Keda o javera ponašinena pe ljubezno amencar, osetinaja amen šukar. Utešinela amen keda džanaja kaj o javera grižinena pe amenge. Sarine mangaja o javera te oven ljubezna amencar. Tegani, sar šaj amen da te sikljova te ova ljubezna?

O ljubezno manuš čače grižinela pe e javerenge hem sikavela adava ple lafencar hem postapkencar. Ov kerela adava na samo adaleske soj tano kulturno nego adaleske so mangela len hem haljovela sar osetinena pe. Soj panda považno, i ljubeznost tani jekh taro osobine so avena taro sveti duh (Gal. 5:22, 23). O Jehova mangela te ova ljubezna, adaleske te dikha sar ov hem leskoro Čhavo sikavgje ljubeznost hem sar šaj amen da te dža palo lengoro primer.

O Jehova tano ljubezno sarinencar, čak „adalencar so nane blagodarna hem adalencar soj lošna“ (Luka 6:35). Na primer, o Jehova „dela leskoro kham te svetinel upro lošna hem upro šukar hem te perel bršim upro pravedna hem upro nepravedna“ (Mat. 5:45). Čak o manuša so na verujnena kaj o Jehova tano o Stvoriteli isi len korist tari leskiri ljubeznost hem šaj te oven dži negde bahtale ko životo.

Adava so kergja o Jehova e Adameske hem e Evake tano but šužo primer baši ljubeznost. Kratko otkeda grešingje, ola učhargje ple kukija listoncar tari smokva. Ama, o Jehova džanlja kaj avri taro Eden ka valjani lenge šeja kola so ka šaj pošukar te zaštitinen len soske i phuv sine dendi arman hem sine pherdi „kare hem divo čar“. Adaleske, o Jehova sine ljubezno agjaar so kergja lenge „dugačka šeja tari koža“ (1. Moj. 3:7, 17, 18, 21).

Iako o Jehova tano ljubezno e lošna hem e šukar manušencar, ov tano posebno ljubezno ple verna slugencar. Na primer, ko vreme keda živinela sine o proroko o Zaharija, jekh angeli sine voznemirimo soske o Izraelcija čhinavgje te gradinen e Jehovaskoro hrami ko Erusalim. O Jehova šungja akale angele hem odgovoringja leske „prijatna hem utešna lafencar“ (Zah. 1:12, 13). O Jehova postapingja ko slično način e prorokoja e Ilijaja. Jekh puti, o proroko sine doborom razočarimo so vakergja e Jehovaske kaj mangela te merel. O Jehova sikavgja kaj leske važno sar osetinela pe o Ilija hem bičhalgja angeli te ohrabrinel le. Isto agjaar, ov uveringja e proroko kaj nane korkori. E Jehovaskiri ljubeznost ohrabringja e Ilija te prodolžinel ple zadačaja (1. Car. 19:1-18). Ama, koj taro e Devleskere sluge uspejngja najšukar te sikavel akaja but šuži osobina e Jehovaskiri — i ljubeznost?

Keda sine o Isus ki Phuv, ov sine pendžardo sar ljubezno manuš. Nikogaš na sine grubo hem na probinela sine silaja te čhivel e manušen  te keren adava so mangela ov. Ov grižinela pe sine e javerenge hem vakergja: „Aven ki mande, sarine so sien umorna hem so isi tumen pharipe, me ka dav tumen sila... Soske, mlo jarem tano lokho te phiravel pe“ (Mat. 11:28-30). Adaleske so sine but ljubezno, o manuša džana sine segde pali leste. Sine leske žal bašo manuša, adaleske sasljargja len, sikavgja len but bukja bašo plo Dad hem ko nekobor prilike dengja len hajbaske (Mar. 6:34; Mat. 14:14; 15:32-38).

O Isus haljovela sine sar osetinena pe o manuša hem sine lencar ljubezno. Čak keda mangela sine te odmorinel pe, ov ljubezno pomožinela sine sarinenge so avena sine ki leste (Luka 9:10, 11). Razmislin bašo adava so slučingja pe jekhe romnjaja koja so krvarinela sine. Oj mangela sine te sasljol, adaleske pipingja e Isuseskere šeja. Ama, sprema e Mojseeskoro zakoni, na smejnela sine te kerel adava soske na sine čisto (3. Moj. 15:25-28). Sar reagiringja o Isus? Ov na sine holjamo džikote kergja laja lafi. Ov dikhlja kaj oj darala, hem sine leske žal baši late soske 12 berš cidela sine taro adava nasvalipe. O Isus vakergja lake: „Mi čhaj, tli vera sasljargja tut. Dža tuke ko mir hem sasljov taro tlo pharo nasvalipe“ (Mar. 5:25-34). O Isus sine čače ljubezno!

Taro primerija so dikhlem len, dikhaja kaj i čačutni ljubeznost sikavela pe postapkencar. Akava šaj isto agjaar te dikha le tari sporedba so vakergja la o Isus bašo milostivo Samarjani. Iako o Samarjanija hem o Evreija mrzinena pe sine jekh jekhea, o Samarjani žalingja jekhe Evree kova so sine mardo taro čora hem mukhlo te merel ko drumo. I ljubeznost pottikningja e Samarjane te pomožinel leske. Čistingja leskere rane hem ingargja le ko jekh kher te rakjarel. Ov platingja e gazdaske taro adava kher te grižinel pe e povredime Evreeske, hem čak vakergja leske kaj ako valjani ka platinel panda keda ka iranel pe (Luka 10:29-37).

I ljubeznost ka pottikninel amen te ova obzirna hem te ohrabrina e javeren na samo postapkencar nego lafencar da. Ki Biblija pišinela: „O sekiracie anena pharipe e manušeske ko vilo, a o šukar lafi kerela le bahtalo“ (Izr. 12:25). Keda i ljubeznost hem o šukaripe pottikninena amen te ohrabrina e javeren, adava ka kerel te osetinen pe bahtale * (Dikh i fusnota.) Amare ljubezna lafencar ka sikava e javerenge kaj mangaja len. A adava ka pomožinel lenge polokhe te istrajnen keda isi len problemija ko životo (Izr. 16:24).

Adaleske so siem kerde „sprema e Devleskoro liko“ sarine šaj te ova ljubezna (1. Moj. 1:27). Na primer, o Julij, jekh rimsko voeno zapovedniko kova so sine odgovorno te ingarel e Pavle ko Rim, „postapingja ljubezno e Pavlea hem dozvolingja leske te džal ko ple amala te šaj te grižinen pe leske“ ki diz Sidon (Dela 27:3). Palo adava, keda e Pavle hem e javeren sine len brodolom, o manuša tari Malta sine but ljubezna lencar hem čak thargje lenge jag te šaj te takjon (Dela 28:1, 2). Adava so kergje akala manuša sine but šukar. Ama, te šaj te kera e Jehova bahtalo, valjani te ova sekogaš ljubezna, a na samo ponekogaš.

O Jehova mangela i ljubeznost te ovel delo tari amari ličnost hem sekogaš te sikava la. Adaleske o Jehova vakerela amenge „te urava amen“ ki ljubeznost (Kol. 3:12). Ama, nane lokho te ova sekogaš ljubezna. Soske? Šaj na sikavaja ljubeznost adaleske so ladžaja, na siem sigurna ki amende ili siem hari sebična. Ili šaj pharo amenge te ova ljubezna okolencar so ponašinena pe amencar lošno. Ama, ako molinaja amen bašo sveti duh hem trudinaja amen te postapina sar o Jehova, ov ka pomožinel amenge te ova čače ljubezna (1. Kor. 2:12).

Sar šaj te džana ko kola načinija šaj te sikava panda pobari ljubeznost? Puč tut: „Dali  šukar šunava e javeren hem probinava te haljovav len? Dali primetinava keda e javerenge valjanela pomoš? Keda posledno puti sikavgjum ljubeznost nekaske so nane mange familija ili mlo paše amal?“ Palo adava, šaj te čhiva amenge celija, sar na primer pošukar te zapoznajna e manušen okolu amende, posebno okolen taro amaro sobranie. Agjaar ka džana save problemija isi len hem so valjani lenge. Isto agjaar, valjani te sikava ljubeznost e javerenge agjaar sar so mangaja ola te sikaven amenge (Mat. 7:12). Hem ma bistre te moline tut e Jehovaske, soske ov šaj te pomožinel tuke te ovel tut akaja osobina (Luka 11:13).

O apostol Pavle spomningja i ljubeznost sar jekh taro osobine kola so pomožingje leske te ovel šukar propovedniko (2. Kor. 6:3-6). O manuša mangena sine e Pavle soske sikavela sine pli ljubeznost lafencar hem postapkencar. Isto agjaar, ola šaj sine te dikhen kaj ov grižinela pe lenge (Dela 28:30, 31). Slično, ako siem ljubezna, o javera šaj ka mangen te sikljoven poviše bašo čačipe. Keda siem ljubezna sa e manušencar, čak okolencar so postapinena lošno amencar, šaj ka kovljara lengoro vilo hem ka pomožina lenge te meninen plo stavi (Rim. 12:20). Sar so ka nakhel o vreme, šaj čak ka mangen te sikljoven o čačipe tari Biblija.

Ko raj, sarine ka oven ljubezna jekh jekhea. Okolenge so ka voskresninen ka ovel sikavdi ljubeznost, nesavenge šaj adava te ovel prvo puti ko životo. Adava sigurno ka pottikninel len te oven ljubezna e javerencar. Sekoj so nane te ovel ljubezno hem nane te mangel te pomožinel e javerenge, nane te ovel leske dozvolimo te živinel večno ko raj. Samo okola soj tane ljubezna ka živinen večno ko raj (Ps. 37:9-11). Adava ka ovel jekh bezbedno sveto kote so ka vladinel mir! Ama, panda angleder te avel adava vreme, savi korist ka ovel amen ako akana siem ljubezna?

I Biblija vakerela: „O ljubezno manuš kerela šukaripe korkori peske“ (Izr. 11:17). O manuša mangena te oven nekasaja soj ljubezno, hem obično ola da postapinena ljubezno lea. O Isus vakergja: „Save merkaja merinena, asavke merkaja ola ka merinen tumenge“ (Luka 6:38). Znači, e ljubezno manušeske tano lokho te arakhel peske šukar amala hem te ačhovel lencar amal.

O apostol Pavle vakergja e phralenge taro sobranie ko Efes te sikaven milost jekh jekheske, te oven sočuvstvitelna hem spremno te prostinen jekh jekheske (Ef. 4:32). Keda sarine ko sobranie tane ljubezna hem sočuvstvitelna, tegani o sobranie ka ovel zoralo hem ko jekhipe. Nikogaš na mangaja te kritikujna amare phralen, te kera lengoro lafi ili te vakera gruba ili oštra lafija čak ni ki šala. Namesto adava, amare lafija sekogaš valjani te pomožinen hem te ohrabrinen e javeren (Izr. 12:18). Adava but ka pomožinel e phralenge hem e phenjenge ko sobranie duhovno te napredujnen hem te oven bahtale džikote služinena e Jehovaske.

Sar so dikhlem, i ljubeznost tani osobina koja so sikavela pe lafencar hem postapkencar. Keda siem ljubezna, postapinaja sar amaro Devel, o Jehova, kova soj darežlivo hem pherdo mangipaja (Ef. 5:1). Akava kerela amare sobranija te oven zorale hem pottikninela e javeren da te služinen leske. Adaleske, te da amendar sa te šaj o javera te dikhen kaj e Jehovaskere svedokija tane ljubezna manuša!