Ako akava tano točno, razmislin sar ka vlijajnel adava ko amaro životo. Na primer, jekhe phraleskoro čhavo mudargja pe. E phraleske sine but pharo. Pučela pe sine dali o Jehova angleder dikhlja kaj ov hem leskiri romni šaj te izdržinen akaja tragedija. Avdive, bute dženenge šaj te slučinen pe tragedije. Valjani li te verujna kaj e Jehova isi le kontrola upro sa so slučinela pe amenge ko životo?

Džikote čitinaja o lafija soj pišime ko 1. Korinkjanite 10:13, dikhaja kaj i Biblija na dela amen pričina te verujna kaj o Jehova angleder dikhela so šaj te izdržina hem sprema adava birinela kola iskušenija ka oven amen. Te dikha štar pričine soske phenaja agjaar.

Prvo, o Jehova dengja e manušen slobodno volja, ili pravo korkori te birinen. Ov mangela amen korkori te ana odluke (5. Moj. 30:19, 20; Is. Nav. 24:15). Keda anaja odluke kolencar so radujnaja e Jehova, šaj te ovel amen doverba kaj ov ka vodinel amen (Izr. 16:9). Ama, keda anaja lošna odluke, mora te soočina amen e posledicencar (Gal. 6:7). Ako o Jehova birinela save iskušenija ka oven amen, dali tegani šaj te vakerel pe kaj isi amen slobodno volja?

Dujto, o Jehova na zaštitinela amen taro nepredvidena nastanija (Prop. 9:11). Nekoj šaj te doživinel nesrekja samo adaleske so arakhlilo ko pogrešno than hem ko pogrešno vreme. Na primer, o Isus vakergja baši jekh tragedija kolate so mule 18 manuša keda jekh kula peli upri lende. Ov jasno vakergja kaj o Devel na kergja ola te meren (Luka 13:1-5). Sprema akava, nane razumno te verujna kaj angleder te ovel nesavi tragedija, o Jehova birinela koj ka merel, a koj na.

Trito, sekoj amendar šaj te ačhol verno e Jehovaske. O Satana vakergja kaj e Jehovaskere sluge služinena leske taro sebična motivija hem kaj nane te ačhoven leske verna ako isi len nevolje (Jov 1:9-11; 2:4; Otk. 12:10). Ako o Jehova zaštitinela amen tari nesavi nevolja adaleske so mislinela kaj našti te izdržina la, nane li te izgledinel kaj e Satana isi le pravo?

Štarto, o Jehova na koristinela sekogaš pli sposobnost te dikhel angleder sa so ka ovel amencar. Ako mangela o Jehova šaj angleder te džanel so ka ovel amencar (Isa. 46:10). Ama, i Biblija sikavela kaj o Jehova na koristinela sekogaš pli sposobnost te džanel angleder sa so ka ovel (1. Moj. 18:20, 21; 22:12). O Jehova mangela amen hem tano pravedno, adaleske mukhela amen te koristina amari slobodno volja te šaj korkori anaja odluke (5. Moj. 32:4; 2. Kor. 3:17).

Tegani so mislingja o Pavle keda vakergja kaj o Jehova nane te mukhel te ova iskušime poviše taro adava so šaj te izdržina? Akate o Pavle manglja te vakerel so kerela o Jehova džikote isi amen iskušenija, a na angleder o iskušenija. * (Dikh i fusnota.) Ako isi amen doverba ko Jehova, ov ka pomožinel amen te ikljova ko krajo sekole iskušeniea (Ps. 55:22). Ka dikha duj pričine soske o Pavle šaj sine te vakerel akava.

I prvo pričina tani kaj o nevolje so isi amen, isi e javere manušen da. Sa džikote živinaja ko sveto e Satanaskoro, ka oven amen phare situacie, čak šaj hem tragedije. Ama, ako isi amen doverba ko Jehova, ka šaj te izdržina o nevolje hem te ačhova leske verna (1. Pet. 5:8, 9). Ko 10 poglavje taro 1. Korinkjanite, o Pavle pišingja bašo nesave iskušenija so sine e Izraelcon ki pustina (1. Kor. 10:6-11). Okola  so sine len doverba ko Jehova šaj sine te izdržinen o iskušenija. Ama, nesave Izraelcija na sine poslušna e Jehovaske. Ola na ačhile leske verna adaleske so na sine len doverba ki leste.

I dujto pričina tani kaj „o Devel tano verno“. So značinela akava? Keda čitinaja sar o Jehova grižinela pe sine celo vreme ple slugenge, dikhaja kaj ov verno pomožinela sine „adalenge so mangena le hem ikerena leskere zapovedija“ (5. Moj. 7:9). I Biblija sikavela kaj o Jehova sa so vetinela, adava ispolninela (Is. Nav. 23:14). Šaj te ova sigurna kaj 1) o Jehova nane te mukhel nijekh iskušenie te ovel doborom pharo so našti te izdržina le hem 2) ov ka pomožinel amen.

Sar o Jehova ka pomožinel adalen so isi len doverba ki leste? Točno i adava kaj ov šaj te cidel o nevolje. Ama, te setina amen ko lafija e Pavleskere kaj o Jehova ka pomožinel amen agjaar so ka del amen sila te izdržina o iskušenija. But puti, o Jehova pomožinela amen adalea so kerela amen pozorale te šaj te ačhova verna. Te dikha nesave načinija sar kerela adava.

• O Jehova „dela amen uteha ki sekoja amari nevolja“ (2. Kor. 1:3, 4). Ov šaj te del amen mir ko vilo preku plo Lafi, preku o sveti duh hem i duhovno hrana so dela amen o verno hem razborito robo (Mat. 24:45; Jovan 14:16, fus.; Rim. 15:4).

• O Jehova šaj te koristinel plo duho te vodinel amen (Jovan 14:26). O sveti duh šaj te pomožinel amen te setina amen ko bibliska izveštaija hem načelija te šaj te ana mudra odluke.

• O Jehova šaj te koristinel e angelen te pomožinen amen (Evr. 1:14).

• O Jehova šaj te koristinel amare phralen te pomožinel amen. Ola šaj te den amen sila ple lafencar hem postapkencar (Kol. 4:11).

So siklilem taro e Pavleskere lafija pišime ko 1. Korinkjanite 10:13? O Jehova na odredinela angleder save iskušenija ka oven amen. Ama šaj te ova uverime kaj, ako isi amen doverba ko Jehova, ov ka pomožinel amen te izdržina sekova iskušenie. Džanaja kaj o Jehova ka pomožinel amen ki sekoja phari situacija te ačhova leske verna.