1, 2. Ko so valjani te ovel sigurno sekova jekh amendar? (Dikh i slika ko početok tari statija.)

SAR so dikhlem ki angluni statija, o Satana vakerela kaj e Jehova nane le pravo te vladinel upro manuša. Ov isto agjaar vakerela kaj o Jehova na vladinela šukar hem kaj o manuša ka oven pobahtale ako vladinena korkori. Dali tano o Satana ko pravo? Zamislin tuke kaj o manuša šaj te vladinen korkori hem te živinen večno. Dali ka oven pobahtale bizo Devel? Dali tu ka ove pobahtalo ako šaj te živine večno hem ma te zavisine taro Devel?

² Sekoj amendar valjani korkori te razmislinel bašo akala pučiba. Tegani, ka ova sigurna kaj o Jehova tano o Najšukar Vladeteli hem kaj ov zaslužinela te poddržina le celo vilea. Ko adava uverinela amen i Biblija. Te dikha so pišinela ki late bašo e Jehovaskoro pravo te vladinel upro sa.

3. Soske e Jehova isi le pravo te vladinel upro sa?

³ Samo e Jehova isi le pravo te vladinel upro sa soske ov tano Semokjno Devel hem Stvoriteli (1. Let. 29:11; Dela 4:24). Ki jekh vizija, o 144.000 so ka vladinen zaedno e Isusea vakergje: „Mokjno Jehova, tu sian amaro Devel hem zaslužinea sarine te slavinen tut hem te sikaven tuke čest, soske tu kergjan sa o bukja, hem ola postojnena soske tu agjaar mangljan“ (Otk. 4:11). O Jehova kergja sa, adaleske isi le pravo te vladinel upri sarinende ko nebo hem ki Phuv.

4. Soske i slobodno volja na dela amen pravo te bunina amen protiv o Devel?

⁴ O Satana na stvoringja ništo. Adaleske, nane le pravo te vladinel upri nikaste. O Satana hem o prva manuša na sine poslušna e Jehovaske hem otfrlingje le sar Vladeteli (Erem. 10:23). Točno tano adava kaj o Jehova dengja len slobodno volja. Ama, dali lengiri slobodno volja dengja len pravo te buninen pe protiv leste? Na. I slobodno volja pomožinela amen te ana odluke, ama na dela amen pravo te bunina amen protiv amaro Stvoriteli, o Jehova. Keda buninaja amen protiv o Devel adava sikavela kaj ko pogrešno način koristinaja i slobodno volja. Sa e manušenge valjani o Devel te vladinel upri lende hem te vodinel len.

5. Soske e Devleskere odluke sekogaš tane pravedna?

⁵ E Jehova isi le pravo te vladinel panda tari jekh pričina — ov koristinela plo avtoriteti ko jekh sovršeno pravedno način. Ov vakerela amenge: „Me sium o Jehova, okova so sikavela verno mangipe hem pravda ki phuv, soske adava radujnela man“ (Erem. 9:24). E Jehovaske na valjanena e manušengere zakonija te šaj odlučinela soj tano ispravno. Namesto adava, ov vakerela soj tano ispravno. Hem o zakonija so dela len e manušenge temelinena pe ki leskiri sovršeno pravda. O psalmisti vakergja: „I pravednost hem i pravda tane o temeli ko tlo prestol“. Znači, sa o zakonija, načelija hem odluke so avena taro Jehova tane pravedna (Ps. 89:14; 119:128). O Satana vakerela kaj o Jehova nane pravedno Vladeteli. Ama, o Satana tano adava so našti te anel pravda ko sveto.

6. Vaker jekh pričina soske e Jehova isi le pravo te vladinel?

⁶ Javer pričina soske e Jehova isi le pravo te vladinel e svetoja tani adaja so ov tano mudro hem džanela sar te grižinel pe bašo sa so kergja. Akava dikhela pe taro adava keda o Devel dengja sila ple čhaveske te sasljarel o nasvalipa kola so nijekh doktori našti te sasljaren len (Mat. 4:23, 24; Mar. 5:25-29). Akava tano amenge čudo, ama e Jehovaske nane. Ov džanela sar funkcionirinela e manušeskoro telo hem šaj te sasljarel sekova nasvalipe. Isto agjaar, O Jehova šaj te iranel  e mulen ko životo hem te čhinavel o prirodna katastrofe.

7. Soske o Jehova tano pomudro bilo kastar taro sveto e Satanaskoro?

⁷ O Satana našti te anel mir ko sveto kolea so vladinela, bilo ki jekh država ili maškar nekobor države. Samo o Jehova tano najmudro hem džanela sar te anel mir ko sveto (Isa. 2:3, 4; 54:13). Adaleske amen da osetinaja amen sar o apostol Pavle kova so vakergja: „O, kobor tane but bare o bereketija so avena taro Devel hem but tane hor leskiri mudrost hem o džandipe!“ (Rim. 11:33).

8. Sar vlijajnela upri tute o način sar vladinela o Jehova?

⁸ Sar so dikhlem, i Biblija jasno vakerela kaj e Jehova isi le pravo te vladinel. Isto agjaar, latar dikhaja soske o Jehova tano najšukar Vladeteli. Jekh pričina tani adaleske so ov vladinela mangipaja. Osetinaja amen panda popaše lea keda razmislinaja bašo adava kaj ov tano „milostivo hem ljubezno, na holjanela sigate hem pherdo tano verno mangipe hem čačipe“ (2. Moj. 34:6). O Devel tano amencar ljubezno hem poštujnela amen. Ov grižinela pe amenge pošukar amendar. O Satana vakerela kaj o Jehova garavela o šukar bukja ple slugendar, ama adava tano hovajbe. O Devel dengja čak ple mangle Čhave te šaj ovela amen nadež te živina večno. (Čitin Psalm 84:11; Rimjanite 8:32.)

9. Kotar džanaja kaj o Devel grižinela pe sekole jekheske amendar?

⁹ O Jehova mangela ple narodo. Ama ov isto agjaar but grižinela pe sekole jekheske. Razmislin bašo adava so slučingja pe ko purano vreme. Trišel berša o Jehova koristingja sudie te vodinel ple narodo hem te spasinel le taro dušmanja. Čak ko adava vreme o Jehova na bistergja nijekhe verno sluga. Jekh lendar sine i Rut. Oj na sine Izraelka hem otkažingja pe taro but bukja te šaj služinela e Jehovaske. Ov nagradingja la romea hem čhavea. Isto agjaar, i Rut uli delo tari familija kotar so alo o Mesija. O Jehova mukhlja te ovel pišimo ki Biblija o životo e Rutakoro, ko lil kova so phiravela lakoro anav. Šaj li te zamisline tuke sar ka osetinel pe i Rut keda ka voskresninel hem keda ka šunel bašo akala bukja? (Rut 4:13; Mat. 1:5, 16).

10. Kotar džanaja kaj o Jehova sar Vladeteli na postapinela ko grubo način?

¹⁰ Sar Vladeteli, o Jehova na postapinela ko grubo način. Adala soj leske poslušna osetinena pe slobodna hem bahtale (2. Kor. 3:17). O David bašo Jehova vakergja: „I čest hem o šužipe tane angli leste, i sila hem o bahtalipe tane kote so bešela ov“ (1. Let. 16:7, 27). A o psalmisti o Etan pišingja: „Bahtale tane o narodo so falinena tut radosno glasoja. Ola phirena ki svetlina so avela taro tlo muj! Bašo tlo anav ola tane bahtale celo dive hem tli pravednost bajrarela len“ (Ps. 89:15, 16).

11. So šaj panda poviše te uverinel amen kaj o Jehova tano o najšukar Vladeteli?

 ¹¹ Kobor poviše razmislinaja bašo e Jehovaskoro šukaripe, doborom poviše ka ova uverime kaj ov tano o najšukar Vladeteli. Amen da osetinaja amen sar o psalmisti, kova so vakergja e Devleske: „Jekh dive ko tle avlina tano pošukar taro milja dive ko javer than“ (Ps. 84:10). O Jehova kergja amen, adaleske ov točno džanela so valjani amenge te šaj te ova čače bahtale. Ov tano darežlivo hem dela amen poviše taro adava so valjani amenge. Sa so rodela amendar o Jehova tano bašo amaro šukaripe. Čak ako valjani te kera nesave žrtve, sekogaš ka ova bahtale ako šunaja le. (Čitin Isaija 48:17.)

12. Koja tani i glavno pričina soske poddržinaja e Jehova sar Vladeteli?

¹² Tari Biblija džanaja kaj nesave ka buninen pe protiv o Jehova keda ka završinen o milja berša so ka vladinel o Isus (Otk. 20:7, 8). Soske ka keren adava? O Satana, sar sekogaš, ka probinel te kerel e manušen te oven sebična. Ov šaj ka probinel te ubedinel len te mislinen kaj šaj te živinen večno bizo te oven poslušna e Jehovaske. Ama, adava nane čače. Adaleske, šukar tano te puča amen: „Dali me ka verujnav ko asavko hovajbe?“ Ako čače mangaja e Jehova hem siem uverime kaj ov tano šukar hem kaj isi le pravo te vladinel, tegani asavko hovajbe ka ovel amenge gadno. Nikogaš nane te manga te živina bizo Jehova, kova soj amaro Najbaro Vladeteli so vladinela mangipaja.

13. Sar sikavaja kaj poddržinaja e Jehova sar Vladeteli?

¹³ Sar so dikhlem, e Jehova isi le pravo te vladinel hem leskoro način sar vladinela tano najšukar. Ov zaslužinela te poddržina le celo vilea. Adava keraja le agjaar so siem leske verna hem trudinaja amen te dža palo leskoro primer. Keda daja amendar sa te postapina sar leste, sikavaja kaj mangaja le hem poddržinaja le sar Najbaro Vladeteli. (Čitin Efešanite 5:1, 2.)

14. Sar šaj o starešine hem o poglavarija ki familija te džan palo primer e Jehovaskoro?

¹⁴ Tari Biblija sikljovaja kaj o Jehova sekogaš koristinela plo avtoriteti mangipaja. O poglavarija ki familija hem o starešine so poddržinena e Jehova sar Vladeteli ka trudinen pe te džan palo leskoro primer, nane te postapinen e javerencar ko grubo način hem nane te kontrolirinen len. O apostol Pavle but trudinela pe sine te postapinel sar o Devel hem leskoro Čhavo (1. Kor. 11:1). Ov na ladžakerela sine e javeren hem na terinela len sine silaja te keren adava soj ispravno. O Pavle ljubezno ohrabringja len te keren adava soj ispravno (Rim. 12:1; Ef. 4:1; Filim. 8-10). Agjaar, ov postapingja sar o Jehova. Keda e javerencar postapinaja mangipaja, poddržinaja e Jehova sar Najbaro Vladeteli.

15. Sar poddržinaja e Jehova sar Vladeteli keda poštujnaja adalen so dengja len avtoriteti?

¹⁵ Isto agjaar, poddržinaja e Jehova sar Vladeteli keda poštujnaja adalen so dengja len avtoriteti hem sorabotinaja lencar. Čak keda celosno na haljovaja ili na soglasinaja amen nesave odlukaja so angje, amen ponadari da ka poddržina len. Iako o manuša ko sveto na kerena akava, amen postapinaja  agjaar soske prifatinaja e Jehova sar amaro Vladeteli (Ef. 5:22, 23; 6:1-3; Evr. 13:17). Tegani siem bahtale, soske o Jehova džanela soj najšukar amenge.

16. Sar amare odluke šaj te sikaven kaj poddržinaja e Jehova sar Najbaro Vladeteli?

¹⁶ Šaj te poddržina e Jehova sar Vladeteli hem e odlukencar so anaja len. O Jehova na dengja amen konkretno zapoved baši sekoja situacija ko životo, nego ov sikavela amenge sar razmislinela. Adava pomožinela amenge te haljova so valjani te kera. Na primer, o Jehova na dela amen spisako save šeja šaj te phirava, a save na. Ov phengja kaj valjani te izgledina skromno hem primerno sar leskere sluge (1. Tim. 2:9, 10). O Jehova mangela te razmislina sar amare odluke vlijajnena upro javera (1. Kor. 10:31-33). Keda anaja odluke sar so mangela o Jehova, tegani sikavaja kaj mangaja hem poddržinaja le sar Vladeteli.

17, 18. Sar šaj okola soj ko brako te poddržinen e Jehova sar Vladeteli?

¹⁷ Te dikha jekh način sar šaj okola soj ko brako te poddržinen e Jehova sar Vladeteli. Šaj nekaskoro brako nane asavko sar so mislingje peske kaj ka ovel. Šaj čak isi len bare problemija ko brako. So šaj te pomožinel lenge? Šaj te razmislinen sar  postapingja o Jehova e Izraelconcar ko purano vreme. O Jehova baši peste vakergja kaj tano sar rom ple narodoske (Isa. 54:5; 62:4). O Izraelcija but puti razočaringje e Jehova hem adaleske ola sine sar ko jekh lošno brako lea. Ama, o Jehova na otkažingja pe lendar sigate. Ov but puti prostinela lenge sine hem ikergja ple vetuvanja so dengja len. (Čitin Psalm 106:43-45.)

¹⁸ Adala soj ko brako hem mangena e Jehova trudinena pe te postapinen sar leste. Čak ako isi len problemija ko brako, ola na razvedinena pe ako nane len biblisko pričina bašo adava. Ola džanena kaj o Jehova dikhela seriozno ko zavet bašo brako hem kaj ov mangela o rom hem i romni te ačhoven zaedno. Edinstveno biblisko pričina keda nekoj šaj te razvedinel pe hem palem te khuvel ko brako tani ako jekh taro bračna partnerija kerela nemoral (Mat. 19:5, 6, 9). Keda e Devleskere sluge kerena sa so šaj lengoro brako te uspejnel, ola poddržinena e Jehova sar Vladeteli.

19. So valjani te kera keda ka grešina?

¹⁹ Sarine siem nesovršena hem nekogaš keraja bukja kolencar so razočarinaja e Jehova. Ov džanela adava hem dengja ple Čhave sar otkupnina amenge. Adaleske, keda ka grešina, šaj te molina e Jehova te prostinel amenge (1. Jov. 2:1, 2). Namesto samo te osetina amen lošno bašo amare greške, valjani te trudina amen te sikljova nešto lendar. Ako ačhovaja paše e Jehovaja, ov ka prostinel amenge hem ka pomožinel amen emocionalno te sasljova hem ponadari da te služina leske (Ps. 103:3).

20. Soske akana valjani te poddržina e Jehova sar Najbaro Vladeteli?

²⁰ Ko nevo sveto sekova manuš ka šunel e Jehova sar Vladeteli hem ka sikljovel bašo leskere pravedna drumija (Isa. 11:9). Ama, panda akana šaj but te sikljova bašo adava sar razmislinela o Jehova hem sar mangela te postapina. Panda hari, nijekh nane te pučel pe dali e Jehova isi le pravo te vladinel. Adaleske, akana valjani te sikava kaj poddržinaja e Jehova sar Najbaro Vladeteli agjaar so ka ova poslušna, ka služina verno hem sa amare silencar ka trudina amen te postapina sar leste.