1, 2. a) Soske siem ohrabrime taro phralja hem phenja kola so istrajno propovedinena ko podračja kote so poviše manuša na mangena te šunen len? (Dikh i slika ko početok tari statija.) b) So vakergja o Isus bašo propovedibe ko than kote so barilo? (Dikh i fusnota.)

O SERŽO hem i Olinda tane bračno pari so živinena ki Amerika. Len isi len poviše taro 80 berš. Ko posledno vreme, adaleske so dukhana len o pre, pharo lenge te phiren. Ama, sar so kerena više beršencar, ko efta o saati sabajle džana ko ploštad ko jekh prometno delo tari diz. Ola ačhovena uzi jekh avtobusko stanica hem dena amare publikacie e manušenge so nakhena. Poviše manuša na mangena te dikhen len, ama o Seržo hem i Olinda strplivo tergjovena hem asana okolencar so dikhena len. Negde ko dešuduj o saati, pohari iranena pe khere. O javer dive sabajle ko efta o saati, ola palem džana ki avtobusko stanica. Agjaar propovedinena šov dive ko kurko.

 ² Isi but verna phralja hem phenja sar o Seržo hem i Olinda kola so beršencar propovedinena iako poviše manuša taro lengoro podračje na mangena te šunen. Ako tu da propovedinea ko asavko podračje, pofalinaja tut baši tli istrajnost. * (Dikh i fusnota.) Tumaro primer ohrabrinela bute phralen hem phenjen, čak okolen da soj tane iskusna ki služba. Dikh so vakerena nesave pokrainska nadglednikija: „Keda sorabotinava asavke verna phralencar hem phenjencar ki služba, but ohrabrinela man lengoro primer“. „Lengiri vernost pottikninela man te istrajnav hem hrabro te propovedinav“. „Lengoro primer pherela mlo vilo“.

3. Bašo kola trin pučiba ka kera lafi hem soske?

³ Ki akaja statija ka dikha o odgovorija ko trin pučiba: Soske ponekogaš šaj te obeshrabrina amen? So značinela te anel pe plodi? So ka pomožinel amenge istrajno te ana plodi? Adava so ka džana o odgovorija ko akala pučiba ka ohrabrinel amen ponadari da te kera i zadača so dengja amen o Isus — te propovedina.

4. a) Sar vlijajngja upro Pavle adava so poviše Evreija na prifatingje o šukar haberi? b) Soske o Pavle osetingja pe agjaar?

⁴ Dali nekogaš obeshrabringjan tut adaleske so o manuša ko tlo podračje na mangena te šunen o šukar haberi bašo Carstvo? Ako oja, tegani haljovea sar osetingja pe o apostol Pavle. Ov propovedingja okolu 30 berš hem pomožingja bute manušenge te oven hristijanja (Dela 14:21; 2. Kor. 3:2, 3). Ama, na uspejngja te pomožinel bute Evreenge te oven hristijanja. Namesto adava, poviše džene lendar na mangena sine te šunen le, a nesave čak progoningje le (Dela 14:19; 17:1, 4, 5, 13). Sar vlijajngja akava upro Pavle? Ov vakergja: „Isi man bari žal hem dukh ko vilo so na nakhela“ (Rim. 9:1-3). Soske osetinela pe sine agjaar? Adaleske so čače mangela sine i služba hem e manušen. O Pavle but mangela sine te pomožinel e Evreenge hem sine leske žal so otfrlingje e Devleskiri milost.

5. a) So pottikninela amen te propovedina? b) Soske tano normalno ponekogaš te osetina amen obeshrabrime?

⁵ Isto sar o Pavle, amen propovedinaja e manušenge adaleske so grižinaja amen lenge hem mangaja te pomožina lenge (Mat. 22:39; 1. Kor. 11:1). Taro amaro iskustvo džanaja kaj o služibe e Jehovaske anela najšukar životo hem mangaja te pomožina lenge da te ovel len asavko životo. Adaleske ponadari da ohrabrinaja len te sikljoven o čačipe bašo Jehova hem baši leskiri namera e manušencar. Adava tano sar te phene ingaraja lenge jekh šužo poklon hem vakeraja lenge: „Molinaja tumen len le“. Keda otfrlinena adava poklon, normalno tano te osetina „dukh ko vilo“ isto sar o Pavle. Adava so osetinaja amen obeshrabrime na značinela kaj falinela amenge vera, nego kaj čače mangaja e manušen. Adaleske, iako ponekogaš osetinaja amen agjaar, amen ponadari da propovedinaja. I Elena koja so služinela sar pioneri poviše taro 25 berš, vakerela: „Nane  mange lokho te propovedinav. Ama, ništo na kerela man pobahtali taro adava“. Sigurno sarine ka složina amen laja.

6. Bašo kova pučibe ka kera lafi akana?

⁶ Soske šaj te ova uspešna ki služba bizi razlika kote propovedinaja? Te šaj te odgovorina ko akava važno pučibe, te dikha duj sporedbe kolende so o Isus vakergja soske valjani te ana plodi (Mat. 13:23). I prvo sporedba tani baši jekh drakh.

7. a) Ki sporedba e Isuseskiri, koj tano „adava so odgledinela drakha“, „o steblo e drakhakoro“ hem „o granke“? b) Bašo kova pučibe mangaja te dobina odgovor?

⁷ Čitin Jovan 15:1-5, 8. Ki akaja sporedba o Isus objasningja kaj o Jehova tano „adava so odgledinela drakha“, o Isus tano „o steblo e drakhakoro“, a leskere učenikija tane „o granke“. * (Dikh i fusnota.) Ov vakergja ple apostolenge: „Mo Dad tano falimo ako anena but plodi hem ako sien mle učenikija“. So značinela te anel pe plodi? Ki akaja sporedba o Isus na vakerela soj točno adava plodi, ama ov vakerela jekh važno detali kova so pomožinela amenge te arakha o odgovor ko akava pučibe.

8. a) Ki sporedba e Isuseskiri, soske o plodi so anaja le nane o neve učenikija? b) Save bukja rodela amendar o Jehova?

⁸ O Isus bašo plo Dad vakergja: „Sekoja granka ki mande so na anela plodi, ov cidela la“. Javere lafencar, šaj te ova e Jehovaskere sluge samo ako anaja plodi (Mat. 13:23; 21:43). Znači ki akaja sporedba, o plodi so valjani te anel sekova hristijani nane o manuša kolenge so pomožinaja te oven e Isuseskere učenikija (Mat. 28:19). Te ovel sine agjaar, o verna phralja hem phenja so na uspejngje te pomožinen nekaske te ovel učeniko e Isuseskoro bi ovena sine sar adala granke kola so na anena plodi. Ama, akava nane agjaar. Soske? Adaleske so našti te čhiva silaja e manušen te oven učenikija. O Jehova tano mangipe hem nikogaš na rodela amendar nešto so našti te kera, nego samo adava so šaj te kera (5. Moj. 30:11-14).

9. a) Sar anaja plodi? b) Koja sporedba ka dikha akana?

⁹ Tegani, soj tano o plodi so mora te ana le? Sigurno tano nešto so sarine šaj te kera. Ov tano i zadača koja so o Jehova dengja la sa ple slugenge — te propovedinen o šukar haberi bašo e Devleskoro Carstvo * (Dikh i fusnota.) (Mat. 24:14). I sporedba e Isuseskiri bašo sejači sikavela amenge akava. Te dikha akaja sporedba.

10. a) Soj tane o seme hem i phuv ki sporedba e Isuseskiri? b) Savo plodi anela jekh steblo giv?

¹⁰ Čitin Luka 8:5-8, 11-15. Ki sporedba bašo sejači, o Isus objasningja kaj o seme tano „o lafi e Devleskoro“, ili o haberi bašo e Devleskoro Carstvo. I phuv tani o simbolično vilo e manušengoro. O seme so perela ki šukar phuv mukhela korenja, niknonela hem ovela rastenie. Palo adava, o rastenie anela „100 puti poviše plodi“. Ako adava rastenie tano steblo giv, savo plodi ka anel? Tikne  steblija giv? Na, ka anel neve semija, kola so hari pohari šaj te bajron hem te oven tikne steblija. Ki akaja sporedba, taro jekh seme ikljona 100 semija. So sikljovaja taro akava baši amari služba?

11. a) So sikljovaja baši služba tari sporedba e sejačea? b) Ki koja smisla anaja sar plodi nevo seme?

¹¹ Keda amare roditelija ili javera Svedokija počmingje te sikaven amen bašo e Devleskoro Carstvo, adava sine sar te phene sejngje seme ki šukar phuv. Sine but bahtale keda dikhle kaj prifatingjem o šukar haberi. Adava seme mukhlja koreni hem barilo sa džikote na dengja plodi. Hem isto sar o steblo giv so spomningjem le angleder kova so na anela nevo steblo nego nevo seme, agjaar amen da na anaja sar plodi neve učenikija, nego nevo seme. * (Dikh i fusnota.) Sar keraja adava? Sekogaš keda vakeraja e javerenge bašo e Devleskoro Carstvo, adava tano sar te phene sejnaja o seme so sine sejmo ko amaro vilo (Luka 6:45; 8:1). Sprema akava, sa džikote propovedinaja o šukar haberi bašo e Devleskoro Carstvo, amen istrajno anaja plodi.

12. a) So sikljovaja taro sporedbe e Isuseskere baši drakh hem bašo sejači? b) Sar vlijajnena upri tute o pouke taro adala sporedbe?

¹² So sikljovaja taro sporedbe e Isuseskere baši drakh hem bašo sejači? Sikljovaja kaj te anel pe plodi na zavisinela taro adava sar ka reagirinen o manuša ko podračje, nego taro adava dali ponadari da ka propovedina. O Pavle vakergja nešto slično keda objasningja: „Sekoj ka dobinel pli nagrada sprema plo trudo“ (1. Kor. 3:8). O Jehova ka nagradinel amen bašo amaro trudo, a na bašo rezultatija taro amaro trudo. I Matilda, koja so 20 berš služinela sar pionerka, vakerela: „But sium bahtali so džanava kaj o Jehova nagradinela amaro trudo“.

13, 14. Sprema ko Rimjanite 10:1, 2, soske o Pavle nikogaš na čhinavgja te propovedinel?

¹³ So ka pomožinel amenge istrajno te ana plodi? Sar so dikhlem, o Pavle sine obeshrabrimo adaleske so o Evreija otfrlingje o haberi bašo Carstvo. Ama, o Pavle nikogaš na čhinavgja te propovedinel lenge.  Ov objasningja savo stavi sine le bašo Evreija keda vakergja: „I želba mle vileskiri hem mli molitva taro vilo dži ko Devel baši lende tani te spasinen pe. Soske, me sium svedoko kaj ola revno trudinena pe te keren e Devleskiri volja, ama na džanena koja tani točno leskiri volja“ (Rim. 10:1, 2). Soske o Pavle ponadari da propovedinela sine?

¹⁴ Prvo, o Pavle vakergja kaj i želba leskere vileskiri pottikningja le te propovedinel e Evreenge. Ov čače manglja ola te spasinen pe (Rim. 11:13, 14). Dujto, ov spomningja pli „molitva taro vilo dži ko Devel baši lende“. O Pavle molingja e Jehova te pomožinel nesave dženenge taro evrejsko narodo te prifatinen o haberi bašo Carstvo. Trito, o Pavle vakergja: „Revno trudinena pe te keren e Devleskiri volja“. Ov dikhlja o šukar ko manuša hem lengoro potencijal te služinen e Jehovaske. Ov džanlja kaj adala revna Evreija šaj te oven e Isuseskere revna učenikija, isto sar leste.

15. Sar šaj te ova sar o Pavle? Vaker primer.

¹⁵ Sar šaj te ova sar o Pavle? Prvo, valjani taro vilo te manga te arakha okolen so ispravno dikhena ko večno životo. Dujto, molinaja e Jehova te pomožinel e iskrena manušenge te šunen keda propovedinaja lenge (Dela 13:48; 16:14). Adava kerela i Silvana, koja so skoro 30 berš služinela sar pionerka. Oj vakerela:  „Angleder te avav ko nesavo kher ko mlo podračje, molinava e Jehova te pomožinel mange te ovel man pozitivno stavi“. Isto agjaar, molinaja amen o angelija te pomožinen amenge te arakha manušen soj tane spremna te šunen (Mat. 10:11-13; Otk. 14:6). O Roberti kova so služinela sar pioneri poviše taro 30 berš vakerela: „But tano interesno te sorabotine angelencar kola so džanena so slučinela pe ko životo e stanarengoro“. Trito, trudinaja amen te dikha o šukar ko manuša hem lengoro potencijal te služinen e Jehovaske. O Karl, jekh starešina kova so krstingja pe angleder poviše taro 50 berš, vakerela: „Rodava čak o najtikno znako so sikavela kaj nekoj iskreno interesinela pe bašo čačipe, sar na primer jekh nasmevka, ljubezno pogled ili iskreno pučibe“. Ako keraja sa akava, istrajno ka ana plodi isto sar o Pavle.

16, 17. a) So šaj te sikljova taro Propovednik 11:6? b) Sar šaj amaro propovedibe te vlijajnel upro okola so dikhena amen?

¹⁶ Nikogaš na valjani te bistra kobor but šaj te vlijajnel amaro propovedibe upro manuša, čak keda mislinaja kaj nikoj na šunela amen. (Čitin Propovednik 11:6.) O manuša dikhena amen. Ola dikhena kaj siem šukar uravde hem kaj siem kulturna hem ljubezna. Akava šaj te vlijajnel pozitivno ki lende hem sar so ka nakhel o vreme, čak okola da so nane len šukar mislenje amenge šaj te meninen plo stavi. O Seržo hem i Olinda dikhle kaj akava tano čače.

¹⁷ O Seržo vakerela: „Adaleske so siem sine nasvale, nesavo vreme na džaja sine ko ploštad. Keda irangjem amen, nesave manuša so nakhena sine adathar pučle amen: ’Kaj sien sine? Falingjen amenge‘“. I Olinda asajbaja vakerela: „O šoferija taro avtobusi mavtinena amenge vastea, a nesave taro avtobusi vikinena amenge sine: ’Samo angle!‘ Čak rodena sine amendar spisanie“. O Seržo hem i Olinda but iznenadingje pe keda jekh manuš alo ki lengiri količka svedočibaske, dengja len buketi lulugjencar hem zablagodaringja pe lenge baši lengiri služba.

18. Soske sian odlučno istrajno te ane plodi?

¹⁸ Sa džikote istrajno sejnaja o haberi bašo Carstvo, amaro da učestvo tano važno ko propovedibe kolea so dela pe „svedoštvo sa e narodonge“ (Mat. 24:14). A soj najvažno, bahtale siem soske džanaja kaj adalea keraja bahtalo e Jehova. Ov mangela sa okolen so „istrajno anena plodi“.