1, 2. Sar sikavela o Jehova kaj tano darežlivo?

O JEHOVA tano darežlivo Devel. Sa so isi amen avela lestar. Leskoro tano sa o zlato, o srebro hem o prirodna resursija ki Phuv kola so koristinela len te održinel o životo (Ps. 104:13-15; Agej 2:8). Tari Biblija dikhaja kaj o Jehova ponekogaš koristingja akala skapocena bukja te kerel čudija te šaj te pomožinel ple slugenge.

² Na primer, o Jehova 40 berš dengja mana hem pani e Izraelconge džikote živinena sine ki pustina (2. Moj. 16:35). Adaleske, sine len sa so valjani lenge (Neem. 9:20, 21). Palo nesavo vreme, o Jehova dengja sila e prorokoske e Elisejeske te kerel čudo agjaar so kergja te ovel poviše zejtini jekhe udovica. Akava poklon taro Devel pomožingja lake te platinel ple borčija hem te ačhoven la dovolno pare te šaj te živinen oj hem lakere čhave (2. Car. 4:1-7). Isto agjaar, o Jehova pomožingja e Isuseske te kerel čudo te šaj te ovel hajbaske, pa čak pare keda valjani sine (Mat. 15:35-38; 17:27).

3. So ka dikha ki akaja statija?

 ³ O Jehova šaj te koristinel sa so mangela te šaj te poddržinel adava so stvoringja. Ama, ov ohrabrinela ple slugen te koristinen pumare materijalna sredstvija te šaj te poddržinen o čačutno obožavanje. (2. Moj. 36:3-7; čitin Izreki 3:9.) Soske o Jehova adžikerela amendar te da le taro amare materijalna sredstvija? Sar o verna sluge e Jehovaskere taro purano vreme poddržinena sine finansiski o čačutno obožavanje? Sar e Devleskiri organizacija koristinela o dobrovolna prilogija ko amaro vreme? O odgovorija bašo akala pučiba ka dikha len ki akaja statija.

4. So sikavaja e Jehovaske keda poddržinaja o čačutno obožavanje?

⁴ Amen daja e Jehovaske adaleske so mangaja le hem ceninaja le. Keda razmislinaja bašo sa so kerela amenge o Jehova, phergjola amaro vilo. O David da osetingja pe agjaar keda objasningja kola bukja ka valjanen te šaj te gradinel pe o hrami. Ov vakergja kaj sa so isi amen avela taro Jehova hem kaj sa so daja e Jehovaske ov više angleder dengja amenge. (Čitin 1. Letopisi 29:11-14.)

5. Sar i Biblija sikavela kaj o nesebično dejbe tano važno delo taro čačutno obožavanje?

⁵ Isto agjaar, daja e Jehovaske soske adava tano jekh način sar obožavinaja le. Ki jekh vizija, o apostol Jovan šungja sar e Jehovaskere sluge ko nebo vakerena: „Mokjno Jehova, tu sian amaro Devel hem zaslužinea sarine te slavinen tut hem te sikaven tuke čest, soske tu kergjan sa o bukja, hem ola postojnena soske tu agjaar mangljan“ (Otk. 4:11). Sigurno, o Jehova zaslužinela sa i slava hem i čest, adaleske mangaja te da leske amaro najšukar. Preku o Mojsej, o Jehova dengja zapoved e Izraelconge te ikeren trin praznikija ko berš. Jekh način sar slavinena sine e Jehova ko akala prilike sine agjaar so anena sine materijalna bukja. Ko akala praznikija o Izraelcija na valjani sine te aven „anglo Jehova čuče vastencar“ (5. Moj. 16:16). Slično tano avdive da, važno delo taro obožavanje tano keda daja nesebično e Jehovaske taro amare materijalna sredstvija. Agjaar ka sikava kaj siem blagodarna hem kaj poddržinaja adava so kerela leskiri organizacija.

6. Soske tano amare šukaripaske te da? (Dikh i slika ko početok tari statija.)

⁶ Amare šukaripaske tano darežlivo te da, a na samo te dobina. (Čitin Izreki 29:21.) Zamislin tuke sar jekh tikno čhavo kova so dobinela pare taro ple roditelija koristinela delo taro adala pare te kinel poklon ple roditelenge. Sar ka osetinen pe o roditelija bašo akava poklon? Ili, zamislin sar jekh terno pioneri so živinela ple roditelencar dela len pare te šaj te platinen i kirija ili te kinen hajbaske. Šaj o roditelija na očekujnena lestar akava, ama prifatinena o poklon. Soske? Soske agjaar sikavela kaj tano blagodarno bašo sa so kerena leske. Slično, o Jehova džanela  kaj amare šukaripaske tano te da le taro amare materijalna sredstvija.

7, 8. Sar e Jehovaskoro narodo ko biblisko vreme dengja šukar primer adalea so dengja prilogija a) baši posebno cel? b) te šaj te poddržinen o čačutno obožavanje?

⁷ Tari Biblija džanaja kaj e Jehovaskere sluge dena sine prilogija te šaj te poddržinen o čačutno obožavanje. Ponekogaš dena sine baši posebno cel. Na primer, o Mojsej ohrabringja e Izraelcon te den prilog te šaj te gradinel pe o sveto šatori. Palo nesavo vreme, o David kergja o isto te šaj te gradinel pe o hrami (2. Moj. 35:5; 1. Let. 29:5-9). Džikote vladinela sine o cari o Joas, o sveštenikija popravingje o hrami agjaar so koristingje o pare kola so o manuša dengje len (2. Car. 12:4, 5). Ko prvo veko, o hristijanja šungje kaj ki Judeja isi bokhalipe hem kaj e phralenge adari valjani pomoš. Adaleske, sekova hristijani sprema ple okolnostija odlučingja te bičhalel pomoš e phralenge (Dela 11:27-30).

⁸ E Jehovaskere sluge isto agjaar dena sine materijalno pomoš okolenge so predvodinena sine ko čačutno obožavanje. Na primer, sprema e Mojsejeskoro zakoni, o levitija na dobingje nasledstvo sar o javera plemija. Adaleske o Izraelcija valjani sine redovno te den prilogija, hem agjaar o levitija šaj sine te koncentririnen pe ki služba ko sveto šatori (4. Moj. 18:21). Ko slično način, nesave darežliva džuvlja koristinena sine adava so sine len te šaj te poddržinen e Isuse hem leskere apostolen (Luka 8:1-3).

9. Sar e Devleskere sluge ko purano vreme dena sine prilogija?

⁹ E Devleskere sluge ko purano vreme dena sine prilogija ko različna načinija. O Izraelcija so dengje prilog te šaj te gradinel pe o sveto šatori šaj dengje o skapocena bukja so angje len taro Egipet (2. Moj. 3:21, 22; 35:22-24). Ko prvo veko, nesave hristijanja bikingje pumare bukja, sar na primer nive ili khera, hem dengje o pare e apostolenge. A palo adava o apostolija koristingje akala pare te šaj te pomožinen e phralenge hem e phenjenge kaske so valjani sine pomoš (Dela 4:34, 35). Javera hristijanja redovno čhivena sine pare ki strana te šaj te poddržinen o čačutno obožavanje (1. Kor. 16:2). Agjaar, sarine šaj sine te den nešto — hem okola so sine but barvale hem okola so sine but čorole (Luka 21:1-4).

10, 11. a) Sar šaj te dža palo primer e Jehovaskere slugengoro taro biblisko vreme? b) Sar dikhea ki prilika te poddržine adava so kerela e Jehovaskiri organizacija?

¹⁰ Avdive da šaj ka valjani te da prilogija baši nesavi posebno cel. Šaj tlo sobranie planirinela te renovirinel i dvorana ili te gradinel nevi. Šaj valjani te renovirinel pe i podružnica ki tli phuv, te platinel pe  o than kote so ikerela pe o kongres, ili te pomožinel pe e phralenge so doživingje prirodno katastrofa. Isto agjaar, amare dobrovolna prilogoncar poddržinaja e misioneren, e specijalna pioneren, e pokrainsko nadglednikon hem okolen so kerena buti ko glavno sedište hem ko podružnice ko celo sveto. Tlo sobranie šaj redovno bičhalela prilogija te šaj te gradinen pe kongresna sale hem dvorane amare phralenge ko javera thana ko sveto.

¹¹ Sekoj amendar šaj te del nešto te šaj te poddržinel adava so kerela e Jehovaskiri organizacija ko akala posledna dive. Poviše prilogija tane anonimna. Keda čhivaja pare ko kutie bašo prilogija ki dvorana ili daja prilog preku internet-stranica jw.org, na vakeraja e javerenge kobor dengjem. Ama, šaj mislinaja amenge kaj amare prilogija tane but tikne hem kaj na vredinena. Pobaro delo taro materijalna sredstvija so dobinela len i organizacija avena taro tikne prilogija, a na taro nekobor pobare prilogija. Čak amare phralen so isi len but hari pare džana palo primer so dengje o hristijanja ko prvo veko tari Makedonija. Ola sine but čorole, ama molingje te mukhen len te den prilog hem palo adava dengje darežlivo (2. Kor. 8:1-4).

12. So kerela amari organizacija te šaj te koristinen pe o prilogija ko najšukar način?

¹² O Vodečko telo tano verno hem razborito keda odlučinela sar te koristinen pe o prilogija (Mat. 24:45). O phralja soj ko Vodečko telo molinena pe te anen šukar odluke hem palo adava šukar planirinena sar te koristinen o pare (Luka 14:28). Ko biblisko vreme, o verna murša so grižinena pe sine bašo prilogija pazinena sine te koristinen len samo bašo čačutno obožavanje. Na primer, o Ezra irangja pe ko Erusalim skapocena bukjencar so dobingja len sar prilog taro persisko cari — zlato, srebro hem javera vredna bukja so avdive bi vredinena sine poviše taro 80 milionija evrija. O Ezra ko akala prilogija dikhela sine sar poklon bašo Jehova. Adaleske dengja konkretna upatstvija te šaj te zaštitinen len džikote nakhavena len sine taro opasna thana (Ezra 8:24-34). But berša palo adava, o apostol Pavle khedingja pare te pomožinel e čorole phralenge ki Judeja. Ov organiziringja okola so ingarena sine o pare te keren sa „česno, na samo anglo Jehova nego anglo manuša da“. (Čitin 2. Korinkjanite 8:18-21.) Avdive, amari organizacija džala palo primer so dengje o Ezra hem o Pavle agjaar so but pazinela sar koristinela o prilogija.

13. Soske ko posledno vreme i organizacija kergja nesave promene?

¹³ Jekh familija šaj ka meninel o način sar koristinela o pare te šaj te na trošinel poviše taro adava so zarabotinela. Ili šaj te razmislinel sar te kerel poednostavno plo životo te šaj te služinel ki pobari mera e Jehovaske. Isto akava važinela e Jehovaskere organizacijake. O posledna berša počmingje pe but neve proektija hem nesavo vreme sine poviše trošako nego prilogija. Adaleske, i organizacija, isto sar jekh familija, rodela načinija sar šaj te štedinen pe pare hem te završinel pe i buti poednostavno, te šaj o prilogija te koristinen pe ko najšukar način.

14-16. a) Bašo so koristinena pe tle prilogija? b) Sar koristingje tuke akala duhovna poklonija?

¹⁴ But džene so beršencar služinena e Jehovaske vakerena kaj avdive tari organizacija dobinaja poviše poklonija taro bilo keda angleder. Akana isi amen i internet-stranica jw.org hem i internet-televizija JW Broadcasting. Isi amen o Prevod Nov svet ko but čhibja. Ko 2014/2015 berš, o megjunarodno kongres „Roden najangle e Devleskoro Carstvo!“ ikergja pe ko nesave taro najbare stadionija ko 14 dizja ko celo sveto. Sarine so sine prisutna sine but bahtale!

¹⁵ But phralja hem phenja tane blagodarna bašo akala poklonija tari e Jehovaskiri organizacija. Na primer, jekh bračno pari so služinela ki Azija pišingja: „Amen služinaja ki tikni diz. Adaleske, ponekogaš osetinaja amen izolirime hem bistraja kaj o čačutno obožavanje kerela pe ko celo sveto. Ama, keda dikhaja o emisie taro JW Broadcasting, setinaja amen kaj siem delo taro phralipe soj ko celo sveto. O phralja hem o phenja taro amaro than tane but bahtale so isi amen o JW Broadcasting. But puti otkeda ka dikhen e masekoskiri emisija šunaja len sar vakerena kaj osetinena pe popaše e phralencar taro Vodečko telo. Akana, taro bilo keda angleder, ola dičinena pe soj tane delo tari e Devleskiri organizacija“.

¹⁶ Avdive, ko celo sveto gradinena pe ili renovirinena pe paše 2.500 dvorane. O phralja taro jekh sobranie ko Honduras vakergje kaj poangle soninena sine te ovel len lengiri dvorana, ama akana lengoro suno ulo čače. Ola pišingje: „But siem bahtale so siem delo tari e Jehovaskiri familija hem so isi amen phralipe soj ko celo sveto“. But džene osetingje pe slično keda dobingje i Biblija ili javera publikacie ki pli čhib, keda o phralja hem o phenja pomožingje lenge pali  nesavi prirodno katastrofa, ili keda dikhle o šukar rezultatija taro propovedibe ko prometna thana ko lengoro podračje.

17. Kotar džanaja kaj o Jehova poddržinela pli organizacija avdive?

¹⁷ But džene so nane e Jehovaskere svedokija našti te haljoven sar šaj te kera sa akala bukja samo taro dobrovolna prilogija. Otkeda jekh direktori tari jekh bari firma posetingja jekh taro amare pečatnice, ov sine vooduševimo keda dikhlja kaj dobrovolcija kerena sa i buti hem sa adava kerela pe dobrovolno prilogoncar hem bizo te organizirinel pe nesavo nastan te šaj te khedel pe pare. Ov vakergja kaj adava so keraja tano čače čudo. Amen da mislinaja agjaar! Džanaja kaj sa akava šaj te kera adaleske so o Jehova pomožinela amenge (Jov 42:2).

18. a) Kola bereketija isi amen keda poddržinaja adava so kerela e Jehovaskiri organizacija? b) Sar šaj te sikava amare čhaven hem e neven te keren adava?

¹⁸ O Jehova sikavela amenge čest adalea so dela amenge prilika te poddržina adava so kerela leskiri organizacija. Ov uverinela amen kaj ka del amen bereketija ako keraja adava (Mal. 3:10). O Jehova vetinela kaj ako siem darežliva, sekogaš ka ovel amen adava so valjani amenge. (Čitin Izreki 11:24, 25.) Isto agjaar, taro e Devleskoro lafi džanaja kaj „poviše isi bahtalipe keda dela pe nego keda lela pe“ (Dela 20:35). Amare lafencar hem adalea so keraja šaj te sikava amare čhavenge hem e nevenge ki organizacija sar šaj te poddržinen o čačutno obožavanje hem te oven len but bereketija.

19. Ko so pottikningja tut akaja statija?

¹⁹ Sa so isi amen dengja amen o Jehova. Keda amen da daja le nešto, sikavaja kaj mangaja le hem ceninaja sa adava so kergja amenge (1. Let. 29:17). Keda o Izraelcija dengje prilogija te gradinel pe o hrami ola sine bahtale bašo adava so dengje e Jehovaske dobrovolno hem taro vilo (1. Let. 29:9). Ponadari da te ova bahtale džikote daja e Jehovaske taro adava so dengja amenge ov.