1. Koja tani jekh buti so kerela amen but bahtale?

BUT siem bahtale keda šunaja sar e Devleskere sluge mukhena lengiri svetlina te svetinel! O berš so nakhlja, e Jehovaskoro narodo vodingja poviše taro 10.000.000 bibliska kursija. Isto agjaar, milionija interesentija ale ki Spomen-svečenost hem šungje bašo mangipe so sikavgja o Jehova amenge adalea so dengja i otkupnina (1. Jov. 4:9).

2, 3. a) So na čhinavela amen te svetina sar svetlo ko akava sveto? b) So ka dikha ki akaja statija?

² Ko celo sveto, e Jehovaskere svedokija kerena lafi ko različna čhibja. Ama akava na čhinavela amen te slavina e Jehova sar jekh familija soj ko jekhipe (Otk. 7:9). Bizi razlika ki koja čhib keraja lafi ili kote živinaja, amen šaj te svetina sar svetlo ko akava sveto (Fil. 2:15).

³ Amari služba, amaro jekhipe hem adava so siem duhovno džangavde slavinela e Jehova. Ki akaja statija ka  dikha sar šaj te mukha amari svetlina te svetinel ko akala trin podračja. (Čitin Matej 5:14-16.)

4, 5. a) Osven preku i služba, sar šaj te mukha te svetinel amari svetlina? b) Kola šukar rezultatija šaj te oven amen ako ponašinaja amen ljubezno? (Dikh i slika ko početok tari statija.)

⁴ Jekh važno način sar mukhaja amari svetlina te svetinel tano keda propovedinaja hem keraja učenikija (Mat. 28:19, 20). Ki Stražarsko kula taro 1 juni 1925 berš, ki statija „Svetlina ko mrako“ pišinela sine kaj džikote trajnena o posledna dive nikoj ka našti te ovel verno e Gospodareske ako na koristingja „i prilika te mukhel leskiri svetlina te svetinel“. Ki statija pišinela sine: „Ov mora te kerel akava agjaar so ka vakerel o šukar haberi sa e manušenge ki phuv, hem agjaar so ka živinel sprema i svetlina [taro e Devleskoro Lafi]“. Osven preku i služba, slavinaja e Jehova adalea sar ponašinaja amen da. But manuša dikhena amen džikote propovedinaja. Keda asaja lencar hem pozdravinaja len adava šaj te kerel te ovel len šukar mislenje baši amende hem bašo Devel koleske so služinaja.

⁵ O Isus vakergja ple učenikonge: „Keda ka khuven ko kher, pozdravinen e kherutnen“ (Mat. 10:12). Ko podračje kote so propovedinela sine o Isus sine običaj o manuša te kaninen jabandžien peste khere. Ko but thana avdive, adava više nane običaj. O manuša but puti tane nervozna ili holjanena keda dikhena jabandžija anglo udar. Ama ako siem ljubezna hem prijatna, ola šaj ka osetinen pe poslobodna. Keda svedočinea količkencar ko prometna thana, šaj primetingjan kaj o manuša but puti reagirinena pozitivno ako asaja lencar hem ljubezno pozdravinea len. Ako siem lencar ljubezna ka mangen šaj čak te počminen te keren amencar lafi.

6. So kerela jekh pophuro bračno pari te šaj te ačhovel aktivno ki služba?

⁶ Jekh pophuro bračno pari ki Anglija našti više te propovedinel taro kher ko kher sar so kerena sine adava angleder, soske isi len problemija sastipaja. Adaleske so živinena paše uzi jekh škola, ikalgje jekh astali hem ki leste čhivgje publikacie kola so šaj te interesinen e roditelen so avena te len pumare čhaven. Nesave roditelija lele publikacie, maškar ko kola sine hem o lila Mladite prašuvaat — delotvorni odgovori, tom 1 hem 2. Jekh pionerka taro lengoro sobranie but puti pridružinela pe lenge ki služba. O roditelija primetingje kaj oj tani ljubezno hem kaj o bračno pari čače grižinela pe e javerenge. Jekh roditeli čak počmingja te proučinel i Biblija.

7. Sar šaj te pomožine e izbeglicenge ko than kote so živinea?

⁷ Ko posledna berša, but džene mora sine te našen tari pumari phuv hem te živinen ko javera države sar izbeglice. Sar šaj te pomožine lenge te sikljoven bašo Jehova? Prvo, šaj te sikljove  sar te pozdravine len ki lengiri čhib. Isto agjaar, šaj te koristine i aplikacija JW Lan­guage te sikljove nekobor lafija kola so šaj te pottikninen len te ačhoven hem te keren tuja lafi. Palo adava, šaj te sikave lenge videoklipija hem publikacie ki lengiri čhib tari jw.org (5. Moj. 10:19).

8, 9. a) Sar pomožinela amenge o sostanok Amaro životo hem služba? b) Sar šaj o roditelija te pomožinen pumare čhavenge pošukar te komentarinen ko sostanokija?

⁸ O Jehova dela amen baš adava so valjani amenge te šaj pošukar te propovedina. Na primer, adava so sikljovaja ko sostanok Amaro životo hem služba pomožinela amenge te ova panda pospremna te kera povtorna posete hem te počmina bibliska kursija.

⁹ Keda o neve avena ko amare sostanokija, ola tane vooduševime taro komentarija so dena amare čhave. Adaleske, pomožinen tumare čhavenge te komentarinen pumare lafencar. Nesave manuša sine pottiknime te prifatinen o čačipe keda šungje sar o čhave kerena lafi baši pli vera ko jekh ednostavno hem iskreno način (1. Kor. 14:25).

10. Sar šaj te kera te ovel pozoralo o jekhipe ki familija?

¹⁰ Slavinaja e Jehova keda trudinaja amen te ovel amen jekhipe hem mir ki amari familija. Na primer, ako sian roditeli, trudin tut redovno te ikeren i Familijarno rat. But familie zaedno dikhena e masekoskiri emisija ko JW Broadcasting, hem palo adava  kerena lafi sar šaj te keren adava so siklile. Valjani te na bistra kaj jekh tikno čhavo isi le pojavera potrebe taro jekh tinejdžeri. Te da amendar sa te pomožina sekole jekheske ki familija te ovel le celosno korist tari Familijarno rat (Ps. 148:12, 13).

11-13. Sar šaj te kera pozoralo o jekhipe ko sobranie?

¹¹ Ako sian terno, sar šaj te pomožine te ovel pozoralo o jekhipe ko sobranie? Pomožin e javerenge te osetinen pe mangle. Jekh način sar šaj te kere adava tano te ove amal e pophure phralencar hem phenjencar. Puč len so pomožingja lenge doborom but berša te služinen e Jehovaske. Šaj te sikljove lendar but korisna bukja. Adava but ka ohrabrinel hem tut hem len! Sarine amen, bizi razlika dali siem terne ili phure, šaj te pomožina o neve so avena ki dvorana te osetinen pe šukar. Šaj te pozdravina len, te pomožina lenge te arakhen than bešibaske hem te zapoznajna len e javerencar. Agjaar ka pomožina lenge te osetinen pe šukar.

¹² Ako tuke dendi zadača te vodine sostanok baši služba, šaj te pomožine e pophurenge silno te svetinel lengiri svetlina. Pomožin lenge te ovel len podračje kova so ka odgovorinel lenge. Šaj te dogovorine nekoj taro terne te pomožinel lenge ki služba. O pophure phralja hem phenja hem okola so isi len problemija sastipaja, but puti tane obeshrabrime soske našti te propovedinen doborom kobor so mangena. Ama ka osetinen pe but šukar keda ka dikhen kaj grižinea tut lenge hem kaj haljovea lengiri situacija. Bizi razlika kobor tane phure ili kobor vreme tane ko čačipe, tlo mangipe ka ohrabrinel len revno te propovedinen (3. Moj. 19:32).

¹³ O Izraelcija sine bahtale so šaj sine zaedno te služinen e Jehovaske. O psalmisti pišingja: „Kobor tano šukar hem prijatno keda o phralja živinena zaedno ko jekhipe!“ (Čitin Psalm 133:1, 2.) Ov sporedingja o jekhipe sar maslo pomazibaske, kova so osvežinela i koža hem sine le šužo miris. Slično, amen šaj te osvežina amare phralen hem phenjen agjaar so ka ova ljubezna hem prijatna lencar. Agjaar keraja pozoralo o jekhipe ko sobranie. Šaj li panda pošukar te pendžare e phralen hem e phenjen taro tlo sobranie? (2. Kor. 6:11-13).

14. Sar šaj te mukha amari svetlina te svetinel ko than kote so živinaja?

¹⁴ Tli svetlina šaj te svetinel bizi razlika kote arakhljovea. Na primer, adava so ka ove ljubezno šaj te kerel tle komšie te mangen te sikljoven poviše bašo Jehova. Puč tut: „So mislinena mle komšie baši mande? Dali mlo kher hem o dvoro tane čista hem uredna? Dali sium pendžardo sar nekoj so mangela te pomožinel e komšienge?“ Šaj te puče javere phralen hem phenjen sar vlijajngja lengiri ljubeznost hem šukar primer upri lengiri familija, komšie, kolege ili součenikija (Ef. 5:9).

15. Soske valjani te ačhova duhovno džangavde?

¹⁵ Ako mangaja ponadari da silno te svetinel amari svetlina, valjani te ova svesna ko kova vreme živinaja. O Isus nekobor puti vakergja ple učenikonge: „Ačhoven džangavde“ (Mat. 24:42; 25:13; 26:41). Ako mislinaja kaj i „bari nevolja“ tani panda dur, nane te ova vnimatelna te koristina sekoja prilika te pomožina e javerenge te sikljoven bašo Jehova (Mat. 24:21). Tegani, namesto silno te svetinel amari svetlina, oj hari pohari ka ovel poslabo hem šaj čak te ačhovel.

16, 17. Sar šaj te ačhove duhovno džangavdo?

¹⁶ Avdive, poviše taro bilo keda angleder, valjani te pazina te ačhova duhovno džangavde. O uslovija ko sveto ovena sa pološna. Ama, uverime siem kaj o krajo ka avel točno ko vreme so odlučingja o Jehova (Mat. 24:42-44). Džikote na avela adava vreme, valjani te ova strpliva hem te mislina ki amari nadež. Sekova dive čitin i Biblija hem nikogaš ma čhinav te moline tut e Jehovaske (1. Pet. 4:7). Sikljov taro phralja hem phenja kola so beršencar služinena e Jehovaske. Na primer, šaj te čitine iskustvija, sar soj i statija  „Sedumdeset godini se držam za skutot na Evreinot“, koja so iklili ki Stražarsko kula taro 15 april 2012 berš, 18-21 strana.

¹⁷ Ačhov zafatimo ki služba bašo Jehova. Ker šukaripe e javerenge hem družin tut e phralencar hem e phenjencar. Tegani ka ove bahtalo hem o vreme sigate ka nakhel (Ef. 5:16). E Jehovaskere sluge kergje but buti ko akala šel berša so nakhle. Hem avdive siem zafatime sar nikogaš angleder. Našti sine ni te zamislina amenge kaj o čačutno obožavanje doborom but ka napredujnel. Amari svetlina silno svetinela!

18, 19. Sar šaj te pomožinen amenge o starešine revno te služina e Jehovaske? Vaker primer.

¹⁸ Iako keraja but greške, o Jehova dozvolinela te služina leske. Te šaj te pomožinel amenge, ov čhivgja ko sobranie te oven „manuša dende sar poklon“ — o starešine. (Čitin Efešanite 4:8, 11, 12.) Adaleske, keda ka posetinen tut o starešine, koristin i prilika te sikljove tari lengiri mudrost hem taro sovetija so ka den tut.

¹⁹ Na primer, jekh bračno pari ki Anglija sine len problemija ko brako hem adaleske rodingje pomoš taro duj starešine. I romni mislinela sine kaj o rom na grižinela pe dovolno bašo duhovna potrebe e familijakere. O rom priznajngja kaj na sine baš šukar učiteli hem kaj na trudinela pe sine redovno te ikeren i Familijarno rat. O starešine pomožingje lenge te razmislinen bašo primer e Isuseskoro. Ohrabringje e rome te ovel sar o Isus kova so šukar grižinela pe sine bašo ple učenikija. Ohrabringje e romnja te ovel strplivo ple romea. Dengje len nesave predlogija bašo adava sar šaj te ikeren i Familijarno rat ple duje čhavencar (Ef. 5:21-29). O rom trudingja pe but te šaj te ovel pošukar poglavari. O starešine ohrabringje le te na otkažinel pe hem ponadari da te ovel le doverba kaj o Jehova ka pomožinel leske ple duhoja. O mangipe hem i griža so sikavgje akala starešine but pomožingja akale familijake!

20. Save rezultatija šaj te oven ako mukhea te svetinel tli svetlina?

²⁰ „Bahtalo tano sekoj so darala taro Jehova hem džala palo leskere drumija“ (Ps. 128:1). Ka ove bahtalo ako mukhea te svetinel tli svetlina. Adaleske, sikav e javeren bašo Devel, ker sa so šaj te pomožine ki familija hem ko sobranie te ovel jekhipe hem ačhov duhovno džangavdo. O javera ka dikhen tlo šukar primer hem ka mangen ola da te slavinen amare Dade, e Jehova (Mat. 5:16).