Jehova šaj te ovel amenge pharo te verujna kaj ov mangela amen. Nesave mislinena kaj o Jehova nikogaš našti te mangel len adaleske so doživingje lošna bukja ko životo. Lengoro dad šaj nikogaš na sikavgja lenge mangipe. O Jehova haljola adala čuvstvija hem sar ola vlijajnena upri amende. Te šaj te pomožinel amenge, ov preku plo Lafi sikavela amenge savi ličnost tano.

3. Soske valjani te doznajna nešto poviše bašo Jehova hem bašo leskoro mangipe?

³ E Jehova najšukar šaj te opišina le jekhe lafea — e lafea mangipe. Baš adava vakerela i Biblija, o Jehova tano mangipe (1. Jov. 4:8). Sa so kerela, kerela taro mangipe. E Devleskoro mangipe tano doborom baro hem silno so sikavela le čak okolenge so na mangena le (Mat. 5:44, 45). Ki akaja statija ka dikha nešto poviše bašo Jehova hem bašo leskoro mangipe. So poviše sikljovaja bašo amaro Devel, doborom poviše ka manga le.

O JEHOVA BUT MANGELA AMEN

4. Sar osetinea tut adaleske so e Jehova isi le sočuvstvo? (Dikh hem i slika.)

⁴ „O Jehova tano pherdo sočuvstvo“ (Jak. 5:11) Ki Biblija ov sporedinela pe jekhe dajaja soj pherdi sočuvstvo (Isa. 66:12, 13). Zamislin tuke sar jekh daj ljubezno grižinela pe  ple čhaveske. Oj nežno ikerela le ki pli angali hem ljubezno kerela lea lafi. Keda rovela ili isi le dukha, oj kerela sa so šaj te del le adava so valjani leske. Slično, keda isi amen nesavi muka šaj te ova sigurna kaj o Jehova ka sikavel amenge mangipe. Jekh psalmisti pišingja: „Keda pherdiljum but misle so na dena man mir, tu utešingjan man hem smiringjan man“ (Ps. 94:19).

5. So značinela tuke e Jehovaskoro verno mangipe?

⁵ O Jehova tano verno (5. Moj. 32:4). Na otkažinela pe amendar keda keraja nešto soj pogrešno. O Izraelcija but puti razočarinena le sine. Sepak keda kainena pe sine, ov uverinela len sine ko plo verno mangipe. Na primer, ki jekh prilika ov vakergja ple narodoske: „Tu sian mange skapoceno, sikavdi tuke čest hem me mangava tut“ (Isa. 43:4, 5). E Jehovaskoro mangipe na meningja pe. Nikogaš na valjani te sumnina amen ko adava, čak ako keraja nesavi seriozno greška o Jehova nane te iranel amenge plo dumo. Ako kainaja amen hem iranaja amen ko Jehova ka šaj te dikha kaj ov panda mangela amen. Ov vetinela kaj ka prostinel amenge ki bari mera (Isa. 55:7). I Biblija vakerela kaj tegani ka džana so značinela o Jehova te iranel amari sila (Apo. 3:19).

6. So sikljovaja taro Zaharija 2:8 bašo Jehova?

⁶ Čitin Zaharija 2:8. O Jehova sporedinela amen e zenicaja tari pli jakh. I jakh tani but osetlivo hem but vredno delo taro amaro telo. Sprema adava, o Jehova javere lafencar sar te phene vakerela amenge: „Tumen so sien mlo narodo, sekova jekh so povredinela tumen, povredinela adava soj mange skapoceno“. Adaleske so mangela amen, o Jehova džanela sar osetinaja amen hem isi le bari želba te zaštitinel amen. Keda amen osetinaja dukh, ov da osetinela dukh. Adaleske šaj te ova sigurna kaj ka odgovorinel amenge keda molinaja le: „Arakh amen sar i zenica tle jakhjakiri“ (Ps. 17:8).

7. Soske valjani te uverina amen ko e Jehovaskoro mangipe?

⁷ O Jehova mangela te uverine tut kaj ov tut lično mangela. Ama ov džanela kaj bašo adava so doživingjem angleder šaj te puča amen dali ov čače mangela amen. Ili šaj ko momenti nakhaja tari nesavi situacija koja so čhivela ko ispit amari doverba ko e Jehovaskoro mangipe. So ka pomožinel tuke te bajrare  tli doverba? Adava so ka doznajne sar o Jehova sikavela plo mangipe sprema o Isus, o pomazanikija hem sprema sarinende amende.

SAR O JEHOVA SIKAVELA PLO MANGIPE

8. Soske o Isus sine uverimo kaj leskoro Dad mangela le?

⁸ O Jehova hem leskoro Čhavo nakhavgje vreme zaedno poviše nego bilo koj javer. Džikote sine zaedno but milijarde berša, ola ule but paše hem lengoro mangipe jekh jekheske but barilo. O Jehova jasno sikavgja plo mangipe e Isuseske. Adava šaj te čitina le ko Matej 17:5. O Jehova šaj sine samo te vakerel: „Akava tano okova so kerela man radosno“. Namesto adava, ov manglja te džana kobor but mangela e Isuse, adaleske ov vakergja leske „mlo manglo Čhavo“. O Jehova dičinela pe sine e Isusea, posebno adaleske so sine spremno te del plo životo (Ef. 1:7). A o Isus ni hari na sumningja pe kaj leskoro Dad mangela le. E Jehovaskoro mangipe sine doborom realno e Isuseske so šaj sine te osetinel le hor ki peste. Ko poviše prilike ov sikavgja kaj tano uverimo kaj leskoro Dad mangela le (Jovan 3:35; 10:17; 17:24).

9. Kova lafi opišinela e Jehovaskoro mangipe sprema o pomazanikija? Objasnin. (Rimjanja 5:5).

⁹ O Jehova isto agjaar sikavela plo mangipe sprema o pomazanikija. (Čitin Rimjanja 5:5.) Primetin kova lafi koristinela pe te šaj te sikavel pe kobor mangela o Jehova e pomazanikon. Akate pišinela kaj ov „phergja“ lengere vile ple mangipaja. Jekh biblisko rečniko sporedinela e Jehovaskoro mangipe jekhe rekaja kolate so celo vreme thavdela pani hem phergjola. Akaja sporedba jasno sikavela kobor but mangela o Jehova e pomazanikon. O pomazanikija džanena kaj o Devel mangela len (Juda 1). O apostol Jovan opišingja ple čuvstvija akale lafencar: „Dikhen savo mangipe dengja amen o Dad, te ova vikime e Devleskere čhave“ (1. Jov. 3:1). Dali o Jehova mangela samo e pomazanikon? Na, o Jehova sikavgja kaj mangela sarinen amen.

10. Kova tano o najbaro dokaz bašo e Jehovaskoro mangipe?

¹⁰ Kova tano o najbaro dokaz bašo e Jehovaskoro mangipe? I otkupnina — o najbaro mangipe so šaj sine nekoj dži akana te sikavel (Jovan 3:16; Rim. 5:8). O Jehova dengja ple mangle Čhave sar žrtva hem dozvolingja te merel sa e manušenge, te šaj amare grevija te oven prostime hem agjaar te ova leskere amala (1. Jov. 4:10). So poviše razmislinaja baši cena so platingje la o Jehova hem o Isus, doborom poviše haljovaja kobor but mangena sekole jekhe amendar (Gal. 2:20). I otkupnina na sine platimi samo adaleske so e Jehovaskiri pravda rodela sine adava. Nego, oj tani poklon taro Jehova so dengja la mangipaja. Ov dokažingja kaj mangela amen agjaar so žrtvujngja adava soj leske najskapoceno — e Isuse. O Jehova dozvolingja leskoro Čhavo te cidel muke hem te merel amenge.

11. So sikljovaja taro Eremija 31:3?

¹¹ Sar so dikhlem, o Jehova na samo so osetinela mangipe sprema amende, nego ov isto agjaar sikavela plo mangipe. (Čitin Eremija 31:3.) O Jehova privlečingja amen ki peste adaleske so mangela amen. (Sporedin 5. Mojseeva 7:7, 8.) Nikoj hem ništo našti te odvojnel amen taro adava mangipe (Rim. 8:38, 39). Sar osetinea tut adaleske so džanea kaj o Jehova mangela tut? Čitin o 23-to Psalm hem dikh sar e Jehovaskoro mangipe hem griža vlijajngja upro David hem sar adava šaj te vlijajnel upri amende.

SAR VLIJAJNELA UPRI TUTE E JEHOVASKORO MANGIPE?

12. Sar ka opišine kratko o 23-to Psalm?

¹² Čitin Psalm 23:1-6. Ko Psalm 23 preku jekh gili o David opišinela pli doverba  ko e Jehovaskoro mangipa hem ki leskiri griža. Ov opišingja leskoro paše amalipe e Jehovaja, koleste so dikhela sine sar plo Pastiri. O David osetinela pe sine sigurno adaleske so o Jehova vodinela le sine, hem ov celosno potrpinela pe sine ki leste. O David džanlja kaj o Jehova sekova dive ka sikavel leske plo mangipe. Soske sine doborom uverimo ko adava?

13. Soske o David sine sigurno kaj o Jehova ka grižinel pe leske?

¹³ „Ništo nane te falinel mange“. O David osetinela sine e Jehovaskiri griža soske ov sekogaš dela le sine adava so valjani leske. O David isto agjaar džanela sine kaj o Jehova dikhela le sine sar leskoro amal hem kaj odobrinela le. Adaleske sine sigurno kaj bizi razlika so ka slučinel pe leske ki idnina, o Jehova ponadari da ka grižinel pe bašo leskere potrebe. Adava so e Davide sine le doverba kaj o Jehova mangela le hem grižinela pe leske, pomožingja leske te na sekirinel pe hem te ovel radosno hem zadovolno (Ps. 16:11).

14. Sar šaj o Jehova mangipaja te grižinel pe amenge?

¹⁴ O Jehova ljubezno grižinela pe amenge, posebno keda slučinela pe amenge nešto lošno ko životo. I Kler a, koja so služingja poviše taro 20 berš ko Betel, na džanlja sar te pomožinel ple familijake keda taro jekh puti sine len poviše problemija. Lakere dade sine le mozočen udar, jekh taro lakere phenja sine isklučimi, isto agjaar našavgje pumaro tikno biznis hem pumaro kher. Sar o Jehova sikavgja kaj ljubezno grižinela pe lenge? I Kler vakerela: „O Jehova grižingja pe mle familijake agjaar so sekova dive dobingje adava so valjani lenge. But puti dengja  len čak poviše taro adava so valjani lenge. Često razmislinava bašo adava sar o Jehova grižingja pe amenge hem nikogaš nane te bistrav o mangipe so sikavgja le amenge. Adava pomožingja mange ponadari da radosno te služinav e Jehovaske keda sine man javera da problemija ko mlo životo“.

15. Soske o David šaj sine te iranel pli sila? (Dikh hem i slika.)

¹⁵ „Ov dela man nevi sila“. Ponekogaš, o David osetinela pe sine voznemirimo taro sa o problemija hem nevolje so sine le (Ps. 18:4-6). Sepak, mangipe hem i griža taro Jehova dengja le nevi sila. O Jehova ingargja ple umorno amale „ko than kote so isi but čar“ hem „ko thana kote so isi but pani“. Adava pomožingja e Davideske te dobinel nevi sila hem ponadari da te služinel e Jehovaske (Ps. 18:28-32).

16. Sar e Jehovaskoro mangipe dela tut sila?

¹⁶ Slično, e Jehovaskoro verno mangipe šaj amenge da te pomožinel te ikljova ko krajo e nevoljencar so isi amen (Plač 3:22; Kol. 1:11). Razmislin baši phen Rejčel. Oj sine phagi tari dukh keda lakoro rom mukhlja la hem e Jehova džikote sine i pandemija KOVID-19. Sar pomožingja lake o Jehova? Oj vakerela: „O Jehova kergja te osetinav man mangli. Ov dengja man amala kola so nakhavgje vreme mancar, angje mange hajbe, bičhalgje mange porake hem ohrabruvačka stihija, asana sine mancar hem sekogaš potsetinena man sine kaj o Jehova grižinela pe mange. But sium blagodarno e Jehovaske so dengja man asavki bari duhovno familija“.

17. Soske o David na darala sine taro lošnipe?

¹⁷ „Na darava taro lošnipe, soske tu sian mancar“. E Davideskoro životo but puti sine ki opasnost hem le sine le but mokjna dušmanja. Sepak, adaleske so džanlja kaj o Jehova mangela le, ov osetingja pe sigurno hem zaštitimo. O David šaj sine ki sekoja situacija te osetinel kaj o Jehova sine lea hem kaj ohrabrinela le. Adaleske ki gili vakergja: „Taro sa so darava [o Jehova] oslobodingja man“ (Ps. 34:4). Iako ponekogaš darala sine, o David šaj sine te pobedinel adaja dar soske džanela sine kaj e Jehovaskoro mangipe sine but posilno tari leskiri dar.

18. Sar adava so džanaja kaj o Jehova mangela amen dela amen sila keda arakhljovaja ko strašna situacie?

¹⁸ Sar adava so džanaja kaj o Jehova mangela amen dela amen sila keda arakhljovaja ko  strašna situacie? Jekh pionerka so vikinela pe Suzi opišinela sar oj hem lakoro rom osetingje pe keda lengoro čhavo mudargja pe. Oj vakerela: „Keda doživinaja nesavi tragedija, adava šaj but te vlijajnel upri amende hem osetinaja amen sar te phene amare vasta tane phanle, našti ništo te kera. Ama e Jehovaskoro sočuvstvo kergja te osetina amen bezbedna hem zaštitime“. I Rejčel kola so spomningjem angleder vakerela: „Jekh rat keda sium sine but tažno hem but sekirimi, ko glaso hem rovindor molingjum man e Jehovaske. Odma palo adava osetingjum sar o Jehova utešingja man hem smiringja man, isto sar jekh daj so kerela adava pe bebeske, hem tegani zasukjum. Nikogaš nane te bistrav adava momenti“. Jekh starešina so vikinela pe Tasos sine phanlo štar berš adaleske so odbingja te džal ki vojska. Sar dikhlja e Jehovaskoro mangipe hem griža? Ov vakerela: „O Jehova grižingja pe te dobinav sa so valjani mange, pa čak poviše taro adava. Adava panda poviše uveringja man kaj šaj te ovel man celosno doverba ki leste. Isto agjaar, preku leskiri sila o Jehova kergja te ačhovav radosno iako o zatvor sine but depresivno than. Haliljum kaj kobor popaše sorabotinava lea, doborom poviše ka ovel man korist taro leskoro šukaripe, adaleske počmingjum te služinav sar opšto pioneri ko zatvor“.

AČHOV PAŠE TLE SOČUVSTVITELNO DEVLEA

19. a) Sar adava so džanaja kaj o Devel mangela amen vlijajnela upro adava so ka vakera ko amare molitve? b) Kova stiho so kerela lafi bašo e Devleskoro mangipe najviše značinela tuke? (Dikh i ramka „ Stihija kola so pomožinena amenge te osetinea e Jehovaskoro mangipe“).

¹⁹ O iskustvija so dikhlem len dži akana dokažinena kaj o Jehova, „o Devel e mangipaskoro“, tano amencar (2. Kor. 13:11). Ov grižinela pe sekole jekheske lično! Uverime siem kaj siem opkolime taro leskoro verno mangipe (Ps. 32:10). Kobor poviše razmislinaja bašo adava sar ov sikavgja amenge plo mangipe, doborom porealno ovela amenge hem ovaja sa popaše lea. Šaj ko sekova momenti te molina amen leske hem te vakera leske kobor amenge potrebno leskoro mangipe. Šaj te vakera leske sa so mučinela amen soske siem uverime kaj haljola amen hem kaj but mangela te pomožinel amenge (Ps. 145:18, 19).

20. Sar e Jehovaskoro mangipe kerela te ova popaše lea?

²⁰ Isto sar so privlečinela amen i jag ko jekh šudro dive, agjaar privlečinela amen e Jehovaskoro mangipe. Adaleske, te prifatina e Jehovaskoro mangipe kova so dela amen uteha hem mir hem amen da te vakera leske: „Mangava tut, Jehova!“ (Ps. 18:1).