1. So mangena te keren sa e Devleskere sluge, hem soske? (Dikh i slika tari naslovno strana.)

O ISUS HRISTOS zapovedingja ple sledbenikonge: „Džan hem keren učenikija taro manuša taro sa o narodija“ (Mat. 28:19). Sa o verna sluge e Devleskere mangena te sikljoven sar šaj celosno te keren i služba soj lenge dendi (2. Tim. 4:5). Čače, nijekh javer buti ko životo nane považno, povredno ili poitno taro adava te propovedina hem te sikava e manušen bašo Devel. Ama, šaj te ovel pharo te dža ki služba doborom kobor so mangaja.

2. Kola problemija isi amen džikote keraja amari služba?

² Ama, ko amaro životo isi javera da važna bukja bašo kola so valjani amenge vreme hem sila. Šaj mora te kera but saatija buti te šaj te grižina amen bašo amare hem amare familijakere osnovna potrebe. Šaj isi amen javera da familijarna odgovornostija ili, palem, šaj borinaja amen nasvalipaja, depresijaja ili problemencar so anela len o phuripe. Sar šaj celosno te kera amari služba iako isi amen asavke okolnostija?

3. So šaj te dikha taro e Isuseskere lafija soj pišime ko Matej 13:23?

³ Ako amare okolnostija čhinavena amen te dža ki služba doborom kobor so bi mangaja, na valjani te obeshrabrina amen. O Isus džanlja kaj našti sekova jekh amendar te nakhavel isto vreme hem te trošinel isto sila ki služba. (Čitin Matej 13:23.) O Jehova but ceninela adava so keraja ki služba sa džikote daja amaro najšukar (Evr. 6:10-12). Tari javer strana, šaj amare okolnostija na dozvolinena amenge te kera nešto  poviše. Ki akaja statija ka dikha sar šaj i služba bašo Devel te čhiva la ko prvo than ko amaro životo, sar šaj te živina ednostavno hem sar šaj pošukar te propovedina hem te sikava e javeren. Prvo, te dikha so značinela celosno te kera amari služba.

4. So značinela celosno te kera amari služba?

⁴ Ednostavno vakerdo, te šaj celosno te kera amari služba, valjani te propovedina hem te sikava e javeren kobor so šaj poviše. Ama, nane važno samo kobor vreme nakhavaja ki služba. E Jehovaske isto agjaar tano važno taro kola motivija keraja adava. Adaleske so mangaja e Jehova hem amare pašutnen celo vilea keraja amari služba * (Mar. 12:30, 31; Kol. 3:23). Te služina e Devleske celo vilea značinela te kera i služba najšukar so šaj sprema amare okolnostija hem sile. Ako ceninaja i čest te propovedina, ka trudina amen te vakera o šukar haberi kobor so šaj poviše manušenge.

5-6. Vaker primer sar šaj i služba te ovel amenge ko prvo than iako isi amen but obvrske.

⁵ Zamislin jekh terno manuš so uživinela te bašalel gitara. Ov mangela te bašalel sekogaš keda isi le prilika te kerel adava. Palo nesavo vreme, arakhela buti ko jekh kafiči te bašalel gitara ko vikendija. Ama, adaleske so na zarabotinela dovolno pare te šaj te učharel ple trošakija, ov počminela te kerel buti ki jekh dukjana ki kasa taro ponedelnik dži ko petok. Iako pobaro delo taro plo vreme nakhela ki buti ki dukjana, i muzika tani leske ko vilo. Ov but mangela te ovel pošukar gitaristi hem adava te ovel leskiri profesija. Iako ko momenti o okolnostija na dozvolinena leske adava, ov uživinela ki sekoja prilika keda šaj te bašalel gitara, bizi razlika kobor kratko trajnela adava.

⁶ Slično, šaj tle okolnostija na dozvolinena te ove ki služba doborom kobor so bi mangea tu. Sepak, adava tano nešto so najviše mangea te kere. Adaleske trudinea tut pošukar te propovedine te šaj o šukar haberi te resel dži ko vilo e manušengoro. Ama, adaleske so isi tut but obvrske, šaj pučea tut  sar šaj te čhive o propovedibe ko prvo than ko tlo životo.

7. Savo stavi sine e Isuse baši služba?

⁷ O Isus dengja najšukar primer bašo adava savo stavi valjani te ovel amen baši služba. Najvažno buti ko leskoro životo sine te vakerel bašo e Devleskoro Carstvo (Jovan 4:34, 35). Phirgja but kilometre te šaj te propovedinel kobor so šaj poviše manušenge. Koristingja sekoja prilika te kerel lafi e manušencar ko lengere khera hem ko prometna thana. Sa so kergja o Isus ko plo životo sine povrzimo leskere službaja.

8. Sar šaj te ovel amen sar e Isuseskoro stavi baši služba?

⁸ Amen da sar o Isus trudinaja amen te kera prilike te svedočina segde hem sekogaš keda šaj. Spremna siem te žrtvujna amari udobnost te šaj te propovedina (Mar. 6:31-34; 1. Pet. 2:21). Nesave ko sobranie isi len prilika te služinen sar specijalna, opšta ili pomošna pionerija. Javera siklile nesavi čhib ili selingje pe ko podračje kote so isi pobari potreba taro objavitelija. Sepak, pobaro delo taro propovedibe kerena le objavitelija kola so našti te služinen ko asavke načinija, ama kerena sa so šaj ki služba bašo Devel. Bizi razlika kobor keraja, o Jehova na adžikerela amendar te kera poviše taro adava so šaj. Ov mangela sarine te ova bahtale džikote vakeraja „o slavno šukar haberi taro bahtalo Devel“ (1. Tim. 1:11; 5. Moj. 30:11).

9. a) Sar o Pavle čhivgja o propovedibe ko prvo than ko plo životo iako mora sine te kerel buti? b) Sprema Dela 28:16, 30, 31, savo stavi sine e Pavle baši služba?

⁹ O apostol Pavle dengja amenge šukar primer adalea so i služba sine leske najvažno buti ko životo. Keda sine ko Korint, džikote sine ko plo dujto misionersko patujbe, na sine le dovolno pare hem adaleske mora sine te odvojnel vreme te šaj te kerel šatorija. Ama e Pavleske na sine akava najvažno ko životo. Ov kerela sine akaja buti te šaj te izdržinel pe ki služba hem na manglja o Korinkjanja te platinen bašo leskere trošakija (2. Kor. 11:7). Iako o Pavle mora sine te kerel buti, i služba bašo Devel ponadari da sine leske najvažno ko životo, hem propovedinela sine sekoja sabota. Otkeda leskere okolnostija meningje pe ko pošukar, ov šaj sine celosno te koncentririnel pe „ko propovedibe o lafi, hem svedočinela sine e Evreenge kaj o Isus tano čače o Hristos“ (Dela 18:3-5; 2. Kor. 11:9). Pokasno, ov sine duj berš phanlo ko jekh kher ko Rim. Sepak, svedočinela sine sarinenge so avena sine ki leste, hem isto agjaar pišinela sine pismija. (Čitin Dela 28:16, 30, 31.) O Pavle sine rešimo ništo te na ovel leske považno tari služba. Ov pišingja: „Adaleske so isi amen akaja služba... na otkažinaja amen“ (2. Kor. 4:1). Iako amen da valjani te odvojna vreme te šaj te kera buti, sepak isto sar o Pavle, šaj te čhiva i služba bašo Devel ko prvo than ko životo.

10-11. Sar šaj celosno te kera amari služba ako isi amen problemija sastipaja?

¹⁰ Ako našti te propovedina taro kher ko kher doborom kobor so mangaja adaleske so siem phure ili nasvale, šaj te propovedina ko javera načinija. O hristijanja taro prvo veko propovedinena sine segde. Ola koristinena sine sekoja prilika te keren lafi e manušencar bašo čačipe — taro kher ko kher, ko prometna thana hem neformalno (Dela 17:17; 20:20). Ako našti te phira, šaj te beša ko thana kote so isi but manuša hem te propovedina adalenge so nakhena. Isto  agjaar šaj te svedočina neformalno, preku pismija ili telefoni. Akaja služba anela bahtalipe bute objavitelenge kolen so ograničinela len o sastipe ili nesave javera problemija.

¹¹ Iako isi tut problemija sastipaja, tu šaj celosno te kere tli služba. Razmislin palem bašo apostol Pavle. Ov vakergja: „Sa šaj te kerav soske pomožinela mange okova so dela man sila“ (Fil. 4:13). E Pavleske valjani sine adaja sila keda nasvalilo ko jekh taro ple misionerska patujba. Tari Biblija šaj te dikha kaj sine le prilika te propovedinel e phralenge ki Galatija baš adaleske so nasvalilo (Gal. 4:13). Slično, adava so sian nasvalo šaj te del tut prilika te vakere o šukar haberi e javerenge, sar na primer, e doktorenge, e medicinsko sestrenge hem e javerenge kola so grižinena pe tuke. But taro adala manuša tane ki buti keda o phralja džana lende khere te svedočinen lenge.

12. So značinela te ovel tut ednostavno jakh?

¹² O Isus vakergja: „I svetilka e teloskiri tani i jakh. Znači, ako tli jakh tani koncentririmi samo ki jekh buti [ili „ednostavno“], celo tlo telo ka ovel svetlo“ (Mat. 6:22, fus.). So manglja te vakerel o Isus adalea? Kaj valjani te živina ednostavno, te ova koncentririme ki jekh buti hem te na dozvolina nešto te lel amaro vnimanie. O Isus dengja amen primer adalea so koncentriringja pe ki služba, hem sikavgja ple učenikon te ačhoven koncentririme ki služba bašo Jehova hem ko e Devleskoro Carstvo. Amen džaja palo e Isuseskoro primer adalea so o propovedibe tano amenge najvažno buti ko životo (Mat. 6:33).

13. So šaj te pomožinel amenge te čhiva i služba ko prvo than ko životo?

 ¹³ Jekh način sar šaj te čhiva i služba ko prvo than ko amaro životo tano agjaar so ka živina ednostavno. Tegani ka ovel amen poviše vreme te pomožina e javerenge te zapoznajnen e Jehova hem te mangen le. * Na primer, dali šaj te kera nesave promene ko amaro rabotno vreme te šaj poviše te propovedina ko rabotna dive? Dali šaj te nakhava pohari vreme ki rekreacija?

14. Save promene kergja jekh bračno pari te šaj te nakhavel poviše vreme ki služba?

¹⁴ Jekh starešina so vikinela pe Ilajas hem leskiri romni kergje baš adava. Ov objasninela: „Mangaja sine te kera poviše ki služba, ama ko adava vreme našti sine te ova pionerija. Sepak, mora sine nekotar te počmina. Adaleske kergjem potikne promene te šaj poviše te propovedina. Na primer, počmingjem pohari te trošina. Isto agjaar, halilem kaj nakhavaja but vreme ki rekreacija hem adaleske kergjem promene. Osven adava, zamolingjem ki buti te meninen amaro rabotno vreme te šaj poviše te propovedina. Adaleske so kergjem sa akava, šaj sine te propovedina akšameske, te oven amen poviše bibliska kursija, pa čak duj puti ko masek šaj sine te propovedina ko rabotna dive. Adava kergja amen but bahtale!“

15. Sprema 1. Timotej 4:13, 15, ko savo javer način šaj celosno te kera amari služba bašo Devel?

¹⁵ Javer način sar šaj celosno te kera amari služba bašo Devel tano agjaar so ka trudina amen pošukar te propovedina. O manuša ko nesave profesie mora redovno te dobinen obuka te šaj pošukar te džanen i  buti hem pošukar te keren la. Isto akava važinela okolenge so propovedinena bašo e Devleskoro Carstvo. Amen valjani ponadari da te sikljova sar šaj pošukar te kera amari služba (Izr. 1:5; čitin 1. Timotej 4:13, 15).

16. Sar šaj pošukar te propovedina o šukar haberi? (Dikh i ramka „ Celija kola so ka pomožinen mange celosno te kerav mli služba“.)

¹⁶ Sprema adava, so ka pomožinel amenge ponadari da te ova pošukar ki služba? Adava so ka ikera amen ko upatstvija so dobinaja len ko sostanok Amaro životo hem služba. Ko akava sostanok dobinaja korisna sovetija kola so pomožinena amenge pošukar te propovedina o šukar haberi. Na primer, keda o pretsedavači dela sovetija okolenge so isi len zadača ko sostanok, šaj te šuna korisna informacie kola so ka pomožinen amenge te ova pošukar ki služba. Adala sovetija šaj te primenina len keda ka dža ki služba. Isto agjaar, šaj te roda pomoš taro nadgledniko tari amari grupa propovedibaske ili te dža lea ki služba. Osven adava, šaj te dža ki služba nesave poiskusno objavitelea, pionerea ili e pokrainsko nadglednikoja. Džikote sikljovaja pošukar te koristina amare glavna publikacie službake, panda poviše ka uživina ko propovedibe hem ko sikajbe e javeren.

17. Sar ka osetina amen ako trudinaja amen celosno te kera amari služba?

¹⁷ Amenge tani bari čest adava so o Jehova dozvolinela te ova leskere sorabotnikija! (1. Kor. 3:9). Keda trudinaja amen te procenina soj tano najvažno hem ako i služba bašo Devel amenge ko prvo than ko životo, ka ova bahtale džikote služinaja e Jehovaske (Fil. 1:10; Ps. 100:2). Sar sluga e Jehovaskoro, šaj te ove sigurno kaj ov ka del tuke sila te kere tli služba iako isi tut problemija hem ograničuvanja (2. Kor. 4:1, 7; 6:4). Bizi razlika dali tle okolnostija dozvolinena tuke te nakhave hari ili poviše vreme ki služba, šaj te ovel tut pričina te ove bahtalo ako kerea adava celo vilea (Gal. 6:4). Keda trudinea tut celosno te kere tli služba, sikavea mangipe e Jehovaske hem tle pašutneske. „Kerindor adava ka spasine hem tut hem adalen so šunena tut“ (1. Tim. 4:16).