ŽIVINAJA ko sveto soj pherdo problemencar, adaleske šaj te ovel pharo te arakha mir. Čak keda isi amen hari mir, šaj lokhe te našava le. So vakerela i Biblija bašo adava sar šaj te arakha čačutno mir kova so trajnela večno? Hem sar šaj te pomožina e javerenge te arakhen asavko mir?

Te šaj te arakha čačutno mir, valjani te osetina amen bezbedna hem zaštitime. Valjani te oven amen šukar amala, hem soj najvažno, valjani te ova paše e Devlea. Sar šaj te kera adava?

E Jehovaskere zakonija hem načelija sekogaš tane bašo amaro šukaripe. Keda šunaja len, sikavaja kaj isi amen doverba ko Jehova hem kaj mangaja te ova ko mir lea (Erem. 17:7, 8; Jak. 2:22, 23). Tegani ov ka ovel paše amencar hem ka del amen andruno mir. Ko Isaija 32:17 pišinela: „O rezultati tari čačutni pravednost ka ovel o mir, hem o plodi tari čačutni pravednost ka ovel o večno mir hem bezbednost“. Šaj te arakha čačutno mir keda taro vilo šunaja e Jehova (Isa. 48:18, 19).

O Jehova isto agjaar dengja amen jekh skapoceno poklon kova so pomožinela amenge te ovel amen mir so trajnela večno. Adava poklon tano o sveti duh (Dela 9:31).

O apostol Pavle vakergja kaj o mir tano jekh taro osobine so avena taro sveti duh (Gal. 5:22, 23). Adaleske so o mir avela taro e Devleskoro duho, valjani te mukha o sveti duh te vodinel amen ako mangaja te ovel amen mir. Sar mukhaja te vodinel amen o sveti duh?

Prvo, valjani redovno te čitina e Devleskoro Lafi (Ps. 1:2, 3). Džikote hor razmislinaja bašo adava so čitinaja lestar, o sveti duh pomožinela amenge te haljova kola bukja mangela o Jehova, a kola mrzinela.  Na primer, sikljovaja sar o Jehova ačhovela ko mir e javerencar hem soske leske doborom važno o mir. Keda keraja adava so sikljovaja tari Biblija, ka ovel amen pobaro mir ko životo (Izr. 3:1, 2).

Dujto, valjani te molina amen bašo sveti duh (Luka 11:13). O Jehova vetinela kaj, ako rodaja lestar pomoš, „o mir taro Devel, kova soj upreder sekoja misla, ka arakhel [amare] vile hem [amare] misle preku o Isus Hristos“ (Fil. 4:6, 7). Keda ačhovaja paše e Jehovaja hem rodaja te del amen sveti duh, ka ovel amen andruno mir (Rim. 15:13).

I Biblija pomožingja bute manušenge te keren promene ko plo životo, hem akana tane ko mir e Jehovaja, isi len andruno mir hem tane ko mir e javerencar. Sar uspejngje te keren akala promene?

Angleder te aven ko čačipe, nesave phralja hem phenja sigate holjanena sine hem čak sine nasilna. Ama, ola but trudingje pe te meninen pe hem akana tane ljubezna, strpliva hem mangena o mir * (Dikh i fusnota.) (Izr. 29:22). Te dikha sar jekh phral hem jekh phen kergje promene ki pli ličnost.

O Dejvid, angleder te ovel e Jehovaskoro svedoko, but puti kritikujnela sine e javeren hem kerela sine grubo lafi ple familijaja. Ama, ov halilo kaj valjani te meninel pe. So pomožingja leske ko adava? Ov vakerela: „Počmingjum te primeninav o bibliska načelija ko mlo životo hem akana poviše poštujnaja amen mle familijaja“.

Upri Rejčel vlijajnela sine i okolina kote so barili. Oj objasninela: „Akana da mange pharo te kontrolirinav mli holi soske bariljum ki familija kote so sarine but sigate holjanena sine“. So pomožingja lake te arakhel mir? Oj vakerela: „Redovno molinava  man sine e Jehovaske hem rodava sine pomoš lestar“.

O Dejvid hem i Rejčel tane samo duj primerija kola so sikavena kaj, ako primeninaja o bibliska načelija hem ako molinaja e Devle te pomožinel amenge ple duhoja, ka ovel amen mir. Iako živinaja ko sveto kote so isi but holi, šaj te ovel amen andruno mir. Akava ka pomožinel amenge pošukar te nakha amare familijaja hem e javerencar ko sobranie. Ama, o Jehova vakerela amenge: „Oven ko mir sa e manušencar“ (Rim. 12:18). Dali šaj čače te ova ko mir sa e manušencar hem soske valjani te trudina amen te ova ko mir e javerencar?

Keda siem ki služba, propovedinaja e manušenge o šukar haberi hem pomožinaja lenge te arakhen mir (Isa. 9:6, 7; Mat. 24:14). But džene mangena hem prifatinena akava haberi. Adaleske, ola nane više bizi nadež hem nane holjame bašo adava so slučinela pe ko sveto. Akana isi len čačutni nadež bašo vreme so avela hem akava pottikninela len te trudinen pe te oven ko mir e javerencar (Ps. 34:14).

Ama, na mangena sarine akava haberi, barem na taro prvo puti (Jovan 3:19). Bizi razlika sar reagirinena o manuša, o Devel dela amen plo duho te ačhova smirime hem te sikava poštovanje džikote propovedinaja. Agjaar šunaja o sovet e Isuseskoro: „Keda ka khuven ko kher, pozdravinen e kherutnen. Ako priminena tumen, neka avel ki lende tumaro mir, ama ako na priminena tumen, tumaro mir neka iranel pe ki tumende“ (Matej 10:11-13). Ako šunaja o sovet e Isuseskoro, šaj te ovel amen mir bizi razlika so kerena ili vakerena o javera. Hem nane te bistra kaj šaj te ovel amen prilika te pomožina adale manušenge javer puti.

Isto agjaar, trudinaja amen te ova ko mir e pretstavnikoncar tari vlast agjaar so sikavaja poštovanje keda keraja lencar lafi, pa čak okolencar so protivinena pe amenge. Na primer, o vlastija ki jekh phuv ki Afrika na mukhena sine te gradinen pe dvorane. Amare phralja džanle kaj valjani te probinen te rešinen akava problemi ko mirno način. Bičhalgje jekhe phrale kova so angleder služinela sine sar misioneri ki adaja phuv te kerel lafi e ambasadorea tari adaja phuv ko London (Anglija). Ov valjani sine te objasninel leske kaj e Jehovaskere svedokija tane mirno narodo kova so propovedinela haberi so anela mir.

O phral vakerela: „Keda resljum ki recepcija ki ambasada, i recepcionerka sine uravdi ko šeja taro jekh pleme so džanava sine lengiri čhib. Adaleske pozdravingjum la ki adaja čhib. Oj sine iznenadimi hem pučlja man: ’Koja tani i pričina so alen?‘ Kulturno vakergjum lake kaj mangava te dikhav man e ambasadorea. Oj javingja pe leske hem ov iklilo te dikhel pe mancar hem pozdravingja man ki pli čhib. Palo adava, ov vnimatelno šungja džikote objasningjum leske kaj e Jehovaskere svedokija tane mirno narodo kova so propovedinela haberi so anela mir“.

Otkeda o ambasadori šungja so vakergja o phral, ov halilo so keraja hem na sine le više predrasude sar angleder. Palo nesavo vreme, i vlada ki adaja afričko phuv meningja pli odluka hem dozvolingja e Jehovaskere svedokija te gradinen dvorane. O phralja sine but bahtale! Akatar šaj te dikha kaj keda sikavaja poštovanje e javerenge, trudinaja amen te ova ko mir.

Avdive, e Jehovaskere sluge arakhljovena ko duhovno raj kote so isi mir. Sekova jekh amendar šaj te pomožinel te arakhel pe adava mir agjaar so ka trudina amen te ovel amen akaja osobina ko amaro životo. Tegani šaj te ova uverime kaj o Jehova ka ovel zadovolno amendar. Hem ko leskoro nevo sveto ka del amen mir kova so ka trajnel večno (2. Pet. 3:13, 14).