SREDA sabajle, ko 24 januari 2018 berš, ko betelska familie ko SAD hem ki Kanada sine čitimo jekh posebno izvestuvanje. Sine vakerdo kaj o phral Kenet Kuk tano nevo členi ko Vodečko telo e Jehovaskere svedokongoro.

O phral Kuk bijandilo hem barilo ki Pensilvanija (SAD). Ov šungja bašo čačipa taro plo součeniko kratko angleder te završinel e sredno školaja hem krstingja pe ko 7 juni 1980 berš. Počmingja te služinel sar opšto pioneri ko 1 septemvri 1982 berš, a palo duj berš sine vikimo ko Betel. Počmingja te služinel ko Betel ko 12 oktomvri 1984 berš, ko Volkil (Njujork).

O phral Kuk 25 berš služingja ko različna zadače ki pečatnica hem ko pomošna oddelenija ko Betel. Ko 1996 berš, ov ženingja pe jekhe phenjaja so vikinela pe Džejmi hem laja zaedno ponadari da služingja ko Betel ko Volkil. Ko dekemvri 2009 berš, o phral hem i phen Kuk sine prefrlime ko Obrazovno centar Paterson (Njujork), kote so o phral Kuk služingja ko Oddel so odgovorinela ko pučiba taro čitatelija. Ko april 2016 berš, otkeda kratko irangje pe ko Volkil, o phral hem i phen Kuk sine prefrlime ko Bruklin (Njujork). Pandž masek palo adava selingje pe ko nevo glavno sedište ko Vorvik (Njujork). Ko januari 2017 berš, o phral Kuk sine imenujmo te služinel sar pomošniko ko Odbor pišibaske taro Vodečko telo.