Sikav sočuvstvo sa e manušenge
KEDA o Isus sikavgja ple učenikon sar te propovedinen o šukar haberi, ov vakergja lenge kaj o manuša nane te mangen sekogaš te šunen len (Luka 10:3, 5, 6). Avdive da tano agjaar. Nesave manuša šaj te ponašinen pe grubo ili čak te oven agresivna. Tegani, šaj te ovel amenge pharo te sikava lenge sočuvstvo hem te manga te propovedina lenge.
O sočuvstvitelno manuš dikhela o potrebe hem o problemija e javerengere, perela leske žal lenge hem mangela te pomožinel lenge. Ama so ka ovel ako nane amen sočuvstvo bašo manuša kolenge so propovedinaja? Ka našava amari revnost baši služba, hem ka našti te pomožina lenge. I revnost šaj te sporedina la jagaja. Jekh jag našti silno te thabljol ako nane kašta. Slično, te šaj i revnost silno te thabljol ki amende, valjani te ova sočuvstvitelna (1. Sol. 5:19).
Sar šaj te ova posočuvstvitelna, čak keda adava nane lokho? Te dikha trin primerija so šaj te pomožinen amenge ko akava: o Jehova, o Isus hem o apostol Pavle.
OV SOČUVSTVITELNO SAR O JEHOVA
Nekobor milje berša o manuša vakerena hovavne bukja bašo Jehova. Ama ov ponadari da ačhovela „milostivo adalencar so nane blagodarna hem adalencar soj lošna“ (Luka 6:35). Sar sikavela o Jehova milost? Ov tano strplivo sarinencar. O Jehova mangela „različna manuša“ te spasinen pe (1. Tim. 2:3, 4). Iako o Devel mrzinela o lošnipe, o manuša tane skapocena leske hem ov na mangela nijekh lendar te merel (2. Pet. 3:9).
O Jehova džanela kaj o Satana šaj lokhe te hovavel e manušen (2. Kor. 4:3, 4). But džene panda taro tiknipe šunena hovavne bukja bašo Devel. Adaleske, o način sar razmislinena šaj te kerel te ovel lenge pharo te prifatinen o čačipe. Ama o Jehova mangela te pomožinel lenge. Kotar džanaja akava?
Razmislin bašo adava sar dikhela sine o Jehova ko Ninevijcija. Iako ola sine nasilna, o Jehova vakergja e Jonaske: „A mange te na ovel li žal baši bari diz Ninevija, kolate so isi poviše taro 120.000 manuša, kola so na džanena soj ispravno, a soj pogrešno?“ (Jona 4:11). E Jehovaske sine žal bašo adala manuša kola so na džanena sine o čačipe baši leste. Adaleske, bičhalgja e Jona te predupredinel len.
Isto sar o Jehova, amen da ko manuša dikhaja sar skapocena hem mangaja te pomožina lenge te džanen nešto poviše baši leste, čak keda mislinaja kaj nane te prifatinen o čačipe.
OV SOČUVSTVITELNO SAR O ISUS
O Isus sine isto sar plo Dad hem leske da sine žal bašo manuša soske ola sine „mučime hem otfrlime sar bakhre bizo pastiri“ (Mat. 9:36). O Isus haljovela sine soske o manuša sine ki asavki situacija. Lengere religiozna vodačija ponašinena pe sine lencar lošno hem sikavena len sine hovavne bukja. O Isus džanela sine kaj but džene taro adala so šunena le nane te oven leskere učenikija taro različna pričine. Ama, ov na čhinavgja te sikavel len (Mar. 4:1-9).
Ma obeshrabrin tut ako nekoj odma na šunela tut
Keda o okolnostija ka meninen pe, jekh manuš šaj pojaver te reagirinel ko šukar haberi
Keda o manuša lošno reagirinena ko šukar haberi, valjani te trudina amen te haljova soske reagirinena agjaar. Šaj isi len lošno mislenje baši Biblija ili bašo hristijanja adaleske so dikhle sar kerena lošna bukja okola so vakerena kaj tane hristijanja. Javera šaj šungje hovajba bašo bukja kolende so verujnaja. A isi javera kola so na mangena te keren lafi amencar adaleske so darana kaj ka asan lenge lengiri familija ili o komšie.
Nesave manuša so arakhaja len ki služba doživingje but lošna bukja ko životo so hor vlijajngje upri lende. Jekh misionerka koja so vikinela pe Kim vakerela kaj but manuša ko lakoro podračje preživingje vojna hem našavgje sa so sine len hem nane len nisavi nadež. Ola tane razočarime hem nane len doverba nikaste. O manuša taro akava podračje but puti probinena te na mukhen e Svedokon te propovedinen. I Kim vakerela kaj jekh puti čak napadingje la džikote propovedinela sine.
Sar i Kim uspejnela te sikavel sočuvstvo, čak keda o manuša ponašinena pe laja lošno? Oj sekogaš probinela te pamtinel o lafija taro Izreki 19:11, kote so pišinela: „O haljojbe čhinavela i holi e manušeskiri“. Oj razmislinela taro so nakhle o manuša ko lakoro podračje, a adava pomožinela lake te sikavel lenge sočuvstvo. Hem oj vakerela kaj na ponašinena pe sarine grubo. Ko adava podračje isi la nekobor šukar povtorna posete.
Šaj te puča amen: „Te na džanav sine o čačipe, sar ka reagirinav sine keda anglo mlo udar ka aven e Jehovaskere svedokija? Ili, te šunav sine nesave hovavne bukja bašo Svedokija, sar ka reagirinav sine?“ Tegani, šaj tu da ka reagirine sine lošno hem o Svedokija ka valjanen sine te sikaven tuke sočuvstvo. O Isus vakergja kaj valjani te ponašina amen e javerencar agjaar sar so mangaja ola te ponašinen pe amencar. Adaleske valjani te trudina amen te haljova sar osetinena pe o javera hem te ova strpliva lencar, čak keda adava nane lokho (Mat. 7:12).
OV SOČUVSTVITELNO SAR O PAVLE
O Pavle sikavgja sočuvstvo čak okolenge so sine nasilna lea. Soske? Adaleske so na bistergja savo manuš sine angleder. Ov vakergja: „Angleder sium sine huliteli, progoninava sine e Devleskere narodo hem sium sine drsko manuš. Postapinava sine agjaar soske na sine man pendžaribe hem na sine man vera. Ama sine mange sikavdi milost“ (1. Tim. 1:13). O Pavle džanlja kaj o Jehova hem o Isus sine but milostiva lea. Ov šaj sine te haljovel e manušen kola so mangena sine te čhinaven le te propovedinel soske ov da angleder sine sar lende.
Ponekogaš, o Pavle arakhela sine manušen kola so but verujnena sine ko hovavne sikljojba. Sar osetinela pe sine o Pavle ko asavke situacie? Ko Dela 17:16 pišinela kaj džikote sine ki Atina ov „sine voznemirimo keda dikhlja kaj i diz sine pherdi idolencar“. Ama, o Pavle koristingja baš adava so voznemiringja le te šaj te propovedinel e manušenge (Dela 17:22, 23). Ov sine prilagodlivo hem ko različno način kerela sine lafi različna manušencar te šaj bilo sar te spasinel nekas lendar (1. Kor. 9:20-23).
Keda propovedinaja manušenge so reagirinena lošno ili verujnena ko pogrešna bukja, šaj te kera adava so kergja o Pavle. Šaj te koristina adava so džanaja baši lende te šaj te pomožina lenge te sikljoven o „šukar haberi bašo nešto pošukar“ (Isa. 52:7). Jekh phen so vikinela pe Doroti vakerela: „But džene ko amaro podračje tane sikavde kaj o Devel tano strogo hem kaj mangela te kazninel e manušen. Pofalinava adale manušen baši lengiri bari vera ko Devel hem palo adava probinava te sikavav lenge so vakerela i Biblija bašo e Jehovaskere osobine hem baši leskiri namera e manušencar“.
„SEKOGAŠ POBEDIN O LOŠNIPE ŠUKARIPAJA“
Kobor popaše avaja dži ko krajo doborom poviše šaj te adžikera kaj o stavija e manušengere ka oven sa pološna (2. Tim. 3:1, 13). Ama na valjani te mukha o način sar ka reagirinen te našavel amaro sočuvstvo hem o bahtalipe. O Jehova šaj te del amen sila sekogaš te pobedina o lošnipe šukaripaja (Rim. 12:21). I Džesika, koja soj pioneri, vakerela: „But puti kerava lafi gorda manušencar kola so asana amenge hem bašo haberi so propovedinaja le. Ponekogaš akava nervirinela man. Keda ka počminav te kerav lafi nekasaja, molinava man ki mande e Jehovaske te pomožinel mange te dikhav ko manuš sar so dikhela ov“. Akava pomožinela lake te na mislinel ko ple čuvstvija nego te mislinel sar šaj te pomožinel adale manušeske.
Ponadari da rodaja okolen so mangena te arakhen o čačipe
Sar so ka nakhel o vreme, nesave manuša ka prifatinen o čačipe
Isto agjaar, valjani te ohrabrina amare phralen hem phenjen džikote siem ki služba lencar. I Džesika vakerela: „Ako nekoj amendar isi le lošno iskustvo ki služba, trudinava man te na kerav lafi bašo adava. Namesto adava, kerava lafi bašo pozitivna bukja, sar na primer, bašo šukar rezultatija taro amaro propovedibe čak keda nekoj reagirinela lošno“.
O Jehova but šukar džanela kaj ponekogaš amenge pharo te propovedina. Ama, ov tano but bahtalo keda sikavaja milost sar leste! (Luka 6:36). Džangjola pe, o Jehova nane večno te ovel strplivo hem sočuvstvitelno e manušencar taro akava sveto. Šaj te ova sigurna kaj ov točno džanela keda valjani te anel o krajo. Dži tegani, o propovedibe tano but itno (2. Tim. 4:2). Adaleske, ponadari da revno te propovedina hem te sikava sočuvstvo sa e manušenge.
