1. Soske nesave phralenge hem phenjenge tano pharo te proučinen?

AVDIVE but manuša mora te keren but buti te šaj te izdržinen pe. But phralja kerena but saatija buti samo te šaj te grižinen pe bašo ple familijakere osnovna potrebe. A javera trošinena but vreme sekova dive te šaj te resen ki buti hem te iranen pe khere. But džene grižinena pe baši pli familija agjaar so kerena phari fizičko buti. Ama ko krajo taro dive, akala bukjarne phralja hem phenja tane but umorna! Posledno nešto so bi mangena te keren tano te proučinen.

2. Keda tu arakhea vreme te proučine?

² Ama, fakti tano kaj mora te arakha vreme te proučina e Devleskoro Lafi hem amare publikacie. Bizo adava našti te ova paše e Jehovaja hem te dobina večno životo! (1. Tim. 4:15, 16). Nesave uštena rano sabajle sekova dive te šaj te proučinen soske tegani tano najmirno ko lengoro kher hem ola tane sveža. Javera odvojnena nekobor minutija ko krajo taro dive te šaj ko mir te proučinen nešto tari Biblija hem taro amare publikacie.

3-4. Save promene sine kerde ki količina e duhovno hranakiri so dobinaja la, hem soske?

³ Sigurno ka vakere kaj tano važno te arakhe vreme proučibaske. Ama, so valjani te proučina? Šaj ka vakere: „Isi amen doborom but čitibaske, so našti te resav sa te čitinav“. Nesave uspejnena te čitinen sa o publikacie hem te dikhen sa o videoklipija so dobinaja len, ama bute phralenge hem phenjenge tano pharo te arakhen vreme te keren adava. O phralja taro Vodečko telo tane svesna bašo akava. Tari adaja pričina, angleder nesavo vreme sine odlučimo te tiknjarel pe  i količina tari duhovno hrana so dobinaja la ko pečatimo hem ko elektronsko oblik.

⁴ Na primer, na pečatinela pe više o Godišniko e Jehovaskere svedokongoro soske but ohrabruvačka iskustvija akana šaj te arakhen pe ki amari internet-stranica jw.org^® hem ko e masekoskere emisie ko JW Broadcasting^®. Osven adava, o spisanija Stražarsko kula (izdanie baši javnost) hem Razbudete se! akana pečatinena pe samo trin puti ko berš. Akala promene na sine kerde te šaj te koristina o vreme bašo javera aktivnostija. I cel akale promenengiri tani te ovel amen poviše vreme bašo adava „soj tano najvažno“ (Fil. 1:10). Akana ka dikha sar šaj te procenina soj tano najvažno hem sar šaj te ovel amen celosno korist taro proučibe e Biblijakoro.

5-6. Kola publikacie valjani šukar te proučina len?

⁵ Keda odlučinaja so ka proučina, so valjani te ovel amenge ko prvo than? Džangjola pe, sekova dive valjani te odvojna vreme te proučina e Devleskoro Lafi. Ko raspored so isi amen čitibaske i Biblija sekova kurko akana tane dende pohari poglavja te šaj te ovel amen poviše vreme te razmislina bašo adava so čitinaja hem dodatno te istražina ko amare publikacie. Amari cel na valjani te ovel samo te čitina o poglavja, nego te mukha o haberi tari Biblija te resel dži ko amare vile — a adava ka pomožinel amenge te ova popaše e Jehovaja (Ps. 19:14).

⁶ So javer valjani šukar te proučina? Džangjola pe, mangaja te spremina amen bašo Proučibe i Stražarsko kula, bašo Proučibe i Biblija ki dvorana hem bašo javer materijali taro sostanok Amaro životo hem služba. Isto agjaar, valjani te čitina sekova broj tari Stražarsko kula hem Razbudete se!

7. Dali valjani te obeshrabrina amen ako našti te čitina ili te dikha sa so ikljola ki amari internet-stranica hem ko JW Broadcasting?

⁷ Šaj ka vakere: „A so te kera sa e statiencar hem e videoklipencar so ikljona ki internet-stranica jw.org, hem e materijalea so ikljola ko JW Broadcasting? Isi doborom but!“ Razmislin baši akaja sporedba: Ko nesave restorantija spreminela pe švedsko masa ki koja so isi but različna hem vkusna hajba. O gostija taro restorani nikogaš našti te probinen taro sa. Adaleske probinena samo taro nekobor hajba. Slično, ako našti te rese te čitine sa so ikljola ko elektronsko oblik, ma obeshrabrin tut. Čitin statie hem dikh videoklipija doborom kobor so šaj. Akana te dikha so značinela te proučina hem sar šaj te ovel amen najbari korist taro adava.

8. Kola bukja šaj te kere keda proučinea i Stražarsko kula, hem sar ka koristinel tuke ako spreminea tut agjaar?

⁸ Keda proučinaja, koncentririnaja amen ko adava so čitinaja te šaj te sikljova nešto važno. Nane proučibe ako samo čitinaja sigate o materijali hem ako obeležinaja o odgovorija. Na primer, keda spreminaja amen bašo Proučibe i Stražarsko kula, prvo čitinaja o delo „Bašo so ka kera lafi“ kova so arakhljola ko početok tari statija. Otkeda ka kera adava, čitinaja hem razmislinaja bašo naslov e statijakoro, bašo podnaslovija hem bašo pučiba povtoribaske. Palo adava, pohari hem šukar čitinaja i statija. Džikote čitinaja, valjani te primetina i rečenica koja so vakerela amenge bašo so kerela lafi o pasus, a adaja tani obično i prvo rečenica. Džikote čitinaja i statija, valjani te razmislina bašo adava sar sekova pasus tano povrzimo e podnaslovea hem e glavno temaja tari statija. Šukar  tano te beležina o lafija so na džanaja len hem o bukja so mangaja poviše te istražina len.

9. a) Soske valjani posebno te pazina ko bibliska stihija keda proučinaja i Stražarsko kula, hem sar šaj te kera adava? b) Sar so pišinela ko Isus Navin 1:8, so valjani javer te kera osven so ka čitina o stihija?

⁹ Adava so proučinaja i Stražarsko kula ko sostanok, pomožinela amenge te haljova i Biblija. Adaleske, šukar pazin ko bibliska stihija, posebno ko adala so čitinaja len džikote proučinaja i statija ko sostanok. Primetin sar o glavna lafija ili izrazija ko stihija tane povrzime e glavno mislaja ko pasus. Osven adava, džikote čitinea, odvojn tuke vreme te razmisline bašo stihija hem bašo adava sar šaj te primenine len ko tlo životo. (Čitin Isus Navin 1:8.)

10. Sprema Evreite 5:14, soske valjani o roditelija ki Familijarno rat te sikaven pumare čhaven sar te proučinen hem te istražinen?

¹⁰ Džangjola pe, o roditelija mangena lengere čhave te uživinen džikote ikerena i Familijarno rat e Jehovaske. Ama, iako e roditelen sekogaš valjani te ovel len planirimo so ka proučinen ki Familijarno rat, ola na valjani sekova kurko te organizirinen nesave posebna proektija ili aktivnostija. Ki Familijarno rat šaj zaedno te dikhen e masekoskiri emisija taro JW Broadcasting ili ponekogaš te keren buti ko nesavo posebno proekti, na primer, te keren maketa tari e Noeskiri arka. Ama, isto agjaar važno tano o roditelija te sikaven pumare čhaven sar te proučinen. Na primer, valjani te sikljoven sar te spreminen pe bašo sostanokija ili sar te istražinen bašo nesavo pučibe so pučle len ki škola. (Čitin Evreite 5:14.) Ako odvojnena peske vreme te proučinen khere, ka ovel lenge polokhe te šunen i programa ko sostanokija hem ko kongresija čak keda nane videoklipi. Džangjola pe, kobor vreme ka proučinel o roditeli e čhavea zavisinela tari leskiri vozrast hem taro adava savo tano o čhavo.

11. Soske tano važno te sikava amare interesenten hor te proučinen?

¹¹ Amare interesentija da valjani te sikljoven sar te proučinen. Keda ka počminen te proučinen i Biblija, amen siem bahtale ako spreminena pe bašo biblisko kursi ili bašo sostanokija adalea so ka obeležinen o odgovorija. Ama valjani te sikava len sar te istražinen hem sar hor te proučinen keda tane korkori. Agjaar, keda ka oven len problemija, namesto odma te roden pomoš taro javera ko sobranie, ola ka džanen sar korkori te istražinen ko amare publikacie  hem te arakhen praktična sovetija baši lengiri situacija.

12. Kola celija šaj te oven amen keda proučinaja?

¹² Ako sian manuš so na mangela te proučinel, šaj mislinea tuke kaj nikogaš ka našti te uživine ko adava. Ama ov sigurno kaj šaj! Počmin agjaar so ko početok kratko ka proučine hem palo adava hari po hari bajrar o vreme proučibaske. Razmislin bašo adava koja tani tli cel keda proučinea. Jekh cel šaj te ovel te arakhe odgovor ko pučibe so nekoj pučlja tut ili te istražine bašo nesavo problemi so isi tut. Džangjola pe, i najvažno cel soske proučinaja valjani te ovel te ova panda popaše e Jehovaja.

13. a) Vaker so šaj te kerel nekoj te šaj te objasninel ple veruvanja e součenikonge. b) Sar šaj te primenine o sovet taro Kološanite 4:6?

¹³ Dali sian terno manuš so džala ki škola? Šaj sa tle součenikija slavinena rodendenija. Šaj mangea te objasnine lenge tari Biblija soske tu na slavinea, ama šaj mislinea tuke kaj našti te kere adava. So valjani te kere? Šaj te istražine bašo adava! Džikote kerea adava, tli cel valjani te ovel: 1) tu te ove pouverimo kaj o Jehova na mangela te slavinen pe rodendenija hem 2) te sikljove pošukar te objasnine soske verujnea ko adava (Rim. 1:20; 1. Pet. 3:15). Prvo šaj te puče tut: „Taro kola pričine mle součenikija slavinena rodendenija?“ Palo adava, šukar istražin baši adaja tema ko amare publikacie. Šaj ka dikhe kaj te objasnine ko so verujnea nane doborom pharo sar so mislingjan tuke. But manuša slavinena rodendenija soske mislinena kaj sarine kerena adava. Ako arakhea samo jekh ili duj informacie baši akaja tema hem vakerea len tle součenikonge, šaj ka pomožine nekaske so iskreno mangela te džanel o čačipe. (Čitin Kološanite 4:6.)

14-16. a) So šaj te kere te šaj te sikljove nešto poviše bašo nesavo biblisko lil koleske so na džanea but? b) Objasnin sar o stihija soj dende šaj te pomožinen tuke pošukar te haljove o lil Amos. (Dikh i ramka „ Pendžar pošukar e manušen tari Biblija“.)

¹⁴ Zamislin tuke kaj ko nesavo sostanok valjani te kerel pe lafi bašo jekh taro tikne proročka lila soj ki Biblija, koleske so šaj na džanea but. Prvo buti so šaj ka valjani te kere tani te bajrare ki tute želba te džane nešto poviše bašo adava proroko. Sar šaj te kere adava?

¹⁵ Najangle puč tut: „So džanava bašo pisateli taro akava lil? Koj sine ov, kaj živinela sine, so buti kerela sine?“ Keda ka džane nešto poviše bašo pisateli, ka šaj pošukar te haljove soske koristingja nesave lafija ili sporedbe. Džikote čitinea i Biblija, primetin o lafija kola so ka pomožinen tuke te haljove savo manuš sine o pisateli.

¹⁶ Palo adava, šaj te istražine keda sine pišimo o lil. Adava šaj lokhe te proverine ko dodatok „Tabela na bibliskite knigi“ kova so arakhljovela ko krajo taro Sveto pismo — prevod Nov svet. Isto agjaar, ki brošurka Da ja istražuvame Božjata Reč, 14-17 strana, šaj te dikhe i tabela kolate soj pišime o prorokija hem o carija. O biblisko lil so proučinea le tano proročko, adaleske ka ovel šukar te doznajne sar živinena sine o manuša ko vreme keda sine pišimo adava lil. Kola lošna stavija ili postapke e manušengere valjani sine te isprajnel adava proroko? Koj živingja ko isto vreme lea? Te šaj te ovel tut celosno slika, šaj ka valjani te istražine javera da lila tari Biblija. Na primer, te šaj pošukar te haljove so slučingja pe keda živinela sine o proroko  o Amos, ka ovel šukar te čitine o stihija taro lila 2. Carevite hem 2. Letopisi, kola soj čhivde ko margine bašo Amos 1:1. * Osven adava, šaj te dikhe o biblisko lil bašo o proroko o Osija, kova so šaj živingja ko isto vreme e Amosea. Sa akala informacie ka pomožinen tuke pošukar te haljove savo sine o životo ko vreme keda živinela sine o Amos (2. Car. 14:25-28; 2. Let. 26:1-15; Osi. 1:1-11; Amos 1:1).

17-18. Vaker nesavo primer taro pasusija ili nesavo tlo primer te šaj te objasnine sar adava so ka istražina o detalija so na dikhjovena doborom važna ka pomožinel amenge poviše te uživina džikote proučinaja i Biblija.

¹⁷ Keda čitinaja i Biblija, šukar tano te ovel amen silno želba te džana so šaj poviše. Na primer, zamislin kaj čitinea o 12 poglavje taro lil Zaharija, kova so prorokujnela o meribe e Mesijaskoro (Zah. 12:10). Keda ka rese dži ko 12 stiho, ka čitine kaj „i familija e Nataneskere khereskiri“ ka rovel hem ka ovel but tažno keda o Mesija ka merel. Namesto sigate te nakhe preku akava detali, šaj te ačhove hem te puče tut: „Sar tane povrzime o kher e Nataneskoro hem o Mesija? Dali šaj te arakhav poviše informacie bašo adava?“ Slično sar jekh detektivi, šaj te počmine pohor te istražine. Ako dikhea ko margine, prvo stiho tano 2. Samoilova 5:14, kote so šaj te dikhe kaj o Natan sine jekh taro e Davideskere čhave. O dujto stiho ko margine, Luka 3:31, otkrinela kaj o Isus alo direktno taro Natan, kastar so ali i Marija. * Taro jekh puti, ovela tuke sa pointeresno! Džanea kaj bašo Isus sine prorokujmo kaj ka avel taro David (Mat. 22:42). Ama e Davide sine le poviše taro 20 čhave. Čače vooduševinela amen adava so o Zaharija  otkrinela kaj baš e Nataneskoro kher sine le pričina te žalinel bašo e Isuseskoro meribe.

¹⁸ Te dikha panda jekh primer. Ko prvo poglavje taro Luka, čitinaja kaj o angeli o Gavriel gelo ki Marija hem vakergja lake nešto but važno povrzimo e čhavea so valjani sine te bijanel le: „Ov ka ovel baro hem ka vikinen le Čhavo e Najbareskoro. O Jehova o Devel ka del le o prestol leskere dadeskoro e Davideskoro, hem ov večno ka vladinel sar Cari ko kher e Jakoveskoro“ (Luka 1:32, 33). Šaj but puti koncentririnea tut samo ki prvo buti so vakergja la o Gavriel — kaj o Isus ka ovel vikimo „Čhavo e Najbareskoro“. Ama o Gavriel isto agjaar prorokujngja kaj o Isus ka ovel Cari. Adaleske šaj pučaja amen so mislingja peske i Marija keda šungja akala lafija. Dali mislingja kaj o Gavriel vakergja kaj o Isus ka ovel vladeteli ko Izrael agjaar so ka zameninel e care e Irode ili nekas taro leskere naslednikija? Ako o Isus čače ovela sine cari, i Marija ka dobinel sine posebno čest sar daj e careskiri, a lakiri familija ka živinel sine ki carsko palata. Ama, nigde ki Biblija na pišinela kaj i Marija vakergja nešto asavko e Gavrieleske. Na pišinela ni kaj i Marija rodingja nesavo posebno than ko Carstvo, sar so kergje duj učenikija e Isuseskere (Mat. 20:20-23). Akava detali panda poviše uverinela amen kaj i Marija sine but ponizno džuvli!

19-20. Sprema Jakov 1:22-25 hem 4:8, kola tane amare celija keda proučinaja?

¹⁹ Sekogaš valjani te ovel amen ki godi kaj amari najvažno cel džikote proučinaja e Devleskoro Lafi hem amare publikacie tani te ova popaše e Jehovaja. Isto agjaar, mangaja pošukar te dikha save manuša siem hem save promene valjani te kera te šaj te kera e Devleskiri volja. (Čitin Jakov 1:22-25; 4:8.) Adaleske, sekova puti keda ka počmina te proučina valjani te molina e Jehova te del amen sveti duh. Valjani te molina le te pomožinel amenge te ovel amen so pobari korist taro materijali hem jasno te dikha save promene valjani te kera.

²⁰ Te trudina amen sarine te ova sar o verno sluga e Devleskoro koleske so o psalmisti vakergja: „Uživinela ko zakoni e Jehovaskoro, čitinela hem razmislinela leskere zakoneske dive hem rat... ko sa so kerela, ka ovel uspešno“ (Ps. 1:2, 3).