1-2. Kova tano najšukar način te čitine hem te proučine i Biblija? Vaker primer.

 ZAMISLIN tuke kaj mangea te kine jekh kher. So bi mangea te dikhe angleder te kine le? Dali ka ovel tuke dovolno te dikhe samo jekh slika taro kher? Verojatno na. Tu ka mange te dža te dikhe o kher, te dikhe sekova delo avrijaldan, te khuve ki sekoja soba hem te proverine sekova delo taro kher. Šaj čak ka mange te dikhe o plani e khereskoro te šaj te džane sar sine kerdo. Sigurno ka mange te dikhe sekova detali taro kher kova so mangea te kine le.

² Nešto slično šaj te kera keda čitinaja hem proučinaja i Biblija. Jekh biblisko izučuvači vakergja kaj „i Biblija tani sar jekh bari uči zgrada kola so isi hor temelija“. Tegani sar šaj šukar te džana sa soj pišimo ki Biblija? Ako čitinea la sigate, tegani šaj te sikljove samo o osnovna bukja — „o osnovna sveta objave e Devleskere“ (Evr. 5:12). Namesto adava, isto sar so bi kerea sine e kherea „khuv andre“ te šaj te dikhe sa o detalija. Jekh but šukar način sar šaj te proučine i Biblija tano agjaar so ka dikhe sar o različna delija taro haberi tane povrzime jekh jekhea. Trudin tut te haljove na samo ko so verujnea nego hem soske verujnea ko adava.

3. So pottikningja o apostol Pavle e hristijanen te keren hem soske? (Efešanja 3:14-19).

³ Te šaj te haljova sekova delo taro e Devleskoro Lafi, amen valjani te proučina o hor bibliska čačipa. O apostol Pavle pottikningja e phralen hem e phenjen redovno hem temelno te proučinen e Devleskoro Lafi te šaj „celosno te haljoven kobor tano buvlo, dugačko, učo  hem hor“ o čačipe. Adava ka pomožinel lenge sine lengiri vera te ovel la hor korenija hem te ovel zorali. (Čitin Efešanja 3:14-19.)  Amen da valjani te kera o isto. Akana te dikha sar šaj temelno te proučina e Devleskoro Lafi te šaj te ovel amen celo slika bašo sa o bukja so mangela o Jehova te vakerel amenge.

4. So šaj te kera te šaj te ova paše e Jehovaja? Vaker primerija.

⁴ Sar hristijanja na mangaja te haljova samo o osnovna bibliska sikljojba. Mangaja te sikljova „čak e Devleskere hor bukja“ hem adava šaj te kera le soske pomožinela amen e Devleskiri sila (1. Kor. 2:9, 10). Ko tlo lično proučibe šaj te proučine podetalno nesavi tema te šaj te ove paše e Jehovaja. Na primer, šaj te istražine sar o Jehova sikavgja plo mangipe ple slugenge taro purano vreme hem sar adava uverinela tut kaj tute da mangela tut. Isto agjaar šaj te proučine bašo adava sar o Jehova organiziringja e Izraelcon te obožavinen le hem te sporedine adalea sar o Jehova avdive mangela te obožavina le. Ili šaj te proučine ko detalija sekova proroštvo so ispolningja le o Isus džikote sine tele ki phuv.

5. Baši koja tema bi mangea te proučine ki tli lično studija?

⁵ Nesave phralja hem phenja so mangena hor te proučinen i Biblija sine pučle kola bukja taro e Devleskoro Lafi mangena podetalno te proučinen. Nesave taro lengere odgovorija šaj te arakhe ki ramka „ Teme bašo lično proučibe“. Šaj te uživine džikote čitinea asavke teme ako koristinea o Priračniko istražibaske e Jehovaskere svedokongoro. Ako proučinea hor i Biblija adava šaj te zojrakerel tli vera hem te pomožinel tut „šukar te pendžare e Devle“ (Izr. 2:4, 5). Akana te dikha nesave hor bibliska čačipa kola so šaj temelno te proučina len.

6. a) Koja tani i razlika maškar o plani hem i namera? b) Soske šaj te vakera kaj e Jehovaskiri namera e phuvjaja hem e manušencar tani večno? (Efešanja 3:11).

⁶ Na primer, razmislin so vakerela i Biblija baši e Devleskiri namera. Isi bari razlika maškar o plani hem i namera. Jekh plani šaj te sporedina le konkretno drumoja kova so šaj te ingarel amen dži ko than kote  so mangaja te resa. Ama, o plani šaj te propadinel ako o drumo tano blokirimo. A tari javer strana, i namera šaj te sporedina la e thanea kote so mangaja te resa. Amen točno džanaja kote mangaja te dža, ama isi različna drumija sar šaj te resa adari. Čak nesavo drumo te ovel blokirimo šaj te kera promene agjaar so ka dža taro javer drumo. Blagodarna siem e Jehovaske so hari pohari ki Biblija otkringja pli večno namera (Ef. 3:11). O Jehova šaj te birinel različna načinija te šaj te ispolninel pli namera hem ov sekogaš uspejnela ko adava soske „kergja sa te šaj te služinel baši leskiri namera“ (Izr. 16:4). Osven adava, sa so kerela o Jehova trajnela zasekogaš. Koja tani e Jehovaskiri namera hem kola promene kergja te šaj te ispolninel la?

7. Otkeda buningje pe o prva manuša sar o Jehova prilagodingja o način te ispolninel pli namera? (Matej 25:34).

⁷ O Devel vakergja e prvo manušenge koja tani leskiri namera lencar. Ola valjangje te „pheren i phuv manušencar hem te vladinen upro... sa o suštestvija ki phuv“ (1. Moj. 1:28). Keda o Adam hem i Eva buningje pe hem o manuša ule grešna, adava ni najhari na meningja e Jehovaskiri namera. Ov samo promeningja o način sar ka ispolninel pli namera. Ov odma odlučingja te kerel Carstvo ko nebo kova so ka ispolninel leskiri namera so sine le ko početok e manušencar hem e phuvjaja. (Čitin Matej 25:34.) Ko vreme kova so o Jehova odredingja le, mangipaja bičhalgja ple prvobijame Čhave tele ki phuv te sikavel e manušen bašo Carstvo hem te otkupinel amen taro grevo hem o meribe. Palo adava o Jehova voskresningja e Isuse ko nebo te šaj te vladinel sar Cari ko e Devleskoro Carstvo. Ama isi but poviše detalija kola so šaj te sikljova baši e Jehovaskiri namera.

8. a) Koja tani e Biblijakiri glavno tema? b) Sprema Efešanja 1:8-11, so panda o Jehova ka ispolninel? (Dikh i slika tari naslovno strana.)

⁸ I glavno tema e Biblijakiri tani kaj e Jehovaskoro anav ka ovel posvetimo džikote ispolninela pli namera e phuvjaja preku plo Carstvo kote so vladinela o Hristos. E Jehovaskiri namera našti te meninel pe. Ov dela amen lafi kaj ka ovel sa agjaar sar so vakergja (Is. 46:10, 11 fus; Evr. 6:17, 18). Hari pohari i phuv ka ovel raj kote o sovršena hem o pravedna manuša so avena taro Adam hem tari Eva ka uživinen ko večno životo (Ps. 22:26). Ama adava nane sa, o Jehova ka kerel but poviše. Leskiri namera tani te anel ko jekhipe sa ple slugen ko nebo hem ki phuv. Tegani sarine soj dživde verno ka oven podložna ple Vladeteleske e Jehovaske. (Čitin Efešanja 1:8-11.) Na sian li vooduševimo taro način sar o Jehova ispolninela pli namera?

9. Keda čitinaja i Biblija, kobor dur ki idnina šaj te dikha?

⁹ Te razmislina bašo proroštvo kova so vakergja le o Jehova ki Edensko gradina, a pišimo tano ki 1. Mojseeva 3:15. b Adava proroštvo kerela lafi bašo nastanija so ka ispolninen leskiri namera. Ama adala nastanija ka slučinen pe palo nekobor milje berša. Jekh taro akala nastanija tano adava so o glavno delo taro potomstvo e džuvljakoro, o Mesija, valjangja te avel tari e Avraameskiri loza (1. Moj. 22:15-18). Palo adava, ko 33 berš a.e., o Isus sine kicimo ki peta, baš sar so sine prorokujmo (Apo. 3:13-15). A o posledno nastan taro adava proroštvo kote so o potomstvo ka zgmečinel e Satanaskoro  šero ka slučinel pe ki idnina otkeda ka nakhen poviše taro milja berša (Otk. 20:7-10). I Biblija isto agjaar but otkrinela amenge bašo adava so ka slučinel pe ko krajo e Satanaskere svetoja kova so protivinela pe e Devleskere narodoske.

10. a) Save nastanija ka slučinen pe panda hari? b) Sar šaj te spremina amari godi hem amaro vilo? (Dikh i fusnota.)

¹⁰ Te razmislina bašo but važna nastanija soj prorokujme ki Biblija. Prvo, o narodija ka vakeren kaj angje „mir hem sigurnost!“ (1. Sol. 5:2, 3). Tegani ka napadinen e hovavne religija hem agjaar odma ka počminel i bari nevolja (Otk. 17:16). Palo adava, šaj ka ovel nesavo natprirodno znako kova so ka sikavel e „manušikane Čhave sar avela ko oblakija ko nebo silaja hem bare slavaja“ (Mat. 24:30). O Isus ka sudinel e manušen agjaar so ka odvojnel e bakhren taro buznja (Mat. 25:31-33, 46). Ama džikote trajnela adava vreme, o Satana ponadari da ka protivinel pe e Jehovaske. Adaleske so mrzinela e Devleskere narodo ka pottikninel jekhe koalicija taro narodija, kola so i Biblija vikinela la Gog tari phuv Magog, te napadinel len (Ezek. 38:2, 10, 11). Ko jekh momenti, džikote trajnela i bari nevolja, o pomazanikija kola so ka oven ki phuv ka oven lende ko nebo kote so zaedno e Isusea hem e nebesno vojskaja ka borinen pe ki vojna Armagedon — o krajo e bare nevoljakoro c (Mat. 24:31; Otk. 16:14, 16). Tegani ka počminen o milja berša tele ki phuv kote so ka vladinel o Hristos (Otk. 20:6).

11. Savi prilika ka ovel tut ki celi večnost? (Dikh hem i slika.)

¹¹ Akana te dikha so ka slučinel pe hari podur ki idnina. I Biblija vakerela kaj amaro Stvoriteli „čak i večnost čhivgja ko amaro vilo“ (Prop. 3:11). Razmislin so značinela akava tuke hem bašo tlo amalipe e Jehovaja. Ko lil Približi mu se na Jehova, ki strana 319 pišinela akaja interesno misla: „Otkeda ka oven amen poviše taro šel, milje, milionja hem čak milijarde berša ka džana but poviše bašo Jehova nego so džanaja  akana. Ama tegani da ka dikha kaj isi but šuže bukja baši kolende so šaj te sikljova. Našti ni te zamislina amenge kobor šužo hem interesno ka ovel o životo ko raj... A i najšuži buti ko raj ka ovel so ki celi večnost ponadari da ka šaj te ova panda popaše e Jehovaja!“ Džikote na avela adava vreme so šaj javer te otkrina keda proučinaja e Devleskoro Lafi?

12. Sar šaj te dikha upre ko nebo? Vaker primer.

¹² E Devleskoro Lafi otkrinela amenge nešto bašo adava sar tano o životo kote soj o Jehova — „ko najuče thana“ (Isa. 33:5). I Biblija otkrinela amenge čudesna bukja bašo Jehova hem bašo nebesno delo tari leskiri organizacija (Isa. 6:1-4; Dan. 7:9, 10; Otk. 4:1-6). Na primer, šaj te čitina bašo čudesna bukja kola so dikhlja o Ezekiel keda phravdilo o nebo hem dikhlja vizie taro Devel (Ezek. 1:1).

13. Sprema Evreija 4:14-16, kova delo posebno ceninea tari e Isuseskiri uloga?

¹³ Isto agjaar, razmislin baši e Isuseskiri uloga sar Cari hem sar sočuvstvitelno Prvosvešteniko. Preku leste molitvaja šaj te ava anglo e Devleskoro prestol „taro šukaripe so na zaslužinaja le“ hem te roda milost hem pomoš keda valjani. (Čitin Evreija 4:14-16.) Te na mukha nijekh dive te nakhel bizo te razmislina bašo adava so o Jehova hem o Isus kerena amenge taro nebo. Lengoro mangipe valjani but te vlijajnel upri amende hem te pottikninel amen revnosno te služina e Jehovaske (2. Kor. 5:14, 15).

14. Kova tano jekh taro najšukar načinija kolea so šaj te sikava amari blagodarnost e Jehovaske hem e Isuseske? (Dikh hem i slika.)

¹⁴ Jekh taro najšukar načinija sar šaj te sikava kobor ceninaja amare Devle hem leskere  Čhave tano agjaar so ka trudina amen te pomožina e javerenge te oven e Jehovaskere svedokija hem učenikija e Isuseskere (Mat. 28:19, 20). Baš adava kergja o apostol Pavle tari blagodarnost e Devleske hem e Hristoseske. Ov džanlja kaj o Jehova mangela „različna manuša te spasinen pe hem šukar te džanen o čačipe“ (1. Tim. 2:3, 4). Ov but trudingja pe ki pli služba te pomožinel so poviše manušenge te šaj „bilo sar te spasinel nekas“ (1. Kor. 9:22, 23).

15. Sprema Psalm 1:2, so ka kerel amen te ova radosna?

¹⁵ O psalmisti vakergja kaj srekjno hem uspešno manuš tano okova so „uživinela ko e Jehovaskoro zakoni hem razmislinela leskere zakoneske dive hem rat“ (Psalm 1:1-3). Jekh biblisko preveduvači, o Džosef Roterham, bašo akala stihija vakergja kaj jekh manuš valjani „doborom but te mangel e Devleskoro vodstvo so sekogaš ka rodel le, ka proučinel baši leste hem ka razmislinel but baši leste“. Ov isto agjaar vakergja: „Ako nakhela jekh dive, a nekoj na čitinela nešto tari Biblija, adava dive leske našavdo“. Šaj te uživine ko čitibe i Biblija agjaar so ka dikhe sa o detalija hem sar tane povrzime jekh jekhea. Asavko hor proučibe ka anel tuke bari radost.

16. Bašo so ka kera lafi ki sledno statija?

¹⁶ O but šuže čačipa so sikavela amen o Jehova taro plo Lafi nane phare haljojbaske. Ki sledno statija ka dikha jekh taro pohor čačipa — e Jehovaskoro baro duhovno hrami koleske so o Pavle kerela lafi ko plo pismo dži ko Evreija. Uživin džikote proučinea akaja tema.