1, 2. So halilo jekh phral baši peste, hem so kergja?

O ROBERTI krstingja pe keda sine le 15 berš, ama o čačipe na sine leske najvažno ko životo. Ov vakerela: „Nikogaš na kergjum nešto soj pogrešno, ama služinava sine mehanički e Jehovaske. Dikhjovava sine sar duhovno zoralo, adaleske so sium sine redovno ko sostanokija hem sium sine pomošno pioneri nekobor puti ko berš. Ama, osetinava sine kaj nešto falinela mange“.

² Sar o Roberti halilo so falinela leske? Otkeda ženingja pe, ov hem leskiri romni ponekogaš khelena sine bibliska igre ko kola so pučena pe sine pučiba jekh jekhea. Leskiri romni but šukar pendžarela sine i Biblija hem šaj sine lokhe te odgovorinel. Ama, o Roberti na džanela sine o odgovorija hem adaleske ladžala sine. Ov vakerela: „Sar ka phene ništo na džanava sine. Mislingjum mange: ’Ako mangava te ovav poglavari so ka dav duhovno vodstvo me romnjake, valjani te kerav nešto‘“. O Roberti kergja adava. Ov vakerela: „Sa poviše hem poviše proučinava sine i Biblija, hem pohari počminava sine te haljovav o bukja. Haliljum pohor i Biblija, a soj najvažno uljum popaše e Jehovaja“.

3. a) So šaj te sikljova taro Roberti? b) Bašo kola važna pučiba ka kera lafi?

 ³ Taro iskustvo e Roberteskoro šaj te sikljova važna pouke. Šaj pendžaraja i Biblija hem redovno džaja ko sostanokija hem ki služba, ama adava na značinela kaj siem duhovna manuša. Ili, šaj napredujngjem duhovno, ama keda ka ispitina amen, dikhaja kaj isi than kote so šaj panda te kera buti (Fil. 3:16). Ki akaja statija ka kera lafi bašo trin važna pučiba: 1) So ka pomožinel amenge te dikha dali siem duhovna manuša? 2) So valjani te kera te šaj duhovno te napredujna? 3) Sar ka vlijajnel ko amaro životo adava so ka ova duhovno zorale?

4. Kaske važinena o lafija taro Efešanite 4:23, 24?

⁴ Keda počmingjem te služina e Devleske, kergjem promene kola so vlijajngje ko sekova delo taro amaro životo. Ama, akala promene na završingje keda krstingjem amen. I Biblija pottikninela amen ponadari da te obnovina amaro način sar razmislinaja (Ef. 4:23, 24). Adaleske so siem nesovršena valjani ponadari da te menina amen. Čak ako beršencar služinaja e Jehovaske, valjani te trudina amen te ikera amaro amalipe lea zoralo (Fil. 3:12, 13).

5. Kola pučiba šaj te pomožinen amenge te ispitina amen?

⁵ Bizi razlika dali siem terne ili phure, valjani iskreno te ispitina amen. Sekova jekh amendar valjani te pučel pe: „Dali dikhava promene ki mande kola so sikavena kaj sa poviše dikhava ko bukja sar o Jehova? Dali ovava sa poslično sar o Isus? So sikavela baši mande adava sar ponašinava man ko sostanokija hem mlo stavi baši lende? So sikavena mle razgovorija bašo adava soj mange najvažno ko životo? So sikavena baši mande mle navike proučibaske, o način sar uravava man, sar izgledinava hem o način sar reagirinava keda dena man sovet? Sar reagirinava keda sium ko iskušenie? Dali uljum zrelo hristijani?“ (Ef. 4:13). Akala pučiba šaj te pomožinen amenge te dikha kobor napredujngjem duhovno.

6. So javer šaj te pomožinel amenge te ispitina dali siem duhovna manuša?

⁶ Te šaj te ispitina amari duhovnost, ponekogaš šaj ka valjani amenge pomoš taro nekoj javer. O apostol Pavle vakergja kaj o telesno manuš na haljovela kaj leskoro način sar živinela na kerela bahtalo e Devle. Tari javer strana, o duhovno manuš haljovela sar o Devel dikhela ko bukja. Ov džanela kaj o Jehova na odobrinela o način sar živinena o telesna manuša (1. Kor. 2:14-16; 3:1-3). Adaleske so o starešine razmislinena sar o Hristos, ola but puti šaj sigate te primetinen keda nekoj ka počminel te postapinel sar telesno manuš, hem trudinena pe  te pomožinen leske. Ako o starešine dikhena asavko nešto amende da hem probinena te pomožinen amenge, dali ka prifatina lengiri pomoš hem ka menina amen? Ako keraja adava ka sikava kaj čače mangaja te ova duhovno pozrela manuša (Prop. 7:5, 9).

7. Kotar džanaja kaj nane dovolno samo te pendžara i Biblija te šaj te ova duhovno zrela manuša?

⁷ Te šaj te ove duhovno zrelo, na valjani samo te pendžare i Biblija. O cari o Solomon džanela sine but bašo Jehova, hem nesave taro leskere mudra lafija tane pišime ki Biblija. Ama, sar nakhela sine o vreme, leskoro amalipe e Jehovaja ulo poslabo hem na ačhilo leske verno (1. Car. 4:29, 30; 11:4-6). Sprema akava, so javer valjani amenge osven te pendžara i Biblija? Valjani ponadari da te kera zorali amari vera (Kol. 2:6, 7). Sar šaj te kera adava?

8, 9. a) So ka pomožinel amenge te kera pozorali amari vera? b) Koja tani amari cel keda proučinaja hem hor razmislinaja? (Dikh i slika ko početok tari statija.)

⁸ O apostol Pavle pottikningja e hristijanen ko prvo veko te napredujnen ki zrelost (Evr. 6:1). Sar šaj te primenina akava sovet? Jekh važno način tano agjaar so ka proučina o lil Začuvaj ja Božjata ljubov. Adava ka pomožinel amenge te haljova sar te primenina o bibliska načelija ko amaro životo. Ako više proučingjem akava lil, šaj te proučina nesavi javer publikacija koja so ka pomožinel amenge te kera amari vera pozorali (Kol. 1:23). Isto agjaar, valjani hor te razmislina bašo adava so sikljovaja hem te molina e Jehova te pomožinel amenge te dikha sar šaj te primenina le.

⁹ Džikote proučinaja hem hor razmislinaja, amari cel valjani te ovel te bajrol amari želba te radujna e Jehova hem te ova leske poslušna (Ps. 40:8; 119:97). Isto agjaar, valjani te otfrlina o bukja kola so šaj te čhinaven amen te napredujna duhovno (Tit 2:11, 12).

10. Sar šaj o terne duhovno te napredujnen?

¹⁰ Ako sian terno, dali isi tut duhovna celija? Jekh phral so služinela ko Betel, isi le navika angleder i programa  ko pokrainska kongresija te kerel lafi e ternencar so ka krstinen pe hem pučela len bašo lengere duhovna celija. O odgovorija so dena len o terne sikavena kaj ola šukar razmislingje so mangena te keren ki služba e Jehovaske. Nesave mangena te služinen polnovremeno ili te selinen pe ko thana kote so isi pobari potreba taro objavitelija. Ama, isi terne so na džanena so te odgovorinen ko adava pučibe. Dali akava šaj te značinel kaj ola mislinena kaj na valjani te ovel len duhovna celija? Ako sian terno, puč tut: „Dali džava ko sostanokija hem ki služba samo adaleske so me roditelija mangena adava? Ili adaleske so me sium amal e Jehovaja?“ Džangjola pe, bizi razlika dali siem terne ili phure, sarinen valjani te ovel amen duhovna celija. Adava ka pomožinel amenge te ova duhovno pozrela (Prop. 12:1, 13).

11. a) So valjani te kera te šaj te ova duhovno zrela? b) Palo kova biblisko primer šaj te dža?

¹¹ Otkeda ka dikha kote šaj te menina amen, valjani te počmina te kera promene. Akava tano but važno adaleske so amaro životo zavisinela taro adava dali ka ova duhovno zrela (Rim. 8:6-8). Akava na značinela kaj valjani te ova sovršena. Te šaj te napredujna duhovno, o Jehova pomožinela amenge agjaar so dela amen plo sveti duh. Ama, amen da valjani te trudina amen. Bašo stiho taro Luka 13:24, o phral Džon Bar kova so služinela sine sar členi ko Vodečko telo, ki jekh prilika  vakergja: „But džene na uspejnena te khuven taro tesno udar adaleske so na trudinena pe dovolno te oven duhovno zrela“. Valjani te ova sar o Jakov kova so boringja pe jekhe angelea hem na otkažingja pe džikote na dobingja bereketi (1. Moj. 32:26-28). Iako šaj te uživina džikote proučinaja i Biblija, na valjani te adžikera kaj sekova delo latar ka ovel amenge interesno sar jekh lil paramisencar. Džikote čitinaja la valjani te trudina amen te arakha skapocena čačipa kola so ka koristinen amenge.

12, 13. a) So ka pomožinel amenge te razmislina sar o Isus? b) Sar šaj te pomožinen amenge o primer hem o sovet e Petareskoro? c) So valjani te kera te šaj duhovno te napredujna? (Dikh i ramka „ Sar šaj duhovno te napredujne“.)

¹² Keda trudinaja amen te napredujna duhovno, o sveti duh pomožinela amenge te menina o način sar razmislinaja. Hari pohari, sikljovaja te razmislina sar o Isus (Rim. 15:5). O sveti duh šaj te pomožinel amenge te cida amendar o pogrešna želbe hem te oven amen osobine save so mangela o Devel (Gal. 5:16, 22, 23). Ako dikhaja kaj siem koncentririme ko materijalna bukja hem ko zadovolstvija, na valjani te obeshrabrina amen. Valjani ponadari da te molina e Jehova te del amen plo sveti duh te šaj te pomožinel amenge te razmislina bašo ispravna bukja (Luka 11:13). Te setina amen ko apostol Petar. Ov na razmislinela sine sekogaš sar o Isus (Mat. 16:22, 23; Luka 22:34, 54-62; Gal. 2:11-14). Ama, ov na otkažingja pe, adaleske o Jehova pomožingja leske. Hari pohari, siklilo te razmislinel sar o Isus. Adava šaj amen da te kera.

¹³ O Petar kergja lafi bašo nekobor osobine so šaj te pomožinen amenge. (Čitin 2. Petrovo 1:5-8.) Valjani but te trudina amen te šaj te ovel amen samokontrola, istrajnost, phralikano mangipe hem javera šukar osobine. Šukar tano sekova dive te puča amen: „Ki koja osobina šaj te kerav buti avdive te šaj duhovno te napredujnav?“

14. Sar i duhovnost ka vlijajnel ko amaro životo?

¹⁴ Ako razmislinaja sar o Hristos, adava ka vlijajnel ko način sar ponašinaja amen ki buti ili ki škola, sar keraja lafi hem ko odluke so anaja len sekova dive. Amare odluke ka sikaven kaj trudinaja amen te ova sar o Hristos. Sar duhovna manuša, na mangaja te mukha ništo te ruminel amaro amalipe e Jehova. Keda ka arakhljova ki situacija te kera nešto soj pogrešno, amari duhovnost ka pomožinel amenge te na pera ko iskušenie. Angleder te ana nesavi odluka, ka razmislina bašo akala pučiba: „Kola načelija tari Biblija šaj te pomožinen mange? So ka kerel o Isus ki akaja situacija? Koja odluka ka kerel bahtalo e Jehova?“ Valjani te ovel amen navika te razmislina ko asavko način. Adaleske, te dikha nekobor situacie. Baši sekoja situacija ka dikha jekh načelo tari Biblija so šaj te pomožinel amenge te ana mudro odluka.

15, 16. Sar adava so ka razmislina sar o Hristos šaj te pomožinel amenge a) keda birinaja bračno partneri? b) keda birinaja amala?

¹⁵ Keda birinaja bračno partneri. Jekh biblisko načelo kova so šaj te primenina le ki akaja situacija tano pišimo ko 2. Korinkjanite 6:14, 15. (Čitin.) O Pavle jasno vakergja kaj o duhovna manuša na dikhena ko bukja ko isto način sar o telesna manuša. Sar šaj akava načelo te pomožinel tuke keda birinea bračno partneri?

 ¹⁶ Keda birinaja amala. Dikh o biblisko načelo taro 1. Korinkjanite 15:33. (Čitin.) Okova soj duhovno zrelo nane te družinel pe manušencar so šaj te keren poslabo leskiri vera. Razmislin sar šaj te primenine akava načelo ko različna situacie. Na primer, sar šaj te pomožinel tuke keda koristinea socijalna mreže? Sar šaj te pomožinel tuke te odlučine dali ka khele igre ko Internet manušencar so na pendžarea len?

17-19. Sar adava so siem duhovna manuša pomožinela amenge a) te izbegina bukja so nane korisna? b) te oven amen duhovna celija? c) te rešina o nesoglasuvanja?

¹⁷ Bukja so šaj te čhinaven amen duhovno te napredujna. O apostol Pavle vakergja jekh važno predupreduvanje ko Evreite 6:1. (Čitin.) Valjani te izbegina bukja so nane korisna baši amari duhovnost. Akava predupreduvanje šaj te pomožinel amenge te razmislina bašo pučiba sar soj: „Dali akaja buti tani korisno ili nane la vrednost? Dali te prifatinav akava biznis? Soske te na ovav delo tari nesavi grupa so mangela te kerel promene ko sveto?“

¹⁸ Duhovna celija. O Isus dengja amenge šukar sovet bašo celija (Mat. 6:33). Jekh duhovno manuš čhivela o Carstvo ko prvo than ko plo životo. Akava načelo ka pomožinel amenge te dobina odgovor bašo akala pučiba: „Dali valjani te džav ko fakulteti otkeda ka završinav e sredno školaja? Valjani li te prifatinav nesavi ponuda bukjake?“

¹⁹ Nesoglasuvanja. O sovet so pišingja o Pavle e hristijanenge ko Rim šaj te pomožinel amenge keda isi amen nesoglasuvanja e javerencar (Rim. 12:18). Adaleske so džaja palo e Isuseskoro primer trudinaja amen te ova „ko mir sa e manušencar“. Sar reagirinaja keda isi amen nesoglasuvanja nekasaja? Dali amenge pharo te prifatina e javerengoro mislenje? Dali siem pendžarde sar manuša „so kerena mir“? (Jak. 3:18).

20. Soske mangea ponadari da duhovno te napredujne?

²⁰ Akala tane samo nekobor primerija so sikavena sar o načelija tari Biblija šaj te pomožinen amenge te ana odluke so sikavena kaj siem vodime taro e Devleskoro duho. Ako trudinaja amen te ova duhovna manuša, ka ova bahtale hem zadovolna. O Roberti so spomningjem le ko početok, vakerela: „Otkeda uljum paše e Jehovaja, uljum pošukar rom hem dad. Sium sine zadovolno hem bahtalo“. Ako trudinaja amen te napredujna duhovno, amende da ka oven amen but bereketija. Panda avdive ka ovel amen pobahtalo životo, a ko vreme so avela ka dobina „o čačutno životo“ (1. Tim. 6:19).