1. So dozvolinela amenge o Jehova te kera?

O JEHOVA dozvolinela amenge te odlučina sar ka živina. Ov sikavela amen sar te ana šukar odluke. A keda anaja odluke kola so kerena le bahtalo ov pomožinela amen uspešno te ikera amen ki lende (Ps. 119:173). Kobor poviše primeninaja o mudra sovetija taro e Devleskoro Lafi, doborom pošukar odluke ka ana (Evr. 5:14).

2. Save problemija šaj ka oven amen otkeda ka ana nesavi odluka?

² Ama, čak ako anaja nesavi mudro odluka, šaj te ovel amenge pharo te završina adava so počmingjem te kera. Te dikha nesave primerija: Jekh terno phral odlučinela te čitinel celo Biblija. Nekobor kurke ov redovno čitinela, ama palo adava tari nesavi pričina ov čhinavela. Jekh phen odlučinela te služinel sar opšto pioneri, ama sekogaš odložinela o datum keda te počminel. O starešine taro jekh sobranie zaedno odlučinena te keren poviše pastirska posete ko phralja hem phenja taro sobranie, ama nakhle nekobor masekija a ola panda na počmingje te keren adava. Akala situacie tane različna, ama isi len nešto zaedničko. O manuša angje odluke, ama na kergje adava so odlučingje. E hristijanen taro prvo veko ko Korint sine len slična problemija. Te dikha so šaj te sikljova lendar.

3. Savi odluka angje o Korinkjanja, ama so slučingja pe?

³ Okolu 55 berš a.e., o Korinkjanja angje jekh važno odluka. Ola šungje kaj lengere phralja ko Erusalim hem ki Judeja mučinena pe sine soske sine but čorole, hem kaj o javera sobranija khedena prilogija te šaj te pomožinen lenge. Adaleske so sine sočuvstvitelna hem darežliva, o Korinkjanja odlučingje te den prilog e čorole phralenge,  hem pučle e Pavle sar šaj te keren adava. O Pavle bičhalgja upatstvija e sobranieske hem zamolingja e Tite te pomožinel ko khedibe o prilogija (1. Kor. 16:1; 2. Kor. 8:6). Ama, palo nekobor masekija o Pavle šungja kaj o Korinkjanja na kergje adava so odlučingje. Adaleske lengoro poklon nane te ovel sine spremno ko vreme te šaj te ingarel pe ko Erusalim zaedno e prilogoncar taro javera sobranija.

4. Sar so dikhaja taro 2. Korinkjanite 8:7, 10, 11, ko so ohrabringja o Pavle e phralen taro Korint?

⁴ O Korinkjanja angje šukar odluka, hem o Pavle falingja len baši lengiri bari vera hem baši lengiri iskreno želba te sikaven darežlivost. Ama isto agjaar, ov mora sine te ohrabrinel len te završinen adava so počmingje. (Čitin 2. Korinkjanite 8:7, 10, 11.) Taro lengoro primer sikljovaja kaj čak e verna hristijanenge šaj te ovel pharo te keren adava so odlučingje.

5. Bašo kola pučiba ka kera lafi?

⁵ Slično sar o Korinkjanja, šaj amenge da tano pharo te kera adava so odlučingjem. Soske? Adaleske so siem nesovršena, šaj odložinaja o bukja. Ili, nesave nepredvidena bukja šaj te keren te ovel amenge pharo te kera adava so odlučingjem (Prop. 9:11; Rim. 7:18). Sar šaj te preispitina nesavi amari odluka hem te dikha dali valjani te menina la? Hem, sar šaj te završina adava so odlučingjem te kera?

6. Soske šaj ka valjanel te menina nesavi odluka?

⁶ Nesave važna odluke nikogaš nane te menina len. Na primer, cvrsto ikeraja amen ki amari odluka te služina e Jehovaske hem odlučna siem te ačhova verna amare bračno partnereske (Mat. 16:24; 19:6). Ama, šaj ka valjani te menina nesave javera odluke. Soske? Adaleske so o okolnostija meninena pe. Kola bukja ka pomožinen amenge te ana o najšukar odluke so šaj?

7. Baši so valjani te molina amen, hem soske?

⁷ Molin tut baši mudrost. Preku o sveti duh, o Jehova pottikningja e Jakove te pišinel: „Ako nekaske tumendar falinela mudrost, neka rodel taro Devel, soske ov dela darežlivo sarinenge“ (Jak. 1:5). Šaj te vakerel pe kaj ko nesavo način sarinenge amenge „falinela mudrost“. Adaleske rode vodstvo taro Jehova keda anea nesavi odluka, ama hem keda preispitinea adaja odluka. Agjaar, o Jehova ka pomožinel tuke te ane mudra odluke.

8. Savo istražibe valjani te kere angleder te ane nesavi odluka?

⁸ Temelno istražin. Proverin so pišinela ko e Devleskoro Lafi, čitin o publikacie tari e Jehovaskiri organizacija hem ker lafi adalencar kaste so šaj te ovel tut doverba (Izr. 20:18). Asavko istražibe tano but važno angleder te odlučine te menine tli buti, te seline tut ko javer than ili te birine škola so ka pomožinel tuke te izdržine tut džikote služinea e Jehovaske.

9. Soske tano šukar te ispitina amare motivija keda anaja odluke?

⁹ Ispitin tle motivija. O Jehova ispitinela amaro vilo, a adava značinela kaj tane leske važna amare motivija (Izr. 16:2). Keda ispitinaja amen, dikhaja kola tane amare motivija. Valjani šukar te razmislina kola čače tane o pričine baši amari odluka. Ustvari, ako ispitinaja so isi amen čače ko vilo sikavaja kaj siem iskrena. Ako taro pogrešno motivi anaja nesavi odluka, ka ovel amenge pharo te ikera amen ki late keda ka oven problemija. Na primer, jekh terno phral odlučinela te počminel pionersko službaja. Ama, palo nesavo vreme, pharo leske te ispolninel o odredimo broj saatija, hem poviše na uživinela ki služba. Soske? Ov šaj mislingja peske kaj o glavno motivi te služinel sar pioneri sine leske i želba te kerel bahtalo e Jehova. Ama, dali šaj leskoro  glavno motivi sine i želba te ugodinel ple roditelenge ili nekaske javereske?

10. So valjani amenge te šaj te kera promene?

¹⁰ Razmislin baši situacija jekhe interesenteskiri kova so odlučinela te čhinavel e pušibaja. Ko početok, ov uspejnela ko adava jekh ili duj kurke iako leske pharo, ama palo adava palem počminela te pušinel. Palo nesavo vreme konečno uspejnela te čhinavel adale navikaja! Leskoro mangipe sprema o Jehova hem i želba te kerel le bahtalo pomožingje leske te pobedinel i lošno navika (Kol. 1:10; 3:23).

11. Soske valjani te čhive tuke konkretna celija?

¹¹ Čhiv tuke konkretna celija. Ako isi tut konkretna celija ka ovel tuke polokho te ispolnine len. Na primer, šaj ka odlučine počesto te čitine i Biblija. Ama, ako na kerea tuke konkretno raspored, šaj nane te ispolnine adaja cel. * Ili, o starešine ko jekh sobranie šaj ka odlučinen počesto te keren pastirska posete ko phralja hem phenja, ama iako nakhlja nesavo vreme ola panda na počmingje te keren adava. Te šaj te uspejnen ko adava, ola šaj te pučen pe pučiba sar akala: „Dali razmislingjem kole phralenge hem phenjenge posebno valjanela pastirsko poseta? Dali razmislingjem keda točno te posetina len?“

12. So šaj ka valjani te kere, hem soske?

¹² Ov realno. Nikas amendar nane le vreme, sredstvija hem sila te kerel sa adava so bi mangela te kerel. Adaleske ov realno hem razumno. Keda ka ovel potrebno, šaj ka valjani te menine nesavi odluka baši koja so ka haljove kaj našti te ispolnine la (Prop. 3:6). Ama, te vakera kaj preispitingjan tli odluka, kergjan o promene so valjani hem mislinea kaj šaj te završine adava so odlučingjan. Te dikha pandž bukja so šaj te pomožinen tuke te završine adava so počmingjan te kere.

13. Sar šaj te dobine i sila so valjani tuke te šaj te kere adava so odlučingjan?

¹³ Molin tut baši sila. O Devel šaj te del tut sila te kere adava so odlučingjan (Fil. 2:13). Adaleske molin e Jehova te del tut sveti duh te šaj te ovel tut i sila so valjani tuke. Ponadari da molin tut čak keda mislinea kaj panda na dobingjan odgovor ko tle molitve. Sar so vakergja o Isus: „Molinen tumen, hem ka del pe tumenge [sveti duh]!“ (Luka 11:9, 13).

14. Sar o načelo taro Izreki 21:5 šaj te pomožinel tuke te kere adava so odlučingjan?

¹⁴ Ker plani. (Čitin Izreki 21:5, fus.) Te šaj te završine nesavi buti so počmingjan te kere la, valjani tuke plani. Palo adava valjani te ikere tut ko adava plani. Slično, keda anea nesavi odluka, ker tuke spisako bukjencar so valjani te kere len te šaj te ispolnine adava so odlučingjan. Keda valjani te završine nesavi pophari zadača, šukar tano te deline la ko potikne zadače. Sekogaš keda ka završine nesavi taro akala potikne zadače, ka ovel tut jasno slika bašo adava dži kaj resljan. O Pavle pottikningja e Korinkjanen te čhiven ki strana delo taro ple sredstvija „sekova prvo dive taro kurko“ namesto te adžikeren hem te probinen te kheden prilogija keda ka resel ov (1. Kor. 16:2). Adava so ka deline nesavi pophari zadača ko nekobor potikne zadače, ka pomožinel tuke te na ove obeshrabrimo mislindor kaj našti te završine la.

15. So šaj te kere otkeda ka kere plani?

¹⁵ Ako pišinea adava so planirinea te kere, ka ovel tuke polokho te ispolnine adava (1. Kor. 14:40). Na primer, o starešinstva dobinena upatstvija te birinen jekhe  starešina so ka pišinel sekoja odluka so anela o starešinstvo, isto agjaar koj tano birimo koja odluka te završinel hem dži keda valjani te završinel pe. Keda o starešine kerena agjaar, tegani ka ovel lenge polokho te keren adava so odlučingje (1. Kor. 9:26). Tu da šaj te kere nešto slično e bukjencar so kerea len sekova dive. Na primer, sekova dive šaj te kere tuke spisako e bukjencar so valjani te završine len adava dive hem prvo ko spisako pišin i najvažno buti so valjani te kere la. Akava ka pomožinel tuke te završine adava so počmingjan hem te kere poviše bukja bašo po hari vreme.

16. So javer tano but važno ako mangea te kere adava so odlučingjan, hem sar o Rimjanite 12:11 sikavela adava?

¹⁶ De tutar sa. Te šaj te završine adava so počmingjan, valjani te trudine tut te ikere tut ko tlo plani. (Čitin Rimjanite 12:11.) O Pavle vakergja e Timoteeske ponadari da te koncentririnel pe ko sikajbe hem te istrajnel ko adava te šaj te ovel pošukar učiteli. Adava sovet važinela bašo javera da duhovna celija (1. Tim. 4:13, 16).

17. Sar šaj o sovet taro Efešanite 5:15, 16 te pomožinel tuke te kere adava so planiringjan?

¹⁷ Mudro koristin tlo vreme. (Čitin Efešanite 5:15, 16.) Birin vreme keda ka kere adava so odlučingjan hem iker tut ko adava. Ma adžiker te oven tut sovršena okolnostija te počmine te kere adava so planiringjan, soske najverojatno nikogaš nane te oven tut asavke okolnostija (Prop. 11:4). Ma mukh o pohari važna bukja te len tlo vreme hem sila so valjanena tuke te šaj te kere o považna bukja (Fil. 1:10). Ako šaj, birin vreme keda o javera verojatno nane te čhinaven tut ko adava so kerea. Vaker e javerenge kaj valjani tuke vreme te koncentririne tut. Šaj te ačhave tlo telefoni, te proverine tle elektronska porake ili o socijalna mreže pokasno. *

18-19. So šaj te pomožinel tuke te na otkažine tut tari nesavi šukar odluka čak keda adava nane lokho?

¹⁸ Mislin ko rezultati. O rezultati tari tli odluka tano sar jekh cel taro jekh patuvanje. Ako čače mangea te rese ki adaja cel, nane te čhinave te patujne čak ako o drumo tano phanlo hem čak ako mora te dža taro javer drumo te šaj te rese dži adari. Slično, ako mislinaja ko rezultatija taro amare odluke, nane lokheste te otkažina amen keda ka oven amen pharipa ili prečke (Gal. 6:9).

¹⁹ Nane lokho te ane šukar odluke hem šaj te ovel pharo te kere adava so odlučingjan. Ama o Jehova ka pomožinel tut, ka del tut i mudrost hem i sila so valjanena tuke te šaj te završine adava so počmingjan te kere.