I DAJANA isi la poviše taro 80 berš, hem ko posledna nekobor berša sine la but phare momentija. Lakoro rom, kova so sine nasvalo taro Alchajmer hem sine ko domi bašo phure manuša, mulo. Isto agjaar, mule lakere duj čhave, a late sine la rako ki čuči. Keda o phralja hem o phenja dikhena e Dajana ko sostanokija hem ki služba, oj tani sekogaš bahtali iako sine la phare situacie ko životo.

O Džon sine patuvačko nadgledniko poviše taro 43 berš hem but mangela sine adaja služba. Našti sine te zamislinel peske te kerel nešto javer. Ama, mora sine te čhinavel akale službaja soske valjani sine te grižinel pe nekaske tari pli familija so sine nasvalo. Keda dikhena e Džone ko kongresija o phralja hem o phenja so pendžarena le, primetinena kaj ov na promeningja pe. Ov panda tano but bahtalo.

Sar šaj i Dajana hem o Džon te oven bahtale ko asavke okolnostija? Sar šaj nekoj so isi le but pharipa te ovel bahtalo? Sar šaj jekh manuš te ovel bahtalo iako mora te čhinavel nesavi teokratsko zadača koja so mangela la but? I Biblija dela amen o odgovor. Ki late pišinela: „O pravedno manuš ka arakhel bahtalipe ko Jehova“ (Ps. 64:10). Akava šaj pošukar te haljova ako džanaja so anela amenge privremeno, a so trajno bahtalipe.

Nesave bukja skoro sekogaš kerena amen bahtale. Na primer, zamislin tuke kobor tane bahtale duj terne soj tane zaljubime hem panda hari ka khuven ko brako. Ili zamislin tuke kobor tano nekoj bahtalo keda ovela roditeli ili keda nekoj dobinela nevi zadača ki služba e Jehovaske? Sa akala bukja kerena amen bahtale soske tane poklonija taro Jehova. Ov kergja o brako, dengja amen sposobnost te oven amen čhave hem dela amen zadače ki pli organizacija (1. Moj. 2:18, 22; Ps. 127:3; 1. Tim. 3:1).

Ama, nesave bukja šaj te anen privremeno bahtalipe. Žalno tano adava so jekh taro bračna partnerija šaj te kerel preljuba ili te merel (Ezek. 24:18; Osi. 3:1). Nesave čhave šaj te na šunen pumare roditelen hem e Devle, pa čak te oven isklučime. Na primer, o čhave e Samoileskere na služingje e Jehovaske ko ispravno način. O David sine le but  problemija ki familija soske kergja preljuba e Vitsaveaja (1. Sam. 8:1-3; 2. Sam. 12:11). Keda ovena akala bukja, ola na anena bahtalipe, nego bari žal hem dukh.

Slično ko adava, ponekogaš nesave phralja hem phenja mora sine te čhinaven nesave teokratsko zadačaja adaleske so sine len problemija sastipaja, sine len obvrske ki familija ili sine promene ki organizacija. But džene lendar phenena kaj falinela lenge o bahtalipe so anela lenge sine adaja zadača.

Akava jasno sikavela kaj o bahtalipe so anena akala bukja šaj te ovel privremeno. Sprema adava, dali nešto šaj te anel amenge bahtalipe kova so trajnela čak keda isi amen phare momentija ko životo? Sigurno isi, adaleske so o Samoil, o David hem o javera na našavgje plo bahtalipe čak keda sine len bare problemija.

O Isus džanela sine soj čačutno bahtalipe. I Biblija vakerela kaj angleder te avel ki Phuv, ov sine bahtalo „anglo [Jehova] celo vreme“ (Izr. 8:30). Ama, otkeda alo ki Phuv, ponekogaš sine le pharipa. Sepak, o Isus sine bahtalo keda kerela sine ple Dadeskiri volja (Jovan 4:34). A so ulo lea nekobor saatija angleder te merel keda sine le bare dukha? Ko Evreite 12:2 pišinela: „Bašo bahtalipe so sine angli leste, trpingja muke ko stubo“. Znači, taro Isus šaj te sikljova but bašo čačutno bahtalipe. Akana ka dikha duj bukja.

Jekh puti, o Isus bičhalgja 70 učenikija te propovedinen. Keda irangje pe ki leste, ola sine bahtale soske kerena sine čudija, čak paldena sine demonen. Ama, o Isus vakergja lenge: „Ma oven bahtale adaleske so o lošna duhija šunena tumen, nego oven bahtale so tumare anava tane pišime ko nebo“ (Luka 10:1-9, 17, 20). Čače, o šukar amalipe e Jehovaja tano but považno hem anela amenge but pobaro bahtalipe tari bilo koja zadača so šaj te kera la ki e Jehovaskiri organizacija.

Ki javer prilika, o Isus kergja lafi anglo but narodo. Tegani jekh Evrejka sine doborom vooduševimi taro adava sar sikavela sine e narodo so vakergja kaj sigurno i daj leskiri tani but bahtali so isi la asavko čhavo. Ama o Isus vakergja lake: „Na, nego bahtale tane okola so šunena e Devleskoro lafi hem ikerena  le!“ (Luka 11:27, 28). Keda o roditelija isi len pričina te dičinen pe pumare čhavencar, adava kerela len bahtale. Sepak, adava so anela amenge trajno bahtalipe tani i poslušnost sprema o Jehova hem o paše amalipe lea.

Čače, baro bahtalipe dela amenge o čuvstvo kaj o Jehova tano zadovolno amendar. Čak o iskušenija, kola soj tane phare, našti te len amendar adava čuvstvo. Ustvari, keda ačhovaja verna ko iskušenija, amaro bahtalipe panda poviše bajrola (Rim. 5:3-5). Isto agjaar, o Jehova dela plo sveti duh okolenge so isi len doverba ki leste, a o bahtalipe tano jekh taro osobine so avena taro adava duho (Gal. 5:22). Adava pomožinela amenge te haljova soske ko Psalm 64:10 pišinela: „O pravedno manuš ka arakhel bahtalipe ko Jehova“.

Akava isto agjaar objasninela soske i Dajana hem o Džon so spomningjem len angleder, šaj sine te ačhoven bahtale iako sine len phare situacie. I Dajana vakerela: „O Jehova sine mange than garajbaske, isto sar jekh čhavo so rodela zaštita ko plo roditeli“. Oj vakerela: „Osetinava kaj ov dela man bereketija agjaar so dela man sila redovno te propovedinav hem te ovav bahtali džikote kerava adava“. So pomožingja e Džoneske te ovel bahtalo hem zafatimo ki služba otkeda mora sine te čhinavel ple zadačaja? Ov vakerela: „Taro 1998 berš keda počmingjum te služinav sar instruktori ki Škola bašo organizacisko osposobuvanje, počmingjum but pohor te proučinav i Biblija“. Ov objasninela kaj akaja promena ov hem leskiri romni prifatingje la polokhe soske ola sekogaš sine spremna te keren o zadače so o Jehova dela len sine. Isto agjaar vakergja: „Kergjem adava bizo te žalina“.

But javera osetingje kaj adava so pišinela ko Psalm 64:10 tano čače. Na primer, razmislin bašo jekh bračno pari so služingja ko Betel ko SAD poviše taro 30 berš. Ola dobingje nevi zadača te služinen sar specijalna pionerija. Ola vakerena: „Keda našavea nešto so mangea tegani prirodno tano te ovel tuke žal“. Ama, isto agjaar vakerena: „Našti te žaline zasekogaš“. Otkeda resle ko nevo sobranie, ola odma počmingje te propovedinen e objavitelencar taro adava sobranie. Akava bračno pari vakerela: „Amen molingjem amen bašo nesave konkretna bukja. Keda dikhaja sine sar o Jehova odgovorinela sine ko amare molitve adava ohrabrinela amen sine hem kerela sine amen bahtale. Kratko otkeda reslem, nesave ko sobranie počmingje te služinen sar pionerija. Isto agjaar, počmingjem duj bibliska kursija so napredujnena šukar“.

Džangjola pe, nane sekogaš lokho te ove bahtalo. Ka oven amen dive keda ka ova tažna. Ama o Jehova uverinela amen e lafencar soj pišime ko Psalm 64:10. Čak keda osetinaja amen obeshrabrime, amen šaj te ova sigurna kaj ako ačhovaja verna bizi razlika so doživinaja, amen ka arakha „bahtalipe ko Jehova“. Amen šaj te razmislina bašo vreme keda e Jehovaskoro vetuvanje bašo „nevo nebo hem nevi phuv“ ka ispolninel pe. Tegani sekoj ka ovel sovršeno hem „ka ovel bahtalo zasekogaš“ bašo sa adava so ka kerel o Jehova (Isa. 65:17, 18).

Zamislin tuke so šaj te značinel akava. Amen ka ovel amen sovršeno sastipe hem sekova dive sabajle ka ušta pherde silaja. Bizi razlika save bukja poangle kerena amen sine tažna, nane te anen amenge poviše dukh. O Jehova uverinela amen kaj nane te avel amenge ki godi adava so sine angleder. Ka adžikera amare manglen so mule keda ka voskresninen hem ka ova but bahtale sar o roditelija e čhajakere so sine la 12 berš kola so voskresningja la o Isus (Marko 5:42). Konečno, sekoj ki Phuv ka ovel pravedno hem ka arakhel bahtalipe ko Jehova zasekogaš.