1-3. So značinela te služina e Jehovaske „celo vilea“? Vaker primer.

SARINE siem nesovršena hem grešinaja. Blagodarna siem so o Jehova dengja otkupnina hem tano spremno te prostinel amenge. Ako siem skromna hem kajnaja amen, šaj te roda lestar te prostinel amenge. Šaj te ova sigurna kaj o Jehova nane te postapinel amencar „sprema amare greške“ (Ps. 103:10). Ama, amen mora te služina leske celo vilea (1. Let. 28:9). Sar šaj te kera adava iako siem nesovršena?

² Ka dobina odgovor ko akava pučibe ako sporedinaja o životo e Asaskoro hem o životo e Amazijaskoro. O solduj carija kerena sine adava soj šukar anglo Jehova, ama isto agjaar kergje greške soske sine nesovršena. I Biblija vakerela kaj o Asa služingja e Jehovaske celo vilea sa džikote sine dživdo (2. Let. 15:16, 17; 25:1, 2; Izr. 17:3). Ov sekogaš trudinela pe sine te kerel e Jehovaskiri volja. Tari  javer strana, o Amazija na služinela sine e Jehovaske celo vilea. Keda pobedingja e Devleskere dušmanen, ov angja pea lengere idolen hem počmingja te obožavinel len (2. Let. 25:11-16).

³ Okova so služinela e Jehovaske „celo vilea“ isi le baro mangipe e Devleske hem mangela te služinel leske zasekogaš. Keda ki Biblija kerela pe lafi bašo „vilo“ obično mislinela pe ko adava save siem andral hem vklučime tane amare želbe, misle, stavija, motivija hem celija. Iako siem nesovršena, šaj te služina e Jehovaske celo vilea. Služinaja leske soske čače mangaja te kera adava, a na adaleske so mora ili samo adaleske so ulo amenge navika (2. Let. 19:9).

4. So ka dikha akana?

⁴ Taro primer e Asaskoro hem taro javera trin verna carija ki Juda, šaj pošukar te haljova so značinela te služina e Jehovaske celo vilea. Adala trin carija sine o Josafat, o Ezekija hem o Josija. Iako akala carija kergje greške, o Jehova sine zadovolno lendar hem mangela len sine. Ov dikhlja kaj ola služingje leske celo vilea. Soske o Jehova dikhela sine agjaar ki lende, hem sar šaj amen da te ova sar lende?

5. So kergja o Asa keda ulo cari?

⁵ O izraelsko narodo odvingja pe ko severno carstvo Izrael hem južno carstvo Juda. Trito cari ki Juda sine o Asa. Keda ulo cari, o Asa sine odlučno te cidel o hovavno obožavanje hem o seksualno nemoral taro plo carstvo. Ov uništingja o idolija so obožavinena len sine o manuša hem paldingja e muršen so kerena sine nemoral javere muršencar ko hrami. O Asa cidingja čak ple baba tari carsko položba, soske kergja odvratno idoli (1. Car. 15:11-13). Isto agjaar, ohrabringja e narodo te roden e Jehova hem te šunen o zakonija hem o zapovedija. Ov kergja sa so šaj te pomožinel e javerenge te služinen e Jehovaske (2. Let. 14:4).

6. So kergja o Asa keda o Etiopjanja napadingje len?

⁶ Ko prva deš berš džikote vladinela sine o Asa, ki Juda sine mir. Palo adava, o Etiopjanja kola so sine len jekh milioni vojnikija hem trišel kočie ale te maren pe protiv o Judejcija (2. Let. 14:1, 6, 9, 10). So kergja o Asa? Le sine le doverba ko Jehova hem adaleske molingja e Jehova te pomožinel len te pobedinen ki adaja borba. (Čitin 2. Letopisi 14:11.) Ponekogaš, čak keda o carija na sine verna e Jehovaske, ov pomožinela len sine te pobedinen. O Jehova kerela sine adava te sikavel kaj ov tano čačutno Devel (1. Car. 20:13, 26-30). Ama, akava  puti pomožingja ple narodo, adaleske so e Asa sine le doverba ki leste. O Jehova šungja leskiri molitva, hem pomožingja len te pobedinen (2. Let. 14:12, 13). Palo nesavo vreme, o Asa kergja bari greška keda rodingja pomoš taro Sirisko cari, namesto taro Jehova (1. Car. 15:16-22). Iako kergja adava, o Jehova dikhela sine kaj o Asa mangela le. Džikote sine dživdo, ov služingja e Jehovaske celo vilea. Sar šaj amen da te ova sar o Asa? (1. Car. 15:14).

7, 8. Sar šaj te ove sar o Asa?

⁷ Sar šaj te džana dali služinaja e Jehovaske celo vilea? Šaj te puča amen: „Dali sium poslušno e Jehovaske čak keda mange pharo? Dali sium odlučno te zaštitinav o sobranie taro lošno vlijanie?“ Razmislin kobor valjani sine te ovel hrabro o Asa te šaj te cidel ple baba tari carsko položba. Isto agjaar, ponekogaš tuke da ka valjanel asavki hrabrost. Na primer, so ako nekoj tari tli familija ili nesavo tlo paše amal tano isklučimo taro sobranie adaleske so kergja grevo hem na kajnela pe bašo adava? Dali ka ove odlučno te na kontaktirine lea? So ka terinel tut tlo vilo te kere?

⁸ Isto sar o Asa, ponekogaš amen da šaj te osetina amen sar te phene sarine tane protiv amende. Šaj o čhave ki škola ili o nastavnikija asana tuke adaleske so sian e Jehovaskoro svedoko. Šaj ki buti asana tuke soske koristinea tlo odmor te dža ko kongres ili adaleske so but puti na ačhovea prekuvremeno ki buti. Ko asavke situacie, isto sar o Asa, neka ovel tut doverba ko Jehova. Molin tut e Jehovaske te del tut hrabrost te šaj ponadari da te kere adava soj tano šukar. Isto sar so pomožingja e Asa, ov uverimo kaj o Jehova ka pomožinel tuke da hem ka del tut sila.

9. Sar šaj te kera e Jehovaskiri volja keda propovedinaja?

⁹ O Asa na mislingja samo peske. Ov ohrabringja e javeren da „te roden e Jehova“. Amen da šaj te pomožina e javerenge te služinen e Devleske. O Jehova dikhela keda vakeraja e manušenge baši leste. Amen keraja leskiri volja keda dikhela kaj propovedinaja adaleske so mangaja le hem e manušen.

10, 11. Sar šaj te ova sar o Josafat?

¹⁰ E Asaskoro čhavo, o Josafat, džala sine „palo drumo ple dadeskoro“ (2. Let. 20:31, 32). So značinela adava? Isto sar plo dad, o Josafat ohrabringja e manušen ponadari da te služinen e Jehovaske. Ov bičhalgja manušen te džan ko dizja ki Juda hem te sikaven e narodo taro „lil e Jehovaskere zakonea“ (2. Let. 17:7-10). Ov čak gelo ko podračje taro severno carstvo Izrael, ko manuša taro efremska planine, te  ohrabrinel len palem te služinen e Jehovaske (2. Let. 19:4). O Josafat čače rodela sine e Jehova celo vilea (2. Let. 22:9).

¹¹ Avdive, o Jehova mangela o manuša ko celo sveto te sikljoven baši leste, hem sarine amen šaj te pomožina ko adava. Dali isi tut cel sekova masek te sikave e manušen bašo Devel? Dali mangea te sikave e javeren tari Biblija te šaj ola da te služinen e Jehovaske? Dali molinea tu bašo adava? Ako dea tutar sa, o Jehova ka pomožinel tut te počmine biblisko kursi nekasaja. Dali sian spremno te žrtvujne tlo slobodno vreme te šaj te proučine nekasaja? Sar o Josafat so trudinela pe sine te pomožinel e javerenge palem te služinen e Jehovaske, amen da šaj te trudina amen te pomožina adalenge soj neaktivna. Isto agjaar, o starešine trudinena pe ko podračje e sobranieskoro te posetinen hem te pomožinen okolen soj tane isklučime hem šaj na kerena više grevo.

12, 13. a) So kergja o Josafat keda darandilo? b) Soske valjani te ova sar o Josafat?

¹² Isto sar plo dad, o Asa, o Josafat sine le doverba ko Jehova keda jekh bari vojska ali protiv o carstvo Juda. (Čitin 2. Letopisi 20:2-4.) O Josafat darandilo hem adaleske rodingja pomoš taro Jehova. Ki molitva ov priznajngja kaj ola našti te pobedinen ple neprijatelen. Ov isto agjaar vakergja kaj ov hem leskoro narodo na džanena so te keren. O Josafat nihari na sumningja pe kaj o Jehova ka pomožinel len. Ov vakergja: „Amare jakhja dikhena ki tute“ (2. Let. 20:12).

¹³ Amen da sar o Josafat, ponekogaš na džanaja sar te rešina nesavo problemi, hem šaj daraja (2. Kor. 4:8, 9). Ama, te na bistra so kergja o Josafat. Anglo sa o narodo ov molingja pe e Jehovaske hem vakergja leske kobor osetinena pe slaba (2. Let. 20:5). Sar šaj te ova sar o Josafat? Ako sian poglavari hem tli familija isi la nesavo problemi, molin e Jehova te del tumen vodstvo hem sila te šaj te ikljoven ko krajo. Ma ladža te moline tut angli tli familija bašo adava problemi. Adalea ka haljoven kaj isi tut bari doverba ko Jehova. O Jehova pomožingja e Josafateske, ka pomožinel tuke da.

14, 15. Sar o Ezekija sikavgja kaj isi le celosno doverba ko Jehova?

¹⁴ O Ezekija sine panda jekh cari so sine paše e Jehovaja, iako leskoro dad na mukhlja leske šukar primer soske služinela sine hovavne devlenge. O Ezekija uništingja o thana kote so kerena pe sine paganska ritualija. Ov isto agjaar phaglja o bakarno sap so kergja o Mojsej, soske o Izraelcija koristinena le sine sar idoli. O Ezekija celo vilea služinela sine e Jehovaske. Ov ikerela sine o zapovedija so dengja o Jehova e Mojsejeske (2. Car. 18:1-6).

¹⁵ Džikote o Ezekija sine cari, i silno asirsko vojska khuvgja ki Juda hem manglja te uništinel o Erusalim. O asirsko cari, o Senahirim,  asala sine e Jehovaske hem manglja te čhivel e Ezekija te predajnel pe. O Ezekija sine le celosno doverba ko Jehova hem molingja pe leske te pomožinel le. Ov džanela sine kaj o Devel tano but posilno taro Asircija hem kaj šaj te spasinel ple narodo. (Čitin Isaija 37:15-20.) O Devel šungja leskiri molitva hem bičhalgja jekh angeli kova so mudargja 185.000 asirska vojnikija (Isa. 37:36, 37).

16, 17. Sar šaj te ova sar o Ezekija?

¹⁶ Palo nesavo vreme, o Ezekija nasvalilo hem sine anglo meribe. Ki adaja phari situacija, ov molinela sine e Jehova te setinel pe ki leskiri vernost hem te pomožinel le. (Čitin 2. Carevite 20:1-3.) O Jehova šungja e Ezekijaskiri molitva hem sasljargja le. Tari Biblija džanaja kaj o Jehova avdive na kerela čudija te sasljarel amen ili te prodolžinel amaro životo. Ama, sar so kergja o Ezekija, amen da šaj te molina e Jehova te pomožinel amenge hem te phena leske: „Molinava tut, Jehova, molinava tut, setin tu sar služinava tuke sine verno hem celo vilea“. Dali isi tut doverba ko Jehova kaj sekogaš ka pomožinel tut, čak keda sian nasvalo? (Ps. 41:3).

¹⁷ Ko savo javer način šaj te ova sar o Ezekija? Šaj nešto anela ki opasnost amaro amalipe e Jehovaja ili lela amendar o vreme so šaj te koristina le te služina leske. Na primer, but džene avdive kerena idolija e manušen. Ola mangena te oven sar nesave slavna ličnostija ili sar javera manuša kolen so ni na pendžarena. Trošinena but vreme te čitinen baši lende hem te dikhen lengere slike. Ili, but puti koristinena socijalna mreže ili javera bukja kola so pomožinena len te komunicirinen e manušencar ko Internet. Džangjola pe, amen da šaj te koristina akala bukja te komunicirina amare familijaja hem paše amalencar. Ama, o socijalna mreže šaj te len but taro amaro vreme. Čak hari pohari šaj te ova gorda ako but manuša sikavena kaj svidžinena pe lenge amare slike ili komentarija so čhivgjem ko Internet. Ili, šaj ka holjana ako halilem kaj čhinavgje te dikhen len. Šaj te sikljova taro šukar primerija sar soj o apostol Pavle, o Akila hem i Priskila. Dali šaj te zamisline len sar trošinena plo vreme sekova dive te dikhen sa so kerena o javera, osobeno okola so na služinena e Jehovaske? I Biblija vakerela kaj o apostol Pavle koristinela sine plo vreme te propovedinel. Isto agjaar, i Priskila hem o Akila koristinena sine plo vreme te propovedinen hem potočno te objasninen o čačipe e javerenge (Dela 18:4, 5, 26). Šaj te puča amen: „Dali pazinava te na kerav e manušen idolija? Dali pazinava te na trošinav but vreme ko bukja so nane važna?“ (Čitin Efešanite 5:15, 16.)

18, 19. Sar šaj amen da te ova sar o Josija?

¹⁸ O paraunuko e Ezekijaskoro, o Josija, isto agjaar ikerela sine e Jehovaskere zapovedija „celo vilea“  (2. Let. 34:31). Keda sine tinejdžeri, ov „počmingja te rodel e Davideskere Devle“. A keda sine le 20 berš, ov počmingja te cidel o idolopoklonstvo tari Juda. (Čitin 2. Letopisi 34:1-3.) O Josija trudinela pe sine te kerel e Jehovaskiri volja poviše nego but javera carija ki Juda. Jekh dive, o prvosvešteniko arakhlja ko hrami o lil e Devleskere zakonea. Adava izgleda sine o lil so pišingja le o Mojsej! Keda o pisari čitingja le e Josijaske, ov halilo kaj valjani te kerel panda poviše te šaj te služinel e Jehovaske celo vilea. Ov isto agjaar ohrabringja e javeren da te keren adava. Adaleske, o narodo služinela sine e Jehovaske sa džikote sine dživdo o Josija (2. Let. 34:27, 33).

¹⁹ Ako sian terno, tu da šaj te ove sar o Josija hem pošukar te pendžare e Jehova. Ov šaj siklilo taro plo papo kova so kajngja pe, o cari o Manasija, kaj o Jehova tano spremno te prostinel. Tu da šaj te sikljove taro pophure ki tli familija hem ko sobranie. Ola šaj te vakeren tuke bašo but šukar bukja so kergja o Jehova baši lende. Isto agjaar ma bistre sar osetinela pe sine o Josija keda šungja so pišinela ko e Devleskoro Lafi. Ov but manglja te kerel e Devleskiri volja hem adaleske odma kergja promene. Džikote čitinea i Biblija, tli odlučnost te ove poslušno e Jehovaske šaj te ovel pobari. Adava ka kerel te ove popaše amal lea hem te ove pobahtalo. Tegani, ka mange te vakere e javerenge bašo Jehova. (Čitin 2. Letopisi 34:18, 19.) Keda lično proučinea i Biblija, šaj te haljove sar pošukar te služine e Devleske. Adaleske, de tutar sa te kere akala promene, isto sar so kergja o Josija.

20, 21. a) So sine len zaedničko e štare caren soj spomnime ki akaja statija? b) So ka dikha ki javer statija?

²⁰ So šaj te sikljova taro akala štar carija ki Juda kola so služingje e Jehovaske celo vilea? Ola sine rešime te keren e Devleskiri volja hem te služinen leske celo životo. Sikavgje doverba ko Jehova keda valjani sine te borinen pe silna neprijatelencar. Hem soj najvažno, ola služingje e Jehovaske soske mangena le sine.

²¹ Iako akala štar carija sine nesovršena hem kergje greške, o Jehova sine lendar zadovolno. Ov dikhlja so isi ko lengoro vilo hem džanela sine kaj iskreno mangena le. Amen da siem nesovršena hem keraja greške. Ama, o Jehova ka ovel zadovolno amendar ako dikhela kaj služinaja leske celo vilea. Ki javer statija, ka dikha so šaj te sikljova taro greške so kergje akala carija.