1-2. Save pharipa šaj te oven e Jehovaskere verna slugen?

 KEDA doživinaja nesavi tragedija adava šaj taro jekh puti te meninel celo amaro životo. Na primer, jekh verno phral so vikinela pe Luis a otkringja kaj tano nasvalo tari jekh opasno vrsta rako. O doktori vakergja leske kaj ka živinel samo panda nekobor masekija. I Monika hem lakoro rom sine zafatime duhovno aktivnostencar. Palo nesavo vreme oj doznajngja kaj lakoro rom, kova so služinela sine sar starešina, više beršencar živinela dvojno životo. I Olivija, jekh phen koja so nane ženimi, mora sine te mukhel po kher adaleske so avela sine jekh strašno uragani. Keda irangja pe, oj dikhlja kaj o uragani uništingja lakoro kher. O životo akale trine objavitelengoro taro jekh puti meningja pe. Dali tu da doživingjan nešto doborom strašno?

² Iako verno služinaja e Jehovaske, amen da doživinaja pharipa hem nasvaljovaja, isto sar sa o javera manuša. Osven adava, šaj ka valjani te doživina protivibe ili progonstvo okolendar so mrzinena e Devleskere narodo. Iako o Jehova na zaštitinela amen taro akala pharipa, ama ov vetinela kaj ka pomožinel amenge (Isa. 41:10). Keda ov pomožinela amen, šaj te ačhova radosna, te ana šukar odluke hem te ačhova leske verna čak keda nakhaja taro najphare situacie. Ki akaja statija ka dikha štar načinija sar o Jehova pomožinela amenge keda nakhaja taro najphare dive ko amaro životo. Isto agjaar ka dikha so valjani te kera te šaj te ovel amen korist tari pomoš so dela amen.

O JEHOVA KA ARAKHEL TUT

3. Keda doživinaja nesavi tragedija, so šaj te ovel amenge pharo te kera?

³ O problemi so doživinaja. Keda doživinaja nesavi tragedija šaj te ovel pharo jasno te razmislina hem te ana odluke.  Soske? Šaj adaleske so amari duša andral dukhala amen. Šaj isi amen doborom sekiracie so samo ki lende te mislina. Šaj osetinaja amen sar te phene phiraja ki magla hem na džanaja koja strana te dža. Primetin sar osetingje pe o duj phenja kolen so spomningjem len angleder keda sine len pharipa. I Olivija vakerela: „Keda o uragani uništingja mlo kher nadžanava sine više so te kerav. O sekiracie lele mli sila“. I Monika, kolakoro rom izneveringja la vakerela: „Našti te vakerav kobor sium sine razočarimi. Sar te phene nekoj khuvgja man čhurikaja. Našti sine više normalno te funkcionirinav. Nikogaš na mislingjum kaj ka doživinav nešto asavko“. O Jehova vetinela kaj ka pomožinel amen. Sar?

4. Sprema Filipjanja 4:6, 7, so vetinela amenge o Jehova?

⁴ Sar pomožinela amenge o Jehova. Ov vetinela amenge kaj ka del amen plo mir. (Čitin Filipjanja 4:6, 7.) Keda isi amen mir taro Devel, tegani amare misle hem amaro vilo tane rahati hem osetinaja amen smirime adaleske so siem paše amala lea. Akava mir tano „upreder sekoja misla“. Akava čuvstvo tano but pošukar nego adava so šaj amen te mislina amenge. Dali slučingja pe tuke nekogaš taro jekh puti te osetine tut smirimo otkeda taro vilo molingjan tut e Jehovaske? Asavko čuvstvo ustvari tano o mir taro Devel.

5. Sar o mir taro Devel arakhela amare misle hem amaro vilo?

⁵ Ko Filipjanja 4:7 isto agjaar pišinela kaj o mir taro Devel „ka arakhel“ ili ka zaštitinel tumare vile hem tumare misle. O lafi soj prevedimo sar „ka arakhel“ ki grčko čhib koristinela pe sine sar voeno izraz hem lea opišinela pe sine jekh grupa vojnikija kola so zaštitinena jekh diz hem ikerena la sine bezbedno taro napadija. O manuša tari adaja diz šaj sine mirno te soven soske džanena sine kaj o vojnikija tergjona anglo porte. Slično, keda o mir taro Devel arakhela amare vile hem amare misle, tegani siem smirime soske džanaja kaj siem zaštitime (Ps. 4:8). Isto sar ko slučaj e Anakoro, čak ako amari situacija na meninela pe odma, sepak amen šaj dži negde te osetina amen smirime (1. Sam. 1:16-18). A keda siem smirime, but puti tano amenge polokho te razmislina jasno hem te ana mudra odluke.

6. So šaj te kera te šaj te ovel amen korist taro e Devleskoro mir? (Dikh hem i slika.)

⁶ So valjani amen te kera. Keda sian smirimo vikin e „čuvare“ ki nesavi smisla. Sar? Agjaar so ka moline tut sa džikote na osetinea o mir taro Devel (Luka 11:9; 1. Sol. 5:17). O Luis kole so spomningjem le angleder objasninela so pomožingja leske hem  leskere romnjake, e Anake, keda doznajngje kaj ka živinel samo panda nekobor masekija. Ov vakergja: „Ko asavke momentija but tano pharo te ane odluke bašo tlo sastipe hem bašo javera bukja, ama ko akava pharo vreme šaj sine te ovel amen mir samo adaleske so molingjem amen“. O Luis hem leskiri romni vakergje kaj ola redovno hem taro vilo molingje pe te roden taro Jehova andruno mir hem mudrost te šaj te anen šukar odluke. Hem ov čače pomožingja lenge. Ako nakhea taro pharo periodi, ma čhinav te moline tut hem ka osetine sar e Jehovaskoro mir arakhela tlo vilo hem tle misle (Rim. 12:12).

O JEHOVA KA POMOŽINEL TUKE TE AČHOVE STABILNO

7. Sar šaj te osetina amen keda nakhaja tari nesavi phari nevolja?

⁷ O problemi so doživinaja. Keda nakhaja tari nesavi phari situacija amare čuvstvija, misle ili postapke šaj nane te oven o ista. Isto sar jekh brodi so šaj te ovel frdimo taro branija tari jekh strana ki javer strana, agjaar amende da o silna čuvstvija šaj te frden amen tari jekh strana ki javer. I Ana, kola so spomningjem la angleder, vakerela kaj otkeda mulo lakoro rom o Luis oj našti sine te kontrolirinel ple čuvstvija. Oj vakergja: „Ponekogaš perava ki depresija hem počminava korkori te žalinav man. Isto agjaar, ponekogaš sium sine holjami so ov više na sine uzi mande“. Osven adava, i Ana osetinela pe sine osameno hem nervozno keda valjani sine te anel odluke bašo bukja kolenge so o Luis but šukar grižinela pe sine. Ponekogaš osetinela pe sine sar ka phene sine maškar jekh bari bura ko more. Sar pomožinela amenge o Jehova keda ka počminen te poplavinen amen asavke emocie?

8. Sprema Isaija 33:6, ko so uverinela amen o Jehova?

⁸ Sar pomožinela amenge o Jehova. Ov uverinela amen kaj ka pomožinel amenge te ačhova stabilna. (Čitin Isaija 33:6.) Keda jekh brodi arakhljola ki nesavi bura, adava šaj te ovel opasno soske šaj te prevrtinel pe. Te šaj te na slučinel pe adava, ko but brodija čhivena pe stabilizatorija taro solduj strane e brodeskere telo pani. Asavke stabilizatorija šaj te pomožinen e brodeske te na mrdinel but hem agjaar o manuša soj ki leste te osetinen pe bezbedna hem te uživinen džikote patujnena. Ama but taro adala stabilizatorija najšukar funkcionirinena samo tegani keda o brodi dvižinela pe angle. Slično, o Jehova ka pomožinel amenge te ačhova stabilna ako ponadari da verno služinaja leske čak keda nakhaja taro phare situacie.

9. Sar pomožinena amen o alatke istražibaske te ova uramnotežena? (Dikh hem i slika.)

 ⁹ So valjani amen te kera. Keda ka arakhljove ki bura taro negativna čuvstvija, de tutar sa ponadari da te moline tut, te dža ko sostanokija hem te dža ki služba. Džangjola pe, šaj nane te ovel tut dovolno sila te kere doborom sar so kerea sine angleder, ama ma bistre kaj o Jehova na očekujnela amendar te kera poviše taro adava so šaj te kera. (Sporedin Luka 21:1-4.) Isto agjaar, odvojn tuke vreme lično te proučine hem hor te razmisline bašo adava so proučinea. Soske? O Jehova preku pli organizacija dela amen statie hem videoklipija kola so šaj te pomožinen amenge te ačhova stabilna. Te šaj te arakhe adava so valjani tuke šaj te koristine o alatke istražibaske so isi ki tli čhib, sar na primer i aplikacija JW Li­brary^® hem o Priračniko istražibaske e Jehovaskere svedokongoro. I Monika kola so spomningjem la angleder vakergja kaj samo so ka počminel te osetinel pe lošno, oj odma rodela sovet ko akala alatke istražibaske. Na primer oj rodela sine ki tema „holi“. Ko javera prilike rodela sine ki tema „neverstvo“ ili „vernost“. Palo adava čitinela sine o materijali sa džikote na osetinela pe sine pošukar. Oj vakergja: „Keda počminava sine te istražinav, osetinava man sine voznemirimi. Ama sar so čitinava sine osetinava man sine sar ka phene o Jehova nežno gušinela man. Isto agjaar, haliljum kaj o Jehova haljovela man sine bizi razlika sar ka osetinav man hem ov pomožinela mange sine“. Asavki poddrška taro Jehova šaj isto agjaar te pomožinel tuke te kontrolirine sa tle čuvstvija sa džikote na osetinea andruno mir (Ps. 119:143, 144).

O JEHOVA KA PODDRŽINEL TUT

10. Sar šaj te osetina amen pali nesavi tragedija?

¹⁰ O problemi so doživinaja. Otkeda ka doživina nesavi tragedija, šaj ka oven dive keda ka osetina amen fizički ili emocionalno ko krajo e silencar. Šaj osetinaja amen sar jekh povredimo sportisti kova so jekh vreme prastala sine sigate a akana langala džikote phirela. Šaj akana edvaj keraja adala bukja kola so angleder but lokhe keraja len sine, ili šaj nane amen bari volja te kera nešto ko so angleder but uživinaja sine. Isto sar o Ilija šaj amenge but pharo te ušta. Šaj samo mangaja te sova (1. Car. 19:5-7). So vetinela amenge o Jehova kaj ka kerel keda osetinaja amen but slaba?

11. Ko savo javer način pomožinela amenge o Jehova? (Psalm 94:18).

¹¹ Sar pomožinela amenge o Jehova. Ov  vetinela kaj ka poddržinel amen. (Čitin Psalm 94:18.) Isto sar so jekhe povredime sportisteske valjani pomoš te šaj te dvižinel pe, šaj amenge da ka valjani pomoš te šaj te ačhova aktivna ki služba bašo Jehova. Ko asavke momentija o Jehova uverinela amen: „Me, o Jehova, tlo Devel, ikerava tut taro tlo desno vas hem vakerava tuke: ’Ma dara! Me ka pomožinav tuke‘“ (Isa. 41:13). O cari o David osetingja asavki pomoš. Keda sine le nevolje hem problemija dušmanencar, ov vakergja e Jehovaske: „Tlo desno vas poddržinela man“ (Ps. 18:35). Ama, sar poddržinela amen o Jehova?

12. Preku kaste o Jehova šaj te pomožinel amenge keda siem slaba?

¹² O Jehova but puti poddržinela amen agjaar so pottikninela e javeren te pomožinen amenge. Na primer, keda o David ki jekh prilika osetingja pe emocionalno slabo, leskoro amal o Jonatan posetingja le te šaj te zajakninel le hem te ohrabrinel le (1. Sam. 23:16, 17). Slično, o Jehova biringja e Elisee te šaj praktično te pomožinel e Ilijaske (1. Car. 19:16, 21; 2. Car. 2:2). Avdive, o Jehova šaj te del amen i poddrška so valjani amenge preku amari familija, amala ili starešine. Sepak, keda isi amen nesavi emocionalno dukh, šaj mangaja te cida amen e javerendar hem te ačhova korkori. Adaja tani normalno reakcija. So šaj te kera te šaj te dobina e Jehovaskiri poddrška?

13. So šaj te kera te šaj te ovel amen korist tari e Jehovaskiri poddrška? (Dikh hem i slika.)

¹³ So valjani amen te kera. Borin tut protiv i želba te izolirine tut. Keda cidaja amen e javerendar, šaj te počmina te mislina samo ki amende hem ko problemija so isi amen. Asavko razmisluvanje šaj te vlijajnel upro odluke so anaja len (Izr. 18:1). Džangjola pe, sarinen amen ponekogaš isi amen potreba te ova korkori, posebno keda doživinaja nesavi tragedija. Ama ako izolirinaja amen poviše vreme, tegani šaj te otfrlina i pomoš taro manuša kolen so o Jehova koristinela te šaj te pomožinel amenge. Adaleske, kobor hem te ovel tuke pharo ko asavke momentija, prifatin i pomoš tari tli familija, taro amala hem taro starešine. Dikh ki lende sar nekaste so o Jehova koristinela te šaj te pomožinel tuke (Izr. 17:17; Isa. 32:1, 2).

O JEHOVA KA UTEŠINEL TUT

14. Kola situacie šaj te daraven amen?

¹⁴ O problemi so doživinaja. Šaj nakhaja taro situacie kolendar so daraja. Ki Biblija  čitinaja bašo verna sluge e Devleskere kola so vakergje kaj nakhena taro phare situacie hem kaj darandile taro pumare dušmanja ili javera pritisokija (Ps. 18:4; 55:1, 5). Slično, amen da šaj isi amen protivibe ki škola, ki buti, tari amari familija ili taro vlastija. Šaj čak daraja kaj ka mera adaleske so siem but nasvale. Ko asavke situacie šaj osetinaja amen slabo sar jekh tikno čhavo. Sar pomožinela amen o Jehova ko asavke momentija?

15. So ka kerel amenge o Jehova sprema Psalm 94:19?

¹⁵ Sar pomožinela amenge o Jehova Ov utešinela amen hem smirinela amen. (Čitin Psalm 94:19.) Keda čitinaja akava Psalm šaj mislinaja ki jekh tikni čhaj koja so darala hem našti te sovel adaleske so avrijal grminela. Šaj te zamislina amenge sar lakoro dad avela, lela la ki angali hem ikerela la sa džikote na zasovela. Iako avri isi panda nevreme hem grminela, ama oj akana osetinela pe sigurno ki ple dadeskiri angali. Keda amen doživinaja nesave phare situacie tegani valjani amenge amaro nebesno Dad te lel amen ko jekh simbolično način ki pli angali sa džikote na smirinaja amen. Sar šaj te dobina asavki uteha taro Devel?

16. So šaj te kera te šaj te ovel amen korist tari e Jehovaskiri uteha? (Dikh hem i slika.)

¹⁶ So valjani amen te kera? Redovno odvojn tuke vreme te šaj te ove e Jehovaja agjaar so ka moline tut hem ka čitine leskoro Lafi (Ps. 77:1, 12-14). Ako isi tut asavki navika, tegani najverojatno o prvo nešto so ka kere keda ka ovel tut stres tano te rode pomoš taro tlo nebesno Dad. Vaker e Jehovaske sostar daraja hem bašo so sekirinea tut. Dozvolin leske preku i Biblija te kerel tuja lafi hem te utešinel tut (Ps. 119:28). Nesave delija tari Biblija posebno šaj te utešinen tut keda daraja. Na primer, šaj te dobine ohrabruvanje taro lila Jov, Psalmija hem Izreki hem isto agjaar taro e Isuseskere lafija soj pišime ko 6-to poglavje taro Matej. Džikote molinea tut e Jehovaske hem čitinea leskoro Lafi ka osetine sar ov utešinela tut.

17. Ko so šaj te ova uverime?

¹⁷ Šaj te ova uverime kaj o Jehova sekogaš ka ovel amencar, čak ko najphare dive taro amaro životo. Amen nikogaš nane te ova korkori (Ps. 23:4; 94:14). O Jehova vetinela kaj ka arakhel amen, ka pomožinel amen te ačhova stabilna, ka poddržinel amen hem ka utešinel amen. Ko Isaija 26:3 bašo Jehova pišinela: „Tu ka spasine okolen so celosno potprinena pe ki tute. Ka de len trajno mir soske isi len doverba ki tute“. Adaleske, neka ovel tut doverba ko Jehova hem ker sa so šaj te ovel tut korist tari leskiri pomoš. Ako kerea adava ka dobine neve sile, čak ko phare vremija.