DALI mislinea kaj sian blagodarno manuš? Šukar tano sekova jekh amendar te razmislinel bašo akava pučibe. I Biblija prorokujngja kaj ko amaro vreme but manuša „nane te oven blagodarna“ (2. Tim. 3:2). Verojatno pendžarea manušen kola so mislinena kaj o javera tane dolžna te keren nešto lenge ili te den len nešto. Šaj adaleske mislinena kaj na valjani te oven blagodarna bašo adava so dobinena. Verojatno nane te mange te ove uzo asavke manuša.

Tari javer strana, e Jehovaskere slugenge tano vakerdo: „Oven blagodarna!“. Isto agjaar, ki Biblija pišinela: „Oven blagodarna bašo sa“ (Kol. 3:15; 1. Sol. 5:18). Ustvari, ako siem blagodarna, adava ka koristinel amenge da. Soske vakeraja akava? Te dikha nekobor pričine.

Jekh važno pričina soske valjani sekogaš te ova blagodarna tani adaja so agjaar ka dikha pozitivno ki amende. Manuš kova so zablagodarinela pe e javerenge verojatno isi le šukar mislenje peske. Ama, okova da so priminela i blagodarnost osetinela pe šukar. Soske i blagodarnost kerela sarinen bahtale? Te dikha jekh primer: Keda ka šune kaj o javera mangena te keren nešto baši tute, na značinela li adava kaj vredinea anglo lengere jakhja? Ola mangena tut hem grižinena pe tuke. Keda ka haljove adava, tegani ka dikhe ki tute panda popozitivno. Šaj te ova sigurna kaj isto agjaar osetingja pe hem i Rut. O Vooz sine darežlivo sprema late. Sigurno i Rut sine but bahtali keda dikhlja kaj nekoj grižinela pe lake (Rut 2:10-13).

Nekoj so posebno zaslužinela te ova leske blagodarna tano o Devel. Sigurno ponekogaš razmislinea bašo but duhovna hem materijalna poklonija so dengja amen hem kola so ponadari da dela amen (5. Moj. 8:17, 18; Dela 14:17). Ama šukar tano te odvojne poviše vreme te šaj hor te razmisline baši e Devleskiri darežlivost hem bašo sa o šukaripe so sikavela tuke hem tle pašutnenge. Adava panda poviše ka bajrarel tli blagodarnost sprema o Jehova hem ka ove panda pouverimo kaj ov mangela tut hem ceninela tut (1. Jov. 4:9).

Ama osven so ka razmisline baši e Jehovaskiri darežlivost hem bašo bereketija kola so dela len tuke, šukar tano isto agjaar te sikave leske kaj sian blagodarno (Ps. 100:4, 5). Keda zablagodarinaja amen e javerenge, adava kerela amen bahtale.

Javer pričina soske tani korisno i blagodarnost tani adaja so o amalipe ovela pozoralo. Sekova jekh amendar isi le potreba te džanel kaj tano cenimo. Keda zablagodarinaja amen nekaske iskreno, ovaja popaše amala (Rim. 16:3, 4). Osven adava, okola soj blagodarna obično tane spremna te pomožinen e javerenge. Ola primetinena keda o javera ka keren lenge šukaripe hem adava pottikninela len ola da te keren šukaripe e javerenge. Hem keda pomožinaja e javerenge tegani siem bahtale. Baš adava vakergja o Isus: „Poviše isi bahtalipe keda dela pe nego keda lela pe“ (Dela 20:35).

O Robert Emons, profesori ko jekh Univerziteti ki Kalifornija, vakergja: „Te šaj te ova blagodarna, valjani te haljova kaj zavisinaja jekh jekhestar. Ponekogaš amen daja nešto e javerenge, a ponekogaš amen dobinaja nešto taro javera“. Fakti tano kaj amaro životo hem bahtalipe ko but načinija zavisinela taro javera. Na primer, šaj dena amen hajbaske ili pomožinena amen keda siem nasvale (1. Kor. 12:21). Okova soj blagodarno dikhela hem ceninela adava so kerena o javera baši leste. Ako isi tut akava ki godi, dali isi tut navika te zablagodarine tut e javerenge bašo adava so kerena tuke?

Panda jekh pričina soske tano šukar te ova blagodarna tani adaja so i blagodarnost pomožinela amenge te mislina ko pozitivna namesto ko negativna bukja. Ki nesavi smisla, amari godi tani sar filteri — dozvolinela amenge te koncentririna amen ko odredena aspektija tari amari okolina, a blokirinela o javera. Ako siem blagodarna poviše ka mislina ko pozitivna bukja, a pohari ko problemija. Kobor poblagodarna siem, doborom posvesna ka ova bašo šukar bukja okolu amende. A adava panda poviše ka bajrarel amari blagodarnost. Ako koncentririnaja amen ko bukja bašo kola so šaj te ova blagodarna, tegani ka šaj te kera adava so vakergja o apostol Pavle: „Sekogaš oven bahtale ko Gospodari“ (Fil. 4:4).

Adava so sian blagodarno pomožinela tuke te na razmisline negativno. But tano pharo te ove blagodarno, a ko isto vreme te ove ljubomorno, tažno ili holjamo. Isto agjaar, o blagodarna manuša obično nane preokupirime materijalna bukjencar. Ola tane zadovolna adalea so isi len hem na optovarinena pe e želbaja te ovel len poviše (Fil. 4:12).

Sar sluge e Devleskere, džanaja kaj o Satana mangela te ova tažna hem obeshrabrime taro problemija kola so isi amen ko akala posledna dive. Ov ka ovel bahtalo ako siem negativna hem ako sekogaš žalinaja amen bašo nešto. Ako isi amen asavko stavi, tegani ka kera te ovel pharo e manušenge te prifatinen o šukar haberi. Ustvari, i blagodarnost tani povrzimi e osobinencar kola so avena taro e Devleskoro sveti duh. Na primer, amen siem blagodarna, polokhe ka ova bahtale. A adava bahtalipe avela keda dikhaja o šukar bukja so dengja amen o Devel hem tari vera so isi amen ko e Devleskere vetuvanja (Gal. 5:22, 23).

Adaleske so sian delo taro e Jehovaskoro narodo, verojatno ka složine tut adalea so sine vakerdo baši blagodarnost ki akaja statija. Sepak, svesno sian kaj nane sekogaš lokho te ove blagodarno hem pozitivno. Ama, ma mukh adava te obeshrabrinel tut. Tu šaj te sikljove te ove panda poblagodarno. Sar? Sekova dive odvojn vreme te razmisline bašo nesave bukja taro tlo životo kolenge so šaj te ove blagodarno. So poviše kerea adava, doborom polokhe ka ovel tuke te osetine hem te sikave blagodarnost. Adava ka pomožinel tuke te ove pobahtalo okolendar so koncentririnena pe samo ko problemija e životoskere. Razmislin bašo šukar bukja so kerela len tuke o Devel hem o javera — bukja so ohrabrinena tut hem kerena tut bahtalo. Šaj te počmine čak te pišine tuke dnevniko. Ki leste šaj te pišine duj ili trin bukja bašo kola sian blagodarno sekova dive.

Nesave naučnikija otkringje kaj, keda redovno zablagodarinaja amen e javerenge, adava šaj te meninel o način sar funkcionirinela amari godi, javere lafencar ka ovel amenge polokhe te dikha pozitivno ko životo. O blagodarna manuša tane bahtale manuša. Adaleske razmislin bašo tle bereketija, uživin ko šukar bukja so slučinena pe tuke hem sekogaš ov blagodarno! Ma dikh ko šukar bukja so isi tut ko životo sar nešto soj normalno te oven tut soske i Biblija pottikninela amen: „Blagodarinen e Jehovaske, soske ov tano šukar“ hem „oven blagodarna bašo sa“ (1. Let. 16:34; 1. Sol. 5:18).