1. So sikavaja keda giljavaja amare teokratska gilja?

JEKH pendžardo kompozitori vakergja: „Keda šunea lafija, počminea te razmisline. Keda šunea muzika, ki tute bajrovena čuvstvija. Ama, keda giljavea, o lafija khuvena tuke andre ko vilo“. Keda giljavaja amare teokratska gilja amen falinaja amare Dade e Jehova hem sikavaja kaj mangaja le. Ola kerena te ova popaše lea. Adaleske, o giljajbe tano but važno ko čačutno obožavanje, bizi razlika dali giljavaja korkori ili amare phralencar hem phenjencar.

2, 3. a) Sar osetinela pe nekoj keda valjani te giljavel zaedno e javerencar ko sobranie? b) Bašo kola pučiba ka kera lafi?

² Dali mangea te giljave e javerencar ko sobranie ili ladžaja te kere adava? Ko nesave kulture, e muršenge tano nezgodno te giljaven anglo javera. Akava stavi šaj negativno te vlijajnel ko celo sobranie, posebno ako o starešine na giljavena taro vilo ili ako tane zafatime javere bukjencar džikote giljavela pe (Ps. 30:12).

 ³ O giljajbe tano delo taro amaro obožavanje. Adaleske, sigurno na mangaja te ikljova džikote giljavela pe ili te propuština adava delo taro sostanokija. Sekoj amendar valjani te pučel pe: „Savo stavi isi man bašo giljajbe ko sostanokija? So šaj te kerav ako mange nezgodno te giljavav anglo javera? Hem, sar šaj te giljavav taro vilo?“

4, 5. Sar sine organizirimo o giljajbe ko hrami ko purano Izrael?

⁴ O verna sluge e Jehovaskere otsekogaš koristinena sine i muzika te šaj te falinen le. Interesno tano adava so, keda o Izraelcija sine verna e Jehovaske, o giljajbe sine važno delo taro lengoro obožavanje. Na primer, keda o David kerela sine podgotovke bašo hrami, ov organiziringja 4.000 levitija te falinen e Jehova muzikaja. Lendar, 288 džene sine „vežbime hem vešta ko giljajbe gilja“ (1. Let. 23:5; 25:7).

⁵ I muzika hem o giljajbe isto agjaar sine važno delo keda sine svečeno phravdo o hrami. Ki Biblija pišinela: „Džikote o trubačija hem o peačija falinena sine e Jehova hem blagodarinena sine leske složno sar jekh hem džikote šungjola sine o zvuko taro trube, taro činele hem taro javera instrumentija džikote giljaja falinena sine e Jehova... i slava e Jehovaskiri, e čačutne Devleskiri, phergja leskoro kher“. Zamislin tuke kobor uli pozorali i vera e Izraelcongiri ki akaja prilika! (2. Let. 5:13, 14; 7:6).

6. Sar o Neemija organiziringja o giljajbe džikote sine upraviteli ko Erusalim?

⁶ O Neemija, kova so organiziringja palem te gradinen pe o zidija ko Erusalim, isto agjaar organiziringja e leviten te giljaven hem te bašalen ko instrumentija. Lengoro bašalibe hem giljajbe kergja i svečenost bašo zidija e dizjakere te ovel panda pobahtali. O Neemija čhivgja „duj bare horija te giljaven blagodarna gilja“. O solduj horija phirena sine taro sprotivna pravcija upro e dizjakere zidija džikote na arakhle pe ko than kova so sine najpaše dži ko hrami. Lengoro giljajbe sine doborom glasno so šaj sine te šunel pe but dur (Neem. 12:27, 28, 31, 38, 40, 43). Šaj te ova sigurna kaj o Jehova sine bahtalo keda šungja sar leskere sluge celo vilea falinena le giljaja.

7. Sar o Isus sikavgja kaj o hristijanja valjani giljaja te falinen e Jehova?

⁷ Ko vreme e Isuseskoro da, i muzika sine važno delo taro obožavanje e Jehovaskoro. Razmislin bašo adava so slučingja pe ki najvažno rat dži akana. Otkeda ikergja e Gospodareskiri večera, o Isus hem leskere učenikija giljavgje falbena gilja e Jehovaske. (Čitin Matej 26:30.)

8. Savo primer dengje o prva hristijanja bašo adava sar valjani te falina e Devle gilencar?

⁸ O prva hristijanja dengje šukar primer bašo adava sar valjani te falina e Devle gilencar. Ola na džana sine ko hrami te obožavinen e Jehova sar so kerena sine o Izraelcija, nego khedena pe sine ko khera. Iako adala khera na sine doborom šuže hem veličestvena sar o hrami, o phralja ponadari da giljavena  sine taro vilo. O apostol Pavle vakergja e phralenge: „Sikaven hem ohrabrinen jekh jekhe psalmencar, falbena gilencar bašo Devel, giljaven gilja obožavibaske ko način so sikavela blagodarnost, giljaven taro vilo e Jehovaske“ (Kol. 3:16). O gilja tari amari pesnarka valjani te giljava len taro vilo hem „ko način so sikavela blagodarnost“. Ola tane delo tari duhovno hrana so dobinaja la taro „verno hem razborito robo“ (Mat. 24:45).

9. a) Soske šaj nekaske tano nezgodno te giljavel taro vilo ko amare sostanokija hem kongresija? b) Sar valjani te giljava falbena gilja e Jehovaske hem koj valjani te predvodinel ko adava? (Dikh i slika ko početok tari statija.)

⁹ Taro kola pričine šaj te ovel tuke nezgodno te giljave? Šaj ki tli familija ili kultura obično na giljavela pe. Ili šaj šunea e profesionalna peačen ko radio ili ki televizija hem keda ka sporedine tut lencar, ladžaja pa čak razočarinea tut taro tlo glaso. Ama, sarinen isi amen odgovornost te falina e Jehova gilencar. Adaleske, le i pesnarka ko vasta, vazdela la poupre, vazde to šero hem giljav taro vilo! (Ezra 3:11; čitin Psalm 147:1.) Ko but dvorane avdive isi ekranija kote so sikavela pe o teksti taro amare gilja, adava pomožinela polokhe te giljava. Interesno tano adava so o giljajbe teokratska gilja ulo delo tari Škola bašo imenujme phralja. Akava sikavela kobor tano važno o starešine te predvodinen ko giljajbe ko sostanokija.

10. So na valjani te bistra ako daraja te giljava celo glasoja?

¹⁰ But džene darana te giljaven celo  glasoja adaleske so mislinena kaj ka oven but glasna ili nane te giljaven šukar. Na valjani te bistra kaj „sarine amen but puti grešinaja“ keda keraja lafi, ama adava na čhinavela amen te kera lafi (Jak. 3:2). Adaleske, na valjani te mukha amare nesovršena glasija te čhinaven amen giljaja te falina e Jehova.

11, 12. Sar šaj pošukar te giljava?

¹¹ Šaj daraja te giljava adaleske so na džanaja sar te giljava. Ama, šaj te giljava pošukar ako primeninaja nesave predlogija. * (Dikh i fusnota.)

¹² Šaj te giljave celo glasoja agjaar so ka sikljove ispravno te dišine. Slično sar so i električno energija dela sila e sijalicake, agjaar o vozduh dela sila tle glasoske keda kerea lafi ili keda giljavea. Valjani te giljave glasno kobor so kerea lafi, pa čak poglasno taro adava. * (Dikh i fusnota.) I Biblija ponekogaš e Jehovaskere slugenge vakerela kaj valjani bahtale te vikinen keda giljavena falbena gilja (Ps. 33:1-3).

13. Objasnin sar šaj te ovel amen pobari doverba keda giljavaja.

¹³ Džikote ikerea i Familijarno rat ili ki javer prilika probin te kere akava: Birin jekh taro tle omilena gilja tari amari pesnarka. Čitin o teksti celo glasoja. Palo adava, taro jekh puti isto glasoja vaker nekobor lafija so kerena jekh misla. Tegani, giljav adala lafija celo glasoja (Isa. 24:14). Agjaar tlo glaso ka ovel posilno, a adava tano šukar. Na valjani te dara ili te ladža so giljavea asavke glasoja.

14. a) So ka pomožinel tuke te ovel tut posilno glaso? (Dikh i ramka „ Sar šaj te giljave pošukar“.) b) Kola predlogija pomožingje tuke te ovel tut pošukar glaso?

¹⁴ Ako mangea te giljave celo glasoja, valjani te phrave to muj poviše nego keda kerea lafi. A so valjani te kere ako mislinea kaj isi tut slabo glaso ili kaj to glaso tano but učo? Šaj te arakhe korisna predlogija ki ramka „Da se sovladaat specifični problemi“ koja so arakhljola ko lil Izvleči korist od Teokratskata škola za služba, ki 184 strana.

15. a) Savo izvestuvanje sine dendo ko godišno sostanok ko 2016 berš? b) Taro kola pričine sine revidirimi i pesnarka?

¹⁵ Sarine so sine ko godišno sostanok ko 2016 berš sine bahtale keda o phral Stiven Let taro Vodečko telo objavingja i nevi pesnarka e naslovea Giljav taro vilo e Jehovaske. * (Dikh i fusnota.) Ov objasningja kaj jekh pričina soske valjani amenge nevi pesnarka tani adaja so sine revidirimo o Prevod Nov svet ki anglisko čhib. Taro e gilengere tekstija sine cidime ili sine promenime nesave lafija kola so na arakhljovena poviše ko Prevod Nov svet. Isto agjaar, sine čhivde neve gilja bašo propovedibe hem baši otkupnina. Adaleske so o giljajbe tano važno delo taro amaro obožavanje, o Vodečko telo manglja i pesnarka te ovel but kvalitetno. Adaleske, i korica tani slično sar ko revidirimo Prevod Nov svet.

16, 17. Kola tane nesave promene ki nevi pesnarka?

¹⁶ Te šaj te ovel amenge polokhe te koristina i pesnarka, o gilja tane grupirime ko teme. Na primer, o prva 12 gilja tane bašo Jehova, o javera  8 tane bašo Isus hem i otkupnina. Ko početok tari pesnarka isi indeks taro teme kova so šaj but te pomožinel, na primer, keda o phralja birinena gili bašo javno govor.

¹⁷ Te šaj sarine te giljaven taro vilo, nesave tekstija taro gilja sine menime te šaj lengiri poraka te ovel pojasno. Sine menime o lafija so na koristinena pe često. Isto agjaar, sine menime o naslovija taro nesave gilja. Na primer, i gili e naslovea „Arakh to vilo“ šaj te haljovel pe sar zapoved, adaleske sine menimi hem akana vikinela pe „Arakhaja amaro vilo“. Soske? Keda nekoj giljavela sine adaja gili, ov vakerela sine e javerenge so valjani te keren. Akava kerela sine te ovel nezgodno ko sostanokija hem ko kongresija e nevenge, e interesentenge, e ternenge hem e phenjenge. Adaleske, sine menimo o teksti hem o naslov e giljakoro.

18. Soske valjani te sikljova o gilja tari nevi pesnarka? (Dikh i fusnota.)

¹⁸ But gilja tari pesnarka Giljav taro vilo e Jehovaske tane sar molitve. Ola šaj te pomožinen tuke te vakere e Jehovaske sar osetinea tut. Javera gilja ka pomožinen amenge te ohrabrina amen te sikava mangipe hem te kera šukaripe (Evr. 10:24). Amen mangaja te sikljova o melodie, o ritam hem o tekstija taro amare gilja. Keda vežbinaja khere o gilja, tegani ka šaj te giljava len pobare doverbaja hem taro vilo. * (Dikh i fusnota.)

19. Sar šaj sarine ko sobranie te obožavinen e Jehova?

¹⁹ Nikogaš na valjani te bistra kaj o giljajbe tano važno delo taro amaro obožavanje. Agjaar šaj ko jekh but šukar način te sikava e Jehovaske kaj mangaja le hem kaj siem blagodarna bašo sa so kergja amenge. (Čitin Isaija 12:5.) Keda giljavaja taro vilo, pottikninaja e javeren da te keren adava. Sarine ko sobranie, bizi razlika dali tane terne, phure ili neve, šaj te obožavinen e Jehova ko akava način. Adaleske, ma te ovel amenge nezgodno te giljava taro vilo. Te šuna adava so pišingja o psalmisti: „Giljaven e Jehovaske!“ Oja, te giljava taro vilo e Jehovaske! (Ps. 96:1).