1-2. a) So ka objavinen panda hari o svetska vodačija? b) Bašo kola pučiba valjani te džana o odgovor?

ZAMISLIN tuke kaj o svetska vodačija samo so dengje i objava bašo „mir hem sigurnost“ koja so but vreme adžikeraja la. Šaj ka falinen pe kaj o sveto nikogaš angleder na sine doborom bezbedno than. O svetska vodačija ka mangen te mislina kaj ola šaj te rešinen sa o problemija ko sveto. Ama, ola ko nisavo način ka našti te čhinaven o bukja so ka slučinen pe palo adava. Soske? Adaleske so i Biblija prorokujngja kaj ola „iznenadeno ka oven uništime“ hem kaj našti te našen (1. Sol. 5:3).

² Valjani te džana o odgovor taro nekobor važna pučiba: So ka slučinel pe ki „bari nevolja“? So ka adžikerel amendar o Jehova te kera ko adava vreme? Hem sar šaj te spremina amen panda akana te šaj te ačhova leske verna ki bari nevolja? (Mat. 24:21).

3. Sprema Otkrovenie 17:5, 15-18, sar o Devel ka uništinel „o Baro Vavilon“?

³ Čitin Otkrovenie 17:5, 15-18. „O Baro Vavilon“ ka ovel uništimo! Sar so vakergjem angleder, o narodija ko nisavo način ka našti te čhinaven o bukja so ka slučinen pe tegani. Soske? Adaleske so o Devel ka čhivel „ko lengere vile te keren adava so ov mangela“.  So mangela o Devel? Te uništinen o svetsko carstvo e hovavne religijakoro, ki koja soj vklučimo hem o hristijansko sveto. * O Devel ka čhivel ko vilo e deše šingenge e lole zveroskere te keren adava so ov mangela. O „deš šinga“ prestavinena sa e politička silen kola so poddržinena „e lole zvero“ — o Obedineta nacie (Otk. 17:3, 11-13; 18:8). Keda adala svetska vlade ka iranen pe protiv i hovavni religija, adava ka ovel znako kaj počmingja i bari nevolja. Adava ka ovel strašno nastan kova so ka vlijajnel upro sekova jekh ki Phuv!

4. a) Sar o svetska vodačija šaj te probinen te opravdinen plo napad upri hovavni religija? b) So verojatno ka keren o manuša so sine angleder členija ko adala religie?

⁴ Na džanaja kola pričine ka vakeren o svetska vodačija te šaj te opravdinen plo napad upro Baro Vavilon. Šaj ka vakeren kaj o religie ko sveto tane pričina soske nane mir maškar o narodo hem kaj sekogaš mešinena pe ki politika. Ili šaj ka vakeren kaj adala religie khedingje peske but baro barvalipe hem imot (Otk. 18:3, 7). Keda o svetska vodačija ka napadinen e hovavne religija verojatno nane te uništinen sarinen soj členija ko adala religie. Namesto adava, izgleda ola ka napadinen o religie. Otkeda ka oven uništime, okola so angleder sine lengere členija ka haljoven kaj o verska vodačija hovavgje len hem verojatno ka vakeren kaj nane len ništo adale religiencar.

5. So vetingja o Jehova baši bari nevolja, hem soske?

⁵ I Biblija na otkrinela amenge kobor vreme ka trajnel o uništibe e Bare Vaviloneskoro. Ama džanaja kaj sa adava nane te trajnel but vreme (Otk. 18:10, 21). O Jehova vetingja kaj ka čhinavel o dive adale nevoljakere te šaj te na oven uništime okola soj „birime“ hem i čačutni religija (Mar. 13:19, 20). Ama, so ka adžikerel o Jehova te kera otkeda ka počminel i bari nevolja pa sa dži ki vojna Armagedon?

6. Osven so valjani te cida amen tari hovavni religija, so javer valjani te kera?

⁶ Sar so dikhlem ki angluni statija, o Jehova adžikerela leskere sluge te ciden pe taro Baro Vavilon. Ama, nane dovolno samo te čhinava sa e bukjencar so povrzinena amen e hovavne religijaja. Mora te ova odlučna ponadari da verno te služina e Jehovaske, e čačutne Devleske. Te dikha ko save duj načinija šaj te kera adava.

7. a) Sar šaj cvrsto te ikera amen ko e Jehovaskere pravedna moralna merilija? b) Sar o sovet taro Evreite 10:24, 25 pomožinela amenge te haljova kobor tane važna o sostanokija, hem soske adava tano važno posebno akana?

⁷ Prvo, mora ponadari da cvrsto te ikera amen ko e Jehovaskere pravedna moralna merilija. Na smejnaja te prifatina o nemoralno ponašibe e manušengoro taro sveto. Na primer, na odobrinaja nisavo nemoral, sar soj brako maškar manuša taro isto pol hem javera homoseksualna vrske (Mat. 19:4, 5; Rim. 1:26, 27). Dujto, mora ponadari da te obožavina e Jehova zaedno amare phralencar hem phenjencar. Akava keraja sekogaš keda šaj ko amare dvorane, ama ako našti, tegani khedaja amen ko amare phralengere khera ili ko javera thana, čak hem garavindor. Bizi razlika so ka slučinel pe, na smejnaja te čhinava te dža redovno ko amare sostanokija. Ustvari, kobor so dikhaja kaj avela „popaše o dive“, valjani te ova panda poodlučna te na mukha amare sostanokija. (Čitin Evreite 10:24, 25.)

8. Ko savo način verojatno ka meninel pe amaro haberi ki idnina?

⁸ Džikote trajnela i bari nevolja, o haberi so propovedinaja le verojatno ka meninel pe. Avdive amen propovedinaja o šukar haberi bašo Carstvo hem trudinaja amen te sikava e manušen baši Biblija. Ama, tegani najverojatno hrabro hem direktno ka vakera o haberi kova so i Biblija sporedinela le bare kukudikaja (Otk. 16:21). Šaj ka vakera kaj e Satanaskoro sveto panda hari ka ovel uništimo. Keda ka avel vreme bašo adava, o Jehova ka otkrinel amenge so točno ka ovel amaro haberi hem ko savo način ka vakera le. Dali ka koristina o ista metode kola so koristinaja len ki služba poviše taro 100 berš ili ka koristina nesave javera metode? Mora te adžikera hem te dikha. Sar hem te ovel, verojatno ka ovel amen čest hrabro te vakera e Jehovaskoro haberi baši osuda! (Ezek. 2:3-5).

9. Sar o manuša najverojatno ka reagirinen ko amaro haberi, ama ko so šaj te ova sigurna?

⁹ Najverojatno amaro haberi ka čhivel e manušen te probinen jekh puti zasekogaš te čhinaven amaro propovedibe. Isto sar avdive so isi amen doverba kaj o Jehova ka pomožinel amen ki amari služba, agjaar tegani da ka valjani amenge leskiri pomoš. Šaj te ova sigurna kaj amaro Devel ka del amen sila te šaj te kera leskiri volja (Mih. 3:8).

10. Sar soj prorokujmo ko Luka 21:25-28, sar ka reagirinen poviše manuša ko adava so ka slučinel pe ki bari nevolja?

¹⁰ Čitin Luka 21:25-28. Džikote trajnela i bari nevolja, o manuša ka oven šokirime keda ka dikhen sar rušinela pe sa adava so mislingje kaj tano trajno hem stabilno. Ka oven ki „muka“ hem ka daran bašo plo životo džikote trajnela o najpharo periodi ki manušikani istorija (Sof. 1:14, 15). Ko adava vreme, o životo verojatno ka ovel popharo čak e Jehovaskere narodoske. Adaleske so ponadari da nane te ova delo taro sveto, šaj ka oven amen pharipa. Šaj te na oven amen ni o najosnovna bukja bašo životo.

11. a) Soske e Jehovaskere svedokija ka oven e narodongiri glavno cel? b) Soske na valjani te dara tari bari nevolja?

 ¹¹ Ko jekh momenti, keda o manuša kolengere religie sine uništime ka haljoven kaj e Jehovaskere svedokija ponadari da služinena e Devleske, najverojatno but ka holjanen. Šaj te zamislina amenge kobor bari prašina ka vazden bašo adava hem savo haos šaj ka keren ko socijalna mreže! O narodija hem lengoro vladeteli o Satana ka mrzinen amen soske samo amari religija na sine uništimi. Adava ka značinel kaj na uspejngje ki pli cel te uništinen sa o religie tari Phuv. Tegani amen ka ova lengiri glavno cel. Ko adava momenti, sa o narodija ka oven jekh koalicija koja so ki Biblija vikinela pe „Gog taro Magog“. * Lengiri cel ka ovel sa ple silencar te napadinen e Jehovaskere narodo (Ezek. 38:2, 14-16). Adaleske so panda na džanaja točno sa o detalija, normalno tano džinegde te ova sekirime keda razmislinaja bašo akava. Ama, jekh buti tani sigurno: Na valjani te dara tari bari nevolja. O Jehova ka del amen upatstvija te šaj te preživina (Ps. 34:19). Šaj te isprajna amen hem te vazda amare šere soske ka džana kaj paše tano o vreme keda o Devel ka spasinel amen. *

12. Sar „o verno hem razborito robo“ spreminela amen bašo adava so adžikerela amen ki idnina?

¹² „O verno hem razborito robo“ spreminela amen te ačhova verna e Jehovaske ki bari nevolja (Mat. 24:45). Akava kerela le ko but načinija. Jekh primer tani i programa ko amare kongresija taro 2016-2018 berš. O govorija so sine ikerde ko akala kongresija pottikningje amen ki panda pobari mera te razvina hem te sikava o osobine kola so valjani te oven amen džikote e Jehovaskoro dive avela sa popaše. Te dikha kratko adala osobine.

13. a) So valjani te kera te šaj te ačhova verna e Jehovaske? b) Soske valjani panda akana te ova verna e Jehovaske?

¹³ Vernost: I tema e kongreseskiri bašo 2016 berš sine „Ačhov verno e Jehovaske“. Taro akava kongres siklilem kaj ako isi amen zoralo hem paše amalipe e Jehovaja, ka ačhova leske verna. Setinkergja amen kaj šaj te ova panda popaše e Jehovaja ako molinaja amen leske iskreno taro vilo, hem ako hor proučinaja leskoro Lafi. Adava ka del amenge sila te nakhava čak o najphare problemija. Džikote o krajo e Satanaskere svetoskoro tano sa popaše, amari vernost sprema o Devel hem leskoro Carstvo sigurno ka ovel čhivdi ko panda pobare ispitija. Najverojatno o manuša ponadari da ka asan amenge (2. Pet. 3:3, 4). Jekh taro pričine soske ka keren adava tano adaleske so ka manga te ačhova neutralna iako ka ova čhivde ko sa pobaro pritisok. Mora panda akana te da amendar sa te kera pozorali amari vera te šaj te ačhova verna ki bari nevolja.

14. a) Savi promena ka ovel povrzimi e phralencar so predvodinena ki Phuv? b) Soske ka valjani te ačhova verna ko adava vreme?

¹⁴ Džikote trajnela i bari nevolja, ka ovel promena povrzimi e phralencar so predvodinena ki Phuv. Ko odredimo momenti, sa o pomazanikija kola so panda tane ki Phuv ka oven khedime ko nebo te šaj te učestvujnen ki vojna Armagedon (Mat. 24:31; Otk.  2:26, 27). Akava značinela kaj o Vodečko telo nane više te ovel amencar ki Phuv. Sepak, o baro mnoštvo ponadari da ka ovel organizirimo. Obučime phralja taro javera bakhre ka predvodinen. Ka valjani te sikava kaj siem verna e Jehovaske agjaar so ka poddržina akale phralen hem ka ova poslušna ko vodstvo so ka del len o Devel. Taro adava ka zavisinel dali ka preživina!

15. a) So valjani te kera te šaj te istrajna ko ispitija? b) Soske panda akana mora te istrajna?

¹⁵ Istrajnost: I tema e kongreseskiri bašo 2017 berš sine „Ma otkažin tut!“ Taro akava kongres siklilem sar te istrajna panda poviše te šaj te izdržina o nevolje. Dikhlem kaj amari istrajnost na zavisinela taro adava dali amare okolnostija ka oven pošukar. Ka uspejna te istrajna samo ako isi amen doverba ko Jehova (Rim. 12:12). Nikogaš ma te bistra so vetingja o Isus: „Koj ka istrajnel dži ko krajo, ka ovel spasimo“ (Mat. 24:13). Akava značinela kaj valjani te ačhova verna bizi razlika kobor pharipa ka oven amen. Ako panda akana istrajnaja ko sekova ispit, amari vera ka ovel panda pozorali angleder te počminel i bari nevolja.

16. Taro so zavisinela amari hrabrost, hem sar šaj te ova pohrabra panda avdive?

¹⁶ Hrabrost: I tema e kongreseskiri bašo 2018 berš sine „Ov hrabro!“ Akava kongres setinkergja amen kaj i hrabrost na zavisinela taro amare sposobnostija. Isto sar i istrajnost, i čačutni hrabrost avela tari doverba ko Jehova. Sar šaj te bajrara amari doverba ko Jehova? Agjaar so sekova dive ka čitina leskoro Lafi hem hor ka razmislina bašo adava sar spasingja ple narodo ko purano vreme (Ps. 68:20; 2. Pet. 2:9). Keda o narodija ka napadinen amen ki bari nevolja, ka valjani te ovel amen hrabrost hem doverba ko Jehova sar nikogaš angleder (Ps. 112:7, 8; Evr. 13:6). Ako panda akana isi amen doverba ki leste ka ova hrabra keda ka napadinel amen o Gog. *

17. Soske na valjani te dara taro Armagedon? (Dikh i slika tari naslovno strana.)

¹⁷ Sar so sine vakerdo ki angluni statija, poviše džene amendar celo vreme živinena ko posledna dive. Ama, isto agjaar isi amen  prilika te preživina i bari nevolja. I vojna Armagedon ka ovel o krajo akale svetoskoro. Sepak, amen nane sostar te dara. Soske? Adaleske so adaja ka ovel e Devleskiri vojna (Izr. 1:33; Ezek. 38:18-20; Zah. 14:3). Keda o Jehova ka del zapoved, o Isus Hristos ka vodinel e Devleskere vojska ki vojna. Uzi leste ka oven o voskresnime pomazanikija hem milionija angelija. Ola zaedno ka borinen pe protiv o Satana, leskere demonija hem lengere vojske ki Phuv (Dan. 12:1; Otk. 6:2; 17:14).

18. a) Ko so uverinela amen o Jehova? b) Soske o Otkrovenie 7:9, 13-17 dela tut nadež baši idnina?

¹⁸ O Jehova uverinela amen akale lafencar: „Nisavo oružje soj kerdo protiv tute nane te uspejnel“ (Isa. 54:17). Jekh „baro mnoštvo“ verna sluge e Jehovaskere ka preživinen i bari nevolja hem ponadari da ka služinen leske. (Čitin Otkrovenie 7:9, 13-17.) I Biblija dela amen but pričine te ovel amen nadež baši idnina! Džanaja kaj „o Jehova arakhela adalen soj leske verna“ (Ps. 31:23). Sarine so mangena hem falinena e Jehova ka oven bahtale keda ka dikhen sar ov ka čistinel plo sveto anav tari sekoja ladž (Ezek. 38:23).

19. Savi šuži idnina adžikerela amen?

¹⁹ Zamislin sar ka oven sine opišime o manuša tari 2. Timotej 3:2-5 keda bi kerela pe sine lafi bašo okola so ka živinen ko nevo sveto kote so e Satana nane te ovel le nisavo vlijanie. (Dikh i ramka „ Save ka oven o manuša tegani“.) O phral Džordž Gangas, * kova so služingja sar členi ko Vodečko telo, opišingja adava vreme agjaar: „Kobor šukar ka ovel o sveto keda sa o manuša ka oven phralja hem phenja! Panda hari ka ovel tut čest te živine ko nevo sveto. Ka živine kobor so živinela o Jehova. Ka živina zasekogaš“. Kobor šuži idnina adžikerela amen!