AKO angleder nekobor berša sien sine ko tikno ostrov ko Sangir Besar ki Indonezija, tegani šaj dikhlen trine taro amare phenja ki plaža. Ko akava ostrov ola tane pendžarde baši lengiri služba adaleske so pomožinena e manušenge te haljoven i Biblija. Ama ko adava periodi ola kergje nešto skroz javer.

Prvo, ola khuvena sine ko pani te šaj te arakhen bare bara, a palo adava ingarena len sine ki plaža. Nesave bara sine bare sar fudbali. Tegani bešena sine ko tikne kaštunale stolice hem čekičea phagena sine o bara ko delija potikne taro e khanjakere jare. Palo adava, čhivena sine o bara ko plastična kofe hem mora sine te uklen taro basamakija te šaj te resen khere. Ko krajo, čhivena sine o bara ko vrekje kola so tovarinena pe ko kamioni te šaj te koristinen pe bašo neve drumija.

Jekh taro phenja sine i Hulda. Lakere okolnostija dozvolingje lake poviše saatija te kerel akaja buti. Obično oj koristinela sine adala pare te šaj te grižinel pe ple familijake. Ama akava puti oj manglja te štedinel soske sine la javer da cel. Oj manglja te kinel peske tablet te šaj te koristinel i aplikacija JW Li­brary^®. I Hulda džanlja kaj o videoklipija hem o javera bukja so arakhljona ki aplikacija šaj te pomožinen lake pošukar te kerel pli služba hem pošukar te haljovel i Biblija.

Jekh tekvaš masek i Hulda kerela sine sekova sabajle buti po duj saatija, hem agjaar uspejngja te phagel dovolno bara te šaj te pherel pe jekh tikno kamioni. Ko krajo khedingja dovolno pare te šaj te kinel peske tablet.

I Hulda vakerela: „Točno tano adava kaj sium sine but umorno tari buti hem dukhala man sine mi snaga. Ama keda počmingjum te koristinav mo nevo tablet hem dikhljum kobor pomožinela mange pošukar te kerav mli služba hem polokhe te spreminav man bašo sostanokija, bistergjum sa mle dukha“. Oj isto agjaar vakerela kaj o tablet pomožingja lake džikote trajnela sine i pandemija soske preku leste šaj sine te učestvujnel ko sobraniska aktivnostija. Radujnaja amen so i Hulda uspejngja te ispolninel pli cel.