1. Kola tane nesave taro blagoslovija so isi amen adaleske so siem delo tari e Jehovaskiri organizacija?

 BUT baro blagoslov tano so siem delo tari e Jehovaskiri organizacija ko akala phare posledna dive. O životo ko akava sveto ovela sa popharo hem popharo, ama o Jehova dengja amen phralja hem phenja kola so šaj te pomožinen amen (Ps. 133:1). Isto agjaar, ov pomožinela amen te ovel amen srekjno familija (Ef. 5:33 — 6:1). Ama isto agjaar, dela amen mudrost koja so šaj te pomožinel amenge te ikljova ko krajo amare problemencar hem te osetina čačutno andruno mir.

2. So valjani te kera, hem soske?

² Sepak, amen mora but te trudina amen te šaj te ačhova verna e Jehovaske džikote služinaja leske. Soske? Adaleske so o javera but puti šaj te povredinen amen pumare lafencar ili postapkencar. Isto agjaar, šaj te obeshrabrina amen taro amare lična greške, posebno ako keraja poviše puti jekh isto greška. Amen ponadari da valjani te služina e Jehovaske čak keda 1) povredinena amen amare phralja hem phenja, 2) razočarinela amen amaro bračno partneri hem 3) razočarinaja amen korkori amendar. Ki akaja statija ka dikha sekoja jekh taro akala trin situacie. Isto agjaar, ka dikha so šaj te sikljova taro nesave verna sluge e Jehovaskere kola soj spomnime ki Biblija.

KEDA NESAVO PHRAL ILI PHEN POVREDINELA TUT

3. Savo predizvik isi e Jehovaskere slugen?

³ Predizvik. Ponekogaš, nesave phraleskoro ili phenjakoro karakter šaj nervirinela amen. Javera šaj te povredinen amen, te na oven amencar ljubezna ili te vakeren amenge nešto bizo te razmislinen. Osven adava, o starešine šaj te grešinen. Asavke situacie šaj te čhiven nekas te  sumninel pe dali akaja tani e Devleskiri organizacija. Namesto te služinen e Jehovaske ponadari da ko jekhipe ple phralencar hem ple phenjencar, nesave čhinavena te keren lafi adalencar so povredingje len pa čak na džana ko sostanokija (Sof. 3:9). Dali akava tano mudro? Te dikha so šaj te sikljova taro jekh sluga e Devleskoro kova so sine ki slično situacija.

4. Save predizvikija sine e apostol Pavle?

⁴ Biblisko primer. O apostol Pavle džanlja kaj o phralja hem o phenja sine nesovršena. Na primer, keda alo ko sobranie ko Erusalim nesave na verujngje kaj ov tano učeniko (Apo. 9:26). Pokasno, nesave kerena sine lafi palo leskoro dumo te šaj te kaljaren leskoro anav (2. Kor. 10:10). Isto agjaar, o Pavle dikhlja sar jekh starešina angja pogrešno odluka koja so šaj kergja o javera te sopkinen pe (Gal. 2:11, 12). Isto, jekh taro leskere paše sorabotnikija o Marko, but razočaringja le (Apo. 15:37, 38). Akala situacie šaj sine te keren o Pavle te čhinavel te družinel pe hem te sorabotinel adalencar so povredingje le. Sepak, ov pozitivno dikhela sine ko ple phralja hem phenja hem ponadari da verno služinela sine e Jehovaske. So pomožingja e Pavleske te na otkažinel pe?

5. So pomožingja e Pavleske te ačhol paše ple phralencar hem phenjencar? (Kološanja 3:13, 14; dikh hem i slika).

⁵ O Pavle but mangela sine e phralen hem e phenjen. Adava mangipe pomožingja leske te na koncentririnel pe ko lengere slabostija, nego ko lengere šukar osobine. Isto agjaar, o mangipe pottikningja e Pavle te kerel adava so korkori pišingja ko Kološanja 3:13, 14. (Čitin.) Razmislin sar ponašingja pe o apostol Pavle e Markoja kova so mukhlja le ko leskoro prvo misionersko patujbe. Iako o Pavle ko početok sine voznemirimo bašo adava, sepak ov na mukhlja te vlijajnen upri leste leskere čuvstvija. Pokasno, keda o Pavle pišingja pismo e sobranieske ko Kolosi, falingja e Marko kaj tano verno sorabotniko kova so pomožingja le hem utešingja le (Kol. 4:10, 11). Keda sine ko zatvor ko Rim, o Pavle rodingja te bičhalen leske baš e Marko te pomožinel le (2. Tim. 4:11). Dikhjola kaj o Pavle prostingja ple phralenge hem sine paše lencar ponadari da. So šaj te sikljova taro Pavle?

6-7. So ka pomožinel amenge ponadari da te manga amare phralen hem phenjen iako isi len slabostija? (1. Jovaneskoro 4:7).

⁶ Pouka. O Jehova mangela ponadari da te sikava mangipa amare phralenge hem phenjenge. (Čitin 1. Jovaneskoro 4:7.) Ako  nekoj na ponašingja pe amencar šukar ki nesavi situacija, šaj te ovel amen doverba kaj ov na manglja te povredinel amen hem kaj trudinela pe te ikerel pe ko bibliska načelija, ama šaj ki adaja situacija postapingja bizo te razmislinel (Izr. 12:18). O Devel mangela ple verna slugen iako isi len slabostija. Ov na cidela pe amendar keda grešinaja, nego ponadari da tano amaro amal hem na ačhola amenge holjamo (Ps. 103:9). Čače tano but važno te dža palo primer amare nebesno Dadeskoro kova so prostinela amenge (Ef. 4:32 — 5:1).

⁷ Isto agjaar, na valjani te bistra kaj sar avela sa popaše o krajo akale svetoskoro, valjani te ova popaše amare phralencar hem phenjencar. Šaj te očekujna kaj o progonstvo ka ovel sa pobaro. Šaj čak te phanden amen baši amari vera. Ako adava slučinela pe, amare phralja hem phenja ka valjanen amenge but poviše nego angleder (Izr. 17:17). Razmislin so slučingja pe jekhe starešinaske tari Španija, kova so vikinela pe Huan. a Ov hem javere phralja sine phanle baši lengiri neutralnost. Ov vakerela: „Ko zatvor živinaja sine sarine zaedno hem adaleske ponekogaš džaja amenge sine ko živce. Valjani sine te trpina amen hem but buti te prostina amenge. Adava pomožinela sine amenge te ova ko jekhipe hem te zaštitina amen maškar amende. Zaedno amencar sine zatvorenikija kola so na služinena sine e Jehovaske. Jekh puti, povredingjum mi musi hem sium sine ko gipsi, adaleske našti sine te kerav nesave bukja korkori. Ama, jekh taro phralja thovela sine me šeja hem grižinela pe mange sine ko javera praktična načinija. Osetingjum čačutno mangipe baš tegani keda najviše valjangja mange“. Čače isi amen šukar pričine te rešina amare problemija maškar amende panda avdive!

KEDA TLO BRAČNO PARTNERI KA RAZOČARINEL TUT

8. Save predizvikija isi e bračna paren?

⁸ Predizvik. Ko sekova brako isi pharipa. Baš adava vakerela i Biblija, kaj adala soj ko brako ka „oven len telesna nevolje“ (1. Kor. 7:28). Soske? Adaleske so o rom hem i romni tane nesovršena kolen so isi različna osobine hem kolenge so svidžinena pe različna bukja. Šaj isi len različno kultura ili poteklo. Sar so nakhela o vreme, šaj ka počminen te sikaven osobine kola so angleder te len pe na primetingje len. Sekoja jekh taro akala bukja šaj te anel problemija. Namesto te priznajnen kaj o solduj angje dži ko problemi hem te trudinen pe te rešinen le, ola šaj krivinena pe jekh jekhea. Šaj čak te mislinen kaj ka rešinen pumare problemija ako na živinena zaedno ili palem razvedinena pe. Ama dali adava čače ka rešinel lengere problemija? b Te dikha jekh primer tari jekh džuvli koja so ačhili verno e Jehovaske iako sine la but problemija ko brako.

9. Savo predizvik sine e Avigeja?

⁹ Biblisko primer. I Avigeja sine ko brako e Navalea, koleske so i Biblija vakerela kaj sine drsko hem lošno manuš (1. Sam. 25:3). E Avigejake sigurno sine but pharo te živinel asavke romea. Dali e Avigeja sine la prilika te čhivel krajo ple brakoske? Oja. Asavki prilika sine la keda o David kova so valjani sine te ovel cari ko Izrael,  alo te mudarel lakere rome adaleske so vredžingja le hem leskere manušen (1. Sam. 25:9-13). I Avigeja šaj sine te našel hem te mukhel o David te mudarel e Navale. Ama, oj na kergja adava, nego ubedingja e Davide te na mudarel e Navale (1. Sam. 25:23-27). Soske kergja adava?

10. So verojatno pottikningja e Avigeja te ačhol ko brako iako sine la but problemija?

¹⁰ I Avigeja mangela sine e Jehova hem dikhela sine ko brako sar so dikhela ov. Oj sigurno džanlja so vakergja o Devel e Adameske hem e Evake keda kergja o prvo brako (1. Moj. 2:24). I Avigeja džanlja kaj anglo e Jehovaskere jakhja o brako tano sveto. Oj manglja te radujnel e Devle hem adava pottikningja la te kerel sa so šaj te spasinel ple kherutnen maškar kolende so sine hem lakoro rom. Oj sigate kergja nešto te šaj te čhinavel e Davide te mudarel e Navale. Isto agjaar, oj sine spremno te izvininel pe bašo nešto so na kergja. Sigurno o Jehova but manglja akale hrabro romnja koja so na sine sebično. So šaj te sikljoven taro e Avigejakoro primer o romnja hem o roma?

11. a) So očekujnela o Jehova adalendar soj ko brako? (Efešanja 5:33). b) So sikliljan taro adava sar i Karmen trudingja pe te arakhel plo brako? (Dikh hem i slika.)

¹¹ Pouka. O Jehova mangela o rom hem i romni te ačhon zaedno ko brako čak ako pharo jekhea lendar te živinel pe. O Devel but radujnela pe keda dikhela sar o bračna parija trudinena pe te rešinen pumare problemija hem te sikaven mangipe so nane sebično hem te poštujnen pe. (Čitin Efešanja 5:33.) Razmislin bašo primer e phenjakoro Karmen. Palo šov berš, otkeda ženingja pe, i Karmen počmingja te proučinel e Jehovaskere svedokoncar hem pokasno krstingja pe. Oj vakerela: „Mle romeske na svidžinela pe sine i odluka so angjum. Ov ulo ljubomorno e Jehovaske. Vredžinela man sine hem zakaningja pe mange kaj ka mukhel man“. Iako sine la problemija, i Karmen na otkažingja pe taro plo brako. Oj trudingja pe 50 berš, te sikavel mangipe hem poštovanje ple romeske. Oj vakerela: „Sar nakhena sine o berša, počmingjum te haljovav pošukar sar osetinela pe mo rom hem te kerav lea ljubezno lafi. Adaleske so džanava sine kaj o brako tano sveto anglo e Jehovaskere jakhja, dava sine mandar sa te šaj te arakhav le. Adaleske so mangava e Jehova nikogaš na probingjum te mukhav mle rome“. c Ako tuke da ikljona problemija ko brako, šaj te ovel tut doverba kaj o Jehova ka poddržinel tut hem ka pomožinel tut.

 KEDA SIAN RAZOČARIMO KORKORI TUTAR

12. Savo predizvik šaj te ovel amen ako kergjem seriozno grevo?

¹² Predizvik. Šaj but te razočarina amen korkori amendar ako kergjem nesavo seriozno grevo. I Biblija vakerela kaj amare grevija šaj te keren te osetina amen phage vilea hem phage duhoja (Psalm 34:18). Jekh phral so vikinela pe Dejvid, but trudingja pe te napredujnel ko duhovno pogled hem palo nesavo vreme ulo sluga-pomošniko. Ama, kergja seriozno grevo hem halilo kaj izneveringja e Jehova. Ov vakerela: „Mli sovest but mučinela man sine hem sar te phene phiravava sine jekh toni cigle. Pokasno osetinava sine baro pharipe ki duša. Rojbaja molinava man sine e Jehovaske. Mislingjum mange kaj o Devel nikogaš nane više te šunel man hem soske bi šunela nekas kova so razočaringja le“. Ako keraja nesavo seriozno grevo, šaj te osetina bari dukh hem adava te čhivel amen te mislina kaj o Jehova vazdingja ple vasta amendar (Ps. 38:4). Ako tu da osetinea tut agjaar, razmislin bašo jekh verno sluga e Devleskoro kova so na čhinavgja te služinel leske iako kergja seriozno grevo.

13. Savo seriozno grevo kergja o apostol Petar, hem save javera greške angje le dži ko adava?

¹³ Biblisko primer. I rat angleder te ovel mudardo o Isus, o apostol Petar kergja nekobor greške kola so angje dži ko adava te kerel but seriozno grevo. Prvo, e Petare sine le but bari samodoverba ki peste, agjaar so vakergja kaj čak o javera apostolija te mukhen e Isuse ov nane te kerel adava nego ka ačhol verno (Mar. 14:27-29). Dujto, ki gradina Getsimanija, o Petar nekobor puti zasukja iako o Isus vakergja leske te ačhol džangavdo (Mar. 14:32, 37-41). Palo adava, keda ale o manuša te astaren e Isuse o Petar mukhlja le (Mar. 14:50). Ko krajo, o Petar trin puti vakergja kaj na pendžarela e Isuse pa čak halja sovli kaj adava tano agjaar (Mar. 14:66-71). Sar reagiringja o Petar keda halilo kobor baro grevo kergja? Ov sine phago tari dukh hem rungja dušaja, adaleske so osetingja pe but krivo (Mar. 14:72). Zamislin tuke sar osetingja pe o Petar keda palo nekobor saatija leskere amale e Isuse mudargje le. Sigurno mislingja peske kaj ni hari na vredinela!

14. So pomožingja e Petareske ponadari da verno te služinel e Jehovaske (Dikh i slika tari naslovno strana.)

¹⁴ O Petar šaj sine ponadari da verno te služinel e Jehovaske taro nekobor pričine. Ov na izoliringja pe, ov gelo ko ple duhovna phralja hem sigurno sine utešimo lendar (Luka 24:33). Osven adava, otkeda  voskresningja o Isus, pojavingja pe e Petareske verojatno adaleske so manglja te ohrabrinel le (Luka 24:34; 1. Kor. 15:5). Pokasno, namesto te ukorinel e Petare bašo leskere greške, o Isus vakergja ple amaleske kaj ka dobinel pobare odgovornostija (Jovan 21:15-17). O Petar džanlja kaj kergja baro grevo, ama ponadari da trudingja pe te kerel adava soj ispravno. Soske? Adaleske so sine uverimo kaj leskoro Gospodari, o Isus na otkažingja pe lestar. Isto agjaar, o duhovna phralja e Petareskere ponadari da pomožingje le. So šaj te sikljova taro e Petareskoro primer?

15. Ko so mangela o Jehova te uverina amen? (Ps. 86:5; Rim. 8:38, 39; dikh hem i slika).

¹⁵ Pouka. O Jehova mangela te ova uverime kaj ov mangela amen hem tano spremno te prostinel amenge. (Čitin Psalm 86:5; Rimjanja 8:38, 39.) Keda grešinaja, amen osetinaja amen kriva. Adava tano normalno hem šukar da. Ama, na valjani te mislina kaj o Jehova na mangela amen ili nane te prostinel amenge. Namesto adava, valjani odma te roda pomoš. O Dejvid kova so spomningjem le poupre vakerela: „Kergjum grevo adaleske so borinava man sine korkori protiv o iskušenie“. Ama, ov halilo kaj valjani te kerel lafi e starešinencar. Ov vakerela: „Keda kergjum lafi e starešinencar, ola pomožingje mange te osetinav e Jehovaskoro mangipe. A dikhljum kaj o starešine da mangena man. Ola pomožingje man te uverinav man kaj o Jehova na mukhlja man“. Amen da šaj te ova uverime kaj o Jehova mangela amen hem prostinela amenge ako kainaja amen bašo amare grevija, rodaja pomoš hem ako iskreno trudinaja amen te na kera palem o ista greške (1. Jov. 1:8, 9). Ako siem uverime kaj o Jehova mangela amen hem mangela te prostinel amenge nane te čhinava te služina leske čak keda ka grešina.

16. Soske sian odlučno ponadari da te služine verno e Jehovaske?

¹⁶ O Jehova but ceninela adava so trudinaja amen te služina leske ko akala phare posledna dive. Adaleske so o Jehova pomožinela amen šaj ponadari da te služina leske iako nesave bukja šaj te razočarinen amen. Amen ponadari da šaj te manga amare phralen hem phenjen te prostina lenge čak ako povredinena amen. Šaj te sikava kobor baro mangipe isi amen sprema o Devel hem kaj poštujnaja leskere načelija bašo brako ako daja sa amendar te rešina o problemija so šaj ka oven amen ko brako. A ako keraja grevo šaj te roda pomoš taro Jehova, te uverina amen kaj o Jehova mangela amen hem prostinela amenge hem te prodolžina te služina leske. Šaj te ova sigurna kaj o Jehova but ka blagoslovinel amen ako na otkažinaja amen te kera šukaripe (Gal. 6:9).