Dali šaj te odgovorine ko akala pučiba kola so temelinena pe ko informacie tari Stražarsko kula bašo 2019?

So značinela e Jehovaskoro vetuvanje: „Nisavo oružje soj kerdo protiv tute nane te uspejnel“? (Isa. 54:17).

Šaj te ovel amen doverba kaj o Jehova ka zaštitinel amen taro napadija e dušmanengere, kola soj sar „bura so khuvela ko zido“ (Isa. 25:4, 5). Amare dušmanja nikogaš nane te uspejnen te keren amenge trajno šteta (w19.01, 6-7 str.).

Sar dikhjola e Devleskiri pravda taro način sar postapingja e Hanaanconcar hem e Izraelconcar kola so na sine poslušna?

O Jehova kazningja okolen so učestvujnena sine ko odvratna seksualna ritualija hem so sine lošna e džuvlencar hem e čhavencar. A dela sine bereketija okolenge so sine leske poslušna hem so postapinena sine pravedno jekh jekhea (w19.02, 22-23 str.).

So te kera ako arakhljovaja ki situacija te molinel pe nekoj so nane verniko?

Ako arakhljovaja ki asavki situacija, šaj te odlučina te kjutina hem te sikava poštovanje e javerenge. Nane te vakera „amin“ hem nane te vazda amare vasta. Šaj ka odlučina te molina amen ki amende (w19.03, 31 str.).

Kobor tano seriozno o zloupotrebibe čhaven?

O zloupotrebibe čhaven tano seriozno grevo kova so anela posledice e žrtvake hem ladž e sobranieske hem kolea so phagjela pe o zakoni e državakoro. Soj najlošno, adava tano grevo protiv o Devel. Keda o zakonija e državakere rodena taro manuša te prijavinen ko vlastija sekova obvinenie baši zloupotreba čhaven, o starešine poštujnena asavke zakonija (w19.05, 9-10 str.).

Sar te menine tlo način sar razmislinea?

Valjani te kere nekobor bukja: Molin tut, hor razmislin hem birin šukar amala (w19.06, 11 str.).

Sar šaj panda akana te spremina amen bašo progonstvo?

Valjani te kere pozoralo tlo amalipe e Jehovaja. Ov uverimo kaj o Jehova mangela tut hem kaj nikogaš nane te mukhel tut. Čitin i Biblija sekova dive hem molin tut redovno. Ov uverimo kaj e Devleskoro Carstvo čače ka anel o bereketija so vetingja len. Sikljov ki godi tle omilena stihija hem o teokratska gilja (w19.07, 2-4 str.).

Sar šaj te pomožina amare familijake te spasinel pe?

Valjani te sikava kaj haljovaja sar osetinela pe, te da šukar svedoštvo amare ponašibaja hem te ova strpliva hem taktična (w19.08, 15-17 str.).

Sprema o vetuvanje e Isuseskoro taro Matej 11:28, sar dobinaja sila?

Isi amen o najšukar nadglednikija, o najšukar amala hem i najšukar zadača (w19.09, 23 str.).

Sar šaj o Jehova te del amen i želba hem i sila te služina leske? (Fil. 2:13)

Džikote čitinaja e Devleskoro Lafi hem razmislinaja baši leste, o Devel ka del amen želba te kera leskiri volja hem sila te služina leske. O sveti duh šaj te pomožinel amenge te razvina o sposobnostija so više isi amen (w19.10, 21 str.).

Kola bukja valjani te kera angleder te ana nesavi važno odluka?

Akala pandž bukja: temelno te istražina, te molina amen baši mudrost, te ispitina amare motivija, te čhiva amenge konkretna celija hem te ova realna (w19.11, 27-29 str.).

Dali o veruvanje kaj i duša na merela avela taro adava so o Satana vakergja e Evake?

Izgleda kaj na. O Satana na vakergja e Evake kaj ka merel samo lakoro telo, nego kaj oj ka merel. Nijekh hovavno religiozno sikljojbe na ačhilo palo Potop. O veruvanje kaj i duša na merela verojatno pojavingja pe angleder o Devel te meninel o čhibja e manušengere so gradinena sine i Vavilonsko kula (w19.12, 15 str.).