1-2. a) Sar vlijajngje o lafija taro Isaija 41:10 upri jekh phen so vikinela pe Jošiko? b) Kaske šaj te koristinen o lafija taro akava stiho?

I DOKTORKA vakergja jekh lošno haberi jekhe verno phenjake so vikinela pe Jošiko. Oj vakergja lake kaj ačhilo la samo panda nekobor masekija životo. Sar reagiringja i Jošiko? Oj setingja pe ko jekh omileno biblisko stiho, Isaija 41:10. (Čitin.) A palo adava ko jekh smirimo način vakergja e doktorkake kaj na darala soske o Jehova astarela la taro vas. * O utešna lafija taro akava stiho pomožingje amare mangle phenjake te sikavel celosno doverba ko Jehova. Akava stiho šaj amenge da te pomožinel te ačhova smirime keda arakhljovaja ko phare situacie. Te šaj te haljova sar šaj te pomožinel amenge, najangle te dikha soske o Devel vakergja akala lafija e Isaijaske.

² O Jehova pottikningja e Isaija te pišinel akala lafija te šaj te utešinel e Evreen kola so palo nesavo vreme sine ingarde ko ropstvo ko Vavilon. Ama, o Devel kergja akala lafija te ačhoven te šaj lendar te ovel len korist na samo o Evreija nego isto agjaar sa leskere sluge so živingje ottegani pa sa dži avdive (Isa. 40:8; Rim. 15:4). Adaleske so živinaja ko „but pharo vreme“, avdive — poviše taro bilo keda angleder — valjanena amenge o ohrabruvačka  lafija soj pišime ko lil Isaija (2. Tim. 3:1).

3. a) Kola vetuvanja tane pišime ko Isaija 41:10, kova soj birimo te ovel e beršeskoro stiho bašo 2019 berš? b) Soske valjanena amenge akala vetuvanja?

³ Ki akaja statija ka dikha trin vetuvanja so dengja len o Jehova kola so šaj te keren amari vera te ovel pozorali, a pišime tane ko Isaija 41:10: 1) o Jehova ka ovel amencar, 2) ov tano amaro Devel hem 3) ov ka pomožinel amenge. Akala vetuvanja * valjanena amenge soske slično sar i Jošiko, sekova jekh amendar arakhljovela ko phare situacie. Osven adava, osetinaja pharipe adaleske so ovena lošna bukja ko sveto. A nesave trpinena progonstvo taro mokjna vlade. Te dikha akala trin vetuvanja jekh po jekh.

4. a) Kova tano o prvo vetuvanje bašo so ka kera lafi? (Dikh hem i fusnota.) b) Kole lafencar o Jehova vakergja ple čuvstvija sprema amende? c) Sar vlijajnela upri tute adava so vakergja o Devel?

⁴ O Jehova najangle utešinela amen e lafencar: „Ma dara, soske me sium tuja!“ * Ov sikavela kaj tano amencar adalea so sikavela amenge celosno vnimanie hem baro mangipe. Primetin kole lafencar o Devel vakergja ple nežna hem hor čuvstvija sprema amende. O Jehova vakergja: „Tu sian mange skapoceno, sikavdi tuke čest hem me mangava tut“ (Isa. 43:4). Na postojnela ništo ko univerzum so šaj te kerel o Jehova te čhinavel te mangel ple slugen; ov nikogaš nane te mukhel len (Isa. 54:10). Leskoro mangipe hem amalipe dena amen bari hrabrost. Ov ka arakhel amen avdive, isto sar so arakhlja ple amale e Avrame (Avraame). O Jehova vakergja leske: „Ma dara, Avram. Me ka arakhav tut“ (1. Moj. 15:1).

5-6. a) Soske siem uverime kaj o Jehova mangela te pomožinel amenge te ikljova ko krajo e problemencar? b) So šaj te sikljova tari Jošiko?

⁵ Uverime siem kaj o Jehova mangela te pomožinel amenge te ikljova ko krajo e problemencar, soske ov vetingja ple narodoske akava: „Ako nakhea taro panja, me ka  ovav tuja. Ako nakhea taro reke, ola nane te poplavinen tut. Ako nakhea tari jag, nane te thabljove hem plameno nane te tharel tut“ (Isa. 43:2). So značinena akala lafija?

⁶ O Jehova na vetinela amenge kaj ka cidel o nevolje so kerena amaro životo popharo, ama ov nane te mukhel o „reke“ taro problemija te poplavinen amen, ili o „plameno“ taro ispitija te kerel amenge trajno šteta. Ov uverinela amen kaj ka ovel amencar hem ka del amenge sila te nakha taro pharipa so ka oven amen. So ka kerel o Jehova? Ov ka pomožinel amenge te pobedina i dar te šaj te ačhova leske verna, čak ako džanaja kaj šaj te mera (Isa. 41:13). I Jošiko, koja so sine spomnimi ko početok tari statija, uveringja pe ko adava. I čhaj lakiri vakerela: „Siem sine vooduševime taro adava kobor mi daj sine smirimi. Čače dikhlem sar o Jehova dela la andruno mir. Dži ko posledno dive taro plo životo kerela sine lafi e medicinsko sestraja hem e pacientencar bašo Jehova hem bašo leskere vetuvanja“. So sikljovaja tari Jošiko? Ako isi amen doverba ko e Devleskoro vetuvanje kaj ka ovel amencar, amen da šaj te ova silna hem hrabra džikote trpinaja nevolje.

7-8. a) Kova tano o dujto vetuvanje so dengja o Jehova, hem so značinela? b) Soske o Jehova vakergja e Evreenge te na oven sekirime? c) Kola lafija taro Isaija 46:3, 4 sigurno ohrabringje e Devleskere narodo?

⁷ Dikh o dujto vetuvanje so pišingja o Isaija: „Ma ov sekirimo, soske me sium tlo Devel“. So značinena akala lafija? Ki originalno čhib, e lafencar soj prevedime sar „ov sekirimo“ mislinela pe ki nekaste so dikhela ple strane adaleske so darala nekastar ili tari nesavi opasnost.

⁸ Soske o Jehova vakergja e Evreenge kola so palo nesavo vreme gele ko ropstvo ko Vavilon te na oven sekirime? Adaleske so ov džanlja kaj o manuša tari adaja phuv ka daran. Taro so? Ko krajo taro e Evreengoro ropstvo kova so trajngja 70 berša, o Vavilon ka ovel sine napadimo tari silno medo-persisko vojska. O Jehova manglja te koristinel akale vojska te šaj te oslobodinel ple narodo taro Vavilon (Isa. 41:2-4). Keda o Vaviloncija hem o javera narodija ko adava vreme šungje kaj o dušmani avela popaše, ola probingje te ohrabrinen jekh jekhe e lafencar: „Ov silno“. Isto agjaar, počmingje te keren panda poviše idolija soske nadinena pe sine kaj ola ka arakhen len (Isa. 41:5-7). Dži tegani, o Jehova utešingja e Evreen akale lafencar: „A tu Izrael [a na o javera narodija] sian mlo sluga... Ma ov sekirimo, soske me sium tlo Devel“ (Isa. 41:8-10). Primetin kaj o Jehova vakergja: „Me sium tlo Devel“. Akale lafencar ov uveringja ple verna slugen kaj na bistergja len — ov panda sine lengoro Devel, a ola panda sine leskoro narodo. Ov vakergja lenge: „Ka ingarav tumen... hem ka spasinav tumen“. Akala utešna lafija sigurno but ohrabringje e Evreen. (Čitin Isaija 46:3, 4.)

9-10. Soske na valjani te dara? Vaker sporedba.

⁹ Avdive, poviše taro bilo keda angleder, o manuša tane sekirime soske o uslovija ko sveto ovena sa pološna. Džangjola pe, amen da doživinaja ista problemija. Ama, na valjani te dara. O Jehova vakerela amenge: „Me sium tlo Devel“. Soske akala lafija tane silno pričina te ačhova smirime?

¹⁰ Razmislin baši akaja sporedba: Duj džene, o Denisi hem o Roberti, tane ko avioni kova so tinanela tari silno bavlal. Džikote o avioni džala upre-tele, o piloti vakerela sarinenge ko avioni: „Molinaja  tumen, ma phraven o pojasija. Nesavo vreme ka oven turbulencie“. O Denisi but tano voznemirimo. Ama, tegani o piloti vakerela: „Kerela tumencar lafi o piloti. Isi man kontrola upro avioni, adaleske ma sekirinen tumen“. O Denisi vakerela: „E, akana epten utešingjan amen!“ Ama, ov primetinela kaj o Roberti na sekirinela pe. Adaleske pučela le: „Sar šaj te ove doborom smirimo?“ O Roberti asala hem vakerela leske: „Pendžarava e pilote but šukar. Ov tano mo dad. Ako džanea kobor šukar piloti tano ov, tu da nane te dara. Te vakerav tuke nešto baši leste...“

11. So sikljovaja tari sporedba bašo duj manuša soj ko avioni?

¹¹ So sikljovaja tari akaja sporedba? Isto sar o Roberti, amen da siem smirime soske but šukar pendžaraja amare Dade soj ko nebo, e Jehova. Džanaja kaj ov bezbedno ka vodinel amen preku o problemija soj sar bure ko posledna dive akale svetoskere (Isa. 35:4). Isi amen doverba ko Jehova, adaleske šaj te ova smirime džikote o manuša ko sveto živinena ki dar (Isa. 30:15). Postapinaja slično sar o Roberti hem keda vakeraja e javerenge soske isi amen doverba ko Jehova. Agjaar ola da ka šaj te oven sigurna kaj bizi razlika save problemija ka oven len, o Jehova ka pomožinel len.

12. a) Kova tano o trito vetuvanje so dengja o Jehova? b) Ko so setinkerena amen o lafija e Jehovaskoro „vas“?

¹² Te dikha o trito vetuvanje so pišingja le o Isaija: „Me ka kerav tut zoralo hem ka pomožinav tuke“. O Isaija više objasningja sar o Devel ka kerel ple narodo te ovel zoralo, keda vakergja: „O Jehova ka avel. Ov tano silno hem leskoro vas ka vladinel“ (Isa. 40:10). Ki Biblija, o lafi „vas“ but puti značinela mokj. Adaleske, o lafija kaj e Jehovaskoro „vas ka vladinel“,  setinkerena amen kaj o Jehova tano mokjno Cari. Ov koristingja pli but bari sila te poddržinel hem te braninel ple slugen ko purano vreme, hem ponadari da kerela pozorale hem arakhela okolen so isi len doverba ki leste (5. Moj. 1:30, 31; Isa. 43:10).

13. a) Posebno ki koja situacija o Jehova ikerela pe ko ple lafija kaj ka kerel amen zorale? b) Kova vetuvanje dela amen sila hem doverba?

¹³ Posebno keda progoninena amen o dušmanja, o Jehova ikerela pe ko ple lafija: „Me ka kerav tut zoralo“. Avdive, ko nesave delija taro sveto amare dušmanja sa ple silencar probinena te čhinaven amaro propovedibe ili te zabraninen amari organizacija. Ama, amen na siem previše sekirime bašo asavke napadija. O Jehova dengja jekh vetuvanje kova so dela amen sila hem doverba. Ov vetingja: „Nisavo oružje soj kerdo protiv tute nane te uspejnel“ (Isa. 54:17). Akala lafija setinkerena amen ko trin važna bukja.

14. Soske na siem iznenadime so napadinena amen e Devleskere dušmanja?

¹⁴ Prvo, sar sledbenikija e Hristoseskere, amen džanaja kaj o javera ka mrzinen amen (Mat. 10:22). O Isus prorokujngja kaj leskere učenikija ka oven but progonime ko posledna dive (Mat. 24:9; Jovan 15:20). Dujto, e Isaijaskoro proroštvo predupredinela amen kaj amare dušmanja nane samo te mrzinen amen, nego isto agjaar ka koristinen različno oružje protiv amende. Ko akava oružje tano vklučimo širibe informacie so nane celosno točna ili čista hovajba baši amende, hem surovo progonstvo (Mat. 5:11). O Jehova nane te čhinavel amare dušmanen te koristinen asavko oružje džikote borinena pe protiv amende (Ef. 6:12; Otk. 12:17). Ama, na valjani te dara. Soske?

15-16. a) Koja tani i trito buti so valjani te pamtina la hem sar o Isaija 25:4, 5 potvrdinela adava? b) Sar ko Isaija 41:11, 12 tano objasnimo so ka ovel okolencar so borinena pe protiv amende?

¹⁵ Te dikha i trito buti so valjani te  pamtina la. O Jehova vakergja kaj „nisavo oružje“ so ka koristinel pe protiv amende „nane te uspejnel“. Isto sar jekh zido so šaj te zaštitinel amen tari silno bura, agjaar o Jehova šaj te zaštitinel amen taro napadija e dušmanengere, kola soj sar „bura so khuvela ko zido“. (Čitin Isaija 25:4, 5.) Amare dušmanja nikogaš nane te uspejnen te keren amenge trajno šteta (Isa. 65:17).

¹⁶ O Jehova isto agjaar kerela pozorali amari doverba ki leste agjaar so ko detalija objasninela amenge so ka ovel okolencar soj gnevna protiv amende (Čitin Isaija 41:11, 12.) Bizi razlika kobor silno ka borinen pe amare dušmanja protiv amende ili kobor poopasno ka ovel i vojna, o krajo ka ovel sekogaš isto — sarine soj dušmanja e Devleskere narodoske ka oven uništime.

17-18. a) Sar adava so čitinaja i Biblija šaj te bajrarel amari doverba ko Devel? Vaker primer. b) Sar šaj te pomožinel amenge adava so ka razmislina hor bašo e beršeskoro stiho bašo 2019 berš?

¹⁷ Amari doverba ko Jehova keraja la pozorali keda pendžaraja le panda pošukar. A edinstveno način sar šaj pošukar te pendžara le tano agjaar so šukar ka čitina i Biblija hem hor ka razmislina baši late. Ki late isi točno izveštaj bašo adava sar o Jehova arakhela sine ple narodo ko purano vreme. Akava kerela te ovel amen doverba kaj avdive da ka grižinel pe amenge.

¹⁸ Te dikha jekh but šužo primer so koristingja o Isaija te šaj te pomožinel amenge te haljova sar o Jehova arakhela amen. Ov sporedingja e Jehova pastirea, a e Devleskere slugen bakhrencar. O Isaija vakergja: „Vastea ka khedel e bakhren, ki angali ka ingarel len“ (Isa. 40:11). Keda siem svesna kaj o Jehova cvrsto ikerela amen ki pli angali, osetinaja amen zaštitime hem smirime. Te šaj te ačhova smirime čak keda isi amen problemija, o verno hem razborito robo biringja o Isaija 41:10 sar beršeskoro stiho bašo 2019 berš: „Ma ov sekirimo, soske me sium tlo Devel“. Razmislin hor bašo akala utešna lafija. Ola ka den tuke sila te izdržine o pharipa so ka oven tut.