1. Sprema Psalm 18:46, solea sporedingja o David e Jehova?

 ŽIVINAJA ko sveto kote so taro jekh puti šaj te oven amen problemija kola so šaj te keren amenge pharo o životo ili celosno te meninen le. But siem blagodarna so šaj te roda pomoš taro Jehova! Ki angluni statija dikhlem kaj o Jehova tano dživdo Devel hem kaj ov sekogaš tano spremno te pomožinel amenge. Keda dikhaja sar ov pomožinela amenge adava uverinela amen kaj o Jehova tano dživdo Devel, baš sar so vakergja o David. (Čitin Psalm 18:46.) Ama, otkeda vakergja adava, o David sporedingja le neštolea so nane dživdo. Ov bašo Jehova vakergja „mli Karpa“. So značinela adava?

2. So ka dikha ki akaja statija?

² Ki akaja statija, ka dikha soske bašo Jehova vakerela pe kaj tano sar karpa hem so sikavela amen akaja sporedba baši leste. Isto agjaar, ka doznajna sar šaj te dikha ki leste sar amari Karpa. Ko krajo ka dikha sar šaj te sikava e Jehovaskere osobine kola so kerena le te ovel sar karpa.

SOSKE O JEHOVA TANO SAR KARPA?

3. Soske but puti ki Biblija koristinela pe o lafi „karpa“? (Dikh hem i slika)

³ I Biblija sporedinela e Jehova karpaja te šaj te pomožinel amenge pošukar te haljova taro nesave leskere osobine. Akava lafi but puti pojavinela pe ki Biblija ko thana kote so leskere sluge falinena le sar Devel kova so nikoj javer nane sar leste. Ki 5. Mojseeva 32:4 prvo puti bašo Jehova vakerela pe kaj tano „Karpa“. I Ana ki molitva vakergja: „Nane karpa sar soj amaro Devel“ (1. Sam. 2:2). O Avakum bašo Jehova vakergja „mli Karpa“ (Avak. 1:12). O psalmisti taro 73-to Psalm bašo Devel vakergja: „I karpa mle vileskiri“ (Ps. 73:26). Čak o Jehova korkori peske vakergja kaj tano „Karpa“ (Isa. 44:8). Te dikha  trin osobine bašo kola so o Jehova sporedimo karpaja hem te dikha sar šaj ov te ovel „amari Karpa“ (5. Moj. 32:31).

4. Ki savi smisla o Jehova tano than garajbaske? (Psalm 94:22).

⁴ O Jehova tano than garajbaske. Isto sar so jekh bari karpa šaj te zaštitinel nekas tari bura, agjaar o Jehova arakhela amen keda nakhaja taro phare situacie. (Čitin Psalm 94:22.) Ov pomožinela amen te arakha amaro amalipe lea hem uverinela amen kaj sa adava pharipe so isi amen avdive nane te kerel amenge trajno šteta. Isto agjaar, ov vetinela amenge kaj ka cidel sa o bukja so sekirinena amen hem so anena amenge muke (Ezek. 34:25, 26).

5. Sar šaj o Jehova te ovel amaro than garajbaske sar zorali karpa?

⁵ Jekh način sar rodaja e Jehovaskiri zaštita tano agjaar so molinaja amen leske. Keda molinaja amen leske, o Jehova dela amen plo mir kova so arakhela amaro vilo hem amare misle (Fil. 4:6, 7). Razmislin bašo iskustvo e phraleskoro Artem, kova so sine phanlo baši pli vera. Džikote sine ko zatvor jekh lošno inspektori non stop ispitinela le sine, kerela leske sine pritisok hem ponižinela le sine. O Artem vakergja: „Sekova puti keda o inspektori ispitinela man sine, sine man baro stres... Adaleske sekogaš molinava man sine e Jehovaske. Molinava le sine te del man mir hem mudrost. E inspektoreskere taktike na uspejngje ki mande... Adaleske so o Jehova pomožingja mange, osetingjum sar te phene angli mande isi jekh baro zido“.

6. Soske šaj sekogaš te ovel amen doverba ko Jehova? (Isaija 26:3, 4).

⁶ O Jehova zaslužinela i doverba. Isto sar jekh bari karpa koja so sekogaš tani ko plo than, agjaar o Jehova sekogaš tano akate amenge. Šaj te ovel amen doverba ki leste adaleske so ov tano „večno Karpa“. (Čitin Isaija 26:3, 4.) Ov sekogaš ka ispolninel ple vetuvanja, ka šunel amare molitve hem ka del amen i pomoš so valjani amenge. Isto agjaar, šaj te ovel amen doverba ko Jehova adaleske so ov tano verno okolenge so služinena leske (2. Sam. 22:26). Ov nikogaš nane te bistrel adava so keraja hem sekogaš ka nagradinel amen (Evr. 6:10; 11:6).

7. Sar ka vlijajnel upri amende adava so ka ovel amen doverba ko Jehova? (Dikh hem i slika.)

⁷ Sikavaja kaj o Jehova tano amari Karpa agjaar so isi amen celosno doverba ki leste. Asavki doverba pomožinela amen te ova leske poslušna čak ko phare vremija, soske džanaja kaj adava tano amare šukaripaske (Isa. 48:17, 18). Sekova puti keda dikhaja kaj o Jehova pomožinela amen, amari doverba ki leste bajrola. Adava kerela te ova panda pouverime kaj samo o Jehova šaj te pomožinel amen ki bilo savi phari nevolja kolate so ka arakhljova. Ko situacie kote so nikoj našti te pomožinel amenge, but puti haljovaja kaj sekogaš šaj te ovel amen doverba ko Jehova. Jekh phral so vikinela pe Vladimir, vakergja: „Džikote sium sine ko zatvor, osetingjum man najpaše e Jehovaja. Sikliljum te ovel man pobari doverba ko Jehova adaleske so sium sine skroz korkori hem na sine man nisavi kontrola upri situacija“.

8. a) Soske šaj te vakera kaj o Jehova tano stabilno? b) Sar koristinela amenge adava so o Devel tano amari Karpa? (Psalm 62:6, 7).

 ⁸ O Jehova tano stabilno. Slično sar jekh bari karpa o Jehova tano cvrsto hem stabilno. Leskiri ličnost hem leskiri namera nikogaš na meninena pe (Mal. 3:6). Keda o Adam hem i Eva buningje pe protiv leste, o Jehova na meningja pli namera e manušencar. Sar so pišingja o apostol Pavle, o Jehova „našti te otkažinel pe korkori pestar“ (2. Tim. 2:13). Akava značinela kaj bizi razlika so slučinela pe ili so kerena o javera, o Jehova nikogaš nane te meninel ple osobine, pli namera hem ple merilija. Adaleske so o Devel tano stabilno, šaj te ova uverime kaj ov ka pomožinel amenge keda ka arakhljova ko phare situacie hem kaj ka ispolninel ple vetuvanja baši idnina. (Čitin Psalm 62:6, 7.)

9. So sikljovea tari Tatjana?

⁹ O Jehova ka ovel amari Karpa ako nikogaš na bistraja leskere osobine hem leskiri namera. Adava ka pomožinel amenge te ačhova stabilna ko emocionalno pogled džikote nakhaja tari nesavi nevolja (Ps. 16:8). Akava sine slučaj jekhe phenjaja so vikinela pe Tatjana, koja so sine phanli ko jekh kher baši pli vera. Oj vakerela: „Sium sine skroz korkori, ko početok sine mange but pharo. But puti osetinava man sine obeshrabrimi“. Palo adava, keda počmingja te razmislinel bašo adava sar lakiri nevolja tani povrzimi e Jehovaja hem leskere nameraja, halili kobor tano važno te istrajnel. Adava pomožingja lake te osetinel pe posmireno hem dengja la sila te ačhovel verno. Oj vakerela: „Adava so razmislinava sine kaj sa akava slučinela pe mange bašo Jehova, pomožingja man te na koncentririnav man but ki mande“.

10. Sar šaj te sikava kaj o Jehova tano amari Karpa avdive?

¹⁰ Panda hari, ka arakhljova ko but phare vremija. Adaleske ka valjani te sikava doverba ko Jehova sar nikogaš angleder. Akana tano vreme te bajrara amari doverba kaj ov ka del amen sa adava so valjani amenge te šaj te istrajna hem te ačhova leske verna. Sar šaj te kera adava? Čitin bibliska izveštaija hem iskustvija bašo e Jehovaskere sluge taro amaro vreme. Primetin sar o Devel sikavgja kaj tano Karpa ple slugenge. Hor razmislin bašo akala izveštaija. Agjaar ka sikave kaj o Jehova tano tli Karpa.

DŽA PALO E JEHOVASKORO PRIMER

11. Soske mangaja te sikava o osobine baši kola so o Jehova tano sporedimo sar karpa? (Dikh hem i ramka „ Cel e terne phralenge“.)

¹¹ Dži akana dikhlem kola osobine sikavena kaj o Jehova tano sar karpa amenge. Akana ka dikha sar šaj amen te sikava adala osobine. Kobor poviše sikavaja adala osobine doborom poviše ka šaj te ohrabrina amare phralen hem phenjen. Na primer, o Isus čhivgja e Simoneske o anav Kifa (prevedimo sar „Petar“), so značinela „karpa“ (Jovan 1:42, fus.). O Isus manglja te vakerel kaj o Petar ka utešinel e phralen hem e phenjen hem kaj ka pomožinel  o sobranie te ovel stabilno. O starešine ko sobranie tane opišime sar „senka tari bari karpa“. Akava sikavela kaj ola ka zaštitinen e javeren ko sobranie (Isa. 32:2). Džangjola pe, sarine amen šaj te ohrabrina e javeren hem te sikava o osobine baši kola so o Jehova tano sporedimo sar karpa (Ef. 5:1).

12. Ko save načinija šaj te ova than garajbaske javerenge?

¹² Ov than garajbaske. Ponekogaš, amare phralenge hem phenjenge šaj te ova doslovno than garajbaske agjaar so ka vikina len ko amaro kher keda isi nesavi prirodno katastrofa, gragjansko nemirija ili vojna. Sar so ka oven pološna o uslovija ko akala „posledna dive“, sigurno ka ovel amen poviše prilike te pomožina amen jekh jekhea (2. Tim. 3:1). Isto agjaar, šaj te utešina hem te sikava mangipe amare phralenge hem phenjenge. Jekh način sar šaj te kera adava tano agjaar so ka kera te osetinen pe šukar keda avena ko amare sostanokija hem ka kera te ovel šukar atmosfera ko sobranie. Živinaja ko sveto kote so o manuša ponašinena pe grubo hem šudreste hem adava kerela amenge stres. Adaleske, keda siem ko amare sostanokija, mangaja te kera sa so šaj te šaj amare phralja hem phenja te osetinen pe mangle, osvežime hem bezbedna.

13. Sar šaj posebno o starešine te oven than garajbaske? (Dikh hem i slika.)

¹³ O starešine šaj te oven than garajbaske e phralenge hem e phenjenge so doživinena doslovna ili simbolična bure. Keda isi nesavi prirodno katastrofa ili nesavo itno medicinsko slučaj, o starešine sigate kerena nešto te šaj praktično te pomožinen. Isto agjaar, ola koristinena i Biblija te šaj te den vodstvo hem te ohrabrinen. O phralja hem o phenja ka osetinen pe poslobodna te roden pomoš taro nesavo starešina ako džanena kaj ov ka kerel lencar lafi ljubezno, ka šunel len hem ka trudinel pe te haljovel sar osetinena pe. Asavke osobine pomožinena e javerenge te  osetinen pe mangle hem te ovel lenge polokho te primeninen bilo kova biblisko sovet so šaj o starešine te den len (1. Sol. 2:7, 8, 11).

14. Sar šaj te sikava kaj zaslužinaja e javerengiri doverba?

¹⁴ Zaslužin e javerengiri doverba. Amen mangaja o javera te džanen kaj šaj te ovel len doverba ki amende, posebno „ko phare dive“ (Izr. 17:17). So šaj te kera te šaj e javeren te ovel len doverba ki amende? Šaj te trudina amen sekova dive te sikava o osobine e Jehovaskere, sar na primer, te ačhova ko amaro lafi hem te ova točna (Mat. 5:37). Isto agjaar, šaj te pomožina praktično okolen kas so isi potreba. Osven adava, trudinaja amen o zadače so isi amen ko sobranie te kera len sprema o upatstvija so dobinaja len.

15. Savi korist isi e sobranie keda o javera šaj te ovel len doverba ko starešine?

¹⁵ Savi korist isi e sobranie keda o starešine sikavena kaj e javeren šaj te ovel len doverba ki lende? O objavitelija osetinena pe posigurna keda džanena kaj šaj te javinen pe e starešinenge ko bilo kova vreme keda ka valjani lenge pomoš, sar na primer, e nadglednikoske tari lengiri grupa bašo propovedibe. Isto agjaar, o objavitelija osetinena pe mangle keda džanena kaj o starešine tane spremna te pomožinen lenge. Keda o starešine dena sovetija kola so temelinena pe ki  Biblija hem ko publikacie taro verno hem mudro robo, namesto ko plo lično mislenje, e objavitelen isi len doverba ki lende. Isto agjaar, e phralen hem e phenjen isi len doverba ko okola starešine so na vakerena e javerenge lična bukja so sine lenge vakerde hem kola so ačhona ko plo lafi.

16. Sar adava so siem stabilna koristinela hem amenge hem e javerenge?

¹⁶ Ov stabilno. Šaj te vlijajna šukar upro javera ako siem odlučna te ova poslušna e Jehovaske ko sa hem ako anaja odluke kola so temelinena pe ko bibliska načelija. Ako proučinaja e Devleskoro Lafi hem ako bajraraja amari vera ko Jehova, tegani panda poviše ka ikera amen ko čačipe. Nane te ova neodlučna, nestabilna hem upri amende nane te vlijajnen o hovavne sikljojba hem o razmisliba e manušengoro taro akava sveto (Ef. 4:14; Jak. 1:6-8). Amari vera ko Jehova hem ko leskere vetuvanja pomožinena amen te ačhova uramnotežena keda šunaja lošna haberija (Ps. 112:7, 8). Isto agjaar, ka šaj te pomožina okolenge so isi len nevolje (1. Sol. 3:2, 3).

17. Sar šaj o starešine te pomožinen e javerenge ko sobranie te ačhoven stabilna?

¹⁷ O starešine valjani te oven uramnotežena ko sa, te oven mudra, te živinen uredno hem te oven razumna. Akala phralja pomožinena e javerenge ko sobranie te ačhon stabilna hem ohrabrinena len agjaar so ikerena pe „ko lafija kolenge so šaj te verujnel pe“ (Tit 1:9; 1. Tim. 3:1-3). Ple primerea hem adalea so grižinena pe sar pastirija, o starešine pomožinena e objavitelenge redovno te džan ko sostanokija, ki služba hem redovno te proučinen. Keda e phralen hem e phenjen isi len problemija kola so anena lenge sekiracie, o starešine šaj but te keren agjaar so ka pottikninen len ponadari da te koncentririnen pe ko Jehova hem ki leskiri namera.

18. Soske mangaja te falina e Jehova hem te ova sa popaše lea? (Dikh hem i ramka „ Sar šaj te ove popaše e Jehovaja“.)

¹⁸ Otkeda dikhlem e Jehovaskere but šuže osobine, šaj te vakera o isto so vakergja o cari o David: „Neka ovel falimo o Jehova, mli Karpa“ (Ps. 144:1). Amen sekogaš šaj te ovel amen doverba ko Jehova. Ko celo amaro životo, pa čak hem ko pophure berša šaj te ovel amen doverba kaj ov ponadari da ka pomožinel amen te ačhova paše lea. Čače isi amen but pričine te vakera: „Ov tano mli Karpa“ (Ps. 92:14, 15).