1. So pomožinela e Jehovaskere slugenge ponadari da te služinen leske iako isi len problemija?

 KI BIBLIJA pišinela kaj avdive živinaja ko „but pharo vreme“ (2. Tim. 3:1). E Jehovaskere slugen isi len o ista problemija sar sa e javeren ko akava lošno sveto kolea so vladinela o Satana. Ama, amen isto agjaar isi amen protivibe hem progonstvo. So pomožinela amenge ponadari da te služina e Jehovaske iako isi amen asavke problemija? Jekh glavno pričina tani adaja so osetingjem sar o Jehova pomožinela amenge hem adava so džanaja kaj „ov tano dživdo Devel“ (Erem. 10:10; 2. Tim. 1:12).

2. So džanaja bašo Jehova, hem sar adava dela amen sila?

² O Jehova tano čačutni ličnost koja so poddržinela amen keda isi amen nevolje hem rodela načinija te pomožinel amenge (2. Let. 16:9; Ps. 23:4). Ako dikhaja ki leste sar dživdo Devel, adava ka pomožinel amenge te ikljova ko krajo sekole pharipaja so ka ovel amen. Te dikha sar akava sine čače ko e Davideskoro slučaj.

3. So mislingja o David keda vakergja: „O Jehova tano dživdo“?

³ O David pendžarela sine e Jehova hem sine le doverba ki leste. Keda o cari o Saul hem javera mangle te mudaren le, o David molingja e Jehova baši pomoš (Ps. 18:6). Otkeda o Devel odgovoringja ki leskiri molitva hem spasingja le, o David vakergja: „O Jehova tano dživdo“ (Ps. 18:46). Akale lafencar, o David na manglja samo te vakerel kaj o Devel postojnela. Ko jekh lil bašo psalmija, pišinela kaj o David sikavgja pli doverba ko Jehova sar „dživdo Devel, kova so sekogaš pomožinela ple narodoske“. Taro lično iskustvo o David  džanlja kaj o Devel tano svesno taro so nakhela hem kaj tano spremno te pomožinel leske. Adava ohrabringja e Davide hem pomožingja leske ponadari da te služinel e Jehovaske hem te falinel le (Ps. 18:28, 29, 49).

4. Sar ka koristinel amenge adava so džanaja kaj o Jehova tano dživdo Devel?

⁴ Ako siem uverime kaj o Jehova tano dživdo Devel, adava šaj te pomožinel amen te služina leske revno. Ka ovel amen sila te istrajna ko nevolje hem želba ponadari da te da amendar sa te služina e Devleske. Isto agjaar, ka ova odlučna te ačhova paše e Jehovaja.

O DŽIVDO DEVEL KA DEL TUT SILA

5. Sar šaj te ova hrabra keda isi amen nevolje? (Filipjanja 4:13).

⁵ Ka šaj te istrajna ki sekoja nevolja, bizi razlika dali tani bari ili tikni, ako na bistraja kaj o Jehova tano dživdo hem kaj tano akate te pomožinel amenge. Ov šaj te pomožinel amen adaleske so nijekh problemi so isi amen nane leske pharo. Ov tano Semokjno hem šaj te del amen sila te istrajna. (Čitin Filipjanja 4:13.) Adaleske, isi amen but pričine hrabro te borina amen sekole pharipaja. Keda dikhaja sar o Jehova pomožinela amen ko potikne nevolje, adava uverinela amen kaj ov isto agjaar ka pomožinel amen keda ka oven amen pobare nevolje.

6. Kola situacie taro ternipe bajrargje e Davideskiri doverba ko Jehova?

⁶ Te dikha duj situacie taro e Davideskoro životo kola so bajrargje leskiri doverba ko Jehova. Keda o David sine terno, jekh lavi, a palo nesavo vreme hem jekh mečka, lele lestar po jekh bakhro taro leskere dadeskoro stado. Ko solduj situacie o David hrabro prastandilo palo lavi hem pali mečka hem spasingja e bakhren. Ama o David na mislingja kaj ov kergja adava ple silaja, soske džanlja kaj o Jehova pomožingja leske (1. Sam. 17:34-37). Ov nikogaš na bistergja akala situacie. Adava so razmislingja lenge uveringja le kaj o dživdo Devel ka del le sila ki idnina da.

7. Ko so koncentriringja pe o David, hem sar adava pomožingja leske te borinel pe e Golijatea?

⁷ Pokasno, verojatno panda džikote sine tinejdžeri, o David gelo ko kampi kote so sine i izraelsko vojska. Ov doznajngja kaj o vojnikija but darandile adaleske so jekh filistejsko džini, kova so vikinela pe sine Golijat, iklilo te izazivinel e izraelsko vojska (1. Sam. 17:10, 11). O vojnikija darandile soske koncentriringje pe ko adava kobor o Golijat tano baro hem ko adava so vakerela sine (1. Sam. 17:24, 25). Ama o David koncentriringja pe ko nešto javer. Ov džanlja kaj keda o Golijat asala sine e izraelsko vojskake, ov ustvari vredžinela sine e dživde Devle (1. Sam. 17:26). O David mislinela sine ko Jehova. Le sine le doverba kaj o Devel so pomožingja le keda sine ovčari, ka pomožinel leske ki akaja da situacija. O David sine sigurno ko adava hem adaleske boringja pe e Golijatea hem džangjola pe, pobedingja le! (1. Sam. 17:45-51).

8. So šaj te bajrarel amari doverba kaj o Jehova ka pomožinel amen keda ka oven amen nevolje? (Dikh hem i slika.)

⁸ Amen da šaj uspešno te ikljova ko krajo e nevoljencar ako na bistraja kaj o dživdo Devel tano spremno te pomožinel amen (Ps. 118:6). Šaj te bajrara amari doverba ko akava ako razmislinaja so kergja o Jehova angleder. Čitin bibliska izveštaija kola so ka setinen tut sar o Jehova spasingja ple slugen (Isa. 37:17, 33-37). Isto agjaar, ki amari internet-stranica jw.org šaj te dikhe ili te čitine iskustvija bašo adava sar o Jehova pomožingja amare phralenge hem phenjenge ko amaro vreme. Osven adava, setin tut ko situacie keda o Jehova pomožingja lično  tuke. Iako šaj o Jehova na kergja tuke doborom bare bukja, sar na primer te spasinel tut tari mečka ili taro lavi, sepak ma bistre kaj o Jehova kergja tuke but bukja ko životo. O Jehova vikingja tut ki peste hem dengja tut prilika te ove leskoro amal (Jovan 6:44). Čak avdive, adaleske so ov pomožinela tut, tu sian panda ko čačipe. Adaleske, molin e Jehova te pomožinel tuke te setine tut ko momentija keda ov odgovoringja ko tle molitve, keda ko pravo vreme dengja tut adava so valjangja tuke ili keda pomožingja tut ki nesavi phari situacija. Adava so ka razmisline bašo asavke iskustvija panda poviše ka uverinel tut kaj o Jehova ponadari da ka pomožinel tuke.

9. Sar šaj te dikha ko amare nevolje? (Izreki 27:11).

⁹ Adava so ka dikha e Jehova sar dživdo Devel ka pomožinel amenge te dikha ispravno ko amare nevolje. Soske? Keda isi amen nevolje, valjani te koncentririna amen ko adava soj najvažno. O Beng vakerela kaj ako isi amen pharipa, tegani ka cida amen taro Jehova. Adaleske, o način sar reagirinaja keda isi amen pharipa vlijajnela upro adava sar ka osetinel pe o Jehova (Jov 1:10, 11; čitin Izreki 27:11). Ako ačhovaja verna iako isi amen nevolje ka sikava kaj mangaja e Jehova hem ka dokažina kaj o Beng hovavela. Dali isi tut protivibe taro vlastija ili isi tut ekonomska problemija? Dali o manuša kaske so propovedinea na interesinena pe bašo šukar haberi ili šaj isi tu nesavi javer nevolja? Ako arakhljovea ki nesavi taro akala situacie, ma bistre kaj adava dela tut prilika te radujne e Jehovaskoro vilo. Isto agjaar, ma bistre kaj ov nikogaš nane te mukhel te ove iskušimo poviše taro adava so šaj te izdržine (1. Kor. 10:13). Ov ka del tut i sila so valjani tuke te šaj te izdržine.

O DŽIVDO DEVEL KA NAGRADINEL TUT

10. So ka kerel o dživdo Devel okolenge so služinena leske?

¹⁰ O Jehova sekogaš nagradinela okolen so verno služinena leske (Evr. 11:6). Ov dela amen mir hem zadovolstvo avdive, a ki idnina  ka del amen hem večno životo. Amen siem celosno uverime kaj o Jehova na samo so mangela te nagradinel amen, nego isi le hem i mokj te kerel adava. Adaleske, ponadari da daja le amaro najšukar džikote služinaja leske, isto sar so kerena sine o verna sluge taro biblisko vreme. Baš adava kergja o Timotej ko prvo veko (Evr. 6:10-12).

11. So pottikningja e Timotee te del pestar sa te služinel ko sobranie? (1. Timotej 4:10).

¹¹ Čitin 1. Timotej 4:10. E Timotee sine le silno vera kaj o dživdo Devel ka nagradinel le. Adaleske, ov dela sine pestar sa te šaj te služinel e Jehovaske hem e javerenge. Sar kerela sine adava? O apostol Pavle pottikningja le panda pošukar te poučinel ki služba hem ko sobranie. Isto agjaar, o Pavle vakergja leske te ovel šukar primer ple phralenge — hem e ternenge hem e phurenge. Sine leske dende hem nesave phare zadače kolende so sine vklučimo te del direktno ama ljubezno sovet okolenge so valjani sine (1. Tim. 4:11-16; 2. Tim. 4:1-5). Ponekogaš, o javera na primetinena sine adava so kerela o Timotej ili na ceninena sine adava, ama ov sine sigurno kaj o Jehova ka nagradinel le (Rim. 2:6, 7).

12. Soske o starešine prodolžinena celo vilea te služinen ko sobranie? (Dikh hem i slika.)

¹² O starešine da avdive šaj te oven sigurna kaj o Jehova dikhela hem ceninela adava so kerena. Osven so kerena pastirska posete, poučinena hem propovedinena, but starešine pomožinena te gradinen pe teokratska objektija hem pomožinena te organizirinel pe pomoš kote so isi prirodna katastrofe. Javera služinena ki Grupa so posetinela e pacienten ili ko Odborija so pomožinena maškar o doktorija hem e Jehovaskere svedokija. O starešine džanena kaj o sobranie tano e Jehovaskoro, a na nesave manušeskoro. Adaleske, ola celo vilea kerena pumare zadače ko sobranie hem isi len celosno doverba kaj o Jehova ka nagradinel len bašo adava so kerena (Kol. 3:23, 24).

13. Sar osetinela pe o Jehova bašo adava so keraja leske?

 ¹³ Našti sarine te oven starešine. Ama, sekova jekh amendar šaj te del nešto e Jehovaske. Amaro Devel but ceninela keda daja le amaro najšukar te šaj te služina leske. Ov dikhela keda daja prilogija bašo aktivnostija so kerena pe ko celo sveto, čak te ovel da adava hari. Leske tano but milo keda dikhela kaj iako siem ladžutne, vazdaja amaro vas hem komentirinaja ko sostanokija. Ov isto agjaar but radujnela pe keda prostinaja okolenge so dukhavgje amen. Čak ako mislinea kaj našti te kere doborom kobor so tu mangea, ov sigurno kaj o Jehova ceninela adava so šaj te kere. Ov but mangela tut bašo adava hem ka nagradinel tut (Luka 21:1-4).

AČHOV PAŠE E DŽIVDE DEVLEA

14. Sar adava so ka ačhova paše e Jehovaja ka pomožinel amenge te ačhova leske verna? (Dikh hem i slika.)

¹⁴ Ako o Jehova amenge realno ka ovel amenge polokho te ačhova leske verna. Adava sine slučaj e Josifea. Ov odlučno odbingja te kerel nemoral. O Devel sine leske realno hem na manglja te dukhavel le (1. Moj. 39:9). Te šaj o Jehova amenge da te ovel realno, valjani te odvojna amenge vreme te molina amen hem te proučina leskoro Lafi. Agjaar ka ova popaše amala lea. Ako amen da isto sar o Josif, siem paše amala e Jehovaja, nane te manga te kera ništo so ka razočarinel le (Jak. 4:8).

15. So šaj te sikljova taro adava so slučingja pe e Izraelconge ki pustina? (Evreija 3:12).

¹⁵ Okola so bistrena kaj o Jehova tano dživdo Devel, lokhe šaj te na oven leske verna. Razmislin so slučingja pe e izraelconge džikote sine ki pustina. Ola sine svesna kaj o Jehova postojnela, ama počmingje te sumninen pe dali ov ka grižinel pe bašo lengere potrebe. Ola čak pučle: „Dali o Jehova tano maškar amende ili na?“ (2. Moj. 17:2, 7). Adaleske počmingje te buninen pe protiv o Devel. Amen sigurno na mangaja te dža palo lengoro lošno primer, kova soj amenge predupreduvanje. (Čitin Evreija 3:12.)

16. Sar šaj te ovel ispitimi amari vera?

 ¹⁶ Akava sveto kerela amenge pharo te ačhova paše e Jehovaja. But džene na mangena te verujnen kaj o Devel postojnela. But puti izgledinela kaj okola so na šunena e Devleskere zakonija živinena peske šukar. Keda dikhaja kaj slučinela pe adava, amari vera šaj te ovel čhivdi ko ispit. Iako verujnaja kaj o Devel postojnela, sepak šaj te počmina te sumnina amen dali ov ka pomožinel amen. Nesavo vreme o pisateli taro 73-to Psalm osetinela pe sine agjaar. Ov dikhlja sar o manuša okolu leste na šunena e Devleskere zakonija, a sepak uživinena sine ko životo. Adaleske počmingja te pučel pe dali vredinela te služinel e Devleske (Ps. 73:11-13).

17. So ka pomožinel amen te ačhova paše e Jehovaja?

¹⁷ So pomožingja e psalmisteske te promeninel plo stavi? Ov razmislinela sine so ka ovel okolencar so bistergje e Jehova (Ps. 73:18, 19, 27). Isto agjaar, razmislinela sine kobor koristinela leske adava so služinela e Devleske (Ps. 73:24). Amen da šaj te razmislina bašo blagoslovija so dela amen o Jehova. Te zamislina amenge savo ka ovel sine amaro životo ako na služinaja e Jehovaske. Adava ka pomožinel amen te ačhova verna e Jehovaske hem isto sar o psalmisti te vakera: „A mange tano šukar te ovav paše uzo Devel“ (Ps. 73:28).

18. Soske na valjani te dara tari idnina?

¹⁸ Amen šaj te ikljova ko krajo sekole pharipaja so ka ovel amen ko akala posledna dive soske služinaja „e dživde hem čačutne Devleske“ (1. Sol. 1:9). Amaro Devel grižinela pe amenge hem sekogaš ka pomožinel amen. Ov dokažingja kaj sine uzo ple sluge ko purano vreme hem kaj tano uzo ple sluge avdive da. Panda hari ka doživina i najbari nevolja so ka slučinel pe ki phuv. Ama amen nane te ova korkori, o Jehova ka ovel amencar (Isa. 41:10). Adaleske, hrabro šaj te vakera: „O Jehova tano mlo pomošniko, nane te darav“ (Evr. 13:5, 6).