1, 2. a) So sine najvažno e Isuseske ko životo hem soske? b) So valjani te kera te šaj te ova uspešna „Devleskere sorabotnikija“?

O ISUS HRISTOS sine stolari hem palo adava učiteli (Mar. 6:3; Jovan 13:13). Ov sovršeno kerela sine solduj bukja. Sar stolari siklilo sar te koristinel o alatija te šaj te kerel korisna predmetija taro kaš. A sar učiteli, ov koristingja adava so šukar pendžarela sine o sveta spisija te šaj te pomožinel e obično narodoske te haljovel o čačipe taro e Devleskoro Lafi (Mat. 7:28; Luka 24:32, 45). Keda e Isuse sine le 30 berš, ov čhinavgja te ovel stolari hem ulo učiteli soske džanlja kaj adava tano najvažno. Ov vakergja kaj jekh taro pričine soske o Devel bičhalgja le ki Phuv sine te propovedinel o šukar haberi bašo e Devleskoro Carstvo (Mat. 20:28; Luka 3:23; 4:43). Ov čhivgja i služba bašo Jehova ko prvo than ko plo životo hem mangela sine o javera da te keren adava (Mat. 9:35-38).

² Iako poviše džene amendar nane stolarija, sarine amen sikavaja e javeren bašo šukar haberi. Akaja zadača tani doborom važno so o Devel da tano vklučimo ki late. Ustvari, baši amende vakerela pe kaj siem „e Devleskere sorabotnikija“ (1. Kor. 3:9; 2. Kor. 6:4). Složinaja amen  e psalmistea kova so vakergja e Jehovaske: „Celo tlo lafi tano čačipe“ (Ps. 119:159, 160). Adaleske mangaja ispravno te koristina „o lafi e čačipaskoro“ ki služba. (Čitin 2. Timotej 2:15.) Adaleske trudinaja amen pošukar te koristina i Biblija, soske oj tani amari najglavno publikacija kolaja so sikavaja e javeren bašo Jehova, bašo Isus hem bašo Carstvo. Ama, te šaj te ova uspešna ki amari služba, e Jehovaskiri organizacija dengja amen panda nekobor glavna publikacie kola so valjani te džana šukar te koristina len.

3. So valjani te ovel amenge najvažno ko akava kratko vreme so ačhilo hem sar o lafija taro Dela 13:48 ka pomožinen amenge ko adava?

³ O glavna publikacie službake tane kerde te šaj te sikava e manušen. Keda nekoj propovedinela, objavinela o haberi. Ama, keda sikavela, trudinela pe te objasninel adava haberi te šaj o manuš te haljovel hem te ovel pottiknimo te kerel adava so sikljovela. Ko akava kratko vreme so ačhilo, najvažno buti mora te ovel amenge te počmina bibliska kursija e manušencar hem te sikava len bašo čačipa. Akava značinela revno te roda okolen so ispravno dikhena ko večno životo hem te pomožina lenge te služinen e Jehovaske. (Čitin Dela 13:44-48.)

4. Sar šaj te arakha okolen so ispravno dikhena ko večno životo?

⁴ Sar šaj te arakha okolen so ispravno dikhena ko večno životo? E hristijanenge taro prvo veko edinstveno način te arakhen len sine agjaar so ka propovedinen. O Isus vakergja ple učenikonge: „Keda ka khuven ki nesavi diz ili gav, roden okole soj tano dostojno“ (Mat. 10:11). Amen da valjani isto te kera. Džangjola pe, okola so nane iskrena, soj gorda ili na interesinela len bašo Devel, nane te mangen te šunen bašo šukar haberi. Amen rodaja okolen soj iskrena, ponizna hem okolen so čače mangena te džanen o čačipe. Akava šaj te sporedina le adalea so o Isus kerela sine sar stolari. Ov najangle valjani sine te arakhel kaš taro kova so šaj sine te kerel mebel, udara, jarem ili nešto javer. Otkeda ka arakhel o ispravno kaš, šaj sine te koristinel ple alatija hem ple veštine te šaj te kerel o predmeti so mangela sine. Amen da valjani te postapina slično džikote trudinaja amen te sikava e iskrena manušen te oven učenikija (Mat. 28:19, 20).

5. So valjani te džana bašo glavna publikacie so koristinaja len ki služba? Vaker primer. (Dikh o slike ko početok tari statija.)

⁵ Sekova alati isi le pli funkcija. Na primer, razmislin bašo alatija so koristinela len sine o Isus. * (Dikh i fusnota.) Valjani leske sine alatija te merinel hem te beležinel o grede, te čhinel, te kerel dupke hem te oblikujnel o kaš, isto agjaar valjani sine leske alatija te ramnonel hem te spojnel o razna delija. Slično, sekoja taro amare glavna publikacie službake isi la pli cel. Te dikha sar šaj te koristina akala važna publikacie.

6, 7. a) Sar koristinea o vizit-kartičke? b) Soske koristinaja o pokane bašo sostanokija?

⁶ Vizit-kartičke. Iako tane tikne, ola tane but delotvorna, soske pomožinena e manušenge te džanen koj siem  hem ingarena len ki jw.org. Keda nekoj ka phravel amari internet-stranica, šaj te džanel nešto poviše baši amenge hem čak te rodel biblisko kursi. Dži akana preku amari internet-stranica poviše taro 400.000 manuša rodingje te proučinen i Biblija hem but džene sekova dive ponadari da rodena! Šukar tano te phirave tuja nekobor vizit-kartičke te šaj te koristine len keda ka ovel tut prilika te kere nekasaja lafi ko teko e diveskoro.

⁷ Pokane. Ki pokana bašo amare sostanokija pišinela: „Kaninaja tu te sikljove tari Biblija e Jehovaskere svedokoncar“. Palo adava, dende tane duj načinija sar šaj te kerel pe adava — „ko amare sostanokija“ ili „nekoj te sikavel tu“. Agjaar, preku i pokana o manuša šaj te džanen koj siem amen, a isto agjaar dela pe prilika okolenge „soj svesna kaj valjani lenge o Devel“ te proučinen i Biblija amencar (Mat. 5:3). Džangjola pe, sarine šaj slobodno te aven ko amare sostanokija bizi razlika dali mangena te proučinen ili na. Ako avena ko amare sostanokija, ka dikhen kaj but šaj te sikljoven tari Biblija.

8. Soske tano važno o manuša barem jekh puti te aven ko amare sostanokija? Vaker primer.

⁸ Važno tano ponadari da te kanina e manušen te aven ko sostanokija barem jekh puti. Soske? Ako avena, ka dikhen kaj e Jehovaskere svedokija sikavena o čačipe tari Biblija hem pomožinena e manušenge te pendžaren e Devle, a i hovavni religija na kerela adava (Isa. 65:13). Na primer, jekh bračno pari taro SAD, o Rej hem i Linda, halile akava angleder nekobor berša. Ola verujnena sine ko Devel hem mangena sine te džanen nešto poviše baši leste. Adaleske odlučingje te posetinen sa o crkve ki pumari diz hem te dikhen koja crkva ka pherel lengere duj uslovija. O prvo uslov sine te sikljoven nešto ki adaja crkva, a o dujto o manuša tari adaja crkva te uraven pe agjaar sar so ličinela e Devleskere slugenge. Valjani sine lenge nekobor berša soske sine but crkve. Ama, otkeda gele ko sa o crkve, sine but razočarime. Na siklile ništo, a o vernikija taro adala crkve na uravena pe sine ko način sar so ličinela e Devleskere slugenge. Keda iklile tari posledno crkva taro pumaro spisako, i Linda geli ki buti, a o Rej cidingja te džal peske khere. Džikote džala peske sine, nakhlja tari dvorana e Jehovaskere svedokongiri. Ov vakergja peske: „Soske te na khuvav hem te dikhav so isi akate?“ Adava so dikhlja hem šungja, mukhlja leske baro vpečatok! Sarine ki dvorana sine ljubezna lea hem sine uravde pristojno. O Rej bešlja ko prvo redo hem but svidžingja pe leske adava so siklilo. Akava setinkerela amen ko adava sar o Pavle opišingja nekas kova so prvo puti avela ko sostanok hem vakerela: „Čače o Devel tano maškar tumende!“ (1. Kor. 14:23-25). Palo adava, o Rej džala sine ko sekova sostanok nedela, a palo nesavo vreme hem ko sekova sostanok ko rabotna dive. I Linda isto agjaar počmingja te džal lea ko sostanokija hem iako sine len poviše taro 70 berš, ola proučingje i Biblija hem krstingje pe.

9, 10. a) Soske o traktatija tane lokhe koristibaske? b) Sar valjani te koristina o traktati So i e Devleskoro Carstvo?

⁹ Traktatija. Isi amen ofto traktatija kola so pomožinena amenge  lokheste te počmina razgovor e manušencar. Ola počmingje te ikljoven ko 2013 berš hem dži akana sine pečatime okolu pandž milijarde primerokija! Akala traktatija tane kerde ko isto način, adaleske keda ka sikljove te koristine jekh lendar, ka džane te koristine len sa. Sar šaj te koristine akala traktatija te šaj te počmine razgovor nekasaja?

¹⁰ Na primer, ako mangea te koristine o traktati So i e Devleskoro Carstvo?, sikav e manušeske o pučibe tari prvo strana hem puč le: „Dali nekogaš pučljan tut soj tano e Devleskoro Carstvo? So ka vakere tu...“ Tegani sikav leske o trin odgovorija hem mukh ov te birinel jekh. Bizo te vakere dali leskoro odgovor tano točno ili na, phrav o traktati ko delo „So vakerela i Biblija“ hem čitin o stihija soj dende, Daniel 2:44 hem Daniel 7:14. Ko krajo, puč le o pučibe tari posledno strana soj ko delo „Razmislin“: „Savo ka ovel o dživdipe keda ka vladinel e Devleskoro Carstvo?“. Šaj te odgovorine leske ko akava pučibe keda ka dža leste javer puti. Tegani, šaj te sikave leske i 7 lekcija tari brošura Šukar haberi taro Devel!, koja soj tani jekh taro glavna publikacie kolencar so šaj te počmina biblisko kursi nekasaja.

11. Koja tani i cel amare spisaniengiri hem so valjani te džana baši lende?

¹¹ Spisanija. I Stražarsko kula hem o Razbudete se! tane najpečatime hem najprevedime spisanija ko sveto! Adaleske so o manuša taro but phuvja čitinena akala spisanija, o teme tari naslovno strana tane kerde te oven interesna e manušenge ko celo sveto. Valjani te koristina akala spisanija te šaj te pomožina e manušenge te razmislinen bašo adava soj tano čače važno ko životo. Ama, prvo valjani te džana kova spisanie kole manušeske odgovorinela.

12. a) Kaske tano kerdo o Razbudete se! hem koja tani leskiri cel? b) Kola šuže iskustvija sine tut ko posledno vreme keda dengjan akava spisanie?

¹² O spisanie Razbudete se! tano kerdo manušenge kola so na džanena skoro ništo baši Biblija. Šaj na džanena ništo bašo hristijanska sikljojba, nane len doverba ki religija, ili na halile kaj i Biblija šaj te pomožinel lenge ko životo. I glavno cel akale spisanieskiri tani te uverinel okolen so čitinena kaj isi Devel hem kaj i Biblija tani čače e Devleskoro Lafi (Rim. 1:20; Evr. 11:6; 1. Sol. 2:13). O trin teme baši 2018 berš tane: „Koj e patot do srekjata?“, „12 tajni za srekjno semejstvo“ hem „Pomoš za užalenite“.

13. a) Kaske tano kerdo o spisanie Stražarsko kula so daja le ki služba? b) Kola šuže iskustvija sine tut ko posledno vreme keda dengjan akava spisanie?

¹³ I glavno cel e spisanieskiri Stražarsko kula so daja le ki služba tano te objasninel o bibliska sikljojba manušenge so više isi len nesavo cenenje bašo Devel hem baši Biblija. Ola šaj džanena nešto baši Biblija, ama na haljovena šukar adava so pišinela ki late (Rim. 10:2; 1. Tim. 2:3, 4). O trin teme bašo 2018 berš odgovorinena ko akala pučiba: „Biblijata — zastarena ili korisna?“, „Što ni nosi idninata?“ hem „Dali Bog se griži za tebe?“

14. a) Soske tane kerde o glavna štar videoklipija? b) Kola šuže iskustvija sine tut keda sikavgjan akala videoklipija?

¹⁴ Videoklipija. Ko vreme e Isuseskoro, o stolarija koristinena sine samo račno alati. Ama, avdive koristinena različna električna alatija hem mašine džikote kerena predmetija taro kaš. Keda avdive propovedinaja, osven o pečatime publikacie, šaj te sikava e manušenge hem šuže videoklipija. O glavna videoklipija so valjani te koristina len ki služba tane: Soske te sikljove tari Biblija?, Sar šaj te sikljove tari Biblija?, So kerela pe ki e Jehovaskere svedokongiri dvorana? hem E Jehovaskere svedokija — koj siem amen? O videoklipija soj potikne taro duj minutija šaj te koristina len ko prvo razgovor. O pobare videoklipija šaj te koristina len ko povtorna posete hem ko okola so isi len poviše vreme. Akala but šuže videoklipija šaj te pottikninen e manušen te proučinen i Biblija hem te aven ko amare sostanokija.

15. So vakergje nesave otkeda dikhle amare videoklipija ki pumari čhib? Vaker primerija.

¹⁵ Na primer, jekh phen arakhlja jekhe manušnja koja so selingja pe tari Mikronezija hem kerela sine ki japsko čhib lafi. Amari phen sikavgja lake o klipi Soske te sikljove tari Biblija? ki japsko čhib. Samo so počmingja o videoklipi, i manušni vakergja „Akava tano ki mli čhib. Našti te verujnav! Taro način sar kerela lafi šaj te dikhav kaj tano taro mlo ostrov. Kerela lafi ki mli čhib!“ Palo adava vakergja kaj ka phravel amari internet-stranica te šaj te čitinel hem te dikhel sa so isi ki lakiri čhib. (Sporedin Dela 2:8, 11.) Razmislin bašo javer iskustvo. Jekh phen taro SAD bičhalgja ple unukoske, kova so živinela ko javer kontinenti, link taro isto videoklipi ki leskiri čhib. Otkeda dikhlja o videoklipi, ov bičhalgja lake imejl kote so pišingja: „Posebno sine mange interesno adava so sine vakerdo baši zlobno duhovno ličnost koja so vladinela e svetoja. Rodingjum biblisko kursi.“ Akava tano posebno interesno soske živinela ki phuv kote so amare aktivnostija tane ograničime.

16. Objasnin bašo so tane kerde sekoja jekh taro akala brošure: a) Šun e Devle hem živin večno. b) Šukar haberi taro Devel! c) Koj kerela e Jehovaskiri volja avdive?

¹⁶ Brošure. Sar šaj te sikave bašo čačipe nekas so na džanela šukar te čitinel ili keda ki leskiri čhib nane amen bibliska publikacie? Šaj te koristina i brošura Šun e Devle hem živin večno. * (Dikh i fusnota.) Javer but šukar publikacija kolaja so šaj te počmine biblisko kursi nekasaja tani Šukar haberi taro Devel! Šaj te sikave leske o 14 teme ki paluni strana hem te puče le koja taro adala teme interesinela le. Palo adava počminen te proučinen adaja lekcija. Dali probingjan akava ko tle povtorna posete? I trito brošura so koristinaja la tani Koj kerela e Jehovaskiri volja avdive? Oj tani kerdi te sikavel e interesenten baši amari organizacija. Te šaj te sikljove sar te koristine akaja brošura, dikh ko Amaro životo hem služba  sar hristijanja — listija spremibaske taro mart 2017 berš.

17. a) Bašo so konkretno tane kerde o duj lila proučibaske? b) So valjani te keren okola so krstinena pe hem soske?

¹⁷ Lila. Otkeda ka počmine te proučine nekasaja nesavi brošura, šaj ko bilo kova vreme te počminen e lilea So sikavela amen i Biblija? Akava lil šaj te pomožinel e interesenteske panda pošukar te pendžarel o osnovna bibliska sikljojba. Ako završinena akava lil, a o interesenti šukar napredujnela, valjani te prodolžinen e lilea Začuvaj ja Božjata ljubov. * (Dikh i fusnota.) Akava lil ka pomožinel leske te sikljovel sar te primeninel o bibliska načelija ko plo životo. Ma bistre, čak otkeda ka krstinel pe, valjani ponadari da te proučinel sa džikote na završinela o solduj lila. Akava ka pomožinel leske te ovel le zorali vera ko Jehova hem te ačhovel leske verno. (Čitin Kološanite 2:6, 7.)

18. a) Ko so pottikninena amen o lafija taro 1. Timotej 4:16 hem savo ka ovel o rezultati taro adava? b) Koja tani amari cel džikote koristinaja amare glavna publikacie službake?

¹⁸ Sar Jehovaskere svedokija, isi amen zadača te sikava e manušen bašo čačipe, ili javere lafencar bašo šukar haberi kova so šaj te ingarel len dži ko večno životo. (Kol. 1:5; čitin 1. Timotej 4:16.) Te šaj te kera adava, šaj te koristina o glavna publikacie službake. (Dikh i ramka „ Glavna publikacie službake“.) Adaleske, te sikljova te koristina akala publikacie najšukar so šaj. Sekova jekh amendar šaj te odlučinel koja publikacija ka koristinel hem keda. Ama, amen na mangaja samo te delina literatura hem te da literatura e manušenge so nane len interes. Amari cel tani te kera učenikija taro manuša soj iskrena, ponizna hem čače mangena te pendžaren e Devle — okola so „ispravno dikhena ko večno životo“ (Mat. 28:19, 20; Dela 13:48).