1-2. So vakergja o angeli e džuvlenge kola so gele ko grobo e Isuseskoro, hem so vakergja lenge o Isus?

RANO sabajle ko 16 nisan 33 berš a.e., nekobor verna džuvlja kola so sine but tažna, gele ko grobo kote so angleder jekh dive tekvaš sine čhivdo o telo lengere Gospodareskoro, o Isus Hristos. Ama, keda resle adari, te šaj te makhen leskoro telo mirisliva masloncar, ola but čudingje pe soske dikhle kaj o grobo tano čučo! Tegani pojavingja pe lenge jekh angeli hem phengja lenge kaj o Isus voskresningja. Isto agjaar vakergja: „Ov džala angli tumende ki Galileja. Adari ka dikhen le“ (Mat. 28:1-7; Luka 23:56; 24:10).

² Keda gele peske taro grobo, pojavingja pe lenge o Isus hem vakergja lenge: „Džan, vakeren mle phralenge te džan ki Galileja. Adari ka dikhen man“ (Mat. 28:10). Sigurno e Isuse sine le te del važna upatstvija ple učenikonge soske o prvo nešto so manglja te kerel otkeda voskresningja, sine te arakhel pe lencar.

3-4. Soske šaj te phena kaj e Isuseskiri zapoved soj pišimi ko Matej 28:19, 20, na važinela sine samo e apostolenge? (Dikh i slika tari naslovno strana.)

³ Čitin Matej 28:16-20. Ko adava sostanok, o Isus vakergja ple učenikonge koja važno buti valjani sine te keren ko adava vreme. Adaja tani i isto buti so keraja la amen da avdive. O Isus vakergja: „Džan hem keren učenikija taro manuša taro sa o narodija... sikaven len te ikeren sa so zapovedingjum tumenge“ (Mat. 28:16-20).

 ⁴ O Isus mangela sa leskere sledbenikija te propovedinen. Adaja zapoved na dengja la samo ple 11 verna apostolenge. Keda o Isus dengja akaja zapoved ki planina ki Galileja, adari na sine samo leskere apostolija. Kotar džanaja akava? Setin tut kaj o angeli vakergja e džuvlenge: „Adari ka dikhen le“. Akava značinela kaj adala da džuvlja valjani sine te džan ki Galileja. Sprema adava, osven o apostolija, sigurno akala džuvlja da sine ko adava sostanok. Ama, na sine o edinstvena.

5. So doznajnaja taro 1. Korinkjanite 15:6? Objasnin.

⁵ O apostol Pavle vakerela amenge kaj o Isus ustvari, pojavingja pe poviše taro 500 phralenge (1. Kor. 15:6). Ki koja prilika? Isi amen šukar pričine te verujna kaj o Pavle mislingja baš ko adava sostanok ki Galileja kova soj spomnimo ko 28 poglavje taro Matej. Prvo, poviše taro e Isuseskere učenikija sine tari Galileja. Adaleske sine but polokhe te arakhel pe poviše manušencar ki nesavi planina ki Galileja nego ko nekaskoro kher ko Erusalim. Dujto, otkeda voskresningja, o Isus više pojavingja pe ple 11 verna apostolenge ko jekh kher ko Erusalim. Ako mangela sine samo lenge te del zapoved te propovedinen hem te sikaven e manušen, šaj sine te kerel adava ko Erusalim namesto te rodel ola, o džuvlja hem o javera te arakhen pe lea ki Galileja (Luka 24:33, 36).

6. a) Sar o Matej 28:20 sikavela kaj e Isuseskiri zapoved te sikava e manušen važinela avdive da? b) Kotar dikhela pe kaj e Hristoseskere sledbenikija šunena akaja zapoved?

⁶ Hem trito, i zapoved so dengja la o Isus na važinela sine samo e hristijanenge so živinena sine ko prvo veko. Kotar džanaja akava? Otkeda zapovedingja ple učenikonge te sikaven e manušen, o Isus vakergja: „Me sium tumencar ko sa o dive dži ko krajo akale svetoskoro“ (Mat. 28:20). Sar so phengja o Isus, avdive but manuša kerena učenikija. Sekova berš skoro 300.000 manuša ovena e Isuseskere učenikija, krstinena pe hem ovena e Jehovaskere svedokija!

7. Baši so ka kera lafi ki akaja statija hem soske?

⁷ But džene kolencar so proučinaja i Biblija krstinena pe. Ama, nesave kolencar so proučinaja i Biblija darana te anen asavki odluka. Iako lenge šukar te proučinen, ola na kerena promene. Ako proučinea nekasaja, sigurno mangea te pomožine leske te primeninel adava so sikljovela hem te ovel e Hristoseskoro učeniko. Ki akaja statija ka dikha sar šaj te pomožina e interesenteske te zamangel e Jehova hem te napredujnel. Soske valjani te kera lafi baši akaja tema? Adaleske so ponekogaš ka avel momenti keda šaj ka valjani te odlučina dali te čhinava te proučina lea ili na.

8. Soske ponekogaš e interesentenge šaj te ovel pharo te zamangen e Jehova?

⁸ O Jehova mangela o manuša te služinen leske taro mangipe. Adaleske, valjani te pomožina e interesentenge te haljoven kaj o Jehova but grižinela pe lenge hem kaj but mangela len. Amen mangaja te dikhen ki leste sar Dad hem sar nekoj so zaštitinela okolen kaske so valjani pomoš (Ps. 68:5). Keda ka haljoven kobor mangela len o Devel, verojatno ki lende da ka bajrol mangipe sprema leste. Nesavenge šaj tano pharo te dikhen e Jehova sar Dad kova soj pherdo mangipaja soske lengere dada na sikavgje lenge mangipe hem naklonost (2. Tim. 3:1, 3). Adaleske, džikote proučinea lencar, istaknin e Jehovaskere but šuže osobine. Pomožin e interesentenge te haljoven kaj  amaro Devel, kova so grižinela pe amenge, mangela ola te dobinen večno životo hem kaj tano spremno te pomožinel lenge ko adava. So javer šaj te kera?

9-10. Kola publikacie valjani te koristina proučibaske e interesentencar, hem soske?

⁹ Koristin o lila „So sikavela i Biblija“ hem „Ačhov ko e Devleskoro mangipe“. I cel akale publikaciengiri tani te pomožinel e interesentenge te zamangen e Jehova. Na primer, ko prvo poglavje taro lil So sikavela i Biblija isi odgovorija bašo akala pučiba: Dali o Devel grižinela pe amenge?, Sar osetinela pe keda o manuša cidena muke? hem Šaj li te ove paše e Jehovaja? O lil Ačhov ko e Devleskoro mangipe ka pomožinel e interesenteske te haljovel sar adava so ka primeninel o bibliska načelija šaj te kerel leskoro životo pošukar hem te ovel popaše e Jehovaja. Čak ako proučingjan više akala lila nekasaja, spremin tut šukar hem razmislin bašo e interesenteskere konkretna potrebe.

 ¹⁰ Ama, so ako interesinela le nesavi tema kolake so kerela pe lafi ki javer publikacija koja so nane delo taro amare glavna publikacie službake? Šaj te pottiknine le te čitinel la korkori. Agjaar ka šaj te prodolžinen te proučinen o publikacie kola so više spomningjem len.

11. Keda valjani te počmina te molina amen ako proučinaja nekasaja, hem sar šaj te kera adava?

¹¹ Počmin o biblisko kursi molitvaja. Ko but slučaija, ako počminaja redovno te proučina nekasaja, najšukar tano te počmina te molina amen so šaj porano, obično ko prva nekobor kurke. Šukar tano te počmina hem te završina molitvaja. Mora te pomožina e interesenteske te haljovel kaj šaj te haljova i Biblija samo ako pomožinela amen e Devleskoro sveti duh. Nesave objavitelija objasninena soske tano šukar te molina amen agjaar so čitinena Jakov 1:5, kote so pišinela: „Ako nekaske tumendar falinela mudrost, neka rodel taro Devel“. Palo adava pučena e interesente: „Sar šaj te roda mudrost taro Devel?“ Ov verojatno ka vakerel kaj valjani te molina amen leske.

12. Sar šaj te koristine o Psalm 139:2-4 te šaj te pottiknine e interesente iskreno te molinel pe e Jehovaske bašo sa?

¹² Objasnin e interesenteske sar te molinel pe. Vaker leske kaj o Jehova mangela te šunel leskere iskrena molitve. Objasnin leske kaj ko amare lična molitve šaj iskreno te kera lafi e Devlea bašo sa — čak te vakera leske amare najhor čuvstvija, kola so našti te vakera len nikaske javereske. Ustvari, o Jehova agjaar da džanela amare najgaravde misle. (Čitin Psalm 139:2-4.) Isto agjaar, šaj te pottiknine e interesente te molinel e Jehova te pomožinel leske te meninel plo pogrešno razmislibe hem te pobedinel o lošna navike. Na primer, nekaske so proučinela više nesavo vreme šaj but značinela nesavo prazniko kova so isi le paganska korenija. Iako džanela kaj o hristijanja na valjani te slavinen adava prazniko, sepak svidžinena pe leske nesave običaija soj povrzime lea. So šaj te kere? Pottiknin le te vakerel e Jehovaske save čuvstvoncar borinela pe hem te rodel lestar pomoš te šaj te mangel adava so mangela o Jehova (Ps. 97:10).

13. a) Soske valjani te kanina e interesenten te počminen te aven ko amare sostanokija so šaj posigate? b) Sar šaj te pomožina lenge te osetinen pe pošukar keda avena ko sostanok?

¹³ Kanin e interesente te počminel te avel ko sostanokija so šaj po sigate. Adava so ka dikhel hem ka šunel ko sostanokija šaj te vlijajnel pozitivno upri leste hem te pottikninel le te napredujnel. Sikav leske o videoklipi So kerela pe ki e Jehovaskere svedokongiri dvorana? hem ljubezno kanin le te avel tuja. Ako šaj, nudin leske prevoz. Šukar tano te dža različna objavitelencar keda proučinea lea. Agjaar ka šaj te zapoznajnel pe e javerencar da taro sobranie, hem verojatno ka osetinel pe pošukar keda ka avel ko sostanok.

14. So ka pottikninel e interesente te pomožinel e javerenge?

¹⁴ Amari cel tani te pomožina e interesenteske duhovno te napredujnel (Ef. 4:13). Keda nekoj ka odlučinel te proučinel i Biblija, šaj poviše ka interesinel le savi korist ka ovel le taro adava. Ama, keda ka zamangel e Jehova, verojatno ka počminel te razmislinel sar šaj ov da te pomožinel e javerenge, kote soj vklučime hem okola so više tane delo taro sobranie (Mat. 22:37-39). Ki nesavi soodvetno prilika šukar tano te  spomnina kaj sarinen isi amen čest te poddržina dobrovolna prilogoncar i buti so kerela pe bašo Carstvo.

15. Sar šaj te pomožina e interesenteske te postapinel ispravno keda ka oven problemija?

¹⁵ Sikav e interesente sar te postapinel keda ka ovel le problemi. Te pretpostavina kaj o interesenti, kova soj nekrsten objaviteli, vakerela tuke kaj vredžingja le nekoj taro sobranie. Namesto te le strana, šukar tano te sikave leske kola bibliska načelija važinena baši leskiri situacija. Ov šaj ili te prostinel adaleske so grešingja leske ili, ako leske pharo te nakhel taro adava, šaj ljubezno hem smireno te kerel lea lafi te šaj te oven palem ko šukar odnosija. (Sporedin Matej 18:15.) Pomožin leske te spreminel pe agjaar so angleder ka razmislinel so ka vakerel. Sikav leske sar te koristinel o Priračnikot za istražuvanje, i aplikacija JW Li­brary^® ili jw.org^® te šaj te istražinel sar te rešinel o problemi. Ako sikljovela te rešinel o nedorazbiranja panda angleder te krstinel pe, ka ovel leske polokho te ovel ko šukar odnosija e javerencar ko sobranie palo adava da.

16. Soske tano šukar te le različna objavitelen tuja keda džaja te proučine nesave interesentea?

¹⁶ Keda ka proučine e interesentea, dža ki leste različna objavitelencar hem e pokrainsko nadglednikoja keda ka avel ki poseta ko tumaro sobranie. Soske? Osven o pričine so sine vakerde, o javera objavitelija ka šaj te den le i pomoš koja so šaj našti tu te de le. Te vakera kaj ov probingja te mukhel o cigare nekobor puti, ama na uspejngja ko adava. Soske na džaja ki leste nesave objavitelea kova so porano sine le o isto problemi, ama palo nekobor puti čhinavgja adale navikaja? Šaj ov ka del e interesenteske baš adava sovet kova so valjani leske. Ako na osetinea tut slobodno te vodine o biblisko kursi anglo nesavo iskusno phral, zamolin le ov te vodinel. Ko sekova slučaj, pomožin e interesente te ovel le korist taro iskustvo e javerengoro. Ma bistre kaj amenge tano najvažno duhovno te napredujnel.

17-18. So valjani te le ko predvid keda razmislinea dali te čhinave te proučine i Biblija nekasaja?

¹⁷ Ako o interesenti na kerela promene ko životo, jekh dive mora te odlučine te čhinave te proučine lea. Keda ka razmisline bašo adava, valjani te le ko predvid leskere sposobnostija hem okolnostija. Nesavenge valjani poviše vreme te šaj te napredujnen. Puč tut: „Dali o interesenti kerela promene sprema ple okolnostija? Dali počminela te primeninel adava so sikljovela?“ (Mat. 28:20). Iako nekaske šaj ka valjani poviše vreme te šaj te ovel e Hristoseskoro učeniko, sepak mora te kerel promene.

¹⁸ Ama, so ako dikhea kaj nekoj kasaja so proučinea više nesavo vreme na sikavela  skoro nisavo cenenje bašo adava so sikljola? Razmislin baši akaja situacija: Šaj o interesenti završingja o lil So sikavela amen i Biblija hem šaj čak počmingja o javer lil Ačhov ko e Devleskoro mangipe, ama panda na alo ko nijekh sostanok — čak ni ki Spomen-svečenost! Osven adava, but puti otkažinela i studija taro pričine kola so nane doborom važna. Ko asavko slučaj, šukar tano iskreno te kere lea lafi. *

19. So šaj te puče e interesente ako mislinea kaj na sikavela cenenje bašo adava so sikljovela, hem sar leskoro odgovor ka pomožinel tuke?

¹⁹ Šaj te puče le: „Soj tano adava so najviše čhinavela tut te ove e Jehovaskoro svedoko?“ O interesenti šaj ka odgovorinel: „Mangava te proučinav i Biblija, ama nikogaš nane te ovav e Jehovaskoro svedoko!“ Ako isi le asavko stavi otkeda proučingja više nesavo vreme, dali isi smisla ponadari da te proučine lea? Tari javer strana, šaj ki adaja prilika o interesenti prvo puti ka phenel tuke soj čače leskoro problemi. Na primer, šaj mislinela peske kaj nikogaš našti te propovedinel taro kher ko kher. Otkeda ka doznajne soj o problemi, ka šaj pošukar te haljove sar te pomožine leske.

20. Sar adava so pišinela ko Dela 13:48 pomožinela amenge te odlučina dali nekasaja ponadari da ka proučina?

²⁰ Žalno tano adava so nesave interesentija tane sar o Izraelcija taro vreme e Ezekieleskoro. Baši lende o Jehova vakergja e Ezekieleske: „Dikh, tu sian lenge sar mangipaskiri gili, sar peači šuže glasoja, kova so šukar bašalela ko instrumenti žicencar. Šunena tle lafija, ama nikoj na postapinela sprema lende“ (Ezek. 33:32). Šaj amenge pharo te vakera nesave interesenteske kaj ka čhinava te proučina lea. Sepak, na smejnaja te bistra kaj „ačhilo hari vreme“ (1. Kor. 7:29). Namesto te trošina panda vreme nekasaja so na kerela promene, valjani te roda okolen so sikavena kaj „ispravno dikhena ko večno životo“. (Čitin Dela 13:48.)

21. Kova tano e beršeskoro stiho bašo 2020 berš, hem ko so ka pottikninel amen?

²¹ Ko 2020 berš, e beršeskoro stiho ka pottikninel amen te razmislina sar šaj panda pošukar te sikava e manušen. O Isus vakergja o lafija taro akava stiho ko adava važno sostanok ki planina ki Galileja: „Džan hem keren učenikija, hem krstinen len“ (Mat. 28:19).