1. Sar adava so ka dikha o Psalm 15:1-5 ka koristinel amenge?

 KI ANGLUNI statija dikhlem kaj okola so dena lafi e Jehovaske kaj ka služinen leske hem trudinena pe te oven paše amala lea, šaj te oven gostija ko leskoro simbolično šatori. Ama so valjani te kera te šaj te ovel amen asavko paše amalipe lea? O 15-to Psalm kerela lafi baši akaja tema. (Čitin Psalm 15:1-5.) Ko akava Psalm pišinela so mora te kera te šaj te ova paše amala e Devlea.

2. Ko so šaj mislingja o David keda spomningja e Jehovaskoro šatori?

² O 15-to Psalm počminela akale pučibancar: „Jehova, koj ka ovel gosto ko tlo šatori? Koj ka živinel ki tli sveto gora?“ (Ps. 15:1). Keda o David spomningja e Devleskoro „šatori“, ov šaj mislingja ko sveto šatori kova so nesavo vreme arakhljola sine ko Gavaon. A keda spomningja e Devleskiri „sveto gora“, šaj mislingja ko Sion ko Erusalim. Adari, nekobor kilometre južno taro Gavaon, o David kergja jekh šatori hem ki leste čhivgja o kovčeg e sojuzeskoro, kote so ačhilo sa džikote na gradingja pe o hrami (2. Sam. 6:17).

3. Soske mangaja te haljova o 15-to Psalm? (Dikh hem i slika.)

³ Džangjola pe, pobaro delo taro Izraelcija na služingje ko sveto šatori hem samo nekobor džene khuvgje ki leste, kote so sine o kovčeg e sojuzeskoro. Ama sa e Jehovaskere verna sluge šaj te oven gostija ko leskoro simbolično šatori, agjaar so ka oven hem ka ačhoven leskere amala. Asavko nešto sarine amen mangaja. Ko 15-to Psalm tane spomnime nesave osobine so valjani te razvina len hem te sikava len te šaj te ačhova e Jehovaskere amala.

 SEKOGAŠ ŠUN E DEVLE HEM POSTAPIN PRAVEDNO

4. Kotar džanaja kaj o Jehova na rodela amendar samo te krstina amen? (Isaija 48:1).

⁴ Ko Psalm 15:2 pišinela kaj okova soj amal e Jehovaskoro, „šunela sekogaš e Devle“ hem „postapinela pravedno“. O lafija „šunela sekogaš e Devle“, šaj te prevedinen pe hem sar „živinela bizi maana“. Ama dali šaj čače te ova bizi maana? Oja. Iako nijekh manuš nane sovršeno, sepak o Jehova ka dikhel ki amende sar te phene siem „bizi maana“ ako daja amendar sa te ova leske poslušna. Keda dengjem lafi e Jehovaske kaj ka služina leske celo životo hem keda krstingjem amen, adava sine samo početok taro amaro amalipe e Devlea. Na primer, ko biblisko vreme, samo adaleske so nekoj sine Izraelco, na značinela sine avtomatski kaj šaj te ovel gosto e Jehovaskoro. Nesave spomninena sine e Jehovaskoro anav, ama na „čačipaja hem pravdaja“. (Čitin Isaija 48:1.) Te šaj te sikaven kaj čače mangena te oven e Jehovaskere gostija, o Izraelcija valjani sine te džanen so rodela o Jehova lendar hem te postapinen sprema adava. Slično, te šaj amen avdive te ova paše amala e Jehovaja, nane dovolno samo te krstina amen hem te phirava o anav e Jehovaskere svedokija. Valjani nešto poviše. Mora ponadari da te postapina pravedno. Sar šaj te kera adava?

5. So značinela te ova poslušna e Jehovaske ko sa?

⁵ Te šaj o Jehova te vakerel nekaske kaj šunela le sekogaš hem postapinela pravedno, ov valjani te kerel nešto poviše nego samo te džal ko sostanokija hem te učestvujnel ki lende (1. Sam. 15:22). Mora te da amendar sa te šaj te ova poslušna ki sekoja buti so keraja la, čak keda siem korkori (Izr. 3:6; Prop. 12:13, 14). Važno tano te trudina amen te ova poslušna e Jehovaske čak ko bukja kola so šaj na dikhjona doborom važna. Agjaar, ka sikava kaj čače mangaja le hem adava ka kerel  te mangel amen poviše (Jovan 14:23; 1. Jov. 5:3).

6. Sprema Evreija 6:10-12, soj tano but považno tari bilo koja šukar buti so kergjem la angleder?

⁶ O Jehova but ceninela o bukja so kergjem leske angleder. Sepak, na značinela kaj ka ačhova gostija ko e Jehovaskoro šatori samo adaleske so kergjem šukar bukja angleder. Akava jasno dikhela pe taro lafija soj pišime ko Evreija 6:10-12. (Čitin.) O Jehova na bistrela o šukar bukja so kergjem len angleder, ama ov mangela te prodolžina te služina leske celo vilea „sa dži ko krajo“. O Jehova ka ovel zasekogaš amaro amal „ako na umorinaja amen“ (Gal. 6:9).

VAKER O ČAČIPE KO TLO VILO

7. So značinela te vakera o čačipe ko amaro vilo?

⁷ Okova so mangela te ovel gosto ko e Jehovaskoro šatori, mora te vakerel „o čačipe ko plo vilo“ (Ps. 15:2). Akava na značinela samo te na hovava. O Jehova mangela te ova česna ko sa so vakeraja hem keraja (Evr. 13:18). Akava tano važno „soske, e Jehovaske tane odvratna o nečesna manuša, a paše amal tano okolencar soj tane česna“ (Izr. 3:32).

8. Taro so valjani te pazina amen?

⁸ Okola so vakerena o čačipe ko pumaro vilo, na kerena pe kaj šunena e Devle keda tane anglo javera, a palo adava keda tane korkori kerena lošna bukja (Isa. 29:13). Ola na postapinena nečesno. Okova soj rumimo, ili nečesno, šaj te počminel te sumninel pe kaj nesave taro e Jehovaskere zakonija nane baš mudra (Jak. 1:5-8). Ov šaj te ovel neposlušno e Jehovaske ko bukja kolenge so mislinela kaj nane doborom važna. Palo adava, ako izgledinela kaj nane nesave lošna posledice tari leskiri neposlušnost, ov šaj te počminel te kerel panda pološna bukja. Iako ov šaj te mislinel peske kaj služinela e Jehovaske, o Jehova ka dikhel ki leste sar licemerno (Prop. 8:11). Ama, amen mangaja te ova česna ko sa.

9. So slučingja pe keda o Isus hem o Natanael prvo puti dikhle pe, hem so sikljovaja taro adava? (Dikh hem i slika.)

⁹ Šaj but te sikljova bašo adava kobor tano važno te ova iskrena ko vilo, tari situacija  keda o Isus prvo puti dikhlja pe e Natanaelea. Keda o Filip angja ple amale e Natanaele te zapoznajnel pe e Isusea, slučingja pe nešto but interesno. Iako o Isus angleder nikogaš na dikhlja e Natanaele, ov vakergja: „Ake pravo Izraelco kaste so nane hovajbe“ (Jovan 1:47). O Isus džanlja kaj leskere javera da učenikija sine iskrena, ama o Natanael sine posebno iskreno. Iako sine nesovršeno sar amende, o Natanael na sine licemerno nego sine česno ko sa. O Isus sine vooduševimo lestar hem pofalingja le bašo adava. Kobor bari čest tani o Isus amenge da te mislinel agjaar!

10. Soske valjani te pazina so keraja lafi? (Jakov 1:26).

¹⁰ Ko 15-to Psalm tane pišime bukja so rodena pe amendar te kera, a tane povrzime adalea sar ponašinaja amen e javerencar. Ko Psalm 15:3 pišinela kaj okova soj gosto ko e Jehovaskoro šatori „na vakerela iftire ple čhibjaja, na kerela nisavo lošnipe ple paše amaleske hem na ladžakerela ple amale“. Ako vakeraja hovajba bašo javera hem adalea kaljaraja lengoro anav, adava šaj but te dukhavel len hem agjaar ka našti više te ova gostija ko e Jehovaskoro šatori. (Čitin Jakov 1:26.)

11. So kerela pe okolencar so kaljarena e javerengoro anav hem na kainena pe bašo adava?

¹¹ O psalmisti konkretno kerela lafi baši nekaste so kaljarela e javerengoro anav adalea so vakerela hovajba baši lende. Okola so kaljarena e javerengoro anav agjaar so vakerena hovajba baši lende hem na kainena pe bašo adava, ka oven isklučime taro hristijansko sobranie (Erem. 17:10).

12-13. Ko kola situacie bizo te manga šaj te ladžakera amare amalen? (Dikh hem i slika.)

¹² Ko Psalm 15:3 isto agjaar pišinela kaj okova soj e Jehovaskoro gosto na kerela nisavo lošnipe ple paše amaleske hem na ladžakerela ple amalen. Sar šaj te ladžakera amare amalen?

 ¹³ Amen šaj bizo te manga te ladžakera nekas agjaar so ka širina negativna informacie baši leste. Razmislin bašo akala situacie: 1) jekh phen čhinavela e pionersko službaja, 2) jekh bračno pari na služinela više ko Betel hem 3) jekh phral na služinela više sar starešina ili sar sluga-pomošniko. Nane te ovel šukar te vakera e javerenge kaj akala phralja hem phenja šaj kergje nešto pogrešno hem adaleske našti te ovel len adaja zadača. Šaj isi poviše pričine soske alo dži ko adala promene bašo kola amen ni na siem svesna. Okova soj gosto ko e Jehovaskoro šatori „na kerela nisavo lošnipe ple paše amaleske hem na ladžakerela ple amale“.

SIKAV ČEST OKOLENGE SO DARANA TARO JEHOVA

14. So značinela te cida amen taro adala so zaslužinena omraza?

¹⁴ Ko Psalm 15:4 pišinela kaj e Jehovaskoro amal „cidela pe sekastar kova so zaslužinela te mrzinen le“. Kotar šaj te džana koj zaslužinela omraza? Amen našti te vakera dali nekoj zaslužinela omraza sprema amaro mislenje hem sprema amare želbe. Soske? Amen siem nesovršena hem adaleske nesave manuša šaj te svidžinen pe amenge bašo lengere osobine a javera te na svidžinen pe amenge soske nervirinena amen. Adaleske, amen valjani te cida amen samo taro okola kolenge so o Jehova vakerela kaj zaslužinena omraza (1. Kor. 5:11). Ko adala tane vklučime okola so kerena lošna bukja a na kainena pe, okola so na poštujnena amare veruvanja hem so probinena te uništinen amaro amalipe e Jehovaja (Izr. 13:20).

15. Kova tano jekh način sar šaj te sikava čest okolenge so darana taro Jehova?

¹⁵ Tari javer strana, ko Psalm 15:4 pišinela kaj valjani te sikava čest okolenge so darana taro Jehova. Adaleske amen rodaja načinija te sikava mangipe hem poštovanje e Jehovaskere amalenge (Rim. 12:10). Sar? Sprema Psalm 15:4, okova soj tano gosto ko e Jehovaskoro šatori kerela adava agjaar so „na meninela plo vetuvanje, čak keda adava tano leske ki šteta“. Ako na ikeraja amen ko amare vetuvanja ka povredina e javeren (Mat. 5:37). Na primer, o Jehova očekujnela taro ple gostija te ikeren pe ko plo bračno zavet. Ov isto agjaar radujnela pe keda o roditelija trudinena pe te ikeren pe ko vetuvanja so dengje len pumare čhavenge. O mangipe sprema o Devel hem sprema o pašutno ka pottikninel amen te da amendar sa te ikera amen ko amare vetuvanja.

16. Ko savo javer način sikavaja čest e Jehovaskere amalenge?

¹⁶ Javer način sar sikavaja čest e Devleskere amalenge tano agjaar so siem gostoprimliva hem darežliva (Rim. 12:13). Keda nakhaja vreme e phralencar hem e phenjencar ko javera da prilike na samo ko sostanokija hem ki služba, tegani ovaja popaše lencar hem e Jehovaja. Osven adava keda siem gostoprimliva džaja palo e Jehovaskoro primer.

MA MANG O PARE

17. Soske ko 15-to Psalm tane spomnime o pare?

¹⁷ Ko Psalm 15:5 pišinela kaj okova soj e Jehovaskoro gosto „na dela ple pare kamataja hem na lela mito protiv okova so nane krivo“. Soske ko akava Psalm tane spomnime o pare? Adaleske so ako mangaja o pare, ola šaj te oven amenge považna taro manuša, pa čak taro Devel (1. Tim. 6:10). Ko biblisko vreme, nesave koristinena sine pumare čorole phralen agjaar so lena lendar sine kamata bašo pare so dena len sine ki veresija. Isto agjaar, nesave sudie lena sine mito hem palo adava nepravedno sudinena  sine okolenge so nane kriva. Asavke postapke tane odvratna e Jehovaske (Ezek. 22:12).

18. Kola pučiba šaj te pomožinen amenge te dikha savo stavi isi amen bašo pare? (Evreija 13:5).

¹⁸ Šukar tano te ispitina amen te šaj te dikha savo stavi isi amen bašo pare. Puč tut: „Dali često razmislinava bašo pare hem bašo adava so šaj te kinav lencar? Ako lava nekastar pare, dali adžikerava but vreme te nakhel džikote iranava len mislindor kaj na valjanena okoleske so dengja len mange? Dali adava so isi man pare kerela te osetinav man považno taro javera? Dali mange pharo te ovav darežlivo? Dali mislinava kaj nesavo phral ili phen tane materijalistija samo adaleske so isi len pare? Dali mangava te ovav amal samo okolencar soj barvale, a na mangava te družinav man okolencar soj čorole?“ Važno tano te puča amen akala pučiba soske isi amen i but šuži čest te ova e Jehovaskere gostija. Ama šaj te ačhova e Jehovaskere gostija samo ako siem sigurna kaj nane amen mangipe bašo pare. Ako tano agjaar tegani o Jehova nikogaš nane te mukhel amen. (Čitin Evreija 13:5.)

O JEHOVA MANGELA PLE AMALEN

19. Soske o Jehova mangela te kera o bukja soj spomnime ko 15-to Psalm?

¹⁹ Ko 15-to Psalm ko krajo isi akava vetuvanje: „Koj kerela akava, nikogaš nane te perel“ (Ps. 15:5). Akate o psalmisti otkrinela amenge soske o Jehova mangela te kera sa adala bukja soj tane pišime ko akava psalm. O Jehova mangela amen te ova srekjna. Adaleske, ako keraja adava so o Jehova rodela amendar ka ovel amen pošukar životo hem ov ka arakhel amen (Isa. 48:17).

20. So šaj te očekujnen e Jehovaskere gostija?

²⁰ E Jehovaskere gostija šaj te očekujnen kaj ka ovel len but šuži idnina. O verna pomazanikija ka živinen ko nebo kote so o Isus spremingja lenge than (Jovan 14:2). Okolen so isi len nadež te živinen ki phuv, edvaj adžikerena te ispolninen pe o vetuvanja taro Otkrovenie 21:3. Sarinenge amenge tani bari čest so o Jehova kaningja amen te ova leskere amala hem zasekogaš te ova gostija ko leskoro šatori!