E Rovoameskoro dad, o Solomon, sine 40 berš cari ko Izrael (1. Car. 11:42). Otkeda mulo ov, o Rovoam gelo taro Erusalim ko Sihem te šaj adari te keren le cari (2. Let. 10:1). Dali darala sine kaj nane te uspejnel šukar te meninel e Solomone, kova so sine pendžardo pali pli bari mudrost? Kratko otkeda ulo cari, o Rovoam valjani sine te sikavel dali isi le dovolno mudrost te rešinel jekh pharo problemi.

O Izraelcija osetinena pe sine mučime hem bičhalgje manušen te vakeren e Rovoameske so rodena lestar: „Tlo dad čhivgja amenge pharo jarem, a tu akana ako lokhjargjan i phari služba tle dadeskiri hem o pharo jarem so čhivgja amenge ov, ka služina tuke“ (2. Let. 10:3, 4).

O Rovoam valjani sine te anel phari odluka. Ako kerela sine adava so mangela o narodo, tegani ov, leskiri familija hem o javera ki carsko palata šaj ka valjani sine te otkažinen pe taro nesavo luksuz. Ama, ako na kerela adava so rodingje o manuša, ola šaj sine te buninen pe. So kergja o Rovoam? Ov prvo kergja lafi e pophure muršencar kola so sine sovetnikija leskere dadeske. Ola vakergje leske te šunel e narodo. Ama palo adava, ov kergja lafi ple vrsnikoncar hem odlučingja te postapinel grubo e narodoja. Ov vakergja lenge: „Ka kerav tumaro jarem pharo, ama na samo adava, ka kerav le panda popharo. Mo dad kazninela sine tumen kamšikoncar, a me ka kazninav tumen kamšikoncar so posavena“ (2. Let. 10:6-14).

So šaj te sikljova taro akava? Avdive, isi but pophure kola so beršencar verno služinena e Jehovaske hem kola so šaj te pomožinen amenge te ana šukar odluke. Adaleske, te ova mudra hem te šuna len (Jov 12:12).

O Rovoam khedingja ple vojska te borinel pe protiv o plemija so buningje pe. Ama, o Jehova bičhalgja e proroko e Semaja te vakerel lenge: „Ma džan hem ma maren tumen protiv tumare  phralja o Izraelcija. Iranen tumen sekoj ko plo kher, soske me kergjum adava te ovel“ (1. Car. 12:21-24). * (Dikh i fusnota.)

Sine li lokho e Rovoameske te šunel e Jehova? So ka mislinen sine o manuša bašo plo nevo cari kova so prvo vakergja kaj ka kazninel len „kamšikoja so posavela“, a akana nane te kerel ništo? (Sporedin 2. Letopisi 13:7.) Bizi razlika so ka mislinen sine leske o manuša, o cari hem leskiri vojska šungje e Jehova hem irangje pe ko pumare khera.

So sikljovaja amen taro akava? Sekogaš tano mudro te šuna e Jehova, čak keda o manuša ka asan amenge. O Devel ka del amen bereketi sekogaš keda šunaja le (5. Moj. 28:2).

Dali o Rovoam dobingja bereketi adaleske so šungja e Devle? O Rovoam ponadari da sine cari upro plemija Juda hem Venijamin, hem počmingja te gradinel neve dizja ko adava podračje. Ov isto agjaar, „ki bari mera“ kergja nesave dizja te oven pozorale (2. Let. 11:5-12). Soj panda považno, nesavo vreme šunela sine e Jehovaskere zakonija. Adaleske so o carstvo taro deš plemija počmingja te obožavinel idolija, but džene taro adava carstvo patujnena sine ko Erusalim te poddržinen e Rovoame hem o čačutno obožavanje (2. Let. 11:16, 17). Znači, adaleske so o Rovoam šunela sine e Jehova, leskoro carstvo ulo pozoralo.

Keda e Rovoameskoro carstvo ulo pozoralo, ov kergja nešto čudno. Čhinavgja te šunel e Jehova hem počmingja te obožavinel hovavne devlen! Soske kergja adava? Dali leskiri daj koja so sine Amonka vlijajngja upri leste? (1. Car. 14:21). Na džanaja, ama o narodo gelo palo leskoro lošno primer. Adaleske, o Jehova dozvolingja o egipetsko cari, o Sisak, te osvojnel but dizja taro carstvo Juda. Akava slučingja pe iako o Rovoam angleder kergja adala dizja pozorale! (1. Car. 14:22-24; 2. Let. 12:1-4).

I situacija uli pološno keda o Sisak hem leskiri vojska ale ko Erusalim, kotar so vladinela sine o Rovoam. Tegani, o proroko o Semaja vakergja e Rovoameske hem leskere knezongje akava haberi taro Devel: „Tumen mukhlen man, adaleske me da mukhljum tumen ko vasta e Sisakoskere“. Sar reagiringja o Rovoam? Ko but pozitivno način! I Biblija vakerela: „O knezija taro Izrael hem o cari ule ponizna anglo Jehova hem vakergje: ’O Jehova tano pravedno‘“. Adaleske o Jehova spasingja e Rovoame hem o Erusalim na sine uništimo (2. Let. 12:5-7, 12).

Palo adava, o Rovoam ponadari da vladinela sine upro carstvo Juda. Angleder te merel, ov dengja but poklonija ple čhavenge. Verojatno adalea manglja te ovel sigurno kaj nane te buninen pe protiv pumaro phral o Avija, kova so valjani sine te ovel cari pali leste (2. Let. 11:21-23). Agjaar o Rovoam sikavgja pobari mudrost nego keda sine terno.

Iako o Rovoam kergja nesave šukar bukja, i Biblija bašo leskoro vladibe vakerela: „Kerela sine lošnipe“. Soske? Ov „ko plo vilo na odlučingja te rodel e Jehova“. Adaleske, o Jehova na sine zadovolno lestar (2. Let. 12:14).

So šaj te sikljova taro Rovoam? Ov ponekogaš šunela sine e Devle. Isto agjaar, kergja nesave šukar bukja e Jehovaskere narodoske. Ama na sine paše amal e Jehovaja hem na sine le silno želba te kerel leskiri volja. Adaleske, čhinavgja te kerel adava soj ispravno hem počmingja te obožavinel hovavne devlen. Šaj pučea tut: „Keda o Rovoam prifatingja o ukor taro Jehova, dali adava kergja le adaleske so o javera vlijajngje leske ili iskreno kaingja pe bašo ple greške hem manglja te kerel e Devleskiri volja?“ (2. Let. 11:3, 4; 12:6). Palo nesavo vreme, ov palem kerela sine lošna bukja. Ov but razlikujnela pe sine taro plo papo, o David. Točno tano kaj o David kergja phare grevija, ama iskreno kaingja pe. Isto agjaar, ov mangela sine e Jehova hem služingja leske celo vilea (1. Car. 14:8; Ps. 51:1, 17; 63:1).

 Šaj but te sikljova taro akava biblisko izveštaj. Pofalno tano keda o manuša grižinena pe bašo ple familie hem trudinena pe te keren šukar bukja e javerenge. Ama, te šaj o Jehova te ovel amendar zadovolno, valjani te služina leske ko način so ka kerel le bahtalo hem mora te ova paše amala lea.

Te šaj te ispolnina adaja cel, valjani but te manga e Jehova. Isto sar so na mukhaja i jag te ačhol agjaar so čhivaja lake kašta, na mukhaja te tiknjol amaro mangipe bašo Jehova agjaar so redovno proučinaja leskoro Lafi, razmislinaja bašo adava so čitinaja hem istrajnaja ki molitva (Ps. 1:2; Rim. 12:12). Asavko mangipe ka pottikninel amen te kera bahtalo e Jehova ko sa so keraja. Isto agjaar, ka pottikninel amen iskreno te kaina amen keda grešinaja hem te molina e Jehova te prostinel amenge. Ako keraja agjaar, nane te ova sar o Rovoam nego ka ačhova verna e Jehovaske (Juda 20, 21).