1-2. a) Soske na siem iznenadime ako nesavi phuv zabraninela amare aktivnostija? b) So ka dikha ki akaja statija?

KO 2018 berš, poviše taro 223.000 objavitelija živingje ko phuvja kote so amare aktivnostija sine zabranime ili ograničime. Adava ni najhari na iznenadinela amen. Sar so dikhlem ki angluni statija, o čačutne hristijanja džanena kaj ka oven progonime (2. Tim. 3:12). Bizi razlika kote živinaja, o vlastija šaj taro jekh puti te zabraninen amare aktivnostija.

² Ako slučinela pe nešto asavko ko than kote so živinea, šaj pučea tut: „Dali o progonstvo značinela kaj o Jehova nane zadovolno amendar? Dali i zabrana ka čhinavel amen te služina e Jehovaske? Dali te selinav man ki javer phuv kote so šaj slobodno te služinav e Jehovaske?“ Ki akaja statija ka dikha o odgovorija taro akala pučiba. Osven adava, ka dikha sar šaj ponadari da te služina e Jehovaske keda isi zabrana, hem taro kola stapice valjani te pazina amen.

3. Sprema 2. Korinkjanite 11:23-27, savo progonstvo doživingja o Pavle hem so sikljovaja taro leskoro primer?

³ Ako o vlastija zabraninena amare aktivnostija, šaj ka mislina kaj o Devel na poddržinela amen više. Ama, važno tano te na bistra kaj adava so siem progonime ni najhari na značinela kaj o Jehova nane zadovolno amendar. Na primer, razmislin bašo apostol Pavle. Jasno tano kaj o Jehova sine zadovolno lestar. Le sine le čest te pišinel 14 pismija kola so ule delo taro Hristijanska  grčka spisija, hem sine apostoli bičhaldo ko javera narodija. Ama, doživingja surovo progonstvo. (Čitin 2. Korinkjanite 11:23-27.) Taro e Pavleskoro primer sikljovaja kaj o Jehova šaj te dozvolinel leskere verna sluge te oven progonime.

4. Soske mrzinela amen o sveto?

⁴ O Isus objasningja soske valjani te adžikera o javera te protivinen pe amenge. Ov vakergja kaj o manuša ka mrzinen amen adaleske so na siem delo taro akava sveto (Jovan 15:18, 19). O progonstvo na značinela kaj nane amen e Jehovaskoro bereketi, nego sikavela kaj postapinaja ispravno.

5. Dali e manušen isi len sila te čhinaven amen te služina e Jehovaske? Objasnin.

⁵ E protivnikon nane len sila te čhinaven amen te služina e Semokjno Devleske, e Jehovaske. But džene probingje, ama na uspejngje. Razmislin so slučingja pe džikote trajnela sine i Dujto svetsko vojna. Ko adava vreme, e Devleskoro narodo sine but progonimo taro vlastija ko but phuvja. O aktivnostija e Jehovaskere svedokongere sine zabranime na samo tari nacističko partija ki Germanija nego isto agjaar taro vlastija ki Avstralija, Kanada hem javera phuvja. Ama, primetin so slučingja pe. Ko 1939 berš, keda počmingja i vojna, ko celo sveto sine 72.475 objavitelija. Ama ko 1945 berš, keda završingja i vojna, sine 156.299 objavitelija. Akava jasno sikavela kaj o Jehova dengja bereketi ple narodoske — o broj taro objavitelija barilo poviše taro duplo!

6. Kola pozitivna rezultatija šaj te oven keda isi progonstvija? Vaker primer.

⁶ Namesto te daravkerel amen, o progonstvo šaj te pottikninel amen panda poodlučno te služina e Jehovaske. Na primer, jekh bračno pari hem lengoro tikno čhavo živinena ki phuv kote so o vlastija zabraningje amare aktivnostija. Namesto te daran hem te keren pohari ki služba bašo Jehova, o bračno pari počmingja e opšto pionersko službaja. I phen čak mukhlja pli šukar platimi buti baši služba, a o phral vakerela kaj, adaleske so isi zabrana, but manuša mangena te džanen nešto poviše bašo e Jehovaskere svedokija. Adaleske, šaj polokheste te počminel bibliska kursija e manušencar. I zabrana angja javera da šukar rezultatija. Jekh starešina tari isto phuv vakergja kaj but džene so na sine aktivna počmingje palem te aven ko sostanokija hem te džan ki služba.

7. a) So sikljovaja tari 3. Mojseeva 26:36, 37? b) So ka kere ako zabraninena amare aktivnostija?

 ⁷ Keda o dušmanja ka zabraninen amare aktivnostija, ola nadinena pe kaj agjaar ka daraven amen hem kaj ka čhinava te služina e Jehovaske. Osven i zabrana, ola šaj te širinen hovajba baši amende, te bičhalen službenikon te pretresinen amare khera, te ingaren amen ko sudo, pa čak te phanden nesaven amendar. Ola mislinena kaj ka daraven amen adaleske so uspejngje te čhiven nekobore dženen amendar ko zatvor. Ako počminaja te dara lendar ili taro adava so šaj te keren amenge, šaj te počmina korkori te čhiva amenge „zabrana“ ki amari služba bašo Jehova. Ama, sigurno kaj na mangaja te ova sar o manuša soj tane opišime ki 3. Mojseeva 26:36, 37. (Čitin.) Nane te dozvolina i dar te tiknjarel ili te čhinavel amari služba bašo Jehova. Amen isi amen celosno doverba ko Jehova hem na vazdaja panika (Isa. 28:16). Osven adava, ponadari da molinaja e Jehova te del amen vodstvo. Adaleske so o Jehova tano tari amari strana, uverime siem kaj čak ni i najsilno manušikani vlada našti te čhinavel amen ponadari da verno te služina leske (Evr. 13:6).

8-9. a) Savi odluka valjani te anel sekova hristijani baši peste ili baši pli familija? b) So ka pomožinel amenge te ana mudro odluka?

⁸ Ako o vlastija zabraninena amare aktivnostija ko than kote so živinea, šaj ka razmisline dali te seline tut ki javer phuv kote so ka šaj slobodno te služine e Jehovaske. Adaja tani odluka koja so sekoj lično valjani te anel la. Angleder te odlučine so ka kere, šaj ka mange te proučine bašo adava sar postapingje o hristijanja taro prvo veko keda sine len progonstvo. Otkeda o dušmanja mudargje e Stefane barencar, o učenikija taro Erusalim počmingje te selinen pe ki celo Judeja hem Samarija, pa čak dži ki Fenikija, Kipar hem Antiohija (Mat. 10:23; Dela 8:1; 11:19). Tari javer strana, šaj te ovel korisno isto agjaar ako proučinea bašo adava so kergja o apostol Pavle keda ki jekh javer prilika sine progonstvo. Iako leskoro životo sine ki opasnost, ov odlučingja te ačhovel ko thana kote so o manuša protivinena pe sine bašo propovedibe. Adava kergja adaleske so sine le silno želba te propovedinel o šukar haberi hem te pomožinel e phralenge kola so živinena sine ko dizja kote so sine baro progonstvo (Dela 14:19-23).

⁹ So sikljovaja taro akala primerija? Sekova poglavari ki familija mora te odlučinel dali ov hem leskiri familija ka selinen pe ili na. Angleder te odlučinel, ov valjani te molinel pe bašo adava, šukar te razmislinel bašo okolnostija ple familijakere hem bašo adava kola šaj te oven o pozitivna hem o negativna strane ako selinena pe. Baši akaja buti, sekova hristijani valjani „te phiravel plo tovar“ (Gal. 6:5). Na smejnaja te sudina e javerenge baši odluka so anena la.

10. Save upatstvija ka den i podružnica hem o starešine?

¹⁰ Sar šaj ponadari da te služine e Jehovaske keda isi zabrana? I podružnica ka del e starešinenge taro tlo sobranie upatstvija hem praktična predlogija bašo adava sar te dobinen duhovno hrana, sar te ikeren sostanokija hem sar te propovedinen o šukar haberi. Ako i podružnica našti kontaktirinela e starešinencar, tegani o starešine ka pomožinen tuke hem sarinenge taro sobranie ponadari da te služinen e Jehovaske. Ola ka den upatstvija kola so ka oven ko sklad e Biblijaja hem amare publikaciencar (Mat. 28:19, 20; Dela 5:29; Evr. 10:24, 25).

11. Soske šaj te ove uverimo kaj sekogaš ka ovel tut duhovno hrana, hem sar šaj te zaštitine tli Biblija hem o javera publikacie?

 ¹¹ O Jehova dengja lafi kaj leskere slugen sekogaš ka ovel len duhovno hrana (Isa. 65:13, 14; Luka 12:42-44). Adaleske, šaj te ove uverimo kaj leskiri organizacija ka kerel sa so valjani te šaj te ačhove verno. Ama, so šaj tu te kere? Ako amare aktivnostija sar Svedokija tane zabranime, arakh šukar than kote so ka šaj te garave tli Biblija ili o javera publikacie so šaj ka oven tut. Ola tane but skapocena hem adaleske bizi razlika dali tane ko pečatimo ili elektronsko oblik, pazin nikogaš ma te mukhe len ko thana kote so šaj lokhe te arakhen pe. Sekova jekh amendar valjani te kerel sa so šaj te ačhovel duhovno zoralo.

12. Sar šaj o starešine te organizirinen o sostanokija ko način so nane te privlečinen vnimanie?

¹² A sar ka ovel amare sostanokoncar? O starešine ka organizirinen o sostanokija ko asavko način te šaj okola so protivinena pe amenge te na primetinen kaj khedaja amen. Šaj ka den upatstvija te kheda amen ko potikne grupe hem verojatno često ka meninen o vreme hem o than kote so ka ikeren pe o sostanokija. Tu da šaj te pomožine ko adava te phralja te ove bezbedna agjaar so nane te kere galama keda ka ave hem ka dža tuke taro sostanokija. Osven adava, šaj ka valjani te urave šeja kolencar so nane te privlečine e javerengoro vnimanie.

13. So šaj te sikljova taro amare phralja taro purano Sovetsko Sojuz?

¹³ Adaleske so o okolnostija tari phuv ki phuv tane različna, šaj ko nesave thana ka šaj poslobodno te propovedina, a ko javera thana šaj ka valjani poviše te pazina. Ama, bilo sar te ovel, amen ka arakha način te propovedina adaleske so mangaja e Jehova hem mangaja te vakera e javerenge bašo leskoro Carstvo (Luka 8:1; Dela 4:29). Bašo propovedibe e Jehovaskere svedokongoro ko purano Sovetsko Sojuz, i istoričarka Emili Beran vakergja: „Keda o vlastija zabraningje e Jehovaskere svedokonge te propovedinen pli vera, ola počmingje te keren lafi ple komšiencar, kolegencar hem amalencar. Keda bašo adava sine ingarde ko rabotnička logorija, ola počmingje te propovedinen e javere zatvorenikonge“. Iako amare aktivnostija sine zabranime, amare phralja taro purano Sovetsko Sojuz na čhinavgje te propovedinen. Ako nekogaš zabraninena pe amare aktivnostija ko than kote so živinea tu, ov rešimo te dža palo šukar primer akale phralengoro!

14. Sprema Psalm 39:1, ko so valjani te pazina?

¹⁴ Pazin save informacie vakerea. Džikote trajnela i zabrana, valjani te procenina keda tano „vreme te trajnel pe“ (Prop. 3:7). Na smejnaja te otkrina važna informacie, sar na primer o anava amare  phralengere hem phenjengere, o thana kote so khedaja amen, o način sar keraja amari služba hem sar dobinaja duhovno hrana. Asavke bukja nane te vakera len e svetovna vlastenge, nesave amalenge so isi len šukar namera ili amare familijake, bizi razlika dali živinena amencar ki isto phuv ili javerthe. Ako na pazinaja ki akaja stapica šaj te ana ki opasnost amare phralen. (Čitin Psalm 39:1.)

15. So trudinela pe o Satana te kerel, hem sar šaj te izbegina adaja stapica?

¹⁵ Ma mukh tikne problemija te keren podelbe. O Satana džanela kaj „jekh kher nane te ačhovel zaedno ako o manuša soj ki leste marena pe maškar peste“ (Mar. 3:24, 25). Ov stalno ka trudinel pe te kerel podelbe maškar amende. Ov nadinela pe kaj ka počmina te borina amen maškar amende namesto te borina amen protiv leste.

16. Savo šukar primer mukhlja amenge i phen Gertrud Pecinger?

¹⁶ Čak o zrela hristijanja mora te pazinen te na peren ki adaja stapica. Te dikha o primer e duje phenjengoro kola so sine pomazime, i Gertrud Pecinger hem i Elfride Ler. Ola sine phanle ko nacističko koncentraciono logori zaedno javere phenjencar. I Gertrud uli ljubomorno adaleske so i Elfride ikerela sine ohrabruvačka govorija e javere phenjenge ko logori. Pokasno, i Gertrud ladžandili bašo adava hem taro vilo molingja e Jehova te pomožinel lake. Oj pišingja: „Mora te sikljova te prifatina keda dikhaja kaj o javera tane pošukar amendar ko nešto ili dobinena poviše odgovornostija“. Sar uspejngja te borinel pe e ljubomoraja? I Gertrud koncentriringja pe ko šuže osobine so sine e Elfrida hem ko lakoro šukar karakter. Agjaar, oj palem sine ko šukar odnosija e Elfridaja. O solduj džene preživingje ko koncentraciono logori hem ačhile verna e Jehovaske sa dži ko krajo taro plo životo ki Phuv. Ako trudinaja amen te nakhava o problemija hem o razlike maškar amende hem amare phralja hem phenja, nane te mukha te avel dži ko podelbe (Kol. 3:13, 14).

17. Soske valjani sekogaš te ikera amen ko upatstvija so dela e Jehovaskiri organizacija?

¹⁷ Sekogaš iker tut ko upatstvija. Ka izbegina but problemija ako ikeraja amen ko upatstvija so dobinaja len taro odgovorna phralja (1. Pet. 5:5). Na primer, ki jekh phuv kote so amare aktivnostija tane zabranime, o odgovorna phralja dengje upatstvo kaj o objavitelija na valjani te mukhen literatura e manušenge ki služba. Ama, jekh pioneri postapingja javer čhane. Savo sine o rezultati? Kratko otkeda ov hem javera objavitelija svedočingje neformalno, sine isprašime tari policija. Nesave službenikija pratingje len hem arakhle i literatura so dengje e manušenge. So sikljovaja taro akava?  Valjani te ikera amen ko upatstvija čak ako mislinaja kaj amen džanaja pošukar. O Jehova sekogaš tano bahtalo keda sorabotinaja e phralencar kolen so čhivgja te predvodinen (Evr. 13:7, 17).

18. Soske na valjani te čhiva nepotrebna pravilija?

¹⁸ Ma čhiv nepotrebna pravilija. Ako o starešine čhivena ple pravilija, ka keren but popharo te ovel e javerenge. O phral Juraj Kaminski vakergja so slučingja pe džikote trajnela sine i zabrana ki purani Čehoslovačka: „Otkeda but starešine sine phanle, nesave taro javera phralja so predvodinena sine ko sobranija hem ko pokraine počmingje te čhiven e objavitelenge pravilija bašo adava sar valjani te ponašinen pe hem so valjani te keren, a so na“. Keda kerela pe lafi bašo lična bukja, o Jehova na dengja amen pravo te ana odluke e javerenge ko than. Nekoj so čhivela nepotrebna pravilija na zaštitinela ple phralen, nego probinela te ovel gospodari lengere verakoro (2. Kor. 1:24).

19. Sprema 2. Letopisi 32:7, 8, soske šaj te ova hrabra bizi razlika so ka kerel o Satana?

¹⁹ Amaro najbaro dušmani o Satana nane te čhinavel te progoninel e Jehovaskere verna slugen (1. Pet. 5:8; Otk. 2:10). O Satana hem okola soj tane tari leskiri strana ka probinen te čhinaven amen te služina e Jehovaske. Ama, čak te dara, amen ponadari da ka služina e Jehovaske (5. Moj. 7:21). O Jehova tano sekogaš amencar hem ponadari da ka poddržinel amen čak ako amare aktivnostija tane zabranime. (Čitin 2. Letopisi 32:7, 8.)

20. So sian odlučno te kere?

²⁰ Keda sine anglo členija taro Sudsko sovet, amare phralja taro prvo veko vakergje lenge: „Sudinen korkori dali tano pravedno anglo Devel te šuna tumen, a na e Devle! Amen našti te na kera lafi bašo adava so dikhlem hem šungjem“ (Dela 4:19, 20). Amen da te ova odlučna isto sar lende.