O apostol Pavle džanlja kaj i propaganda e Satanaskiri tani but opasno. Ama, na sine sa e Devleskere sluge svesna baši akaja opasnost. Izgleda nesave phralja taro Korint mislingje peske kaj lengiri vera tani doborom zorali so našti te hovavel len o Satana (1. Kor. 10:12). Adaleske o Pavle predupredingja len: „Isto sar o sap so hovavgja e Eva te šaj te zavedinel la, darava kaj nekoj šaj te ruminel tumare misle hem te cidel tumen taro čisto hem čačutno mangipe so isi tumen bašo Hristos“ (2. Kor. 11:3).

O lafija e Pavleskere sikavena kobor tano važno ma te ovel amen but bari doverba ki amende. Te šaj te zaštitina amare misle taro e Satanaskiri propaganda, valjani te haljova kobor tani opasno.

Soj tani i propaganda? Ko akava kontekst, propaganda tani te širinen pe hovavne informacie ili informacie so anena e manušen ko pogrešno zaklučok. Koristinena la te hovaven e manušen hem te kontrolirinen lengoro razmislibe hem ponašibe. Sprema jekh lil, i propaganda tani „pogrešno, štetno hem nepravedno“. Nesave manuša opišinena la e lafencar sar soj „hovajba, pogrešno te prestavinen pe o bukja, manipulacija, [hem] kontrola upri nekaskiri godi (Propaganda and Persuasion).

I propaganda tani but opasno soske oj hari pohari vlijajnela upro amaro razmislibe bizo te ova svesna bašo adava.  Šaj te sporedina la sar jekh otrovno gasi kova so na dikhjola hem našti te osetinel pe. O Vans Pakard, jekh eksperti so istražinela o ponašibe e manušengoro, vakergja kaj i propaganda vlijajnela upro amare postapke „poviše nego so siem svesna“. Jekh javer eksperti vakergja kaj oj teringja e manušen te ponašinen pe ko but opasno hem nerazumno način hem kaj angja dži ko adava te oven uništime cela narodija, isto agjaar te oven vojne hem progonstvo adaleske so isi različna rase hem religie (Easily Led — A His­to­ry of Propaganda).

Ako o manuša šaj te zavedinen amen ple propagandaja, kobor poviše šaj te kerel adava o Satana. Ov dikhela sar ponašinena pe o manuša panda taro početok otkeda sine stvorime. Isto agjaar, ov vladinela celo svetoja, adaleske šaj te koristinel sekova delo taro sveto te širinel ple hovajba (1. Jov. 5:19; Jovan 8:44). Ple propagandaja o Satana „korjargja i godi“ bute manušengiri hem akana „zavedinela celo sveto“ (2. Kor. 4:4; Otk. 12:9). Sar šaj te zaštitine tut tari propaganda e Satanaskere?

O Isus sikavgja jekh lokho način sar šaj te zaštitina amen tari propaganda. Ov vakergja: „Ka džanen o čačipe, hem o čačipe ka oslobodinel tumen“ (Jovan 8:31, 32). Keda isi vojna, jekh vojniko valjani te džanel kotar šaj te dobinel točna informacie soske o neprijateli ka širinel pogrešna informacie te šaj te hovavel le. Kote šaj te arakhe točna informacie? O Jehova mukhlja te oven pišime ko leskoro Lafi, i Biblija. Ki late šaj te arakhe sa so valjani tuke te šaj te borine tut protiv i propaganda e Satanaskiri (2. Tim. 3:16, 17).

O Satana džanela akava. Adaleske ov koristinela o sveto kolea so vladinela te lel amaro vnimanie hem te čhinavel amen te čitina hem te proučina i Biblija. Ma mukh te hovavel tut o Satana (Ef. 6:11). Nane dovolno te džana samo o osnovna bukja so sikavela i Biblija. Valjani te trudina amen panda pošukar te haljova o bibliska čačipa (Ef. 3:18). Jekh pisateli so vikinela pe Noam Čomski vakergja: „Nikoj nane te čhivel o čačipe ki tli godi. Adava tano nešto so valjani korkori te arakhe le“. Adaleske, arakh korkori o čačipe agjaar so sekova dive ka proučine i Biblija (Dela 17:11).

O Satana na mangela te razmisline hem te haljove dali o informacie so šunea len tane čačutne. Soske? Adaleske so i propaganda „verojatno tani najuspešno... keda o  manuša čhinavena te razmislinen hem te ispitinen dali o informacie tane točna (Media and Society in the Twen­ti­eth Cen­tu­ry). Ma verujn odma ko sa so šunea bizo angleder te razmisline bašo adava (Izr. 14:15). O Devel dengja tut sposobnost te razmisline, adaleske koristin adaja sposobnost te šaj te bajrare tli vera (Izr. 2:10-15; Rim. 12:1, 2).

O vojnikija so verujnena ki propaganda uklela len dar hem pohari tane spremna te borinen pe. Oj šaj te čhivel len te maren pe maškar peste ili te ciden pe taro javera vojnikija. Jekh germansko generali vakergja kaj i propaganda sine jekh pričina soske i Germanija našavgja ki prvo svetsko vojna. Ov vakergja kaj o manuša doborom but verujngje ki propaganda sar te phene sine hipnotizirime. O Satana koristinela slična metode te šaj te uništinel o jekhipe so isi maškar e Devleskoro narodo avdive. N primer, ov mangela te kerel akošibe maškar o phralja hem o phenja. Ili, trudinela pe te čhivel len te ikljon tari e Jehovaskiri organizacija agjaar so čhivela len te mislinen kaj tani nepravedno ili kerela nešto pogrešno.

Ma mukh te hovavel tut! Šun o sovet taro e Devleskoro Lafi hem ačhov zaedno e phralencar hem e phenjencar. Na primer, i Biblija ohrabrinela amen spremno te prostina jekh jekheske hem sigate te rešina o problemija (Kol. 3:13, 14; Mat. 5:23, 24). Hem vakerela amenge te na cida amen taro sobranie (Izr. 18:1). Ispitin tut dali sian spremno te zaštitine tut tari propaganda e Satanaskiri. Šaj te puče tut: „Keda o posledno puti povredingja man nesavo phral, dali me ponašibaja radujnkergjum e Jehova ili e Satana?“ (Gal. 5:16-26; Ef. 2:2, 3).

Jekh vojniko so nane verno ple vodačeske nane te borinel pe šukar. Adaleske, o neprijatelija koristinena propaganda te šaj e vojnikon ma te ovel len doverba ko ple vodačija. Ako o vodačija grešinena, tegani o neprijatelija ka trudinen pe te koristinen adava hem vakerena: „Našti te verujnen lenge!“ hem „Ma mukhen len te ingaren tumen ki propast!“ O Satana kerela isto buti. Ov trudinela pe te uništinel tli doverba ko manuša so koristinela len o Jehova te vodinel ple narodo.

 Sar šaj te zaštitine tut? Ov odlučno te ačhove ki e Jehovaskiri organizacija. Ačhov verno hem poddržin adalen so vodinena e Devleskere narodo iako tane nesovršena (1. Sol. 5:12, 13). O otpadnikija hem javera hovavne manuša šaj ka vakeren lošna bukja baši organizacija (Tit 1:10). Šaj ka izgledinel tuke kaj tano čače adava so vakerena, ama ma dozvolin te vlijajnen upri tute (2. Sol. 2:2). Šun o sovet so dengja le o Pavle e Timotejeske: „Ačhov ko adava so sikliljan le“ hem ma bistre „kastar sikliljan sa adava“ (2. Tim. 3:14, 15). Razmislin bašo sa o dokazija so sikavena kaj šaj te ovel tut doverba ko verno robo kaste so skoro 100 berš o Jehova koristinela le te sikavel amen bašo čačipe (Mat. 24:45-47; Evr. 13:7, 17).

O Satana probinela te vlijajnel upro amare misle hem ko podirektna načinija. Ponekogaš ov mangela te daravkerel amen — „adava tano jekh taro najpurane propagande“. Jekh britansko profesori so vikinela pe Filip Tejlor pišingja kaj o Asircija daravkerena sine ple neprijatelen agjaar so širinena sine propaganda. O Satana šaj te koristinel protiv amende i dar taro manuš, taro progonstvo, ili taro meribe, te šaj te čhinavel amen te služina e Jehovaske (Isa. 8:12; Erem. 42:11; Evr. 2:15).

Ma dozvolin e Satanaske te uspejnel ko akava! O Isus vakergja: „Ma daran taro adala so mudarena o telo, hem palo adava našti te keren ništo poviše“ (Luka 12:4). Ov uverimo kaj o Jehova ka ikerel pe ko plo lafi kaj ka grižinel pe tuke, ka del tut „sila soj pobari tari normalno“ hem ka pomožinel tut te sprotivstavine tut e Satanaske (2. Kor. 4:7-9; 1. Pet. 3:14).

Džangjola pe kaj ponekogaš šaj ka ove obeshrabrimo ili ka dara. Ama, setin tut ko ohrabruvačka lafija so phengja o Jehova e Isus Navineske: „Ov hrabro hem zoralo! Ma dara, soske o Jehova tlo Devel tano tuja bilo kote te dža!“ (Is. Nav. 1:9). Ako sian voznemirimo, odma molin tu e Jehovaske hem vaker leske so mučinela tut. Ov uverimo kaj e Devleskoro mir šaj te zaštitinel tlo vilo hem godi. Adava ka del tut sila te zaštitine tut tari propaganda e Satanaskiri (Fil. 4:6, 7, 13).

Dali setinea tut ki propaganda so vakergja o Rapšak, o glasniko e Asircongoro, te šaj te daravkerel e Devleskere narodo? Ov manglja ola te verujnen kaj nikoj našti te zaštitinel len tari Asirija, ni o Jehova. Ov čak vakergja kaj o Jehova dengja len zapoved te uništinen o Erusalim. Ama, o Jehova vakergja ple narodoske: „Ma dara taro lafija so šungjan len, kolencar so o sluge e asirsko careskere navredingje man“ (2. Car. 18:22-25; 19:6). Palo adava, ov bičhalgja angeli kova so mudargja 185.000 Asircija ki jekh rat (2. Car. 19:35).

Dali nekogaš dikhljan filmi kote so nekoj na halilo kaj hovavena le? Dali alo tuke te phene: „Ma verujn lenge! Hovavena tut!“ Zamislin sar o angelija vakerena tuke: „Ma mukh te hovavel tut o Satana!“

Ma šun i propaganda e Satanaskiri (Izr. 26:24, 25). Šun e Jehova hem neka ovel tut celosno doverba ki leste (Izr. 3:5-7). Ov mangela tut hem vakerela tuke: „Ov gogjaver, mo čhavo, hem radujnker mo vilo“ (Izr. 27:11). Ako kergjan akava, tegani ka zaštitine tut tari propaganda e Satanaskiri!