1, 2. a) Sar vlijajnena upri amende o promene so na adžikeraja len? (Dikh i slika ko početok tari statija.) b) Sprema o Psalm 131, so šaj te pomožinel amenge te ovel amen andruno mir?

OTKEDA o Lojd hem i Aleksandra služingje poviše taro 25 berš ko Betel, ola dobingje nevi zadača te služinen sar pionerija. Ko početok ola sine tažna. O Lojd vakerela: „I betelsko služba uli delo mandar. Iako haljovava sine o pričine baši promena, ama ko kurke hem masekija palo adava but puti borinava man sine negativna čuvstvoncar. Mle emocie meninena pe sine sigate — jekh momenti sium sine pozitivno, a javer momenti osetinava man sine razočarimo“.

² Ponekogaš ko amaro životo šaj te oven amen promene so na adžikergjem len, a adava šaj te kerel te ova but sekirime hem te ovel amen stres (Izr. 12:25). So ka pomožinel amenge te ačhova smirime keda amenge pharo te prifatina o promene? (Čitin Psalm 131:1-3.) Te dikha  sar nesave Devleskere sluge taro purano vreme hem avdive uspejngje te ovel len andruno mir keda lengoro životo meningja pe taro jekh puti.

3. Sar meningja pe e Josifeskoro životo taro jekh puti?

³ Razmislin bašo Josif. Taro sa e Jakoveskere čhave, ov sine leske najmanglo. Adaleske, leskere phralja sine but ljubomorna. Keda e Josife sine le 17 berš, ola bikingje le sar robo (1. Moj. 37:2-4, 23-28). Okolu 13 berš o Josif mučinela pe sine ko Egipet, prvo sar robo, a palo adava sar zatvoreniko. O Josif sine dur taro plo dad, o Jakov, kaste so but mangela sine. So pomožingja leske te na našavel pli nadež hem te na ovel holjamo?

4. a) So kergja o Josif keda sine ko zatvor? b) Sar odgovoringja o Jehova ko molitve e Josifeskere?

⁴ Džikote sine ko zatvor, o Josif sigurno razmislinela sine bašo adava sar o Jehova pomožingja leske (1. Moj. 39:21; Ps. 105:17-19). Šaj razmislinela sine hem bašo proročka sune so sine le džikote sine poterno. Akava uveringja le kaj o Jehova tano lea (1. Moj. 37:5-11). Ov verojatno but puti phravela sine plo vilo e Jehovaske ki molitva (Ps. 145:18). O Jehova odgovoringja leske ko molitve agjaar so uveringja le kaj ka ovel lea bizi razlika so ka slučinel pe (Dela 7:9, 10). * (Dikh i fusnota.)

5. Sar šaj „o mir taro Devel“ te vlijajnel upri amende?

⁵ Bizi razlika ki kobor phari situacija arakhljovaja, amen da šaj te ovel amen „o mir taro Devel“ kova so ka arakhel amari godi hem ka kerel te ova smirime. (Čitin Filipjanite 4:6, 7.) Adaleske, keda siem sekirime ili isi amen stres, „o mir taro Devel“ ka del amen sila ponadari da te služina leske hem te na otkažina amen. Te dikha nesave primerija taro amare phralja hem phenja kola so doživingje akava.

6, 7. Sar šaj o molitve te pomožinen amenge palem te ovel amen andruno mir? Vaker primer.

⁶ Keda o Rajan hem i Džuliet šungje kaj nane više te služinen sar privremena specijalna pionerija, but obeshrabringje pe. O Rajan vakerela: „Odma molingjem amen e Jehovaske. Džanaja sine kaj akana tano o vreme keda valjani te sikava doverba ki leste. Ko amaro sobranie sine but neve objavitelija hem adaleske molinaja amen sine te sikava vera hem te ova šukar primer“.

⁷ Sar o Jehova odgovoringja ki lengiri molitva? O Rajan vakerela: „Odma pali molitva, o negativna čuvstvija hem o griže našavdile. E Devleskoro mir arakhlja amare vile hem amari godi. Halilem kaj o Jehova ponadari da šaj te koristinel amen samo ako isi amen ispravno stavi“.

8-10. a) Sar šaj te pomožinel amenge e Devleskoro duho keda isi amen muke hem problemija? b) Sar šaj o Jehova te pomožinel amenge ako čhivaja o duhovna bukja ko prvo than?

⁸ E Devleskoro duho šaj te smirinel amen hem isto agjaar šaj te vodinel  amen ko nesave bibliska stihija kola so ka pomožinen amenge te na bistra soj tano čače najvažno ko životo. (Čitin Jovan 14:26, 27.) Razmislin bašo Filip hem i Meri, bračno pari kova so služinela sine ko Betel skoro 25 berš. Štare masekonge mule e soldujengere daja, a e Filipestar mulo panda jekh dženo tari leskiri familija, isto agjaar mora sine te grižinen pe e Meriskere dadeske kole so sine le demencija.

⁹ O Filip vakerela: „Mislinava sine kaj šukar ikljovava ko krajo e situacijaja, ama nešto falinela sine. Tegani ki jekh statija proučibaske tari Stražarsko kula dikhljum o stiho taro Kološanite 1:11. Sium sine istrajno, ama na ki celosno smisla e lafeskiri. Mora sine celosno te istrajnav strplivo hem bahtalo. Akava stiho setinkerela man kaj mlo bahtalipe na zavisinela taro mle okolnostija, nego taro adava kobor mukhava e Devleskoro duho te vlijajnel ko mlo životo“.

¹⁰ Adaleske so o Filip hem i Meri čhivgje o duhovna bukja ko prvo than, o Jehova dengja len bereketi ko but načinija. Kratko vreme otkeda iklile taro Betel, o solduj džene počmingje te proučinen i Biblija interesentencar so šukar napredujnena sine hem kola so mangle te proučinen poviše puti ko kurko. I Meri vakerela: „Ola kerena sine te osetina amen bahtale. Preku lende o Jehova sar te phene mangela sine te vakerel amenge kaj sa ka ovel šukar“.

11, 12. a) Sar o Josif dengja prilika e Jehovaske te del le bereketi? b) Sar nagradingja o Jehova e Josife?

¹¹ Keda ka meninel pe o životo taro jekh puti, šaj te ova doborom but sekirime so ka mislina samo ko amare problemija. Akava šaj sine te slučinel pe e Josifeske da. Ama, namesto adava, ov odlučingja te kerel sa so šaj ko ple okolnostija hem agjaar te del prilika e Jehovaske te del le bereketi. O Josif dengja pestar sa te šaj šukar te kerel sekoja zadača so dobinela la sine taro zatvorsko čuvari, isto sar so kerela sine pli buti ko Petefri (1. Moj. 39:21-23).

¹² Jekh dive, o Josif dobingja zadača te grižinel pe duje zatvorenikonge kola so angleder služinena sine ki palata e faraoneskiri. Adaleske so o Josif sine lencar šukar, o solduj džene osetinena pe sine slobodna te vakeren leske so mučinela len. Ola vakergje leske o čudna sune so sine len i  rat angleder (1. Moj. 40:5-8). Ko adava momenti o Josif na džanela sine kaj akava razgovor ka kerel ov te ovel oslobodimo. Duj berš palo adava, ov sine mukhlo taro zatvor hem ulo mokjno vladeteli — dujto manuš ko Egipet, odma palo faraoni! (1. Moj. 41:1, 14-16, 39-41).

13. Sar šaj te da prilika e Jehovaske te del amen bereketi bizi razlika save tane amare okolnostija?

¹³ Slično sar o Josif, amen da šaj te arakhljova ki situacija upri koja so nane amen nisavi kontrola. Ama, ako siem strpliva hem keraja sa so šaj ki adaja situacija, ka da e Jehovaske prilika te del amen bereketi (Ps. 37:5). Šaj ponekogaš siem bunime hem sekirime, ama nikogaš nane te ova bizi nadež (2. Kor. 4:8). O Jehova ka ovel amencar, posebno ako trudinaja amen i služba te ačhovel amenge ko prvo than.

14-16. Sar o propovedniko o Filip čhivgja i služba ko prvo than iako meningje pe leskere okolnostija?

¹⁴ O propovedniko o Filip tano but šukar primer adaleske so i služba ačhili leske ko prvo than bizi razlika save promene sine le ko životo. Ov uživinela sine ki pli nevi zadača ko Erusalim (Dela 6:1-6). Ama, taro jekh puti, sa meningja pe. Otkeda o Stefan sine mudardo, počmingja surovo progonstvo protiv o hristijanja hem adaleske ola našle taro Erusalim. O Filip mangela sine te ačhovel zafatimo ki služba bašo Jehova, adaleske gelo ki Samarija, kote so o manuša valjani sine te šunen o šukar haberi (Mat. 10:5; Dela 8:1, 5).

¹⁵ O Filip sine spremno te džal segde kaj so vodingja le e Devleskoro duho. Adaleske o Jehova šaj sine te koristinel le te propovedinel ko thana kote so o manuša panda na šungje o šukar haberi. E Filipe na sine le predrasude, a adava but značinela sine e Samarjanenge soske but Evreija dikhena sine ki lende sar potele hem ponašinena pe sine lencar lošno. Adaleske na iznenadinela amen so sarine šunena le sine (Dela 8:6-8).

¹⁶ Palo adava, e Devleskoro duho ingargja e Filipe ko Azot hem ki Cezareja, duj dizja ko kola so sine but manuša so na sine Evreija (Dela 8:39, 40). Tegani leskoro životo palem meningja pe. Ulo le familija hem ponadari da živinela sine ko podračje kote so alo te propovedinel. Ama, iako o okolnostija leskere meningje pe, ov ponadari da čhivela sine i služba ko prvo than, adaleske o Jehova dengja  leske hem leskere familijake bare bereketija (Dela 21:8, 9).

17, 18. Sar adava so ka ova koncentririme ki služba ka pomožinel amenge ako isi amen nesave promene ko životo?

¹⁷ But džene so služinena sar polnovremena sluge vakerena kaj adava so čhivena i služba ko prvo than pomožinela lenge te ačhoven bahtale hem pozitivna iako ponekogaš lengere okolnostija meninena pe. Keda o Ozborn hem i Polajt, bračno pari tari Južnoafrikansko Republika, iklile taro Betel, mislingje kaj ka ovel lenge lokho te arakhen than živibaske hem te arakhen buti pohari saatencar. O Ozborn vakerela: „Žalno tano adava so našti sine te arakha buti doborom sigate sar so mislingjem“. I Polajt vakerela: „Trin masek na arakhlem buti, a na sine amen ništo ki strana. Na sine ni hari lokho“.

¹⁸ Sar uspejngje te ikljoven ko krajo akale phare situacijaja? O Ozborn vakerela: „Adava so propovedinaja sine e phralencar taro sobranie pomožingja amenge te ačhova pozitivna hem te koncentririna amen ko adava soj najvažno. Namesto samo te beša hem te ova zagrižime, odlučingjem te ova zafatime ki služba hem adava kergja amen but bahtale. Ponadari da rodaja sine segde buti hem ko krajo uspejngjem te arakha“.

19-21. a) So ka pomožinel amenge te arakha amaro andruno mir? b) Savi korist šaj te ovel amen ako prilagodinaja amen ko neve okolnostija?

¹⁹ Akala primerija jasno sikavena kaj ako koristinaja amare okolnostija najšukar so šaj hem ako isi amen doverba ko Jehova, ka arakha amaro andruno mir bizi razlika so ka ovel. (Čitin Mihej 7:7.) Sar so ka nakhel o vreme, šaj ka haljova kaj adalea so prilagodingjem amen ko neve okolnostija ulem panda popaše e Jehovaja. I Polajt vakerela kaj otkeda iklili taro Betel, halili so značinela te ovel tut doverba ko Jehova čak keda tuke najpharo.  Oj vakerela: „Mlo amalipe lea ulo panda pozoralo“.

²⁰ I Meri, kola so spomningjem la angleder, panda grižinela pe bašo plo dad hem služinela sar pioneri. Oj vakerela: „Sikliljum kaj keda sium sekirimi, valjani te ačhovav, te molinav man hem te opuštinav man. Verojatno najvažno nešto so sikliljum tano te mukhav o bukja ko e Jehovaskere vasta, a adava ka ovel panda považno ko vreme so avela“.

²¹ O Lojd hem i Aleksandra, kolen so spomningjem ko početok tari statija, priznajnena kaj adava so meningje pe lengere okolnostija ispitingja lengiri vera ko način so na adžikergje le. Ama ola vakerena: „O ispitija sikavena dali isi amen čačutni vera hem dali tani dovolno zorali te šaj te del amen sila hem uteha ko phare vremija. Ola pomožinena amenge te ova pošukar manuša“.

22. Ko so šaj te ova uverime ako keraja sa so šaj ki amari situacija?

²² Ko akava sveto, amaro životo šaj sigate te meninel pe. Šaj te dobina javer zadača ki služba bašo Jehova, šaj te oven amen problemija sastipaja ili neve familijarna odgovornostija. Ama, bizi razlika so ka ovel, ov uverimo kaj o Jehova grižinela pe tuke hem ka pomožinel tut ko pravo vreme (Evr. 4:16; 1. Pet. 5:6, 7). Dži tegani, ker sa so šaj ki tli situacija. Molin tut tle Dadeske, e Jehovaske, hem sikljov te ovel tut celosno doverba ki leste. Agjaar, bizi razlika save ka oven tle okolnostija, sekogaš ka ovel tut andruno mir kova so avela taro Jehova.