1. Savi odluka valjani te anen o terne baši pli idnina? So šaj te pomožinel len te na oven but sekirime? (Dikh i slika ko početok tari statija.)

TERNALEN, sigurno ka složinen tumen kaj angleder te ciden ko drumo, mudro tano te planirinen kote ka džan hem sar ka džan. O životo tano sar te cide ko jekh drumo, hem ko ternipe valjani te planirine kote ka dža. Nane lokho te keren pe asavke planija. Jekh terni phen so vikinela pe Heder vakerela: „Valjani te odlučinav so ka kerav dži ko krajo taro mlo životo. Adava daravkerela man“. Ako tu da osetinea tut agjaar, ma bistre e Jehovaskere lafija: „Ma sekirin tut, soske me sium tlo Devel. Me ka kerav tut zoralo hem ka pomožinav tut“ (Isa. 41:10).

2. Kotar džanaja kaj o Jehova mangela mudro te planirina te šaj te ovel amen bahtali idnina?

² O Jehova ohrabrinela tumen mudro te planirinen tumari idnina (Prop. 12:1; Mat. 6:20). Ov mangela te oven bahtale. Adava dikhjola pe taro bukja so stvoringja len. O Jehova grižinela pe ko javera da načinija,  sar na primer dela amen sovetija hem sikavela amen sar najšukar te živina. Adaleske, okolenge so na prifatinena leskere sovetija, ov vakerela: „Biringjen adava so na radujnela man... Ake, mle sluge ka radujnen pe, a tumen ka ladžan. Ake, mle sluge ka vikinen tari radost soske isi len šukar vilo“ (Isa. 65:12-14). Keda anaja mudra odluke ko životo, falinaja e Jehova (Izr. 27:11).

3. Save planija mangela o Jehova te kere?

³ Save planija mangela o Jehova te kera? Te šaj te ova bahtale, valjani te pendžara e Jehova hem te služina leske. Ov agjaar stvoringja e manušen (Ps. 128:1; Mat. 5:3). O životne samo hana, piena hem množinena pe. Ama, o Jehova mangela o manuša te keren planija kola so ka pomožinen len te oven bahtale hem te ovel len šukar životo. Amaro stvoriteli tano „o Devel e mangipaskoro“, „o bahtalo Devel“ so kergja e manušen „sprema plo liko“ (2. Kor. 13:11; 1. Tim. 1:11; 1. Moj. 1:27). Tu da ka ove bahtalo keda ka trudine tut te postapine sar amaro Devel soj pherdo mangipaja. Ki Biblija pišinela: „Pobaro bahtalipe isi keda dela pe nego keda lela pe“ (Dela 20:35). Na osetingjan li tu da akava? Akava tano sekogaš agjaar ko životo. O Jehova mangela taro tle planija baši idnina te dikhjol kaj mangea le hem e javeren. (Čitin Matej 22:36-39.)

4, 5. Soske sine o Isus bahtalo?

⁴ O Isus dengja sovršeno primer e ternenge. Džikote sine tikno čhavo, sigurno uživinela sine te khelel peske. E Devleskoro Lafi vakerela kaj isi „vreme asajbaske“ hem „vreme khelibaske“ (Prop. 3:4). Isto agjaar, o Isus ulo paše e Jehovaja agjaar so proučinela sine e Devleskoro Lafi. Keda sine le 12 berš, o učitelija taro hrami čudingje pe kobor haljovela sine o bukja hem sar odgovorinela sine lenge (Luka 2:42, 46, 47).

⁵ Keda barilo, o Isus kerela sine adava so rodingja lestar o Devel hem adaleske sine bahtalo. Na primer, o Jehova manglja ov „te vakerel o šukar haberi e čorolenge“ hem te vakerel kaj „o korole palem ka dikhen“ (Luka 4:18). Ko Psalm 40:8 pišinela sar osetinela pe o Isus: „Zadovolstvo mange Devla te kerav tli volja“. O Isus uživinela sine te sikavel e javeren bašo plo Dad. (Čitin Luka 10:21.) Jekh puti, keda kergja lafi jekhe džuvljaja bašo adava sar valjani te obožavinel pe o Devel, o Isus vakergja ple učenikonge: „Mlo hajbe tano te kerav i volja okoleskiri so bičhalgja man hem celosno te završinav i buti so dengja la mange“ (Jovan 4:31-34). O Isus sine bahtalo adaleske so sikavgja kaj mangela ple Dade hem e javeren. Ako kerea adava, tu da ka ove bahtalo.

6. Soske tano šukar te kere lafi e javerencar bašo adava so planirinea ki idnina?

⁶ But sluge e Devleskere počmingje e pionersko službaja panda sar terne hem adava kergja len bahtale. Šaj li te kere lencar lafi bašo tle planija?  Adava ka ovel šukar soske i Biblija vakerela: „O planija na uspejnena keda na kerela pe iskreno lafi, a uspejnena keda isi but sovetnikija“ (Izr. 15:22). Akala phralja hem phenja šaj te vakeren tuke kaj i pionersko služba ka sikavel tut but bukja kola so ka koristinen tuke ko životo. O Isus siklilo but bukja taro plo Dad keda sine ko nebo. Keda alo tele ki Phuv, ov ponadari da sikljovela sine. Ov siklilo kobor šaj te ovel nekoj bahtalo keda vakerela o šukar haberi e javerenge hem keda ačhovela verno e Devleske ko phare situacie. (Čitin Isaija 50:4; Evreite 5:8; 12:2.) Te dikha soske i polnovremeno služba šaj te kerel tut bahtalo.

7. Soske but terne uživinena džikote sikavena e javeren bašo Jehova?

⁷ O Isus vakergja amenge te kera učenikija hem te sikava e manušen (Mat. 28:19, 20). Ako planirinea te ove ki polnovremeno služba, ka ovel tut šukar životo kolea so ka faline e Devle. Isto sar sekole javere bukjaja, valjani tuke vreme te sikljove šukar te propovedine. Jekh phral so vikinela pe Timotej počmingja e pionersko službaja panda džikote sine tinejdžeri. Ov vakerela: „Mangava i polnovremeno služba adaleske so pomožinela man te sikavav e Jehovaske kobor mangava le. Ko početok, našti sine te počminav nijekh biblisko kursi, ama palo nesavo vreme selingjum ma ko javer than hem bašo jekh masek počmingjum nekobor bibliska kursija. Jekh taro interesentija počmingja te avel ko sostanokija. Palo adava, sium sine ki Biblisko škola bašo biženime phralja koja so ikergja pe duj masek, hem bičhalgje ma ko javer than kote so počmingjum štar bibliska kursija. Uživinava keda sikavava e javeren, adaleske so dikhava sar o sveti duh pomožinela lenge te meninen pe“ * (Dikh i fusnota.) (1. Sol. 2:19).

8. So kergje nesave terne te šaj te propovedinen poviše manušenge?

⁸ Nesave terne siklile javer čhib. Na primer, o Jakov tari Severno Amerika pišingja: „Keda sine man efta berš, but čhave so učingjum lencar sine Vietnamcija. Mangava sine te vakerav lenge bašo Jehova, adaleske palo nesavo vreme počmingjum te sikljovav lengiri čhib. Najviše sikliljum agjaar so sporedinava sine i anglisko hem i vietnamsko Stražarsko kula. Isto agjaar, uljum amal e phralencar taro jekh vietnamsko sobranie so sine mange paše. Keda sine man 18 berš, uljum pioneri. Palo adava, geljum ki Biblisko škola bašo biženime phralja. Akava pomožingja man pošukar te služinav ki pionersko služba hem ki jekh grupa ki vietnamsko čhib kote so služinava korkori sar starešina. But Vietnamcija tane iznenadime so sikliljum lengiri čhib. Ola vikinena man peste khere hem but puti počmingjum te proučinav i Biblija lencar. Nesave lendar ule e Jehovaskere svedokija“. (Sporedin Dela 2:7, 8.)

9. So sikljovaja keda sikavaja e javeren bašo Jehova?

⁹ Keda sikavea e manušen bašo čačipe, sikljovea te ove bukjarno, šukar  te kere lafi e javerencar, ovea posigurno ki tute hem sikljovea te ove taktično (Izr. 21:5; 2. Tim. 2:24). A posebno kerela tut bahtalo adava so sikljovea sar e Biblijaja te sikave e javerenge ko so verujnea. Isto agjaar, sikljovea sar pošukar te sorabotine e Jehovaja (1. Kor. 3:9).

10. Sar šaj te radujne tut ki služba čak keda ko tlo podračje nane but manuša so mangena te proučinen i Biblija?

¹⁰ Šaj te ove bahtalo keda propovedinea čak keda ko podračje nane but manuša so mangena te proučinen i Biblija. Te šaj te kerel pe učenikija, celo sobranie valjani te kerel buti sar jekh timi. Iako samo jekh phral ili phen šaj ka arakhen nesave manuše so ka ovel e Jehovaskoro sluga, radujnaja amen soske sarine učestvujngjem ko podračje te roda učenikija. Na primer, o Brendon, enja berš služingja sar pioneri ko podračje kote so but manuša na mangle te proučinen i Biblija hem ov vakerela: „Mangava te vakerav bašo šukar haberi soske o Jehova rodela amendar adava. Keda završingjum e školaja uljum pioneri. Uživinava te ohrabrinav e ternen taro amaro sobranie hem te dikhav sar duhovno napredujnena. Keda geljum ki Biblisko škola bašo biženime phralja, palo adava sium sine bičhaldo te služinav sar pioneri ko javer than. Me na arakhljum nijekhe ko podračje so napredujngja hem krstingja pe, ama javera arakhle. Radujnava ma so čhivgjum mange cel te ovav ki polnovremeno služba“ (Prop. 11:6).

11. Ki savi služba uživinena but terne?

¹¹ Šaj te služine e Jehovaske ko različna načinija. Na primer, but terne pomožinena ko gradežna proektija ki amari organizacija. Valjani te gradinen pe panda but dvorane. Akala thana falinena e Jehova, adaleske ka ove but bahtalo ako pomožingjan te gradinen pe. Isto agjaar, ka uživine te kere buti zaedno e phralencar hem phenjencar. Ka sikljove but bukja, na primer sar šaj šukar hem bezbedno te završine i buti hem sar te sorabotine e nadglednikoncar.

12. Sar i pionersko služba phravela amenge javera prilike služibaske?

¹² Jekh phral so vikinela pe Kevin vakerela: „Panda taro tiknipa, mangljum polnovremeno te služinav e Jehovaske. Keda phergjum 19 berš, uljum pioneri. Kerava sine pohari saatija buti ko jekh phral so sine gradežniko. Sikliljum sar te mestinav krovija, pendžerke hem udara. Palo adava, duj berš služingjum ko jekh timi so pomožinela keda isi uraganija agjaar so poprajnela o dvorane hem o khera e phralengere. Keda šungjum kaj valjani dobrovolcija gradibaske ki Južnoafrikansko Republika, dengjum molba hem vikingje man te džav adari. Akate ki Afrika, keda bašo nekobor kurke ka završina jekh dvorana, selinaja  amen ko javer than kote so isi potreba te gradinel pe javer dvorana. I grupa bašo gradibe tani sar jekh familija. Keraja sa zaedno, zaedno proučinaja i Biblija hem keraja buti. Isto agjaar, uživinava so šaj sekova kurko te propovedinav e phralencar taro than kote so gradinaja. O planija so sine man panda sar tikno, kergje te ovel man bahtalo životo“.

13. Soske but terne tane bahtale so služinena e Jehovaske ko Betel?

¹³ Nesave so sine pionerija akana služinena ko Betel. Okola so služinena ko Betel tane but bahtale, soske sa so kerena adari tano bašo Jehova. Ko Betel kerena pe Biblie hem publikacie so pomožinena e manušenge te sikljoven bašo čačipe. O Dastin, kova so služinela ko Betel, vakerela: „Keda sine man enja berš, čhivgjum mange cel te ovav ki polnovremeno služba, hem keda završingjum e školaja, uljum pioneri. Palo berš tekvaš, vikingje man ko Betel, hem adari sikliljum te kerav buti ki mašina štampibaske, a palo adava sikliljum sar te kerav kompjuterska programe. Uživinava so ko Betel šaj direktno te šunav sar napredujnela o propovedibe ko celo sveto. Mangava te služinav akate soske adava pomožinela e manušenge te oven popaše e Jehovaja“.

14. Sar šaj te spremine tut baši polnovremeno služba?

¹⁴ Sar šaj te spremine tut baši polnovremeno služba? Te služine e Jehovaske najšukar so šaj, valjani tuke hristijanska osobine. Redovno proučin e Devleskoro Lafi, hor razmislin bašo adava so čitinea hem trudin tu te sikave tli vera ko sostanokija. Džikote džaja ki škola, šaj te sikljove sar pošukar te kere lafi e javerencar bašo šukar haberi. Sikljov te sikave iskreno interes e javerenge agjaar so taktično ka puče len so mislinena hem palo adava šukar ka šune len džikote odgovorinena. Isto agjaar, de tut ko raspolaganje te pomožine ko sobranie, na primer te čistinel pe ili te poprajnel pe nešto ki dvorana. O Jehova mangela te koristinel okolen soj ponizna hem spremna te služinen. (Čitin Psalm 110:3; Dela 6:1-3.) O apostol Pavle vikingja e Timoteje te služinel sar misioneri soske o phralja vakerena sine šukar bukja baši leste (Dela 16:1-5).

15. So ka pomožinel tut te arakhe buti džikote služinea sar pioneri?

¹⁵ But džene soj ki polnovremeno služba valjani te keren buti (Dela 18:2, 3). Šaj te dža ko nesavo kratko kursi so ka pomožinel tut te kere buti džikote služinea sar pioneri. Ker lafi e pokrainsko nadglednikoja hem javere pionerencar bašo tle planija, hem puč len bašo nesave predlogija. Palo adava, sar so pišinela ki Biblija, „mukh e Jehovaske ko vasta sa so kerea, hem tle planija ka uspejnen“ (Izr. 16:3; 20:18).

16. Sar šaj i polnovremeno služba te spreminel tut bašo javera odgovornostija ki idnina?

¹⁶ Šaj te ove uverimo kaj o Jehova mangela te ovel tut bahtali idnina. (Čitin 1. Timotej 6:18, 19.) I polnovremeno služba ka pomožinel tut te ove zrelo hristijani džikote sorabotinea e javere polnovremena slugencar. Isto agjaar, but džene halile kaj adava so počmingje panda sar terne ki polnovremeno služba, pomožingja lenge palo adava keda khuvgje ko brako. But puti, adala so sine pionerija džikote sine korkori, na čhinavgje e pionersko službaja keda khuvgje ko brako (Rim. 16:3, 4).

17, 18. Sar o planija so kerea tane povrzime tle vilea?

¹⁷ Ko Psalm 20:4 bašo Jehova pišinela: „Neka del tut sprema o želbe tle vileskere, hem neka ispolninel sa tle planija“. Džikote planirinea tli idnina, razmislin so čače mangea te kere tle životoja. Razmislin bašo bukja so kerela len o Jehova ko amaro vreme, hem sar šaj te služine leske. Palo adava, planirin te kere adava soj leske ki volja.

¹⁸ Keda koristinea tlo životo te služine e Jehovaske polnovremeno hem falinea le, ka ove but bahtalo. Ako o Jehova tano tli radost, tegani „ka dobine lestar so mangela tlo vilo“ (Ps. 37:4).