1. Soske o krstibe tano but važno? (Dikh i slika ko početok tari statija.)

SEKOVA berš but džene so proučinena i Biblija krstinena pe. But džene lendar tane tinejdžerija, a čak potikne da. Šaj lengere roditelija tane e Jehovaskere svedokija. Dali tu da sian jekh lendar? Ako oja, tegani kergjan but šukar buti. Sekova hristijani valjani te krstinel pe te šaj te ovel spasimo hem te živinel večno (Mat. 28:19, 20; 1. Pet. 3:21).

2. Soske na valjani te dara te de lafi e Jehovaske kaj ka služine leske?

² O krstibe anela but bereketija, ama isto agjaar odgovornostija. Ki savi smisla? Ko dive keda krstingjan tut, o phral so ikergja o govor bašo krstibe pučlja: „Dali preku e Isuseskiri žrtva kaingjan tut bašo tle grevija hem dali vetingjan e Jehovaske kaj ka kere leskiri volja?“ Tu dengjan lafi kaj ka mange e Jehova hem kaj ka ovel tuke najvažno te kere leskiri volja. Dali valjani te kaine tut so dengjan asavko seriozno vetuvanje? Ni najhari! Nikogaš nane te kaine tut so mukhljan o Jehova te  vodinel tut ko životo. Okola so na pendžarena e Jehova tane delo taro e Satanaskoro sveto. O Beng na mangela len isto sar so na mangela tut. Ov ka ovel bahtalo ako tu našavea i nadež te živine zasekogaš adaleske so biringjan te ove leskiri strana hem otfrlingjan e Jehova.

3. Save bereketija dobingjan taro Jehova otkeda dengjan lafi kaj ka služine leske?

³ Razmislin kobor but bereketija dengja tut o Jehova adaleske so dengjan lafi kaj ka služine leske hem krstingjan tut. Otkeda kergjan adava, šaj te ovel tut doverba hem te vakere: „O Jehova tano tari mli strana; nane te darav. So šaj te kerel mange manuš?“ (Ps. 118:6). Nane pobari čest te ove tari e Devleskiri strana hem te džane kaj ov tano zadovolno tutar.

4, 5. a) Soske šaj te vakerel pe kaj tlo amalipe e Jehovaja tani tli odgovornost? b) Save problemija isi e Devleskere slugen bizi razlika kobor berša isi len?

⁴ Ko tlo amalipe e Jehovaja našti te dikhe sar „familijarno paketi“ bašo mobilno telefoni kova so platinena le tle roditelija. Čak ako panda živinea tle roditelencar, tlo amalipe e Jehovaja tano tli odgovornost. Soske tano važno te na bistre akava? Nikoj amendar našti te džanel sar ka ovel ispitimi amari vera. Na primer, šaj krstingjan tut angleder te ove tinejdžeri. Ama, akana keda khuvgjan ko tinejdžerska berša, šaj isi tut neve čuvstvija hem neve problemija. Jekh tinejdžerka vakergja: „Jekhe tikne čhaveske obično nane te ovel pharo soj tano e Jehovaskoro svedoko samo adaleske so na lelja kotor tari torta bašo rodenden ki škola. Ama, nekobor berša palo adava keda i želba bašo seks ovela posilno, ov ili oj valjani te oven cvrsto uverime kaj sekogaš tano najšukar te šunen e Jehovaskere zakonija“.

⁵ Nane samo o terne adala so isi len neve okolnostija hem problemija. Čak o vozrasna so krstinena pe, lengiri vera šaj te ovel ispitimi ko način so na adžikerena. Šaj te ovel len problemija ko brako, sastipaja ili ki buti. Bizi razlika kobor berša isi amen, sekova jekh amendar valjani te ačhol verno e Jehovaske ko različna situacie (Jak. 1:12-14).

6. a) So na valjani te bistre bašo tlo lafi so dengjan e Devleske? b) So šaj te sikljove taro Filipjanite 4:11-13?

⁶ Ako mangea te ačhove verno e Jehovaske, nikogaš ma bistre kaj dengjan lafi te služine e Devleske bizi razlika so ka slučinel pe. Akava značinela kaj dengjan lafi e Vladeteleske upro celo univerzum kaj ponadari da ka služine leske čak ako tle amala ili roditelija čhinavena te keren adava (Ps. 27:10). Ki sekoja situacija šaj te moline e Jehova te pomožinel tuke te ikere tut ko tlo lafi so dengjan le. (Čitin Filipjanite 4:11-13.)

7. So značinela te de tutar sa te šaj te ove spasimo taro Devel?

⁷ O Jehova mangela te ove leskoro amal. Ama, valjani te trudine tut te ikere adava amalipe zoralo hem te de tutar sa te šaj te ove spasimo. Ko Filipjanite 2:12 pišinela: „Den tumendar sa te oven spasime“. Adava značinela kaj valjani šukar te razmislina sar šaj te ačhova paše e Jehovaja hem te ova leske verna bizi razlika so ka ovel. Na valjani te ovel amen preterano doverba ki amende.  Čak nesave so beršencar služingje e Devleske na ačhile verna. Kola bukja šaj te pomožinen tuke te de tutar sa te šaj te ove spasimo?

8. Soj tano vklučimo ko lično proučibe hem soske tano adava važno?

⁸ Te šaj te ova amala e Jehovaja, valjani te šuna le hem te kera lea lafi. Glavno način sar šunaja e Jehova tano agjaar so proučinaja i Biblija. Ko adava tano vklučimo te čitina e Devleskoro Lafi hem o bibliska publikacie hem te razmislina bašo adava so čitinaja. Ama, na valjani te trudina amen samo ki godi te pamtina nesave informacie isto sar keda spreminaja amen bašo nesavo ispit školake. Namesto adava, o proučibe tano sar te cide ko jekh interesno drumo kote so istražinea hem arakhea neve bukja bašo Jehova. Agjaar, ka ove popaše e Devlea hem ov da ka ovel popaše tuja (Jak. 4:8).

9. So pomožingja tuke hor te proučine i Biblija?

⁹ E Jehovaskiri organizacija dela but bukja kola so šaj te pomožinen tuke hor te proučine. Na primer, ki jw.org ki makedonsko čhib, ko delo „Tinejdžeri“ isi rubrika „Oživej si gi bibliskite nastani“ koja tani kerdi te pomožinel tuke te primenine adava so sikljovea taro bibliska izveštaija. Isto agjaar, ki amari internet-stranica ki makedonsko čhib šaj te arakhe o rabotna listija bašo lil Što navistina uči Biblijata?, kola so šaj te pomožinen tuke te bajrare  tli vera hem te džane sar te objasnine e javerenge ko so verujnea. Šaj te arakhe javera da idee bašo tlo lično proučibe ki statija „Mladite prašuvaat — kako da uživam vo čitanjeto na Biblijata?“ koja so iklili ko Razbudete se! taro april 2009 berš. O proučibe hem o hor razmislibe šaj but te pomožinen tuke te trudine tut te dobine o spasenie. (Čitin Psalm 119:105.)

10. Soske tano but važno jekh krstimo sluga e Devleskoro te molinel pe?

¹⁰ Keda proučinaja i Biblija, amen šunaja e Jehova, a keda molinaja amen, keraja lea lafi. Na valjani te mislina kaj i molitva tani obično rituali ili nesavi amajlija bašo bahtalipe. Namesto adava, i molitva tani čačutni komunikacija amare Stvoritelea. Zamislin tuke, o Jehova mangela te šunel so isi tut te vakere leske! (Čitin Filipjanite 4:6.) Keda ka ovel tuke pharo tari bilo savi pričina, šun o sovet tari Biblija: „Frde tlo pharipe e Jehovaske“ (Ps. 55:22). But phralja hem phenja šaj te vakeren tuke kaj akava sovet čače pomožingja lenge — a šaj te pomožinel tuke da!

11. Soske valjani sekogaš te blagodarina amen e Jehovaske?

¹¹ Ama, na valjani te molina amen samo keda mangaja o Jehova te pomožinel amenge. I Biblija ohrabrinela amen: „Oven blagodarna“ (Kol. 3:15). Ponekogaš, doborom but siem zafatime amare problemencar so na dikhaja o šuže bukja so isi amen. Adaleske probin akava: Sekova dive razmislin bašo najhari trin bukja kolenge so sian blagodarno hem palo adava vaker e Jehovaske kaj sian blagodarno bašo adava. Jekh tinejdžerka so vikinela pe Abigejl, koja so krstingja pe keda sine la 12 berš, vakerela: „Mislinava kaj nikoj javer ko univerzum na zaslužinela te blagodarina leske sar o Jehova. Valjani te blagodarina leske ki sekoja prilika hem bašo sekova poklon so dengja le amenge“. Ponekogaš i Abigejl pučela pe jekh pučibe so šungja le jekh puti: „Ako uštava tajsa hem isi man samo adala bukja kolenge so blagodaringjum man e Jehovaske jekh dive angleder, kobor bukja ka oven man?“ * (Dikh i fusnota.)

12, 13. Soske tano važno te razmisline bašo adava sar o Jehova pomožingja tuke lično?

¹² O Jehova pomožingja e Davideske te istrajnel ko but phare situacie. Adaleske, o David šaj sine taro lično iskustvo te vakerel: „Probinen hem dikhen kobor tano šukar o Jehova! Bahtalo tano okova manuš koleske so ov tano than garajbaske“ (Ps. 34:8). Akava stiho sikavela amenge kobor tano važno korkori amen te osetina e Jehovaskoro šukaripe. Keda čitinea i Biblija hem o bibliska publikacie hem keda sian prisutno ko  sostanokija, sikljovea sar o Devel pomožingja e javerenge te ačhoven verna. Ama, sar ovea sa popaše e Jehovaja, važno tano te haljove sar o Jehova pomožinela tuke. Sar tu osetingjan e Jehovaskoro šukaripe?

¹³ Sekova sluga e Devleskoro osetingja e Jehovaskoro šukaripe ko posebno način. Ov vikingja sekole jekhe amendar te ovel paše lea hem leskere Čhavea. O Isus vakergja: „Nikoj našti te avel ki mande, osven ako na anela le mlo Dad, kova so bičhalgja man“ (Jovan 6:44). Dali mislinea kaj akala lafija važinena tuke da? Ili šaj mislinea tuke: „O Jehova angja samo mle roditelen, a me samo džava pali lende“. Ma bistre, keda dengjan lafi kaj ka služine e Jehovaske hem krstingjan tut, sikavgjan kaj sian paše lea. I Biblija vakerela: „Ako nekoj mangela e Devle, le o Devel pendžarela le“ (1. Kor. 8:3). Sekogaš cenin o than so dengja tut o Jehova ki leskiri organizacija.

14, 15. Sar šaj i služba te pomožinel tuke te bajrare tli vera?

¹⁴ O šukaripe e Jehovaskoro osetinea le isto agjaar keda ov dela tut hrabrost te kere lafi baši tli vera, sajekh dali ki služba ko podračje ili ki škola. Šaj tuke pharo te propovedine tle součenikonge soske daraja sar ka reagirinen. Šaj posebno daraja te kere lafi baši tli vera angli pobari grupa manuša. So šaj te pomožinel tuke?

¹⁵ Prvo, razmislin soske sian uverimo ko adava so sikljovea tari Biblija. Šaj te koristine o rabotna listija proučibaske so isi ki jw.org. Ola šaj te pomožinen tuke te razmisline ko so verujnea, soske verujnea ko adava hem sar šaj e javerenge te objasnine adava. Keda ka ove čače uverimo hem šukar spremimo, ka mange te kere lafi bašo Jehova (Erem. 20:8, 9).

16. So šaj te del tut hrabrost te kere lafi baši tli vera?

¹⁶ Čak ako šukar spreminea tut, šaj ka ovel tut trema keda ka valjani te objasnine e javerenge ko so verujnea. Jekh phen so isi la 18 berš, a krstingja pe ko 13 berš, vakerela: „Džanava ko so verujnava, ama ponekogaš pharo mange te vakerav adava so mislinava“. Adaleske, oj probinela te kerel lafi bašo čačipe ko jekh smireno hem prirodno način. Oj vakerela: „Mle součenikija slobodno kerena lafi bašo adava so kerena. Me da valjani te osetinav man slobodno te kerav o isto. Adaleske, džikote keraja lafi, vakerava nešto sar na primer: ’Angleder nesavo dive, proučinava sine i Biblija nekasaja hem...‘ A palo adava vakerava adava so mangljum te vakerav. Iako na počminaja odma te kera lafi baši Biblija, but puti o javera interesinena pe hem ponekogaš pučena man so kerava keda proučinava e javerencar i Biblija. Kobor poviše koristinava akava pristap, doborom mange polokho te kerav lafi bašo čačipe. A ko krajo, sekogaš osetinava man but šukar!“

17. So javer šaj te pomožinel tuke te kere lafi e javerencar baši tli vera?

¹⁷ Keda o javera ka dikhen kaj čače  grižinea tut lenge hem poštujnea len, ka ovel lenge polokho te poštujnen tut hem tli vera. I Olivija, kola so isi la 17 berš hem krstingja pe angleder te ovel tinejdžerka, vakerela: „Sekogaš darava sine kaj, ako kerava lafi baši Biblija, o javera ka mislinen kaj sium fanatiko“. Ama, palo adava oj počmingja te dikhel pojaver ko bukja. Namesto te koncentririnel pe samo ki pli dar, oj razmislingja: „But terne na džanena ništo bašo e Jehovaskere svedokija. Taro sa e Jehovaskere svedokija, ola avena ko kontakt samo amencar. Adaleske, o način sar ponašinaja amen šaj te vlijajnel upro adava sar ka reagirinen. So ako siem ladžutne, daraja, pharo amenge te kera lafi baši amari vera ili kočingjovaja tari dar keda propovedinaja? Tegani šaj te mislinen peske kaj ladžaja so siem e Jehovaskere svedokija. Šaj čak nane te ponašinen pe amencar šukar soske nane amen doverba ki amende. Ama, ako siem smirena hem uverime keda keraja lencar lafi baši amari vera, isto sar so keraja lafi bašo javere teme, tegani pobari tani i verojatnost kaj ka poštujnen amen“.

18. So valjani te kere te šaj te de tutar sa te ove spasimo?

¹⁸ Sar so dikhlem, te de tutar sa te ove spasimo tani bari odgovornost. Te šaj te kere adava, valjani te čitine e Devleskoro Lafi hem te razmisline bašo adava so čitinea, te moline tut e Jehovaske hem hor te razmisline sar ov pomožingja tuke. Agjaar ka ove pouverimo kaj o Jehova tano tlo amal. A akava ka ohrabrinel tut te kere e javerencar lafi baši tli vera. (Čitin Psalm 73:28.)

19. Soske vredinela te de tutar sa te ove spasimo?

¹⁹ O Isus vakergja: „Ako nekoj mangela te avel pali mande, neka otkažinel pe pestar hem neka lel plo stubo mučibaske hem neka avel pali mande“ (Mat. 16:24). Ako mangela te džal palo Isus, sekova sluga e Devleskoro valjani te del lafi e Jehovaske kaj ka služinel leske celo plo životo hem te krstinel pe. Ama, akava tano samo početok taro jekh but šužo životo panda avdive kova so ingarela dži ko večno životo ko e Devleskoro nevo sveto. Adaleske, de tutar sa te ove spasimo!