1, 2. Savi bari zadača sine e Isus Navine otkeda mulo o Mojsej?

O JEHOVA vakergja e Isus Navineske: „Mlo sluga o Mojsej mulo. Adaleske akana ušti, nakh o Jordan, tu hem sa akava narodo hem džan ki phuv koja so dava la lenge“ (Is. Nav. 1:1, 2). Akaja sine bari promena e Isus Navineske kova so sine pomošniko e Mojsejeske skoro 40 berš!

² O Mojsej vodinela sine e Izraelcon but vreme, adaleske o Isus Navin šaj pučela pe sine dali o narodo ka prifatinel le sar vodači (5. Moj. 34:8, 10-12). Jekh biblisko priračniko bašo Isus Navin 1:1, 2 pišinela: „Hem ko purano vreme hem avdive, najnesigurno hem najpharo vreme jekhe narodoske tano keda avela nevo vodači“.

3, 4. Savo bereketi dobingja o Isus Navin adaleske so sine le doverba ko Jehova hem so šaj te puča amen?

³ E Isus Navine sine le šukar pričine te sekirinel pe. Ama, sine le doverba ko Jehova hem odma postapingja  sprema leskere upatstvija (Is. Nav. 1:9-11). Adaleske, o Jehova dengja le bereketi hem bičhalgja angeli te vodinel le hem e Izraelcon. Akava angeli najverojatno sine o Lafi — e Devleskoro prvobijamo Čhavo (2. Moj. 23:20-23; Jovan 1:1).

⁴ O Jehova pomožingja e Izraelconge sigate te prilagodinen pe ki promena keda o Isus Navin ulo lengoro nevo vodači. Amen da živinaja ko vreme keda isi bare promene. Adaleske šaj pučaja amen: „Džikote e Devleskiri organizacija sigate džala angle, dali isi amen šukar pričine te ovel amen doverba ko Isus, o vodači so o Devel dengja le amenge?“ (Čitin Matej 23:10.) Te šaj te odgovorina ko akava pučibe, ka dikha sar o Jehova vodinela sine ple narodo ko purano vreme keda sine promene.

5. So slučingja pe e Isus Navineske paše uzo Erihon? (Dikh i slika ko početok tari statija.)

⁵ Kratko otkeda o Izraelcija nakhle i reka Jordan, e Isus Navineske slučingja pe nešto neobično. Paše uzo Erihon, ov dikhlja jekhe manuše so ikerela sine mači ko vas. O Isus Navin pučlja e manuše: „Dali sian tari amari strana ili tari strana amare dušmanengiri?“ Iznenadingja pe keda o manuš vakergja kaj tano „o knezi e Jehovaskere vojskakoro“, javere lafencar o vodači adale vojskakoro, kova so sine spremno te braninel e Devleskere narodo. (Čitin Isus Navin 5:13-15.) Iako ko javera thana taro akava izveštaj pišinela kaj o Jehova kerela sine lafi e Isus Navinea, ov ustvari koristingja akale angele te kerel lea lafi, sar so kergja but puti angleder (2. Moj. 3:2-4; Is. Nav. 4:1, 15; 5:2, 9; Dela 7:38; Gal. 3:19).

6-8. a) Soske nesave upatstvija so dengja o Jehova šaj te dikhjon sine čudna? b) So sikavela kaj o upatstvija sine mudra hem dende ko ispravno vreme? (Dikh hem i fusnota.)

⁶ O angeli vakergja e Isus Navineske so točno valjani sine te kerel te šaj te osvojnel o Erihon. Ko početok šaj te dikhjol sine čudno adava so vakergja leske o angeli. Na primer, o Jehova vakergja leske te obrežinen pe sa o murša. Akava ka značinel sine kaj našti te borinen pe nekobor dive. Dali čače sine mudro te obrežinen pe baš tegani? (1. Moj. 34:24, 25; Is. Nav. 5:2, 8).

⁷ O vojnikija šaj pučena pe sine: „Sar ka zaštitina amare familien ako o dušmanja napadinena amaro logori?“ Ama, tegani ulo nešto so na adžikergje! Namesto te napadinen e Izraelcon, o manuša taro Erihon darandile lendar. Ki Biblija pišinela: „O Erihon phanlja ple porte soske darandilo taro Izraelcija hem nikoj na khuvela sine ni na ikljola sine“ (Is. Nav. 6:1). Akava haberi sigurno panda poviše bajrargja e Izraelcongiri doverba ko e Jehovaskoro vodstvo.

⁸ O angeli isto agjaar vakergja e Isus Navineske kaj o Izraelcija na valjani te napadinen o Erihon. Namesto adava, ola valjani sine te phiren okolu i diz o naredna šov dive po jekh puti, a o eftato dive adava valjani sine te keren le efta puti. Šaj nesave vojnikija mislinena peske sine: „Soske džabe trošinaja amaro vreme hem sila?“ Ama o Jehova, o nevidlivo Vodači e Izraelcongoro, točno džanela sine so kerela. Adava so šungje o upatstvija kergja e Izraelcongiri vera pozorali hem na valjani sine te borinen pe protiv o  vojnikija taro Erihon (Is. Nav. 6:2-5; Evr. 11:30). * (Dikh i fusnota.)

9. Soske valjani te šuna o upatstvija tari e Devleskiri organizacija? Vaker primer.

⁹ So šaj te sikljova taro akava izveštaj? Šaj ponekogaš na haljovaja celosno soske e Jehovaskiri organizacija kerela o bukja ko nesavo nevo način. Na primer, šaj ko početok pučaja amen sine dali tano šukar te koristina elektronska uredija bašo lično proučibe, ki služba ili ko sostanokija. Akana verojatno haljovaja kobor tano važno te koristina len — džangjola pe, ako isi amen prilika te kera adava. Keda dikhaja o šukar rezultatija taro asavke promene, amari vera hem amaro jekhipa ovena pozorale.

10. Koj vodingja o bukja te šaj o vodečko telo te ikerel adava važno sostanok ko Erusalim?

¹⁰ Nakhle otprilika 13 berš otkeda o Kornelij, kova so na sine obrežimo hem na sine Evrei, ulo hristijani. Ama, nesave hristijanja so sine Evreija panda vakerena sine kaj o hristijanja mora te obrežinen pe (Dela 15:1, 2). Keda ki diz Antiohija alo dži ko akošibe maškar o phralja, o starešine odlučingje te bičhalen e Pavle ko Erusalim ko vodečko telo te šaj te rešinel pe akava problemi. Ama koj čače angja adaja odluka? O Pavle vakergja: „Geljum soske dobingjum objava taro nebo“. Jasno, o Hristos sine adava so vodinela sine o bukja ko asavko način  te šaj o vodečko telo te rešinel akava problemi (Gal. 2:1-3).

11. a) Savo stavi sine ponadari da nesave hristijanen so sine Evreija bašo obrežuvanje? b) Sar o Pavle sikavgja kaj spremno poddržinela e starešinen taro Erusalim? (Dikh hem i fusnota.)

¹¹ O Hristos vodingja e vodečko telo te del jasno upatstvo kaj o hristijanja so na sine Evreija na valjani te obrežinen pe (Dela 15:19, 20). Ama, beršencar palo adava, but hristijanja so sine Evreija ponadari da obrežinena sine ple čhaven. Ko adava vreme, širingje pe lafija kaj o Pavle na poštujnela sine e Mojsejeskoro zakoni. Adaleske o starešine taro Erusalim rodingje lestar te kerel nešto kolea so ka sikavel kaj poštujnela o Zakoni * (Dikh i fusnota.) (Dela 21:20-26). Vakergje leske te lel pea štare dženen, te čistinel pe sprema o obred zaedno lencar hem te khuvel ko hrami. Agjaar o manuša ka šaj sine te dikhen kaj o Pavle poštujnela o Zakoni. O Pavle šaj sine te vakerel: „Čače nane smisla so kerena akava! Soske rodena nešto asavko mandar? O hristijanja soj Evreija isi len problemi, a na me — ola na dikhena ispravno ko obrežuvanje“. Ama, o Pavle halilo kaj o starešine mangle te ikeren o jekhipe maškar o hristijanja, adaleske ponizno šungja len. Ama, šaj te puča amen: „Soske o Isus mukhlja akava problemi te trajnel doborom vreme, iako e Mojsejeskoro zakoni čhinavgja te važinel keda o Isus mulo?“ (Kol. 2:13, 14).

12. Soske šaj o Hristos mukhlja te nakhel nesavo vreme angleder celosno te rešinel o problemi bašo obrežuvanje?

¹² Nesave manušenge valjani poviše vreme te prifatinen nesavo nevo haljojbe. Nesave hristijanenge da so sine Evreija valjani sine vreme te meninen plo stavi (Jovan 16:12). Na sine lenge lokho te prifatinen kaj o obrežuvanje nane više znako kaj tane ko posebno odnos e Devlea (1. Moj. 17:9-12). Javera na mangena sine te razlikujnen pe taro Evreija maškar kola so živinena sine, soske darana sine kaj ka oven progonime (Gal. 6:12). Ama, sar nakhela sine o vreme, o Hristos dengja len poviše upatstvija ko pismija so pišingja len o Pavle (Rim. 2:28, 29; Gal. 3:23-25).

13. So ka pomožinel amenge te prifatina o vodstvo so dela amen o Hristos avdive?

¹³ O Hristos panda vodinela o hristijansko sobranie avdive. Adaleske, ako našti celosno te haljova nesavi promena ki organizacija, šukar tano te razmislina bašo način sar o Hristos vodinela sine e Devleskere narodo ko purano vreme. Hem ko vreme e Isus Navineske hem ko prvo veko, o Hristos sekogaš dela sine mudro vodstvo e Devleskere slugenge te šaj te zaštitinel  len, te kerel lengiri vera pozorali hem te pomožinel lenge te ačhoven ko jekhipe (Evr. 13:8).

14-16. Sar o upatstvija so dobinaja len preku „o verno hem razborito robo“ sikavena kaj o Hristos mangela te pomožinel amenge amari vera te ačhovel zorali?

¹⁴ Avdive o Isus mangipaja grižinela pe amenge agjaar so ko pravo vreme dela amen upatstvija preku „o verno hem razborito robo“ (Mat. 24:45). O Mark, kas so isi štar čhave, vakerela: „O Satana probinela te kerel poslaba o sobranija agjaar so napadinela e familien. Ama, amen siem pottiknime sekova kurko te ikera i Familijarno rat. Akava jasno sikavela kaj o poglavarija mora te zaštitinen ple familija“.

¹⁵ Keda dikhaja sar o Hristos vodinela amen, ka haljova kaj ov mangela te pomožinel amenge amari vera te ačhovel zorali. Na primer, jekh starešina so vikinela pe Patrik vakergja. „Nesave sine obeshrabrime keda počmingjem te kheda amen ko tikne grupe propovedibaske ko vikendija“. Ama, ov vakerela kaj akala promene sikavena sar o Isus grižinela pe sekole jekheske ko sobranie. Na primer, nesave phralja hem phenja soj tane ladžutne ili so na džana sine često ki služba akana osetinena pe po potrebna hem po korisna ko sobranie. Akava kergja pozorali lengiri vera.

¹⁶ O Hristos isto agjaar pomožinela amenge te ova koncentririme ki amari služba, a adaja tani najvažno buti so kerela pe avdive ki Phuv. (Čitin Marko 13:10.) O Andre, jekh nevo starešina, sekogaš trudinela pe te ikerel pe ko neve upatstvija ki e Jehovaskiri organizacija. Ov vakerela: „Adava so tiknilo o personali ko podružnice jasno sikavela kaj o vreme sigate nakhela hem kaj mora te da amendar sa te šaj te koncentririna amen ko propovedibe“.

17, 18. Soske tano šukar te razmislina baši korist so isi amen adaleske so prifatingjem o promene?

¹⁷ O vodstvo so dobinaja taro Isus Hristos, amaro Cari, ka pomožinel amenge akana hem ki idnina. Adaleske, te razmislina baši korist so sine amen bašo adava so prifatingjem o promene so slučingje pe sigende. Ki tumari Familijarno rat, šaj te keren lafi bašo adava sar pomožingje tumenge o promene povrzime e sostanokoncar ili e službaja.

¹⁸ Ako na bistraja kaj amari poslušnost ko upatstvija tari e Jehovaskiri organizacija anela but šukar rezultatija, ka ovel amenge polokho te prifatina o vodstvo so dobinaja le hem te ova bahtale. Na primer, štedinaja pare adaleske so na pečatinaja doborom literatura sar angleder. Hem adaleske so koristinaja nevi tehnologija, panda poviše manuša šaj te šunen o šukar haberi. Dali amen da šaj počesto te koristina o elektronska publikacie hem o videoklipija? Akava tano jekh način sar poddržinaja o vodstvo taro Hristos, kova so mangela mudro te koristina o sredstvija so isi amare organizacija.

19. Soske valjani te poddržina o vodstvo so dela o Hristos?

¹⁹ Keda poddržinaja o vodstvo taro Hristos, pomožinaja amare phralenge hem phenjenge te ovel len pozorali vera hem pobaro jekhipe. Bašo adava so tiknilo o personali ki betelsko familija ko celo sveto, o Andre vakergja: „O šukar stavi okolengoro so iklile taro Betel hem prilagodingje pe ko promene bajrarela mli doverba hem mlo cenenje. Ola ačhovena ko čekor e Jehovaskere kočijaja agjaar soj tane bahtale džikote kerena sekoja zadača soj lenge dendi“.

20, 21. a) Soske šaj te ovel amen doverba ko amaro Vodači, o Hristos? b) Bašo kova pučibe ka kera lafi ki javer statija?

²⁰ Panda hari amaro Vodači, o Isus Hristos, ka pobedinel hem „ka kerel bukja so anena dar“ (Otk. 6:2; Ps. 45:4). Ama, panda akana ov spreminela ple narodo bašo životo ko nevo sveto, keda ka sikava adalen so ka voskresninen hem ka pomožina i Phuv te ovel raj.

²¹ Sa džikote isi amen doverba ko amaro Vodači hem Cari bizi razlika so ka slučinel pe, ov ka ingarel amen ko nevo sveto. (Čitin Psalm 46:1-3.) Avdive, o promene šaj te oven phare, posebno keda vlijajnena upri amende ko način so na adžikergjem. Sar šaj tegani te ovel amen andruno mir hem zorali vera ko Jehova? Bašo akava ka kera lafi ki javer statija.