1, 2. a) Bašo so kergja lafi o Isus ple učenikoncar i rat angleder te merel? (Dikh i slika ko početok tari statija.) b) Soske tano važno te razmislina taro kola pričine propovedinaja? c) Bašo so ka kera lafi ki akaja statija?

I RAT angleder te merel, o Isus kergja poviše vreme lafi ple apostolencar. Ov uveringja len kaj but mangela len. Isto agjaar, vakergja lenge i sporedba baši drakh, baši koja so kergjem lafi ki angluni statija. O Isus manglja te pottikninel ple učenikon ponadari da te anen plodi, javere lafencar istrajno te propovedinen o haberi bašo Carstvo (Jovan 15:8).

² Ama, o Isus na vakergja lenge samo so valjani te keren, nego isto agjaar vakergja lenge soske te keren adava. Ov vakergja lenge taro kola pričine valjani ponadari da te propovedinen. Soske tano važno amen da te razmislina bašo adala pričine? Ako razmislinaja baši lende, ka ova pottiknime istrajno te da svedoštvo sa e manušenge (Mat. 24:13, 14). Ki akaja statija ka dikha štar pričine tari Biblija soske propovedinaja. Isto  agjaar ka dikha štar poklonija kola so avena taro Jehova te šaj te pomožinel amenge ponadari da te ana plodi.

3. a) Sprema o Jovan 15:8, koja tani i najvažno pričina soske propovedinaja? b) Soj tane o drakha tari e Isuseskiri sporedba, hem soske akaja sporedba tani soodvetno?

³ I najvažno pričina soske propovedinaja tani adaleske so mangaja te falina e Jehova hem te slavina leskoro sveto anav. (Čitin Jovan 15:1, 8.) Ki sporedba baši drakh, o Isus sporedingja e Jehova adalea so odgledinela drakha, baši peste phengja kaj tano o steblo e drakhakoro, a leskere učenikija tane o granke (Jovan 15:5). Adaleske, soodvetno tano so o drakha tane o plodi so dena e Isuseskere učenikija, a adava tano o propovedibe. O Isus vakergja e apostolenge: „Mo Dad tano falimo ako anena but plodi“. Keda jekh drakh dela šuže drakha adava anela falba okoleske so odgledinela la. Slično, keda daja amendar sa te propovedina o šukar haberi bašo Carstvo, anaja falba e Jehovaske (Mat. 25:20-23).

4. a) Sar slavinaja e Devleskoro sveto anav? b) So mislinea baši čest so isi tut te slavine e Devleskoro sveto anav?

⁴ E Devleskoro anav tano sveto. Ama, žalno tano adava so na dikhena sa o manuša ki leste sar sveto. Adaleske tano but važno te slavina e Devleskoro sveto anav. O proroko o Isaija vakergja: „O Jehova, o zapovedniko e vojskengoro — samo ov neka ovel tumenge sveto“ (Isa. 8:13). Amen slavinaja e Devleskoro sveto anav agjaar so dikhaja ki leste sar najbaro taro sa o javera anava hem adalea so propovedinaja pomožinaja e javerenge te haljoven kaj ov tano sveto (Mat. 6:9). Na primer, keda sikavaja e manušen bašo e Jehovaskere but šuže osobine hem baši leskiri namera o manuša te živinen večno ko raj, pomožinaja lenge te haljoven kaj tane hovajba sa o lošna bukja so vakergja o Satana bašo Jehova (1. Moj. 3:1-5). Isto agjaar slavinaja leskoro sveto anav keda pomožinaja e manušenge te džanen kaj o Jehova zaslužinela sarine te slavinen le hem te sikaven leske čest (Otk. 4:11). O Run, kova so služinela sar pioneri 16 berš, vakerela: „Keda razmislinava kaj mange dendi i prilika te svedočinav bašo Stvoriteli so kergja celo univerzum, sium čače blagodarno. Adava dela man želba ponadari da te propovedinav“.

5. a) Sprema o Jovan 15:9, 10, koja tani jekh pričina soske propovedinaja? b) Sar o Isus pomožingja ple učenikonge te haljoven soske valjani te oven istrajna?

⁵ Čitin Jovan 15:9, 10. I dujto pričina soske propovedinaja o haberi bašo Carstvo tani adaleske so mangaja e Jehova hem e Isuse (Mar. 12:30; Jovan 14:15). O Isus vakergja ple učenikonge kaj valjani te ačhoven ko leskoro mangipe. Soske vakergja lenge adava? Ov džanlja kaj ka valjanel lenge  istrajnost te šaj te živinen sar čačutne hristijanja. Ustvari, ko Jovan 15:4-10, dikhaja kaj o Isus koristingja o lafi „ačhoven“ poviše puti te šaj te pomožinel ple učenikonge te haljoven kaj valjani te oven istrajna.

6. Sar sikavaja kaj mangaja te ačhova ko e Isuseskoro mangipe?

⁶ Sar sikavaja kaj mangaja te kera bahtalo e Isuse hem te ačhova ko leskoro mangipe? Agjaar so ka ova leske poslušna. O Isus rodela amendar te kera samo adava ov so kergja. Ov vakergja: „Me ikergjum o zapovedija e Dadeskere hem ačhovava ko leskoro mangipe“. Adalea dengja amenge šukar primer (Jovan 13:15).

7. Sar i poslušnost tani povrzimi e mangipaja?

⁷ O Isus jasno sikavgja kaj i poslušnost tani povrzimi e mangipaja keda vakergja: „Kas isi mle zapovedija hem ikerela len, ov mangela man“ (Jovan 14:21). E Isuseskere zapovedija avena taro leskoro Dad, adaleske keda siem poslušna ki leskiri zapoved te propovedina, sikavaja kaj mangaja e Jehova da (Mat. 17:5; Jovan 8:28). A keda sikavaja e Jehovaske hem e Isuseske kaj mangaja len, ačhovaja ko lengoro mangipe.

8, 9. a) Koja tani panda jekh pričina soske propovedinaja? b) Soske e Jehovaskere lafija soj pišime ko Ezekiel 3:18, 19 hem 18:23, pottikninena amen ponadari da te propovedina?

⁸ I trito pričina soske propovedinaja tani adaleske so mangaja te predupredina e javeren kaj e Jehovaskoro dive avela. Ki Biblija, bašo Noe vakerela pe kaj tano „propovedniko“. (Čitin 2. Petrovo 2:5.) Angleder o Potop, o Noe sigurno predupredinela sine e javeren kaj ka avel uništuvanje. Soske vakeraja agjaar? Adaleske so o Isus vakergja: „Sar so kerena sine ko adala dive angleder o potop, hana hem piena sine, o murša hem o džuvlja prandinena pe sine, sa dži ko dive keda o Noe khuvgja ki arka, hem na pazinena sine ko bukja so ovena sa džikote na alo o potop hem ingargja sarinen, asavki ka ovel i prisutnost e manušikane Čhaveskiri“ (Mat. 24:38, 39). Iako poviše manuša na šunena le sine, o Noe istrajno predupredingja kaj o Jehova ka anel krajo adale lošno svetoske.

⁹ Avdive propovedinaja o šukar haberi bašo Carstvo te šaj o manuša te šunen koja tani e Devleskiri namera. Isto sar o Jehova, amen da čače  mangaja o manuša te šunen o šukar haberi hem sekova jekh lendar te živinel večno (Ezek. 18:23). Keda propovedinaja taro kher ko kher hem ko prometna thana, predupredinaja so šaj poviše manušen kaj e Devleskoro Carstvo ka avel hem ka uništinel akava lošno sveto (Ezek. 3:18, 19; Dan. 2:44; Otk. 14:6, 7).

10. a) Sprema o Matej 22:39, tari koja pričina propovedinaja? b) Sar o Pavle hem o Sila pomožingje e čuvareske ko Filipi?

¹⁰ I štarto pričina soske ponadari da propovedinaja tani adaja so mangaja e manušen (Mat. 22:39). Akava mangipe pomožinela amenge ponadari da te propovedina adaleske so džanaja kaj o manuša šaj te meninen plo stavi keda ka meninen pe lengere okolnostija. Te dikha so doživingje o Pavle hem o Sila ki diz Filipi. Adari, lengere protivnikija čhivgje len ko zatvor. Ama ki ekvaš i rat ulo baro zemjotres hem o udara taro zatvor phravdile. O čuvari darandilo kaj o zatvorenikija našle hem manglja te mudarel pe. Ama o Pavle vikibaja čhinavgja le: „Ma mudar tut!“ O čuvari pučlja le: „So valjani te kerav te šaj te ovav spasimo?“ O Pavle hem o Sila vakergje leske: „Verujn ko Gospodari o Isus hem ka ove spasimo“ (Dela 16:25-34).

11, 12. a) So sikljovaja baši služba taro izveštaj bašo zatvorsko čuvari? b) Soske mangaja ponadari da te propovedina?

¹¹ So sikljovaja baši služba taro akava izveštaj? Primetin kaj ov meningja plo stavi hem rodingja pomoš palo zemjotres. Slično, o manuša so na šunena o haberi tari Biblija šaj ka meninen plo stavi hem ka roden pomoš keda ka slučinel pe lenge nesavi tragedija. Na primer, nesave šaj tane iznenadime adaleske so ačhile bizi buti ili razvedingje pe. Javera šaj tane but tažna soske šungje kaj isi len pharo nasvalipe ili mulo lendar nekoj soj lenge paše. Keda ka slučinen pe asavke bukja, o manuša šaj ka počminen te pučen pe koja tani i smisla e životoskiri, pučibe koleske so na razmislingje angleder. Šaj čak pučena pe: „So valjani te kerav te šaj te ovav spasimo?“ Keda ka dža ki lende, šaj prvo puti ko plo životo ka mangen te šunen o haberi baši nadež.

¹² Adaleske, ako istrajno propovedinaja, ka šaj te da uteha e manušenge keda ka oven spremna te prifatinen la (Isa. 61:1). I Šarlot, koja so 38 berš služinela sar pioneri, vakerela: „O manuša avdive tane bizi nadež. Adaleske valjani lenge te šunen o šukar haberi“. I Ejvor, koja so 34 berš služinela sar pioneri, vakerela: „Avdive, poviše taro bilo keda angleder, but manuša tane obeshrabrime. But mangava te pomožinav lenge. Akava pottikninela man te propovedinav“. Adava so mangaja e manušen tano but šukar pričina ponadari da te propovedina!

13, 14. a) Kova poklon tano spomnimo ko Jovan 15:11? b) Sar šaj te ovel amen e Isuseskoro bahtalipe? c) Sar o bahtalipe pomožinela amenge ki služba?

¹³ I rat angleder te merel, keda kergja lafi ple apostolencar o Isus spomningja poklonija kola so ka pomožinen lenge ponadari da te anen plodi. Kola tane adala poklonija, hem sar šaj te pomožinen amenge avdive?

 ¹⁴ Bahtalipe. Dali o propovedibe amenge tano teret? Ni najhari. Otkeda vakergja i sporedba baši drakh, o Isus vakergja kaj ka ovel amen leskoro bahtalipe keda propovedinaja. (Čitin Jovan 15:11.) Sar šaj te ovel akava? Ki sporedba e Isuseskiri, ov vakergja kaj tano o steblo e drakhakoro a leskere učenikija tane o granke. O granke ka dobinen pani hem hranliva sostojke samo ako ačhovena ko steblo. Slično, sa džikote ačhovaja ko jekhipe e Isusea hem džaja palo leskoro primer ko sa, ka osetina amen bahtale sar so osetinela pe ov džikote kerela e Devleskiri volja (Jovan 4:34; 17:13; 1. Pet. 2:21). I Hane, koja so poviše taro 40 berš služinela sar pioneri, vakerela: „O bahtalipe so osetinava le sekogaš keda ka iranav man tari služba pottikninela man ponadari da te služinav e Jehovaske“. Adava so ka ova bahtale ka del amen sila ponadari da te propovedina čak keda poviše manuša na mangena te šunen amen (Mat. 5:10-12).

15. a) Kova poklon tano spomnimo ko Jovan 14:27? b) Sar o mir pomožinela amenge ponadari da te ana plodi?

¹⁵ Mir. (Čitin Jovan 14:27.) I rat angleder te merel, o Isus vakergja ple apostolenge: „Dava tumen mlo mir“. Sar e Isuseskoro mir šaj te pomožinel amenge ponadari da te propovedina? Keda propovedinaja, džanaja kaj keraja bahtale e Jehova hem e Isuse. Adava kerela te ovel amen mir kova so dela amenge sila ponadari da istrajno te propovedina (Ps. 149:4; Rim. 5:3, 4; Kol. 3:15). O Ulf, kova so 45 berš služinela sar pioneri, vakerela: „I služba umorinela man, ama isto agjaar anela mange baro zadovolstvo hem čačutni smisla ko životo“. But siem blagodarna so arakhlem mir kova so trajnela!

16. a) Kova poklon tano spomnimo ko Jovan 15:15? b) So valjangje te keren o apostolija te šaj te ačhoven e Isuseskere amala?

¹⁶ Amalipe e Isusea. Otkeda vakergja ple apostolenge kaj mangela te oven bahtale, o Isus objasningja soske tano važno te sikaven mangipe so nane sebično (Jovan 15:11-13). Palo adava vakergja: „Vikinava tumen mle amala“. O amalipe e Isusea tano čače jekh skapoceno poklon! Ama so valjangje te keren o apostolija te šaj te ačhoven leskere amala? O Isus objasningja: „Džan hem ponadari da anen plodi“. (Čitin Jovan 15:14-16.) Javere lafencar, ov vakergja lenge ponadari da  te propovedinen. Otprilika duj berš angleder, o Isus vakergja ple apostolenge: „Džikote džana, propovedinen: ’O nebesno Carstvo tano paše‘“ (Mat. 10:7). Adaleske, i rat angleder te merel, o Isus ohrabringja ple apostolen te istrajnen ko propovedibe (Mat. 24:13; Mar. 3:14). O Isus džanlja kaj nane te ovel lokho te ikerel pe leskiri zapoved. Ama ola šaj sine te uspejnen ko adava hem te ačhoven leskere amala. Sar? Ko adava pomožingja lenge panda jekh poklon.

17, 18. a) Kova poklon tano spomnimo ko Jovan 15:7? b) Sar adava poklon pomožingja e Isuseskere učenikonge? c) Kola poklonija pomožinena amenge avdive?

¹⁷ Odgovor ko amare molitve. O Isus vakergja: „Roden sa so mangena, hem adava ka del pe tumenge“ (Jovan 15:7, 16). E Isuseskoro vetuvanje sigurno but ohrabringja e apostolen! * (Dikh i fusnota.) O apostolija na halile celosno kaj o Isus panda hari ka merel. Adaleske, keda slučingja pe adava, šaj osetingje pe korkori. Ama ola na sine korkori, soske o Jehova sine spremno te odgovorinel ko lengere molitve hem te pomožinel lenge džikote propovedinena sine. Hem agjaar da kergja. Kratko otkeda mulo o Isus, o apostolija molingje e Jehova te del len hrabrost, a ov odgovoringja ko lengere molitve (Dela 4:29, 31).

¹⁸ Agjaar tano avdive da. Keda istrajnaja ki služba, ačhovaja amala e Isusea. Isto agjaar, šaj te ova sigurna kaj o Jehova spremno ka odgovorinel ko amare molitve baši pomoš keda amenge pharo te propovedina (Fil. 4:13). But siem blagodarna so o Jehova odgovorinela ko amare molitve hem so o Isus tano amaro amal. Akala poklonija taro Jehova pomožinena amenge ponadari da te ana plodi (Jak. 1:17).

19. a) Soske ponadari da propovedinaja? b) So pomožinela amenge te završina i zadača so dengja amen o Devel?

¹⁹ Ki akaja statija dikhlem štar pričine soske valjani ponadari da te propovedina: 1) agjaar falinaja e Jehova hem slavinaja leskoro sveto anav, 2) sikavaja kaj mangaja e Jehova hem e Isuse, 3) predupredinaja e manušen hem 4) sikavaja kaj mangaja len. Isto agjaar, dikhlem štar poklonija: o bahtalipe, o mir, o amalipe e Isusea hem o odgovor ko amare molitve. Akala poklonija pomožinena amenge te završina i zadača so dengja amen o Devel. O Jehova tano but bahtalo keda dikhela kobor but trudinaja amen istrajno te ana plodi!