1. Koj pomožingja te kerel pe o nevo sobranie ko Filipi?

KEDA o apostol Pavle, o Sila, o Luka hem o Timotej resle ki diz Filipi, adari arakhle bute manušen so interesingje pe bašo šukar haberi. Akala štar revna phralja pomožingje adari te kerel pe sobranie hem o neve phralja hem phenja verojatno počmingje te kheden pe ko kher e Lidijakoro, koja so sine but gostoprimlivo phen (Dela 16:40).

2. Save phare situacijaja soočingja pe adava sobranie?

² Palo kratko vreme o nevo sobranie soočingja pe phare situacijaja. O Satana pottikningja e manušen so mrzinena sine o čačipe te protivinen pe but bašo propovedibe akale verna hristijanengoro. O Pavle hem o Sila sine astarde, marde kaštencar hem frdime ko zatvor. Otkeda sine mukhle taro zatvor, ola posetingje e neve učenikon hem ohrabringje len. Palo adava, o Pavle, o Sila hem o Timotej gele peske tari diz, a o Luka verojatno ačhilo adari. So slučingja pe e neve sobraniea? O Jehova pomožingja lenge ple duhoja hem ola ponadari da revno služingje leske (Fil. 2:12). E Pavle sine le šukar pričina te dičinel pe lencar!

3. Sprema Filipjanite 1:9-11, bašo so molingja pe o Pavle?

³ Okolu deš berš pokasno, o Pavle pišingja pismo e sobranieske ko Filipi. Džikote čitinea adava pismo šaj jasno te dikhe kobor baro mangipe sine e Pavle sprema o phralja hem o phenja. Ov pišingja lenge: „Falinena mange sarine but, mangava tumen isto sar so mangela tumen o Hristos Isus“ (Fil. 1:8). Isto agjaar,  vakergja lenge kaj molinela pe baši lende. Molinela sine e Jehova te pomožinel lenge lengoro mangipe sa poviše te bajrol, te šaj te proceninen soj tano najvažno, te oven bizi maana, te na sopkinen e javeren hem ponadari da te keren pravedna bukja. Amen da avdive šaj but te sikljova taro e Pavleskere ohrabruvačka lafija. (Čitin Filipjanite 1:9-11.) Ki akaja statija ka dikha podetalno akala sovetija hem ka dikha sar šaj te primenina len.

4. a) Sprema 1. Jovanovo 4:9, 10, sar sikavgja o Jehova plo mangipe sprema amende? b) Kobor valjani te manga e Devle?

⁴ O Jehova sikavgja plo baro mangipe sprema amende adalea so bičhalgja ple Čhave ki Phuv te merel bašo amare grevija. (Čitin 1. Jovanovo 4:9, 10.) E Devleskoro nesebično mangipe pottikninela amen te manga le (Rim. 5:8). Kobor valjani te manga e Jehova? O Isus odgovoringja ko akava pučibe keda vakergja jekhe fariseeske: „Mang e Jehova, tle Devle, sa tle vilea, sa tle dušaja hem sa tle gogjaja“ (Mat. 22:36, 37). Valjani te manga e Devle celo vilea hem adava mangipe valjani sekova dive te bajrol sa poviše. O Pavle vakergja e Filipjanenge kaj lengoro mangipe valjani „sa poviše hem poviše te bajrol“. Tegani, sar šaj amen te bajrara amaro mangipe sprema o Devel?

5. Sar šaj amaro mangipe sa poviše te bajrol?

⁵ Te šaj te manga e Devle, mora šukar te pendžara le. Ki Biblija pišinela: „Koj na sikavela mangipe na pendžarela e Devle, soske o Devel tano mangipe“ (1. Jov. 4:8). O apostol Pavle objasningja kaj kobor poviše džanaja o čačipe bašo Devel hem haljovaja sar dikhela ko bukja doborom poviše ka bajrol amaro mangipe sprema leste (Fil. 1:9). Keda počmingjem te proučina i Biblija, zamanglem e Jehova iako na džanaja sine but baši leste. Ama, sar so nakhela sine o vreme kobor poviše sikljovaja sine bašo Jehova doborom poviše bajrola sine amaro mangipe sprema leste. Adaleske tano but važno redovno te proučina e Devleskoro Lafi hem hor te razmislina baši leste! (Fil. 2:16).

6. Sprema 1. Jovanovo 4:11, 20, 21, ko so pottikninela amen amaro mangipe sprema o Devel?

⁶ O baro mangipe so isi le e Devle sprema amende pottikninela amen te manga amare phralen hem phenjen. (Čitin 1. Jovanovo 4:11, 20, 21.) Šaj mislinaja kaj ka ovel amenge lokho te manga len adaleske so služinaja e Jehovaske hem trudinaja amen te ova sar leste. Isto agjaar, džaja palo e Isuseskoro primer kova so doborom but manglja amen so dengja plo životo amenge. Sepak, ponekogaš šaj te ovel amenge pharo te šuna i zapoved te manga amen jekh jekhea. Te dikha jekh primer taro sobranie ko Filipi.

7. So sikljovaja taro e Pavleskoro sovet so dengja le e Evodijake hem e Sintihijake?

⁷ I Evodija hem i Sintihija sine revna phenja kola so sorabotinena sine ki služba e Pavlea. Ama, šaj adale phenjen nesavo vreme sine len seriozno problemi maškar lende kova so kergja te ruminen plo amalipe. Ko pismo so bičhalgja le ko sobranie kote so služinena sine akala duj phenja, o Pavle spomningja lengere anava hem dengja len konkretno sovet „te oven len ista misle“ (Fil. 4:2, 3). O Pavle mislingja kaj mora isto agjaar te vakerel celo sobranieske da: „Keren sa bizo te žalinen tumen hem te akošen tumen“ (Fil. 2:14). Sigurno, akala direktna sovetija so dengja len o Pavle pomožingje adale verna phenjenge, ama isto agjaar celo sobranieske da te bajraren plo mangipe maškar peste.

8. a) Soske ponekogaš šaj te ovel amenge pharo te manga amare phralen hem phenjen? b) So ka pomožinel amenge te na šudrol amaro mangipe sprema o phralja?

 ⁸ Amenge da ponekogaš šaj te ovel but pharo te manga e phralen hem e phenjen, soske slično sar i Evodija hem i Sintihija, obično polokhe amenge te koncentririna amen ko lengere slabostija. Sarine grešinaja sekova dive. Ako razmislinaja samo bašo e javerengere greške, amaro mangipe sprema lende ka šudrol. Na primer, šaj ka nervirina amen ako jekh phral bistrela te pomožinel amen keda čistinaja i dvorana palo sostanok. Ako palo adava počminaja te razmislina bašo sa leskere javera greške, adava panda poviše ka nervirinel amen hem amaro mangipe sprema leste ka tiknjol. Ako arakhljovaja ki slično situacija, ka ovel šukar te razmislina baši akaja buti: o Jehova dikhela hem amare hem amare phraleskere slabostija. Ama, iako dikhela akala slabostija, ov ponadari da mangela amare phrale, a mangela amen da. Adaleske, mangaja te sikava mangipe sar o Jehova hem te koncentririna amen ko amare phralengere hem phenjengere šukar osobine. Keda taro vilo trudinaja amen te manga amare phralen hem phenjen, keraja pozoralo amaro jekhipe (Fil. 2:1, 2).

9. Kola tane nesave taro najvažna bukja bašo kola so kergja lafi o Pavle ko plo pismo dži ko Filipjanja?

⁹ O sveti duh vodingja e Pavle te vakerel e phralenge ko Filipi „te proceninen soj tano najvažno“ (Fil. 1:10). Akava sovet važinela amenge da avdive. E Devleskere slugenge, nesave taro najvažna bukja tane te slavinel pe e Devleskoro sveto anav, te ispolninel pe leskiri namera hem te ovel mir hem jekhipe ko sobranie (Mat. 6:9, 10; Jovan 13:35). Ako akala bukja amenge ko prvo than ko životo, sikavaja kaj mangaja e Jehova.

10. So mora te kera te šaj o Jehova te dikhel ki amende sar manuša bizi maana?

¹⁰ O Pavle isto agjaar vakergja kaj mora te ova bizi maana. Akava na značinela kaj valjani te ova sovršena. Našti te ova sovršena ki apsolutno smisla sar o Jehova. Ama o Jehova ka dikhel ki amende sar manuša bizi maana ako daja sa amendar te bajrara amaro mangipe hem ako trudinaja amen te procenina soj tano najvažno. Jekh način sar sikavaja amaro mangipe tano agjaar so keraja sa so šaj te na sopkina e javeren.

11. Soske na valjani te sopkina e javeren?

¹¹ O sovet te na sopkina e javeren tano but seriozno predupreduvanje. Sar šaj te sopkina nekas? Adava šaj te kera adalea savi zabava ka birina, sar ka urava amen, pa čak savi buti ka kera. Šaj na keraja nešto so o Jehova osudinela. Ama, ako amare odlukaja povredinaja nekaskiri sovest hem adalea sopkinaja le, tegani adaja tani seriozno buti. O Isus vakergja kaj pošukar ka ovel te obesinen amenge baro bar ki men hem te frden amen ko more nego te sopkina nekas taro leskere bakhre! (Mat. 18:6).

12. So sikljovaja taro primer jekhe bračno pareskoro soj pionerija?

¹² Primetin ko kova način o Martini hem i Renata *, bračno pari kola so služinena sar pionerija, primeningje e Isuseskere lafija. Ko lengoro sobranie sine o bračno pari o David hem i Suzana, kola so sigende krstingje pe. Akala neve hristijanja barile ki familija kote so sine but strogo vospitime hem mislinena sine kaj e Devleskere sluge na valjani te džan ko kino, čak ni te dikhen filmija kola soj prifatliva e hristijanenge. Adaleske sine šokirime keda šungje kaj o Martini hem i Renata gele ko kino. Otkeda šungje bašo adava, o Martini hem i Renata odlučingje te na džan ko  kino sa džikote o David hem i Suzana na oblikujnena pli sovest te šaj pošukar te haljoven soj ispravno a soj pogrešno (Evr. 5:14). Agjaar, o Martini hem i Renata sikavgje kaj mangena e Davide hem e Suzana (Rim. 14:19-21; 1. Jov. 3:18).

13. Sar šaj amen te ova i pričina nekoj te kerel grevo?

¹³ Javer način sar šaj te sopkina nekas tano agjaar so amen ka ova i pričina nekoj te kerel grevo. Sar šaj te slučinel pe adava? Zamislin tuke akaja situacija. Otkeda jekh interesenti but vreme boringja pe ple navikaja te piel alkohol, ov uspejngja te čhinavel e pijbaja. Ov haljola kaj leske tano najšukar nikogaš palem te na piel. Uspejnela te kerel bare promene ko plo životo hem ko krajo krstinela pe. Palo nesavo vreme, jekh phral kaninela le ko bešibe hem nudinela leske alkohol. Šukar nameraja o phral vakerela leske: „Akana sian e Devleskoro sluga hem isi tut e Jehovaskoro duho. Jekh taro osobine so avena taro sveti duh tani i samokontrola. A ako isi tut samokontrola, na bi ovela tuke problemi te pie hari alkohol“. Ka ovel but tažno ako o nevo phral šunela akava pogrešno sovet hem palem ovela zavisno taro alkohol!

14. Sar pomožinena amenge o sostanokija te primenina o sovetija taro Filipjanite 1:10?

¹⁴ O sostanokija pomožinena amenge ko but načinija te primenina o sovetija taro Filipjanite 1:10. Prvo, i duhovno hrana so dobinaja la ko sostanokija pomožinela amenge te haljova soj tano najvažno e Jehovaske. Dujto, šunaja sar te primenina adava  so sikljovaja te šaj te ova bizi maana. Hem trito, pottikninaja amen „te sikava mangipe hem te kera šukaripe“ (Evr. 10:24, 25). Kobor poviše siem ohrabrime taro amare phralja, doborom poviše ka bajrol amaro mangipe sprema o Devel hem sprema amare phralja. Ako celo vilea mangaja e Jehova hem amare phralen, ka kera sa so šaj te na sopkina nijekhe phrale ili phenja.

15. So značinela te kera sa poviše pravedna bukja?

¹⁵ O Pavle taro vilo molingja pe bašo Filipjanja „te keren sa poviše pravedna bukja“ (Fil. 1:11). Sigurno, ko „pravedna bukja“ sine vklučimo lengoro mangipe sprema o Jehova hem sprema leskoro narodo. Ko adava isto agjaar sine vklučimo te vakeren e javerenge baši pli vera ko Isus hem baši šuži nadež. Ko Filipjanite 2:15 tani koristimi panda jekh sporedba: „Svetinena sar svetlo ko sveto“. Akaja sporedba odgovorinela soske o Isus bašo ple učenikija vakergja kaj tane „o svetlo e svetoskoro“ (Mat. 5:14-16). Isto agjaar, ov zapovedingja ple sledbenikonge te keren učenikija hem vakergja lenge: „Ka oven mle svedokija... ko najdur thana ki phuv“ (Mat. 28:18-20; Dela 1:8). Amen keraja „pravedna bukja“ keda daja amendar sa te učestvujna ki akaja važno zadača.

16. Sar taro Filipjanite 1:12-14 dikhjola pe kaj šaj te svetina sar svetlo čak ko phare okolnostija? (Dikh i slika tari naslovno strana.)

¹⁶ Bizi razlika ko save okolnostija siem, amen šaj te svetina sar svetlo ko akava sveto. Ponekogaš, o bukja so dikhjona kaj čhinavena amen te vakera o šukar haberi, šaj te oven prilika te propovedina. Na primer, o apostol Pavle sine phanlo ko jekh kher ko Rim keda pišingja o pismo e Filipjanenge. Ama, iako o Pavle sine phanlo, ov na čhinavgja te propovedinel e čuvarenge hem okolenge so avena sine te posetinen  le. O Pavle revno propovedinela sine ko asavke okolnostija hem adalea ohrabringja e phralen „bizi dar [te] vakeren bašo e Devleskoro Lafi“. (Čitin Filipjanite 1:12-14; 4:22.)

17. Sar nesave phralja hem phenja uspejnena te propovedinen čak keda tano pharo?

¹⁷ But taro amare phralja hem phenja sikavena isto hrabrost sar o Pavle. Ola živinena ko phuvja kote soj zabranimo te propovedinel pe javno ili taro kher ko kher hem adaleske arakhena javera načinija te propovedinen (Mat. 10:16-20). Ki jekh asavki phuv, jekh pokrainsko nadgledniko dengja predlog sekova objaviteli te propovedinel ko plo „podračje“, javere lafencar e familijake, e komšienge, e součenikonge, e kolegenge hem okolenge kas so džanena. Duje beršenge, o broj e sobraniengoro ki adaja pokraina but barilo. Šaj na živinaja ki phuv kote so amare aktivnostija tane zabranime. Ama, šaj te sikljova važno pouka taro primer akale snaodliva phralengoro hem phenjengoro — sekogaš te roda načinija te propovedina ki sekoja prilika, uverime kaj o Jehova ka del amen i sila koja so valjani amenge te šaj te nakhava sekoja prečka (Fil. 2:13).

18. So valjani te ova odlučna te kera?

¹⁸ Ko akava važno vreme, te ova odlučna te primenina o sovetija soj tane pišime ko e Pavleskoro pismo dži ko Filipjanja. Mora te trudina amen te procenina soj tano najvažno, te ova bizi maana, te na sopkina e javeren hem te kera pravedna bukja. Tegani amaro mangipe sa poviše ka bajrol hem ka falina amare Dade e Jehova kova so grižinela pe amenge.