STATIJA PROUČIBASKE 23
GILI 28 Ov e Jehovaskoro amal
O Jehova kaninela amen te ova leskere gostija
Mlo šatori ka ovel upri lende, a me ka ovav lengoro Devel (EZEK. 37:27)
SO KA SIKLJOVA
Ka dikha sar šaj panda poviše te cenina adava so o Jehova kaninela amen te ova gostija ko leskoro simbolično šatori hem ka dikha sar ov grižinela pe amenge sar amaro domakjini.
1-2. Savi čest sikavela o Jehova ple verna slugenge?
SAVI uloga isi e Jehova ko tlo životo? Šaj ka vakere: „O Jehova tano mlo Dad, mlo Devel hem mlo Amal“. Šaj mislinea ko javera da lafija kolencar so šaj te opišine e Jehova. Ama, dali baši leske šaj te vakere kaj ov tano tlo domakjini kova so kaninela tut ko plo kher?
2 O cari o David sporedingja e Jehova jekhe domakjinea, a leskere verna slugen sporedingja len leskere gostoncar. Ov pučlja: „Jehova, koj ka ovel gosto ko tlo šatori? Koj ka živinel ki tli sveto gora?“ (Ps. 15:1). Taro akava stiho doznajnaja kaj šaj te ova gostija ko e Jehovaskoro šatori, javere lafencar te ova leskere amala. Nane li akaja bari čest koja so sikavela amenge o Jehova?
O JEHOVA MANGELA TE OVA LESKERE GOSTIJA
3. Koj sine o prvo gosto e Jehovaskoro, hem sar osetinena pe sine o Jehova hem leskoro gosto bašo adava?
3 Angleder te počminel te stvorinel, o Jehova sine korkori. Ama, palo adava stvoringja ple prvobijame Čhave. O Jehova sine sar domakjini, kova so kaningja ple prvo gosto ko plo šatori hem but sine radosno bašo adava. I Biblija vakerela amenge kaj e Jehovaskoro Čhavo sine leske „bari radost“. A leskoro prvo gosto, o Isus „sine radosno angli leste celo vreme“ (Izr. 8:30).
4. Kas panda o Jehova kaningja te ovel gosto ko leskoro šatori?
4 Palo adava, o Jehova stvoringja e angelen hem lende da kaningja len te oven leskere gostija. I Biblija vakerela kaj tane „e Devleskere čhave“ hem sikavela kaj ola tane radosna adaleske soj tane e Jehovaja (Jov 38:7; Dan. 7:10). But berša, e Devleskere amala sine samo okola so živinena sine lea ko nebo. Palo adava, ov stvoringja e manušen ki phuv. Agjaar ola da šaj sine te oven gostija ko leskoro šatori. Nesave taro adala gostija sine o Enoh, o Noe, o Avraam hem o Jov. I Biblija baši lende vakerela kaj tane e Devleskere amala ili okola so džana sine „e čačutne Devlea“ (1. Moj. 5:24; 6:9; Jov 29:4; Isa. 41:8).
5. So šaj te sikljova taro proroštvo soj pišimo ko Ezekiel 37:26, 27?
5 Vekoncar palo adava, o Jehova prodolžingja te kaninel ple amalen te oven leskere gostija. (Čitin Ezekiel 37:26, 27.) Na primer, taro e Ezekieleskoro proroštvo doznajnaja kaj o Devel čače mangela leskere verna sluge te oven lea paše amala. Ov vetingja kaj ka kerel lencar „sojuz bašo mir“. Akava proroštvo kerela lafi bašo vreme keda okola so isi len nadež te živinen ko nebo hem okola so isi len nadež te živinen ki phuv, ka oven ko jekhipe ko leskoro simbolično šatori sar „jekh stado“ (Jovan 10:16). Amen avdive živinaja ko adava vreme!
O DEVEL GRIŽINELA PE AMENGE KAJ HEM TE OVA
6. Sar nekoj ovela gosto ko e Jehovaskoro šatori, hem kote arakhljola leskoro šatori?
6 Ko biblisko vreme, jekh šatori sine than kote so nekoj šaj sine te odmorinel pe hem te garavel pe keda sine nevreme. Nekoj so sine gosto nekaste ko šatori šaj sine te očekujnel kaj o domakjini šukar ka grižinel pe leske. Keda daja lafi e Jehovaske kaj ka služina leske, amen ovaja gostija ko leskoro simbolično šatori (Ps. 61:4). Amen isi amen but duhovno hrana hem siem but radosna so šaj te ova ko društvo manušencar so isto agjaar ule e Jehovaskere gostija. Leskoro simbolično šatori nane samo ko jekh than. Šaj sian sine ki javer phuv ko nesavo specijalno kongres hem adathe zapoznajngjan javeren da kola soj srekjna soj tane ko e Devleskoro šatori. E Jehovaskoro šatori tano segde kote so arakhljona leskere verna sluge (Otk. 21:3).
7. Soske šaj te vakera kaj o verna sluge so mule panda tane gostija ko e Jehovaskoro šatori? (Dikh hem i slika.)
7 A soj tano okole verna slugencar so mule? Dali ola panda tane gostija ko e Jehovaskoro šatori? Oja! Soske šaj te vakera adava? Adaleske so o Jehova setinela pe ki lende doborom šukar so angli leste ola tane panda dživde. O Isus vakergja: „Kaj o mule ka voskresninen, sikavgja o Mojsej da ko plo lil keda pišingja baši grmuška, kote so bašo Jehova vakergja kaj tano ’o Devel e Avraameskoro, o Devel e Isakoskoro hem o Devel e Jakoveskoro‘. Ov nane o Devel e mulengoro nego e dživdengoro soske leske sarine ola tane dživde“ (Luka 20:37, 38).
Čak ko ple verna sluge so mule, o Jehova panda dikhela sar gostija ko leskoro šatori (Dikh ko pasus 7)
SAVE BLAGOSLOVIJA ISI AMEN AMA HEM SO MORA TE KERA
8. Save blagoslovija isi e Jehovaskere goston adaleske soj tane ko leskoro šatori?
8 Isto sar so ko jekh doslovno šatori šaj te odmorine tut hem te garave tut keda o vreme nane šukar, agjaar hem e Jehovaskoro šatori zaštitinela leskere goston taro sa so šaj te kerel lenge šteta ko duhovno pogled hem dela len čačutni nadež baši idnina. Ako ačhovaja paše e Jehovaja, o Satana ka našti te kerel amenge nisavi trajno šteta (Ps. 31:23; 1. Jov. 3:8). Ko nevo sveto o Jehova ponadari da ka zaštitinel ple verna amalen, na samo taro duhovna opasnostija nego hem taro meribe (Otk. 21:4).
9. So očekujnela o Jehova taro ple gostija?
9 Čače tani bari čest te ovel pe gosto ko e Jehovaskoro šatori. Šaj te ovel amen paše amalipe e Jehovaja, kova so šaj te trajnel večno. So valjani te kera ako mangaja ponadari da te ova leskere gostija? Ako nekoj kaninela tut peste khere, sigurno ka mange te džane so očekujnela tutar ov. Na primer, ov šaj očekujnela tutar angleder te khuve andre te ikale te kundre, hem tu sigurno ka kere adava. Slično, amen sigurno mangaja te džana so očekujnela o Jehova okolendar so mangena te ačhoven gostija ko leskoro šatori. Amaro mangipe sprema o Jehova pottikninela amen te da amendar sa te šaj celosno te kera leskiri volja (Kol. 1:10). Točno tano kaj o Jehova tano amaro Amal, ama isto agjaar ov tano amaro Devel hem Dad kova so zaslužinela te poštujna le (Ps. 25:14). Nikogaš na valjani te bistra akava hem sekogaš valjani hor te poštujna le. Adava so hor ka poštujna le ka pomožinel amenge te na kera nešto so ka dukhavel le. Amen mangaja sekogaš te dža skromno amare Devlea (Mih. 6:8).
O JEHOVA SINE NEPRISTRASNO E IZRAELCONCAR
10-11. Sar dikhjola pe kaj o Jehova tano nepristrasno taro način sar postapinela sine e Izraelconcar ki Sinajsko Pustina?
10 O Jehova tano nepristrasno ple gostoncar (Rim. 2:11). Akava džanaja taro način sar postapingja e Izraelconcar ki Sinajsko Pustina.
11 Otkeda oslobodingja ple narodo taro ropstvo ko Egipet, o Jehova čhivgja sveštenikon te šaj te služinen ko sveto šatori. A e levitenge dengja odgovornost te keren javera zadače povrzime e službaja ko sveto šatori. Dali o Jehova grižinela pe sine pošukar okolenge so služinena sine ko sveto šatori ili okolenge so živinena sine paše uzi leste? Na! O Jehova tano nepristrasno.
12. Taro so javer dikhela pe kaj o Jehova sine nepristrasno e Izraelconcar? (2. Mojseeva 40:38; dikh hem i slika.)
12 Sekova Izraelco šaj sine te ovel paše amal e Jehovaja bizi razlika dali služinela sine ko sveto šatori ili na, hem bizi razlika dali živinela sine paše ili dur lestar. Na primer, o Jehova kergja celo narodo te dikhel o stubo taro oblako hem o stubo tari jag kola so sine upro šatori. (Čitin 2. Mojseeva 40:38.) Keda o oblako ka počminel sine te dvižinel pe ko nevo pravco, čak okola so živinena sine najdur taro sveto šatori šaj sine te dikhen adava. Agjaar, ola šaj sine te pakujnen pumare bukja, te kheden pumare familijarna šatorija hem te džan zaedno e javerencar (4. Moj. 9:15-23). Sarine šaj sine te šunen o jasno hem glasno zvuko e duje srebrena trubengoro kova so sine znako kaj valjani te ciden (4. Moj. 10:2). Znači, adava so nekoj živinela sine paše uzo sveto šatori na značinela sine kaj ov tano popaše e Jehovaja taro okola so živinena sine podur. Namesto adava, sekova Izraelco šaj sine te ovel e Jehovaskoro gosto hem šaj sine te ovel sigurno kaj ov ka vodinel le hem ka arakhel le. Slično tano avdive da, bizi razlika kaj živinaja, o Jehova mangela amen, grižinela pe amenge hem arakhela amen.
O sveto šatori, kova so sine ki sredina taro logori, sikavela sine kaj o Jehova tano nepristrasno (Dikh ko pasus 12)
SAR O JEHOVA AVDIVE SIKAVELA KAJ TANO NEPRISTRASNO
13. Kova tano jekh način sar o Jehova sikavela nepristrasnost avdive?
13 Nesave taro e Devleskere sluge avdive živinena paše uzo glavno sedište ili paše uzo nesavo Betel. Javera služinena ko adala objektija. Adaleske, adala phralja hem phenja šaj te učestvujnen ko but taro aktivnostija kola so kerena pe ko adala thana hem te družinen pe okolencar so predvodinena. Nesave služinena sar pokrainska nadglednikija ili ki nesavi javer specijalno polnovremeno služba. Ama, poviše taro e Jehovaskere sluge na služinena ko asavko način. Ako tu da sian jekh lendar, ov sigurno kaj amaro domakjini o Jehova mangela sa ple goston (1. Pet. 5:7). Ov but šukar pendžarela tut hem dela tut adava so valjani tuke. O Jehova dela duhovno hrana sa ple slugenge, vodinela len hem arakhela len.
14. Ko savo javer način o Jehova sikavela kaj tano nepristrasno sar amaro domakjini?
14 Javer način sar o Jehova sikavela kaj tano nepristrasno sar amaro domakjini tano agjaar so mukhlja i Biblija te ovel dostapno e manušenge ko celo sveto. O Sveto pismo ko početok sine pišimo ko trin čhibja — hebrejsko, aramejsko hem grčko. Dali okola so džanena te čitinen ko originalna čhibja ki koja so sine pišimi i Biblija, tane popaše e Jehovaja taro okola so na džanena? Džangjola pe kaj na (Mat. 11:25).
15. So sikavela kaj o Jehova tano nepristrasno? (Dikh hem i slika.)
15 Dali o Jehova ka prifatinel amen sar ple amala na zavisinela taro adava dali isi amen bari škola, a ni palem taro adava dali džanaja o originalna čhibja ki koja so sine pišimi i Biblija. O Jehova kergja sarinenge te ovel dostapno leskiri mudrost, a na samo okolenge so isi len bari škola. Leskoro Lafi, i Biblija, tano prevedimo ko milja čhibja. Adaleske, sa e manušen ko celo sveto šaj te ovel len korist taro bibliska sikljojba hem te doznajnen sar šaj te oven paše amala e Jehovaja (2. Tim. 3:16, 17).
Sar adava so i Biblija tani prevedimi ko milja čhibja sikavela kaj o Jehova tano nepristrasno? (Dikh ko pasus 15)
PONADARI DA KER ADAVA SO MANGELA O JEHOVA
16. Sprema Apostolija 10:34, 35, so valjani te kera te šaj o Jehova ponadari da te prifatinel amen sar ple gostija?
16 Amenge tani bari čest so o Jehova primingja amen te ova gostija ko leskoro simbolično šatori. Ov tano o najšukar, najljubezno hem najgostoprimlivo domakjini so postojnela. Isto agjaar, ov tano nepristrasno. Ov prifatinela amen sarinen bizi razlika kaj živinaja, kotar avaja, savi škola isi amen, savi rasa isi amen, kobor berš isi amen, ili savo pol siem. Ama samo okola soj leske poslušna prifatinela len te oven leskere gostija. (Čitin Apostolija 10:34, 35.)
17. Kaj ka arakha poviše informacie bašo adava so valjani te kera te šaj te ova gostija ko e Jehovaskoro šatori?
17 Ko Psalm 15:1, o David pučlja akala pučiba: „Jehova, koj ka ovel gosto ko tlo šatori? Koj ka živinel ki tli sveto gora?“ Palo adava ple silaja o Jehova vodingja e Davide te šaj te odgovorinel ko akala pučiba. Ki javer statija ka dikha nesave taro bukja so valjani te kera te šaj te ačhova amala e Jehovaja.
GILI 32 Ov tari e Jehovaskiri strana!
