1-2. Soske e Isuse sine le baro stres?

KO POSLEDNO dive taro plo životo ki Phuv, e Isuse sine le baro stres. Džanlja kaj panda hari ka ovel mučimo hem mudardo taro lošna manuša. Ama, ov na sine sekirimo samo bašo adava. O Isus but manglja ple Dade hem manglja te kerel le bahtalo. Ov džanlja kaj ako ačhola verno ko akava baro ispit, ka dokažinel kaj e Jehova isi le pravo te vladinel. O Isus mangela sine e manušen da hem džanela sine kaj šaj te ovel amen nadež bašo večno životo samo ako ačhovela verno e Jehovaske dži ko meribe.

² Iako sine le baro stres, e Isuse sine le andruno mir. Ple apostolenge vakergja: „Dava tumen mlo mir“ (Jovan 14:27). O Isus ačhilo smirimo ko akala momentija soske sine le „o mir taro Devel“. Asavko mir isi nekas keda tano paše amal e Jehovaja (Fil. 4:6, 7).

3. So ka dikha ki akaja statija?

³ Nijekhe amendar nane te ovel isto pritisok sar so sine e Isuse. Ama, sa leskere sledbenikon ka oven len problemija hem ispitija (Mat. 16:24, 25; Jovan 15:20). Hem isto sar o Isus, ponekogaš ka ova voznemirime. So ka pomožinel amenge te na ova preterano sekirime hem agjaar te našava amaro andruno mir? Te dikha kola trin bukja kergja o Isus džikote trajnela sine leskiri služba ki Phuv hem sar šaj te dža palo leskoro primer keda isi amen bare problemija.

4. a) Kola primerija sikavena kaj o Isus često molingja pe ko posledno dive taro plo životo ki Phuv? b) Sprema 1. Solunjanite 5:17, so sine ohrabrime te keren o hristijanja?

⁴ Čitin 1. Solunjanite 5:17. Ko posledno dive taro plo životo ki Phuv, o Isus molingja pe često. I rat keda sikavgja ple učenikonge sar te setinen pe ko leskoro meribe, ov molingja pe bašo maro hem i mol (1. Kor. 11:23-25). Angleder te ikljoven taro than kote so ikergje i Pasha, o Isus molingja pe ple učenikoncar (Jovan 17:1-26). I isto rat, keda sine ple učenikoncar ki Maslinsko Gora, ov molingja pe nekobor puti (Mat. 26:36-39, 42, 44). Čak o posledna lafija so vakergja len angleder te merel sine jekh molitva (Luka 23:46). O Isus molinela pe sine e Jehovaske bašo sa so slučinela pe leske sine ko posledno dive taro leskoro životo.

5. Soske e Isuseskere apostolen na sine len dovolno hrabrost?

⁵ Jekh pričina soske o Isus šaj sine te izdržinel o iskušenija sine adaleske so ov često molingja pe ple Dadeske hem sine le doverba kaj ov ka pomožinel leske te istrajnel. Tari javer strana, o apostolija namesto te ačhoven džangavde hem te molinen pe, ola zasukje. Adaleske, na sine len dovolno hrabrost keda palo adava sine ispitimi lengiri vera (Mat. 26:40, 41, 43, 45, 56). Keda amari da vera ka ovel ispitimi, šaj te ačhova verna e Jehovaske samo ako sekogaš molinaja amen leske, isto sar o Isus. Bašo so molingja pe o Isus?

6. Sar šaj i vera te pomožinel amenge ponadari da te ovel amen andruno mir?

⁶ Šaj te molina amen e Jehovaske te del amenge poviše vera (Luka 17:5; Jovan 14:1). Valjani amenge vera adaleske so o Satana iskušinela sa e Isuseskere sledbenikon  (Luka 22:31). Sar ka pomožinel amenge i vera ponadari da te ovel amen andruno mir čak keda isi amen but problemija? Ako dengjem sa amendar te šaj te rešina nesavo problemi, i vera ko Jehova ka pomožinel amenge te na sekirina amen preterano. Soske? Adaleske so isi amen doverba kaj ov ka pomožinel amenge te ana o najšukar rešenie ko pravo vreme. A adava ka kerel te ovel amen andruno mir (1. Pet. 5:6, 7).

7. So sikliljan taro e Roberteskere lafija?

⁷ I molitva pomožinela amenge ponadari da te ovel amen andruno mir bizi razlika save ispitija ka oven amen. Razmislin bašo e Roberteskoro primer, jekh iskusno starešina kole so isi le poviše taro 80 berš. Ov vakerela: „O sovet taro Filipjanite 4:6, 7 pomožingja mange te borinav man bute problemencar. Jekh periodi ko životo sine man finansiska problemija. Isto agjaar, nesavo vreme sine mandar lendi i odgovornost te služinav sar starešina“. So pomožingja e Roberteske ponadari da te ovel le andruno mir? Ov vakerela: „Samo so ka počminav te sekirinav man, odma molinava man. Haliljum kaj kobor počesto molinava man hem kobor pohor taro vilo kerava adava doborom pobaro mir osetinava“.

8. Sprema Jovan 8:29, koja tani panda jekh pričina soske e Isuse sine le andruno mir?

⁸ Čitin Jovan 8:29. E Isuse sine le andruno mir čak keda sine le progonstvija. Soske? Adaleske so džanela sine kaj adalea so ka ovel poslušno ka kerel bahtalo ple Dade. O Isus ačhilo poslušno keda sine leske pharo te kerel adava. Ov mangela sine ple Dade hem najvažno ko životo sine leske te služinel  e Jehovaske. Na primer, angleder te avel ki Phuv, o Isus pomožingja ple Dadeske džikote stvorinela sine (Izr. 8:30). Isto agjaar, keda sine ki Phuv, ov revnosno sikavela sine e javeren bašo Devel (Mat. 6:9; Jovan 5:17). Adava kerela le sine but bahtalo (Jovan 4:34-36).

9. Soske isi amen andruno mir keda siem zafatime ki služba?

⁹ Amen šaj te dža palo e Isuseskoro primer agjaar so ka ova poslušna e Jehovaske hem ka ova sekogaš zafatime ki služba (1. Kor. 15:58). Keda siem koncentririme ko propovedibe, adava pomožinela amenge te ovel amen ispravno stavi bašo amare problemija (Dela 18:5). Na primer, e manušen so arakhaja len ki služba but puti isi len pobare problemija taro amare. Ama, keda počminena te mangen e Jehova hem sikljovena te primeninen leskere sovetija, lengoro životo ovela pošukar hem ola ovena pobahtale. Sekogaš keda dikhaja akava ki služba, setinaja amen kaj o Jehova grižinela pe e manušenge, a adava uverinela amen kaj grižinela pe amenge da. Adaja uverenost pomožinela amenge ponadari da te ovel amen andruno mir. Akava potvrdinela o iskustvo jekhe phenjakoro koja so celo životo borinela pe depresijaja hem čuvstvoncar kaj na vredinela ništo. Oj vakerela: „Keda sium zafatimi ki služba, osetinava kaj sium emocionalno postabilno hem sium pobahtali. Mislinava kaj adava tano agjaar soske keda sium ki služba osetinava man najpaše e Jehovaja“.

10. So sikliljan taro adava so vakergja i Brenda?

¹⁰ Te dikha isto agjaar o primer jekhe phenjakoro so vikinela pe Brenda. La hem lakere čhaja isi len multipleks skleroza. I Brenda tani ki invalidsko količka hem sekogaš osetinela pe umorno. Ponekogaš propovedinela taro kher ko kher, ama najviše svedočinela preku pismija. Oj vakerela: „Otkeda haliljum hem prifatingjum kaj sa džikote trajnela akava sveto ka mora te borinav man akale nasvalipaja, polokhe sine mange te koncentririnav man ki služba. Ustvari, keda propovedinava, na mislinava ko mle problemija. Namesto adava, koncentririnava man sar te pomožinav adalenge kaske so propovedingjum. Isto agjaar, keda propovedinava, sekogaš setinava man ki nadež so isi man baši idnina“.

11-13. a) Sar o apostolija hem o javera sikavgje kaj tane e Isuseskere čačutne amala? b) Sar vlijajngje upro Isus leskere amala?

¹¹ Džikote trajnela sine e Isuseskiri služba ki Phuv, o verna apostolija sikavgje kaj tane leskere čačutne amala. Ko Izreki 18:24 pišinela kaj „isi amala kola soj popaše taro phral“, a o apostolija čače sine asavke. O Isus but ceninela sine asavke amalen. Džikote sine ki Phuv, nijekh taro leskere telesna phralja na verujngje ki leste (Jovan 7:3-5). Ki jekh prilika, leskiri familija čak mislingja kaj delindilo (Mar. 3:21). E Isuseskere verna apostolen sine len but pojaver stavi lendar. Adaleske, i rat angleder te merel ov vakergja lenge: „Tumen ačhilen mancar ko mle iskušenija“ (Luka 22:28).

¹² O apostolija ponekogaš razočarinena sine e Isuse, ama ov na koncentriringja pe ko lengere greške, namesto adava dikhlja kaj isi len vera ki leste (Mat. 26:40; Mar. 10:13, 14; Jovan 6:66-69). I rat angleder te mudaren le, o Isus vakergja akale verna manušenge: „Tumen sien mle amala, soske vakergjum tumenge sa so šungjum taro mo Dad“ (Jovan 15:15). E Isuseskere amala but ohrabringje le. Adava so pomožingje le džikote kerela sine pli služba, kergja le but bahtalo (Luka 10:17, 21).

 ¹³ Osven o apostolija, e Isuse sine le javera da amala — murša hem džuvlja kola so pomožinena leske sine ki služba hem ko javera praktična načinija. Nesave vikinena le sine ko pumare khera hem spreminena sine leske hajbaske (Luka 10:38-42; Jovan 12:1, 2). Javera patujnena sine e Isusea hem delinena sine lea sa so sine len (Luka 8:3). Sine le šukar amala soske ov da sine šukar amal lencar. O Isus kerela sine šukar bukja baši lende hem na adžikerela sine previše lendar. Iako sine sovršeno, ceninela sine i pomoš so dena le sine leskere nesovršena amala. Šaj te ova sigurna kaj ola pomožingje leske ponadari da te ovel le andruno mir.

14-15. Sar šaj te oven amen šukar amala, hem sar šaj te pomožinen amenge?

¹⁴ O šukar amala ka pomožinen amenge te ačhova verna e Jehovaske. A najšukar način te oven amen šukar amala tano agjaar so prvo amen ka ova šukar amala (Mat. 7:12). Na primer, i Biblija pottikninela amen te koristina amaro vreme hem sila bašo javera, posebno keda valjani lenge pomoš (Ef. 4:28). Razmislin kaske šaj te pomožine ko tlo sobranie. Šaj li te dža te kine nesave bukja nekaske so našti te ikljol kher­aldan adaleske soj phuro ili nasvalo? Šaj li te vikine ko ručko nesave familija kola so isi la finansiska problemija? Ako džanea sar te koristine amari internet-stranica jw.org^® hem i aplikacija JW Li­brary^®, šaj li te pomožine e javerenge ko sobranie te sikljoven sar te koristinen len? Ako keraja sa so šaj te pomožina e javerenge, ka ova pobahtale (Dela 20:35).

¹⁵ Keda isi amen problemija, amare amala ka poddržinen amen hem ka pomožinen amenge ponadari da te ovel amen andruno mir. Isto sar so o Eliu šukar šunela sine  džikote o Jov vakerela sine ple muke, amare amala pomožinena amenge agjaar so strplivo šunena amen keda vakeraja lenge sar osetinaja amen (Jov 32:4). Na valjani te adžikera amare amala te anen odluke amenge ko than, ama mudro ka ovel ako šunaja keda dena amen sovetija so temelinena pe ki Biblija (Izr. 15:22). O cari o David ponizno prifatingja i pomoš taro ple amala. Amen da valjani te ova ponizna agjaar so ka prifatina pomoš taro amala keda adava ka ovel potrebno (2. Sam. 17:27-29). Asavke šukar amala tane poklon taro Jehova (Jak. 1:17).

16. Sprema Filipjanite 4:6, 7, kova tano o edinstveno način sar šaj te dobina o mir so dela le o Devel? Objasnin.

¹⁶ Čitin Filipjanite 4:6, 7. Soske o Jehova vakerela amenge kaj o mir so dela le ov šaj te dobina le „preku o Isus Hristos“? Adaleske so šaj te ovel amen trajno mir ki godi hem ko vilo samo ako haljovaja e Isuseskiri uloga hem ako isi amen vera ki leste. Na primer, preku i otkupno žrtva e Isuseskiri, šaj te oven prostime sa amare grevija (1. Jov. 2:12). Kobor bari uteha dela amen akava! Sar Cari ko e Devleskoro Carstvo, o Isus ka cidel sa o muke so angje amenge o Satana hem leskoro sveto (Isa. 65:17; 1. Jov. 3:8; Otk. 21:3, 4). Kobor šuži nadež baši idnina dela amenge adava! Iako i zadača so dengja amenge o Isus nane lokhi, ov tano amencar hem ka pomožinel amenge sa džikote na avela o krajo akale svetoskoro (Mat. 28:19, 20). Kobor bari hrabrost dela amen adava! Čače, i uteha, i nadež hem i hrabrost tane but važna te šaj te ovel amen andruno mir.

17. a) Sar šaj jekhe Devleskere sluga ponadari da te ovel le andruno mir? b) Ko so uverinena amen o lafija soj pišime ko Jovan 16:33?

¹⁷ Tegani, sar šaj ponadari da te ovel tut andruno mir keda isi tut bare problemija hem ispitija? Agjaar so ka kere o ista bukja so kergja len o Isus. Sar prvo, ponadari da sekogaš molin tut bizi razlika so ka slučinel pe. Dujto, ov poslušno e Jehovaske hem revno propovedin čak keda adava nane lokho. Hem trito, prifatin i pomoš taro tle amala. Tegani o mir taro Devel ka arakhel tli godi hem tlo vilo. Agjaar, tu da isto sar o Isus ka šaj te ačhove verno e Jehovaske bizi razlika save problemija hem iskušenija ka oven tut! (Čitin Jovan 16:33.)