1-2. a) So pomožinela amenge te ikljova ko krajo e problemencar sekova dive? Objasnin. b) So ka dikha ki akaja statija?

DALI nekogaš vakergjan: „Keda ka setinav man taro sa so nakhljum, džanava kaj našti sine te izdržinav mle silaja“? But džene amendar vakergje akava. Šaj vakergjan akala lafija otkeda razmislingjan sar ikliljan ko krajo nesave phare nasvalipaja ili otkeda mulo nekoj taro tle najpaše. Keda setinea tut ko adava, haljovea kaj šaj sine te istrajne sekova nevo dive samo adaleske so o Jehova, preku plo sveti duh, dela tut sine „sila, koja so nakhavela i normalno“ (2. Kor. 4:7-9).

² Isto agjaar, valjani amenge pomoš taro sveti duh te šaj te sprotivstavina amen ko vlijanie taro akava lošno sveto (1. Jov. 5:19). Osven adava, mora te borina amen protiv „o lošna duhija“ (Ef. 6:12). Akana ka dikha duj načinija sar o sveti duh pomožinela amenge te ikljova ko krajo sa adale problemencar. Palo adava ka dikha so šaj te kera te šaj te ovel amen celosno pomoš taro sveti duh.

3. Vaker jekh način sar o Jehova pomožinela amenge preku plo sveti duh?

³ O Jehova pomožinela amenge ple sveti duhoja agjaar so dela amen sila te kera amare odgovornostija iako adava nane sekogaš lokho. E Pavle sine le doverba ki e „Hristoseskiri sila“, adaleske sine svesno kaj šaj te služinel e Jehovaske iako sine le pharipa (2. Kor. 12:9). Džikote sine ko plo dujto misionersko patuvanje, o Pavle na samo so dengja pestar sa te šaj te propovedinel, nego kerela sine buti da te šaj te platinel ple trošakija. Keda sine ko Korint, ov živinela sine ko kher e Akilaskoro  hem e Priskilakoro. Ola kerena sine šatorija. Adaleske so sine le o isto zanati, nesave dive o Pavle kerela sine zaedno lencar buti (Dela 18:1-4). O sveti duh dela le sine sila te kerel buti te šaj te platinel ple trošakija hem te kerel pli služba.

4. Sprema 2. Korinkjanite 12:7b-9, savo problemi sine e Pavle?

⁴ Čitin 2. Korinkjanite 12:7b-9. So manglja te vakerel o Pavle keda vakergja kaj isi le „karo ko telo“? Ako isi tut doslovno karo ko telo, sigurno but ka dukhal tut. Sprema akava, o Pavle najverojatno kerela sine lafi bašo nesavo lično problemi so kerela leske sine bari dukh. Ov vakergja kaj akava problemi sine sar „angeli e Satanaskoro“ kova so celo vreme khuvela le sine. Šaj o Satana ili leskere demonija na predizvikujngje direktno e Pavleskere nevolje. Ama, keda adala lošna duhija dikhle adava „karo“, šaj probingje te „gurinen“ le sa pohor te šaj te dukhaven le panda poviše. So kergja o Pavle?

5. Sar odgovoringja o Jehova ko e Pavleskere molitve?

⁵ Ko početok, o Pavle manglja o Jehova te cidel lestar „o karo“. Ov priznajngja: „Trin puti molingjum e Gospodare [e Jehova] te cidel mandar adava“. Iako o Pavle molingja pe, ov ponadari da osetinela sine o karo. Dali akava značinela kaj o Jehova na odgovoringja ko leskere molitve? Ni najhari. Ov šungja leskere molitve. O Jehova na cidingja leskoro problemi, ama dengja le sila te šaj te istrajnel. O Jehova vakergja leske: „Mli sila sikavela pe celosno keda sian slabo“ (2. Kor. 12:8, 9). Adaleske so o Jehova pomožingja leske, o Pavle ačhilo bahtalo hem ikergja plo andruno mir (Fil. 4:4-7).

6. a) Sar šaj o Jehova te odgovorinel ko molitve? b) Kola vetuvanja taro dende stihija dena tut sila?

⁶ Dali tu da, isto sar o Pavle, molingjan e Jehova te cidel tutar nesavo problemi? Šaj molingjan tut iskreno bašo adava but puti, ama o problemi ačhilo, čak šaj ulo pobaro. Dali mislingjan kaj kergjan nešto so razočaringja e Jehova? Ako oja, tegani setin tut ko Pavle. Isto sar so odgovoringja ko leskere molitve, o Jehova ka odgovorinel ko tle da. Šaj nane te cidel o problemi, ama preku o sveti duh ka del tut i sila so valjani tuke te šaj te izdržine (Ps. 61:3, 4). Iako o problemija šaj ko nesavo vreme te peraven tut, o Jehova nane te mukhel tut (2. Kor. 4:8, 9; Fil. 4:13).

7-8. a) Ki koja smisla o sveti duh tano sar bavlal? b) Sar o Petar opišingja o način sar vlijajnela o sveti duh?

⁷ Ko savo javer način pomožinela amenge o sveti duh? O sveti duh šaj te sporedina le jekhe bavlalaja. Jekh brodi šaj te koristinel i bavlal so phudela ko ispravno pravco te šaj te resel bezbedno ki pli cel čak ako ko more isi but branija. Slično, o sveti duh pomožinela amenge ponadari da te služina e Jehovaske iako isi amen nevolje džikote na resaja ko nevo sveto so vetingja le amenge o Devel.

⁸ Sar ribari, o Petar džanela sine but bašo plovibe. Šaj adaleske, keda opišingja o način sar vlijajnela o sveti duh, ov koristingja jekh lafi kova so verojatno tano povrzimo plovibaja. O Petar pišingja: „nijekh proroštvo na sine vakerdo sar so mangela o manuš, nego o manuša vakerena sine o lafija so avena taro Devel agjaar sar so vodinela len sine o sveti duh“. O grčko lafi soj prevedimo e glagolea „vodinela“ doslovno značinela „ingarela“ (2. Pet. 1:21).

9. Savi slika manglja te kerel amenge o Petar keda vakergja kaj o sveti duh vodingja e manušen so pišingje i Biblija?

⁹ Savi slika manglja te kerel amenge o Petar keda vakergja kaj o sveti duh vodingja e manušen so pišingje i Biblija? Slično oblik  taro grčko glagol koristingja hem o Luka, kova so pišingja o lil Dela, keda kergja lafi bašo jekh brodi kova so sine ingardo tari bavlal (Dela 27:15). Jekh biblisko izučuvači vakerela kaj o Petar koristingja jekh „interesno metafora taro moreplovstvo“ keda pišingja kaj o sveti duh vodingja e bibliska pisatelen. O Petar, ustvari vakergja kaj, sar so jekh brodi tano ingardo tari bavlal dži ko krajo taro patujbe, isto agjaar o bibliska prorokija hem pisatelija sine ingarde taro sveti duh te šaj te keren pli zadača. O isto izučuvači sporedingja e Biblijakere pisatelen e brodencar kola so „phravena sine pumare edrija“. O Jehova kergja plo delo agjaar so dela sine „bavlal“, javere lafencar, o sveti duh, a ola dena sine plo delo agjaar so sine poslušna ko vodstvo adale duhoskoro.

10-11. Kola duj bukja valjani te kera te šaj te vodinel amen o sveti duh? Vaker primer.

¹⁰ Džangjola pe, avdive o Jehova na koristinela plo sveti duh te vodinel nekas te pišinel bibliska lila. Ama, ov ponadari da koristinela o sveti duh te vodinel ple narodo. O Jehova panda kerela plo delo. Ama, sar šaj te ovel amen korist taro e Devleskoro sveti duh? Amen da mora ponadari te kera amaro delo. Sar?

¹¹ Razmislin bašo akava primer. Te šaj jekh mornari te iskoristinel i bavlal, mora te kerel duj bukja. Prvo, mora te džal adari kote so isi bavlal. Ustvari, leskoro čamco našti te džal angle ako ov ačhovela ko pristanište kote so nane bavlal. Dujto, mora te vazdel hem te phravel o edrija. Sepak, čak ako phudela bavlal, o čamco šaj te džal angle samo ako astarela le i bavlal. Sar so jekh čamco našti te dvižinel pe bizi bavlal, agjaar amen da našti istrajno te služina e Jehovaske bizo leskoro sveti duh. Ama, amendar adžikerela pe te kera duj bukja. Prvo, mora te mukha o sveti duh te vlijajnel upri amende agjaar so ka dža palo leskoro vodstvo hem ka ova zafatime duhovna aktivnostencar. Dujto, mora te „vazda“  hem celosno te „phrava o edrija“ agjaar so ka učestvujna ko adala aktivnostija najšukar so šaj (Ps. 119:2). Keda ka kera akala duj bukja, o sveti duh ka del amen sila te šaj ponadari da te služina e Jehovaske verno džikote resaja ko e Devleskoro nevo sveto.

12. So ka dikha akana?

¹² Dikhlem ko kola duj načinija pomožinela amenge o sveti duh. Ov dela amen sila hem pomožinela amenge te ačhova verna keda isi amen nevolje. Osven adava, o sveti duh vodinela amen te dža anglal hem pomožinela amenge te ačhova ko drumo kova so ingarela dži ko večno životo. Akana ka dikha štar bukja so mora te kera te šaj te ovel amen celosno pomoš taro adava duho.

13. Sprema 2. Timotej 3:16, 17, sar šaj i Biblija te vlijajnel upri amende, ama so mora amen te kera?

¹³ Prvo, valjani te proučina e Devleskoro Lafi. (Čitin 2. Timotej 3:16, 17.) O Devel koristingja plo duho te šaj te „čhivel“ ple misle ki godi e bibliska pisatelenge. Keda čitinaja i Biblija hem razmislinaja bašo adava, e Devleskere sovetija khuvena ki amari godi hem ko amaro vilo. Adala lafija so avena taro Devel pottikninena amen te kera promene ko amaro životo te šaj te kera e Jehovaskiri volja (Evr. 4:12). Ama, te šaj te ovel amen celosno pomoš taro sveti duh, mora te odvojna vreme redovno te proučina i Biblija hem hor te razmislina bašo adava so čitinaja. Tegani e Devleskoro Lafi ka vlijajnel upro amare lafija hem postapke.

14. a) Soske šaj te vakera kaj o sveti duh tano prisutno ko amare sostanokija? b) Sar šaj te ova prisutna ko sostanokija „phravde edrencar“?

¹⁴ Dujto, valjani zaedno te obožavina e Devle (Ps. 22:22). E Jehovaskoro duho tano prisutno ko amare sostanokija (Otk. 2:29). Soske šaj te vakera akava? Adaleske so, keda khedaja amen amare phralencar hem phenjencar ko amare dvorane, amen molinaja amen bašo sveti duh, giljavaja gilja kola so temelinena pe ko e Devleskoro lafi hem šunaja o bibliska pouke so vakerena len o phralja imenujme e sveti duhoja. O isto sveti duh pomožinela e phenjenge te spreminen hem te ikeren pumare zadače. Ama, te šaj te ovel amen celosno pomoš taro sveti duh, mora te ava spremna ko sostanok te šaj te komentarina. Agjaar, ki simbolično smisla, siem prisutna ko sostanok „phravde edrencar“.

15. Sar pomožinela amenge o sveti duh ki služba, hem so mora te kera amen?

¹⁵ Trito, valjani te propovedina. Keda koristinaja i Biblija džikote propovedinaja hem sikavaja e javeren, mukhaja o sveti duh te pomožinel amen ki služba (Rim. 15:18, 19). Ama, te šaj te ovel amen celosno pomoš taro sveti duh, mora redovno te propovedina hem te koristina i Biblija sekogaš keda šaj. Šaj te kera pošukar lafi ki služba ako koristinaja o predlogija bašo razgovor taro Amaro životo hem služba — listija spremibaske.

16. Kova tano o najdirektno način sar šaj te dobina o sveti duh?

¹⁶ Štarto, valjani te molina amen e Jehovaske (Mat. 7:7-11; Luka 11:13). Najdirektno način sar šaj te dobina o sveti duh tano agjaar so ka molina e Jehova te del le amenge. Ništo našti te čhinavel amare molitve te resen dži ko Jehova hem ništo našti te čhinavel o sveti duh so dela amenge o Jehova te resel dži amende — ni o zatvor, pa čak ni o Satana (Jak. 1:17). Sar valjani te molina amen te šaj te ovel amen celosno pomoš taro sveti duh? Te šaj te džana o odgovor, te dikha nešto podetalno baši molitva tari jekh sporedba soj pišimi ko e Lukaskoro evangelie. *

17. So sikljovaja baši molitva tari e Isuseskiri sporedba soj pišimi ko Luka 11:5-9, 13?

¹⁷ Čitin Luka 11:5-9, 13. Akale sporedbaja o Isus sikavela ko savo način valjani te molina bašo sveti duh. O manuš tari sporedba dobingja adava so valjani sine leske adaleske so sine uporno. Ov na darandilo te rodel pomoš taro plo amal iako sine kasno rakjate. * Sar povrzingja o Isus akaja sporedba e molitvaja? Ov vakergja: „Molinen tumen, hem ka del pe tumenge! Roden, hem ka arakhen! Khuven, hem ka phravel pe tumenge!“ So sikljovaja taro akava? Te šaj te dobina pomoš taro sveti duh, mora uporno te molina e Jehova te del le amenge.

18. Sprema e Isuseskiri sporedba, soske šaj te ova sigurna kaj o Jehova ka del amen plo sveti duh?

¹⁸ E Isuseskiri sporedba isto agjaar pomožinela amenge te haljova soske o Jehova ka del amen sveti duh. O manuš tari sporedba manglja šukar te grižinel pe ple amaleske. Ov manglja te ikalel leske hajbaske iako alo kasno rakjate, ama na sine le so te del le. O Isus vakergja kaj o komšija dengja le maro soske ov uporno rodingja lestar adava. So manglja te sikavel amen o Isus akalea? Ako jekh nesovršeno manuš tano spremno te pomožinel nesave komšijaske soj tano doborom uporno, kobor poviše amaro šukar Dad soj ko nebo ka pomožinel okolenge so uporno molinena le bašo sveti duh! Adaleske, šaj te ova sigurna kaj o Jehova ka odgovorinel ko amare molitve keda taro vilo ka roda sveti duh (Ps. 10:17; 66:19).

19. Soske šaj te ova sigurna kaj ka pobedina?

¹⁹ Iako o Satana nikogaš na čhinavela te napadinel amen, šaj te ova sigurna kaj ka pobedina. Soske? Adaleske so o sveti duh pomožinela amenge ko duj načinija. Prvo, dela amen sila te šaj te izdržina o problemija. Dujto, adaja tani sila koja so vodinela amen te dža anglal hem pomožinela amenge ponadari da te služina e Jehovaske džikote na resaja ko leskoro nevo sveto. Te ova odlučna te ovel amen celosno korist tari pomoš so dela amen o sveti duh!