1, 2. a) Soske o terne sluge e Devleskere pobedinena ki borba protiv o Satana hem o demonija? (Dikh i slika ko početok tari statija.) b) So ka dikha ki akaja statija?

O APOSTOL Pavle sporedingja e hristijanen vojnikoncar. Amen siem ki vojna, hem amare dušmanja čače postojnena! Ama, na borinaja amen manušencar, nego e Satanaja hem e demonencar. Ola borinena pe nekobor iljade berša hem tane but iskusna vojnikija. Adaleske šaj te izgledinel amenge kaj nane amen nisave šanse te pobedina ki akaja vojna, posebno ako siem terne. Šaj li o terne te pobedinen asavke silna dušmanen? Oja, šaj te pobedinen hem pobedinena! Soske? Adaleske so dobinena sila taro Jehova. Osven adava, isto sar šukar obučime vojnikija kola soj spremna baši vojna, ola uravena i „celosno voeno oprema taro Devel“. (Čitin Efešanite 6:10-12.)

² Keda o Pavle dengja adaja sporedba, šaj mislingja ki voena oprema so phiravena la sine o rimska vojnikija (Dela 28:16). Ki akaja statija ka kera lafi baši adaja sporedba. Isto agjaar, ka dikha so vakerena nesave terne  bašo pharipa hem o bereketija so isi len adaleske so phiravena sekova delo tari amari duhovno voeno oprema.

3, 4. Soske o čačipe tari Biblija tano sar o pojas jekhe rimsko vojnikoskoro?

³ Čitin Efešanite 6:14. O pojas so phiravena le sine o rimska vojnikija sine le metalna pločke. Ov zaštitinela sine i polovina e vojnikoskiri hem kerela sine te ovel leske polokho te phiravel o pharo oklop ko kolin. Nesave pojasija isto agjaar sine len metalna delija kolende so šaj sine te zakačinel pe mači hem čhurik. Ako o pojas sine šukar phanlo, o vojniko šaj sine te osetinel pe sigurno džikote borinela pe sine.

⁴ Isto sar jekh vojničko pojas, o čačipa so sikljovaja len taro e Devleskoro Lafi zaštitinena amen taro hovavne sikljojba (Jovan 8:31, 32; 1. Jov. 4:1). Kobor poviše mangaja o čačipa taro e Devleskoro Lafi, doborom polokho ka ovel amenge te phirava amaro „oklop“, ili javere lafencar te živina sprema e Jehovaskere pravedna merilija (Ps. 111:7, 8; 1. Jov. 5:3). Isto agjaar, kobor pošukar haljovaja akala čačipa, doborom pošukar ka branina len taro amare dušmanja (1. Pet. 3:15).

5. Soske valjani sekogaš te vakera o čačipe?

⁵ O čačipa taro e Devleskoro Lafi amenge tane važna, adaleske šunaja adava so vakerela i Biblija hem sekogaš vakeraja o čačipe. O hovajba tane jekh taro najuspešna oružja e Satanaskere. O hovajba anena šteta hem okolenge so vakerena len hem okolenge so verujnena ki lende (Jovan 8:44). Adaleske, iako siem nesovršena, daja amendar sa nikogaš te na hovava (Ef. 4:25). Ama, akava nane lokho. I Abigejl, kola so isi la 18 berš, vakerela: „Nekogaš šaj mislinaja kaj na vredinela te vakerel pe o čačipe, posebno keda o hovajbe šaj te ikalel tut tari phari situacija“. Tegani, soske trudinela pe sekogaš te vakerel o čačipe? Oj vakerela: „Keda vakerava o čačipe, isi man čisto sovest anglo Jehova. Osven adava, mle roditelija hem mle amala džanena kaj šaj te ovel len doverba ki mande“. I Viktorija, kola so isi la 23 berš, vakerela: „Keda vakerea o čačipe hem braninea tlo veruvanje, o javera šaj te maltretirinen tut. Ama sekogaš isi bare bereketija: ovea pohrabro, ovea popaše e Jehovaja hem okola so mangena tut poviše ka poštujnen tut“. Čače vredinela sekogaš te phirava o pojas e čačipaskoro!

6, 7. Soske tani i pravednost sporedimi oklopea so čhivela pe ko kolin?

⁶ O oklop so phiravela sine jekh rimsko vojniko ko kolin but puti sine kerdo taro horizontalna sastrnale lente. Ola sine bangjarde te šaj šukar te pašljon ko leskoro kolin hem sine spojme kožna kaišencar kola so sine phanle ko metalna kuke hem kopče. Leskere pikje sine učharde poviše sastrnale  lentencar kola isto agjaar sine phanle kožna kaišencar. Akale oklopea o dviženje e vojnikoskoro sine ograničimo hem ov valjani sine redovno te proverinel dali sa o pločke tane ko plo than. Ama, adava oklop zaštitinela sine e vojnikoskoro vilo hem javera organija taro mači ili tari strela.

⁷ E Jehovaskere pravedna merilija kola so zaštitinena amaro simbolično vilo, ili javere lafencar amari andruni ličnost, šaj te sporedinen pe asavke oklopea (Izr. 4:23). Jekh vojniko nikogaš nane te meninel sine plo sastrnalo oklop javere oklopea soj kerdo taro poslabo metali. Slično, nikogaš na valjani te menina e Jehovaskere merilija bašo ispravno hem pogrešno amare merilencar. Amen na siem doborom mudra te džana sar šaj te zaštitina amaro vilo (Izr. 3:5, 6). Adaleske, mora redovno te proverina dali amaro duhovno oklop panda zaštitinela amaro vilo.

8. Soske valjani te ikera e Jehovaskere merilija?

⁸ Dali nekogaš mislinea kaj e Jehovaskere merilija ograničinena tli sloboda ili čhinavena tut te kere bukja kola so tu mangea te kere len? O Daniel, kole so isi le 21 berš, vakerela: „O nastavnikija hem mle součenikija asana sine mange adaleske so živinava sprema o bibliska merilija. Nesavo vreme našavgjum i doverba ki mande hem sium sine razočarimo“. Ama, sar osetinela pe akana? Ov vakerela: „Sar so nakhela sine o vreme, dikhljum kaj tano korisno te živinel pe sprema e Jehovaskere merilija. Nesave taro mle ’amala‘ počmingje te drogirinen pe, a javera mukhle i škola. Sine mange žal keda dikhljum so ulo lencar. Haliljum kaj o Jehova čače zaštitinela amen“. I Medison, kola so isi la 15 berš, vakerela: „Nane mange lokho te ikerav e Jehovaskere merilija hem te na kerav nesave bukja kolenge so mle vrsnikija mislinena kaj tane interesna hem zabavna“. Sar uspejnela te borinel pe protiv adava pritisok? Oj vakerela: „Sekogaš ikerava ko misle kaj phiravava e Jehovaskoro anav hem kaj o iskušenie tano oružje kolea so o Satana napadinela man. Keda ka pobedinav ki nesavi duhovno vojna, osetinava man zadovolno“.

9-11. a) Save simbolična sandale phiravena o čačutne hristijanja? b) So ka pomožinel amenge polokhe te propovedina?

⁹ Čitin Efešanite 6:15. Jekh rimsko vojniko našti sine te džal ki vojna bizo sandale. Ola sine kerde taro trin sloja koža hem adaleske sine but izdržliva. Ama ola isto agjaar sine komotna, adaleske o vojnikija šaj sine te phiren stabilno hem bizo te lizgan.

¹⁰ O rimska vojnikija phiravena sine sandale te šaj te borinen pe, a amen phiravaja simbolična sandale te šaj te propovedina „o šukar haberi bašo mir“ (Isa. 52:7; Rim. 10:15). Ama, ponekogaš valjani amenge bari hrabrost te šaj te propovedina. O Bo, kole  so isi le 20 berš, vakerela: „Darava sine te propovedinav mle součenikonge. Izgleda ladžava sine. Keda ka setinav man ko adava vreme, haljovava kaj na sine pričina te osetinav man agjaar. Akana sium bahtalo so propovedinava mle vrsnikonge“.

¹¹ But terne halile kaj lenge polokho te propovedinen keda angleder šukar ka spreminen pe. Sar šaj te spremine tut? I Julija, kola so isi la 16 berš, vakerela: „Phiravava mancar amare publikacie ko mlo ranco. Isto agjaar, trudinava man te šunav so mislinena mle součenikija hem ko so verujnena. Agjaar džanava sar šaj te pomožinav lenge. Keda sium spremno, šaj te kerav lencar lafi bašo teme kola so šaj te pomožinen lenge“. I Mekenzi, kola so isi la 23 berš, vakerela: „Ako sian ljubezno hem ako šukar šunea e javeren, ka haljove taro so nakhena. Trudinava man te čitinav sa amare publikacie bašo terne. Agjaar džanava so te sikavav mle vrsnikonge tari Biblija ili tari amari internet-stranica jw.org te šaj te pomožinav lenge“. Keda siem šukar spremime te propovedina adava tano sar te phene amare „sandale“ tane šukar phanle.

12, 13. Save „jagale strele“ koristinela o Satana?

¹² Čitin Efešanite 6:16. Jekh rimsko vojniko phiravela sine baro pravoagolno štiti. Ov učharela sine e vojniko taro pikje dži ko kočaka hem zaštitinela le sine taro mačija, taro strele hem taro kopje.

¹³ Save „jagale strele“ šaj o Satana te frdel upri tute? Šaj napadinela tut agjaar so širinela hovajba bašo Jehova. O Satana mangela te misline kaj o Jehova na mangela tut hem kaj nikoj na grižinela pe tuke. I Ida, kola so isi la 19 berš, vakerela: „But puti mislinava kaj o Jehova nane mancar paše hem kaj na mangela te ovel mlo amal“. So kerela keda osetinela pe agjaar? Oj vakerela: „O sostanokija kerena mli vera pozorali. Angleder samo bešava sine hem na komentarinava sine, mislinava sine kaj nikoj na mangela te šunel so isi man te vakerav. Ama akana, spreminava man bašo sostanokija hem probinava te komentarinav duj ili trin puti. Nane mange lokho te komentarinav, ama keda kerava adava osetinava man but pošukar. A o phralja hem o phenja but ohrabrinena man. Palo sekova sostanok osetinava kaj o Jehova mangela man“.

14. So sikljovaja taro primer e Idakoro?

¹⁴ Jekhe vojnikoskoro štiti sekogaš sine le isto golemina. Ama, sar so dikhlem taro primer e Idakoro, amari vera šaj te bajrovel hem te tiknjovel, te ovel pozorali ili poslabo. Adava zavisinela amendar (Mat. 14:31; 2. Sol. 1:3). Akava jasno sikavela kobor tano važno ponadari da te bajrara amari vera!

15, 16. Soske amari nadež tani sar šlemi?

¹⁵ Čitin Efešanite 6:17. O šlemi so phiravena sine o rimska vojnikija zaštitinela sine o šero, i men hem o muj. Nesave šlemija sine len račke te šaj o vojniko te phiravel le ko vas.

¹⁶ Isto sar o šlemi so zaštitinela sine e vojnikoskiri godi, amari „nadež bašo spasenie“ zaštitinela amare misle (1. Sol. 5:8; Izr. 3:21). I nadež pomožinela amenge te mislina ko e Devleskere vetuvanja hem te na obeshrabrina amen taro amare problemija (Ps. 27:1, 14; Dela 24:15). Ama, ako mangaja amari nadež te zaštitinel amen, oj mora te ovel amenge realno. Mora te phirava amaro „šlemi“ ko šero, a na ko vas!

17, 18. a) Sar šaj o Satana te hovavel amen te ikala amaro šlemi? b) Sar šaj te sikava kaj na hovavgja amen o Satana?

¹⁷ Sar šaj o Satana te hovavel amen te ikala amaro šlemi? Razmislin so probingja te kerel e Isuseske. O Satana džanlja kaj o Isus ka ovel vladeteli upro manuša. Ama, angleder adava o Isus valjani sine te cidel muke hem te merel. A palo adava, valjani sine te adžikerel te ovel Cari sa dži ko vreme kova so odredingja le o Jehova. Adaleske, o Satana nudingja leske te ovel vladeteli porano. Ov vetingja e Isuseske kaj ako pokloningja pe leske, odma ka ovel vladeteli e svetoskoro (Luka 4:5-7). Avdive da o Satana džanela kaj o Jehova vetingja amenge but šuže bukja ko nevo sveto. Ama, mora te adžikera džikote ispolninena pe adala vetuvanja, a dži tegani šaj ka oven amen but problemija. Adaleske, o Satana nudinela amenge udobno životo panda akana. Ov mangela amare želbe te oven amenge považna taro e Devleskoro Carstvo (Mat. 6:31-33).

 ¹⁸ But terne sluge e Devleskere na mukhle te hovavel len o Satana. Na primer, i Kiana, kola so isi la 20 berš, vakerela: „Džanava kaj edinstveno nadež bašo sa o problemija tano e Devleskoro Carstvo“. Sar lakiri nadež vlijajnela upro adava sar razmislinela hem postapinela? Oj pomožinela lake te na bistrel kaj sa o bukja ko akava sveto tane privremena. Namesto te del pestar sa te kerel peske kariera ko akava sveto, i Kiana koristinela plo vreme hem sila te služinel e Jehovaske.

19, 20. Sar šaj pošukar te koristina e Devleskoro Lafi?

¹⁹ E rimska vojnikon sine len mačija kola so sine dugačka okolu 50 santimetre. Ola sekova dive vežbinena sine lencar hem adaleske but šukar koristinena len sine.

²⁰ O apostol Pavle vakergja kaj e Devleskoro Lafi tano sar mači. O Jehova dengja amen adava mači. Ama, valjani te sikljova šukar te koristina le te šaj te branina amari vera hem te menina amaro razmisluvanje (2. Kor. 10:4, 5; 2. Tim. 2:15). Sar šaj pošukar te koristina le? O Sebastijan, kole so isi le 21 berš, vakerela: „Džikote čitinava i Biblija, pišinava mange po jekh stiho taro sekova poglavje. Kerava mange spisako mle omilena stihoncar“. Akava pomožinela leske pošukar te haljovel sar razmislinela o Jehova. O Daniel vakerela: „Keda čitinava i Biblija, birinava stihija kola so mislinava kaj ka pomožinen e manušenge so arakhava len ki služba. Haliljum kaj o manuša šukar reagirinena keda dikhena kaj mangea i Biblija hem kaj dea tutar sa te pomožine lenge“.

21. Soske na valjani te dara taro Satana hem taro demonija?

²¹ Sar so dikhlem taro primerija e ternengere so sine spomnime ki akaja statija, na valjani te dara taro Satana hem taro demonija. Točno tano adava kaj ola tane silna, ama nane posilna taro Jehova. Hem ola nane te postojnen zasekogaš. Ola ka oven phanle hem ka našti te keren lošnipe nikaske džikote vladinela o Hristos iljada berša, a palo adava ka oven uništime (Otk. 20:1-3, 7-10). Amen pendžaraja amare dušmane, leskere mamke hem namere. Šaj te borina amen protiv leste adaleske so o Jehova pomožinela amenge!