O izveštaj tari 5. Mojseeva 22:25-27 na sine pišimo prvenstveno te dokažinel pe dali o murš tano krivo, soske sprema o Zakoni ov više sine krivo. Akava zakoni sine dendo te dikhel pe dali i džuvli tani krivo. Te dikha o kontekst.

Ko anglune stihija kerela pe lafi bašo jekh manuš so sine le seksualna odnosija jekhe verime džuvljaja „ki diz“. Adalea o manuš sine krivo baši preljuba soske ki verimi džuvli dikhela pe sine sar te phene tani ko brako. A dali oj sine krivo baši preljuba? I džuvli „na vikingja ki diz“. Te vikinel sine, o javera sigurno ka šunen la hem ka braninen la. Ama, oj na vikingja. Adava značinela kaj oj da sine učesniko ki preljuba, hem adaleske o solduj sine kriva (5. Moj. 22:23, 24).

Palo adava, ko Zakoni sine vakerdi javer situacija: „Ama, ako nesavo manuš arakhela ki niva verime džuvlja, pa astarela la hem pašljovela laja, neka ovel mudardo samo adava manuš so pašlilo laja, a e džuvljake ma ker ništo. I džuvli na kergja grevo so zaslužinela meribe, soske adava tano isto sar keda nekoj napadinela ple pašutne hem mudarela le. Soske, ov arakhlja la ki niva. I verimi džuvli vikingja, ama na sine koj te spasinel la“ (5. Moj. 22:25-27).

Ko akava slučaj, o sudie verujnena sine e džuvljake. Soske? Pretpostavinela pe sine kaj oj „vikingja, ama na sine koj te spasinel la“. Znači oj na kergja preljuba. A o manuš sine krivo bašo silujbe hem baši preljuba soske astargja e verime džuvlja hem „pašlilo laja“.

Sprema adava, adaleske so i cel akale Zakoneskiri sine te dokažinel kaj i džuvli nane krivo, bašo murš jasno vakerela pe kaj tano krivo bašo silujbe hem baši preljuba. Šaj te ova sigurna kaj o sudie temelno istražinena sine asavke slučaija hem kaj anena sine odluke sprema o jasna upatstvija kola so o Devel but puti povtorinela len sine lenge (5. Moj. 13:14; 17:4; 2. Moj. 20:14).