1. So sikavela kaj o Jehova tano darežlivo?

ANGLEDER te počminel te stvorinel, o Jehova sine korkori. Tegani, ov odlučingja te pokloninel životo agjaar so stvoringja intelegentna suštestvija ko nebo hem ki Phuv. „O bahtalo Devel“, o Jehova, mangela te del šukar bukja (1. Tim. 1:11; Jak. 1:17). O Jehova mangela amen da te ova bahtale, adaleske sikavela amen te ova darežliva (Rim. 1:20).

2, 3. a) Soske siem bahtale keda siem darežliva? b) So ka dikha ki akaja statija?

² O Devel stvoringja e manušen sprema plo liko (1. Moj. 1:27). Akava značinela kaj o Jehova kergja te oven amen osobine sar leskere. Te šaj te ova čače bahtale hem te ovel amen bereketi taro Jehova, valjani te dža palo leskoro primer. Valjani te interesina amen e javerenge hem te ova darežliva (Fil. 2:3, 4; Jak. 1:5). Soske?  Adaleske so o Jehova agjaar stvoringja amen. Iako na siem sovršena, šaj te ova darežliva sar leste.

³ Akana ka dikha nesave pouke tari Biblija baši darežlivost. Ka dikha soske o Jehova tano bahtalo keda siem darežliva. Isto agjaar, ka dikha sar i darežlivost pomožinela amenge te kera i zadača so dengja amen o Jehova hem soske siem bahtale keda siem darežliva. Hem ka kera lafi soske ponadari da valjani te ovel amen akaja osobina.

4, 5. Savo primer dengje amen o Jehova hem o Isus baši darežlivost, hem soske valjani te ova sar lende?

⁴ O Jehova mangela te ova sar leste, hem adaleske tano bahtalo keda siem darežliva (Ef. 5:1). O Jehova mangela o manuša da te ova bahtale. Taro način sar kergja amen hem amari šuži planeta, koja soj pherdi but šuže bukjencar, jasno dikhela pe kaj o Jehova mangela o manuša te oven bahtale (Ps. 104:24; 139:13-16). Adaleske, keda trudinaja amen te kera e javeren bahtale falinaja e Jehova.

⁵ Amen isto agjaar mangaja te ova sar o Isus, kova so dengja amen sovršeno primer bašo adava sar o manuša šaj te oven darežliva. Ov vakergja: „O manušikano Čhavo na alo te služinen leske, nego te služinel hem te del plo životo sar otkupnina bute dženenge“ (Mat. 20:28). O apostol Pavle da pottikningja e hristijanen: „Razmislinen agjaar sar so razmislingja o Hristos Isus... Ov otkažingja pe taro sa so sine le hem ulo sar robo“ (Fil. 2:5, 7). Adaleske, šukar tano te puča amen: „Šaj li panda poviše te džav palo primer e Isuseskoro?“ (Čitin 1. Petrovo 2:21.)

6. Savi pouka dengja amen o Isus preku i paramis bašo milostivo Samarjani? (Dikh i slika ko početok tari statija.)

⁶ O Jehova tano bahtalo keda džaja palo sovršeno primer so dengje amen ov hem o Isus. Akava keraja le keda sikavaja interes e manušenge hem keda rodaja načinija te pomožina lenge. O Isus sikavgja kobor tano važno akava keda vakergja i paramis bašo milostivo Samarjani. (Čitin Luka 10:29-37.) Ov sikavgja ple sledbenikon kaj mora te pomožinen e javerenge, bizi razlika koj tane hem kotar avena. Dali setinea tut soske o Isus vakergja adaja paramis? Adava kergja soske jekh Evrei pučlja le: „Koj tano mlo pašutno?“ Taro odgovor e Isuseskoro sikljovaja kaj valjani te ova darežliva sar o Samarjani ako mangaja te kera e Jehova bahtalo.

7. Sar sikavaja doverba kaj adava so rodela amendar o Jehova tano bašo amaro šukaripe? Objasnin.

⁷ Panda jekh pričina soske valjani te ova darežliva tani povrzimi adalea so slučingja pe ki rajsko gradina. O Satana vakergja kaj o Adam hem i Eva ka oven pobahtale ako na šunena e Jehova hem ako mislinena samo peske. I Eva sine sebično hem manglja te ovel sar o Devel. O Adam sine sebično adalea so manglja poviše te kerel e Evakiri volja nego e Devleskiri (1. Moj. 3:4-6). Adava angja dži ko katastrofalna posledice. Taro akava dikhaja kaj nikoj našti te ovel bahtalo ako tano sebično. Ama, keda siem nesebična hem darežliva, sikavaja doverba kaj adava so rodela amendar  o Jehova tano bašo amaro šukaripe.

8. Soske o Adam hem i Eva valjani sine te mislinen bašo javera?

⁸ Iako o Adam hem i Eva sine korkori ki rajsko gradina, valjani sine te mislinen e javerenge da. Soske? O Jehova dengja len zadača te pheren i Phuv pumare čhavencar hem te keren la raj (1. Moj. 1:28). O Adam hem i Eva valjani sine te mangen lengere čhave so ka bijangjoven te oven bahtale, isto sar o Jehova so mangela sarine te oven bahtale. Zaedno ola valjani sine te keren i Phuv raj. Adaja sine but bari zadača.

9. Soske o manuša ka oven sine bahtale džikote kerena sine i Phuv raj?

⁹ O sovršena manuša ka valjani sine te sorabotinen e Jehovaja te šaj te keren i Phuv raj hem agjaar te ispolninen leskiri namera. Zamislin samo kobor zadovolstvo hem bahtalipe ka anel lenge sine akaja zadača! O Jehova ka del len sine bare bereketija soske nane te oven sine sebična hem ka grižinen pe sine bašo javera.

10, 11. So ka pomožinel amenge te propovedina hem te sikava e manušen bašo čačipe?

¹⁰ Avdive o Jehova dengja amen posebno zadača. Ov mangela te propovedina hem te pomožina e javerenge te oven leskere sluge. Te šaj te kera akaja zadača, valjani čače te interesina amen bašo šukaripe e javerengoro.  Ustvari, ponadari da ka propovedina samo ako isi amen o ispravno motivi — mangipe bašo Jehova hem bašo manuša.

¹¹ O Pavle vakergja kaj ov hem o javera hristijanja ko prvo veko tane „e Devleskere sorabotnikija“ adaleske so propovedinena sine hem sikavena sine e manušen bašo čačipe (1. Kor. 3:6, 9). Amen da avdive šaj te ova „e Devleskere sorabotnikija“ agjaar so darežlivo ka da amaro vreme, sila hem materijalna sredstvija te šaj te kera i zadača koja so dengja amen o Devel. Akava tano bari čest!

12, 13. So mislinea, kola tane o bereketija keda sikavaja e javeren bašo čačipe?

¹² Keda darežlivo daja amaro vreme hem sila te šaj te propovedina adava kerela amen but bahtale. Adava vakerena but phralja hem phenja kola so sine len prilika te vodinen bibliska kursija. But siem bahtale keda dikhaja sar o manuša kolencar so proučinaja tane vooduševime keda haljovena o čačipe tari Biblija. Bahtale siem keda dikhaja sar bajrola lengiri vera, sar kerena promene ko plo životo hem sar počminena te vakeren e javerenge bašo adava so sikljovena. O Isus isto agjaar sine but bahtalo keda o 70 džene so bičhalgja len te propovedinen irangje pe bahtale soske sine len šuže iskustvija (Luka 10:17-21).

¹³ Amare phralja hem phenja ko celo sveto tane bahtale keda dikhena sar o haberi tari Biblija pomožinela e manušenge te meninen plo životo ko pošukar. Na primer, jekh terni biprandimi phen so vikinela pe Ana manglja te kerel poviše ki služba bašo Jehova. * (Dikh i fusnota.) Adaleske selingja pe ko jekh than ki Istočno Evropa kote so valjanena poviše objavitelija. Oj pišingja: „Akate but lokhe šaj te počminen pe bibliska kursija hem adava but svidžinela pe mange. I služba kerela man čače bahtali. Keda avava mange khere, nane man vreme te mislinav bašo mle problemija. Mislinava okolenge kasaja so proučinava — bašo lengere problemija hem sekiracie. Razmislinava sar te ohrabrinav len hem te pomožinav lenge ko praktično način. Čače sium uverimi kaj ’poviše isi bahtalipe keda dela pe nego keda lela pe‘“ (Dela 20:35).

14. Sar šaj te ova bahtale ki služba čak ako o manuša na šunena amen?

¹⁴ Čak ako o manuša na šunena amen keda propovedinaja, šaj ponadari da te ova bahtale soske adalea daja len prilika te šunen o šukar haberi. O Jehova adžikerela amendar te kera i isto buti koja so rodingja la taro Ezekiel: „Vaker lenge mle lafija, bizi razlika dali ka šunen ili na“ (Ezek. 2:7; Isa. 43:10). Znači, bizi razlika sar ka reagirinen o manuša, o Jehova ceninela amaro trudo. (Čitin Evreite 6:10.) Jekh phral baši pli služba vakergja: „Sadingjem, čhivgjem pani, hem  molingjem amen e Jehovaske te kerel te bajrol o interes ko manuša“ (1. Kor. 3:6).

15. Dali valjani te ova darežliva samo ako o manuša ceninena adava? Objasnin.

¹⁵ O Isus mangela te ova darežliva soske adava kerela amen bahtale. Keda siem darežliva, adava ka pottikninel e manušen ola da te oven darežliva. Adaleske ohrabringja amen: „Den, hem o manuša ka den tumen. Ola ka pheren ko tumare šeja šukar merka, nabijmi, tresimi hem previše pherdi. Soske, save merkaja merinena, asavke merkaja ola ka merinen tumenge“ (Luka 6:38). Džangjola pe, nane sarine te ceninen tli darežlivost. Ama čak keda mislinea kaj o manuša na ceninena adava, ponadari da ov darežlivo. Nikogaš na džanea kobor šukar bukja šaj te ikljon tari jekh darežlivo postapka.

16. Sprema kaste valjani te ova darežliva hem soske?

¹⁶ Okola soj tane čače darežliva dena e javerenge bizo te adžikeren lendar nešto. O Isus vakergja: „Keda spreminea večera, kanin e čorolen, e sakaten hem e korolen. Hem ka ove bahtalo, soske nane len solea te iranen tuke“ (Luka 14:13, 14). I Biblija isto agjaar vakerela: „E darežlivo manuše ka ovel le bereketi“, hem „Bahtalo tano okova so pomožinela e čoroleske“ (Izr. 22:9; Ps. 41:1). Valjani te ova darežliva soske čače mangaja te pomožina e javerenge.

17. Ko kola načinija šaj te ova darežliva?

¹⁷ Keda o Pavle citiringja e Isuseskere lafija: „Poviše isi bahtalipe keda dela pe nego keda lela pe“, ov na mislingja samo ko dejbe materijalna bukja. Šaj isto agjaar e manušenge te da ohrabruvanje, sovetija tari Biblija hem praktično pomoš (Dela 20:31-35).  Ple lafencar hem postapkencar, o Pavle sikavgja amenge kobor tano važno darežlivo te sikava mangipe hem vnimanie e javerenge hem spremno te da amaro vreme hem sila baši lende.

18. So vakerena but istražuvačija baši darežlivost?

¹⁸ Adala so istražinena sar ponašinena pe o manuša isto agjaar ale dži ko zaklučok kaj o dejbe kerela e manušen bahtale. Sprema jekh naučno statija, o manuša vakerena kaj osetinena pe but pobahtale keda kerena šukar bukja bašo javera. O istražuvačija vakerena kaj keda pomožinaja e javerenge, amaro životo isi le smisla hem cel. Adaleske, ola but puti dena predlog o manuša te učestvujnen ki nesavi dobrovolno aktivnost soske agjaar ka oven posaste hem pobahtale. Ni hari na siem iznenadime so ale dži ko asavko zaklučok, soske amaro Stvoriteli so grižinela pe amenge, o Jehova, panda but angleder vakergja kaj o dejbe kerela amen bahtale (2. Tim. 3:16, 17).

19, 20. Soske mangea te ove darežlivo?

¹⁹ Nane lokho te ova darežliva soske živinaja ko sveto kote so o manuša mislinena samo peske. Ama, o Isus setinkergja amen kaj o duj najbare zapovedija tane te manga e Jehova celo vilea, dušaja, gogjaja hem silaja, hem te manga amare pašutne sar korkori amen (Mar. 12:28-31). Ki akaja statija dikhlem kaj adala so mangena e Jehova trudinena pe te postapinen sar leste. O Jehova hem o Isus tane darežliva hem pottikninena amen te ova sar lende soske džanena kaj samo tegani ka ova čače bahtale. Ako trudinaja amen te da amendar sa ki služba bašo Jehova hem ako siem darežliva amare pašutnencar, slavinaja e Jehova hem adava tano bašo amaro hem e javerengoro šukaripe.

²⁰ Sigurno tu više dea tutar sa te ove darežlivo hem te pomožine e javerenge, posebno e phralenge hem e phenjenge (Gal. 6:10). Ako ponadari da kerea adava, o javera ka mangen tut hem ka ceninen tut, a tu ka ove bahtalo. Ki Biblija pišinela: „O darežlivo manuš ka ovel uspešno, hem sekova manuš so spremno dela e javerenge te pien pani leske da ka ovel dendo te piel pani“ (Izreki 11:25). Ko amaro životo hem ki služba isi but načinija sar šaj te sikava kaj siem nesebična, ljubezna hem darežliva. Bašo akava ka kera lafi ki javer statija.