Izgleda kaj na. Soske šaj te vakera adava? O Beng na vakergja e Evake kaj, ako hala taro plodi so zabraningja o Devel, ka merel samo lakoro telo, a lakiri duša ponadari da ka živinel ko javer than. Keda kergja lafi preku o sap, o Satana vakergja kaj i Eva sigurno nane te merel ako hala taro plodi so sine ko kaš. Ov manglja te vakerel kaj oj ponadari da ka živinel, kaj ka ovel la pošužo životo ki Phuv hem kaj nane te zavisinel taro Devel (1. Moj. 2:17; 3:3-5).

Ako o hovavno veruvanje kaj i duša na merela na avela tari rajsko gradina, tegani keda pojavingja pe? Našti sigurno te vakera. Ama džanaja kaj sa o hovavne sikljojba sine cidime ko Potop ko vreme e Noeskoro. Nijekh hovavno religiozno sikljojbe na ačhilo palo Potop soske preživingje samo o Noe hem leskiri familija — a sarine ola služinena sine e Jehovaske.

Znači, o sikljojbe kaj i duša na merela sigurno pojavingja pe palo Potop. A sar širingja pe akava sikljojbe? Keda o Devel meningja o čhibja ko Vavilon hem o manuša selingje pe te živinen ki celi Phuv, ola sigurno širingje o veruvanje kaj i duša na merela (1. Moj. 11:8, 9). Bizi razlika kotar avela akava hovavno sikljojbe, šaj te ova sigurna kaj o Satana o Beng, kova soj tano „dad e hovajbaskoro“ bešela palo akava sikljojbe hem sine leske zadovolstvo te dikhel sar širinela pe segde (Jovan 8:44).