KO MATEJ pišinela: „O Isus khuvgja ko hrami hem paldingja sarinen so bikinena sine hem kinena sine ko hrami, irangja o astalja adalengere so meninena sine pare hem o klupe okolengere so bikinena sine gulubija. Hem ov vakergja lenge: ’Pišimo tano: Mlo kher ka vikinel pe kher e molitvakoro, a tumen lestar kergjen kher e čorengoro!‘“ (Mat. 21:12, 13).

I istorija sikavela kaj o trgovcija ko hrami čhivena sine but bare cene. Na primer, o gulubija obično sine doborom eftina so o čorole da šaj sine te kinen hem te den len sar žrtva. Sprema ko purane evrejska zapisija, ko prvo veko a.e., duj gulubija koštinena sine jekh zlatno dinari. Te šaj te zarabotinel doborom pare, jekh rabotniko valjani sine te kerel 25 dive buti. O gulubija ule doborom skupa so o čorole manuša našti sine te kinen len (3. Moj. 1:14; 5:7; 12:6-8). Holjamo but bašo akava, o rabini Simeon ben Gamaliel tiknjargja o broj bašo žrtve so valjani sine te den pe. Odma palo adava, i cena bašo duj gulubija sine šel puti potikni.

Dikhjola pe kaj o trgovcija ko hrami sine alčna hem iskoristinena sine e manušen so kinena lendar. Adaleske o Isus vakergja lenge kaj tane čora.