O METEOROLOGO vnimatelno dikhela i radarsko slika. Ov dikhela kaj avela sa popaše jekh opasno bura ko jekh podračje kote so živinena but manuša. Adaleske so sekirinela pe baši e manušengiri bezbednost, ov kerela sa so šaj te predupredinel len angleder te ovel but kasno.

Slično agjaar, o Jehova avdive predupredinela sa e manušen ki Phuv kaj avela jekh „bura“ koja tani but poopasno taro bilo kova nevreme so šaj te šunen le ki nesavi vremensko prognoza. Sar kerela adava? Hem soske šaj te ova sigurna kaj dela dovolno vreme e manušenge te spreminen pe baši adaja „bura“? Te šaj te dobina o odgovor, najangle te dikha save predupreduvanja dengja o Jehova ko purano vreme.

Ko purano vreme, o Jehova dengja predupreduvanja bašo različna „bure“, javere lafencar, osude so sine le namera te anel len upro okola so namerno phagena sine leskere zapovedija (Izr. 10:25; Erem. 30:23). Ki sekoja situacija, predupredinela sine e neposlušna manušen dovolno vreme angleder hem vakerela lenge sine kola promene mora te keren (2. Car. 17:12-15; Neem. 9:29, 30). Adaleske so manglja te postapinen ispravno, o Devel but puti koristinela sine ple verna slugen ki Phuv te šaj te vakeren leskere osude hem te pomožinen e manušenge te haljoven kaj odma valjani te keren nešto (Amos 3:7).

Jekh asavko verno sluga sine o Noe. Ov beršencar bizi dar predupredinela sine e nemoralna hem nasilna manušen, kola so živinena sine ko leskoro vreme, kaj ka ovel Potop (1. Moj. 6:9-13, 17). Osven adava, vakerela lenge sine so mora te keren te šaj te spasinen pe — doborom but so ki Biblija baši leste pišinela kaj „propovedinela sine e Devleskoro pravedno drumo“ (2. Pet. 2:5).

Iako o Noe kergja sa so šaj, o manuša ko adava vreme na mangle te šunen e Devleskoro haberi so vakerela le sine lenge. Ola sikavgje kaj nane len nisavi vera. Sar posledica, mule keda „alo o Potop hem ingargja sarinen“ (Mat. 24:39; Evr. 11:7). Sar so avela sine lengoro krajo, nikoj lendar našti sine te vakerel kaj o Devel na predupredingja len.

Ponekogaš o Jehova predupredinela sine e manušen kratko angleder te anel ple osude. Ama, čak tegani dikhela sine te del dovolno vreme te šaj te keren promene. Na primer, ko purano Egipet ko vreme predupredinela sine angleder te anel sekoja taro deš nevolje. Ov bičhalgja e Mojsee hem e Arone te predupredinen e faraone hem leskere slugen baši eftato nevolja — kukudik so ka kerel bari šteta. Adaleske so ki diz valjani sine tajsutno dive te perel i kukudik, dali šaj sine te vakerel pe kaj o Devel dengja len dovolno vreme te garaven pe hem te spasinen pe tari bura? I Biblija vakerela: „Sa e faraoneskere sluge so darandile taro e Jehovaskoro lafi, garavgje ple slugen hem ple stoka ko khera, a okola so na čhivgje e Jehovaskoro lafi ko plo vilo, mukhle ple slugen hem ple stoka ko nive“ (2. Moj. 9:18-21). Jasno tano kaj o Jehova dengja len dovolno vreme hem okola so sigate reagiringje sine spasime taro najstrašna posledice tari akaja nevolja.

O Jehova predupredingja e faraone hem leskere slugen isto agjaar angleder te anel i dešto nevolja (2. Moj. 4:22, 23). Ama, ola na šungje adava predupreduvanje. Adaleske, lengere prvobijame čhave mule. Kobor žalno! (2. Moj. 11:4-10; 12:29). Dali šaj sine te šunen o predupreduvanje angleder te ovel but kasno? Oja! O Mojsej ko vreme predupredingja e Izraelcon baši dešto nevolja hem dengja len upatstvija sar te spasinen pumare familien (2. Moj. 12:21-28). Kobor džene šungje akala upatstvija? Sprema nesave  procenke, trin milionija manuša. Osven o Izraelcija, sine vklučime Egipkjanija hem poedincija taro javera narodija. Sarine ola sine spasime tari e Devleskiri osuda hem iklile taro Egipet (2. Moj. 12:38, fus.).

Sar so šaj te dikha taro akala primerija, o Jehova sekogaš dela sine dovolno vreme e manušenge te šunen leskere predupreduvanja (5. Moj. 32:4). Soske kerela sine adava? O apostol Petar objasningja kaj o Jehova „na mangela nikoj te ovel uništimo nego sarinen te ovel len prilika te kainen pe“ (2. Pet. 3:9). O Devel čače grižinela pe sine e manušenge. Ov manglja te kainen pe hem te keren o promene so valjani angleder te resel len leskiri osuda (Isa. 48:17, 18; Rim. 2:4).

Avdive da sa o manuša mora odma te šunen o važno predupreduvanje so vakerela pe ko celo sveto. Džikote sine ki Phuv, o Isus vakergja kaj o avdisutno sveto ka ovel uništimo ki jekh „bari nevolja“ (Mat. 24:21). Baši osuda so ka ovel ki idnina, o Isus dengja jekh detalno proroštvo kote so opišingja so ka dikhen hem so ka doživinen leskere sledbenikija džikote avela sa popaše adava vreme. O Isus vakergja kola važna bukja ka slučinen pe ko celo sveto. Amen siem svedokija kaj adava čače ispolninela pe (Mat. 24:3-12; Luka 21:10-13).

Ko sklad akale proroštvoja, o Jehova pottikninela sa e manušen te odlučinen te oven leske poslušna hem te služinen leske. Ov mangela e poslušna manušen te ovel len pošukar životo panda akana hem te doživinen o bereketija so ka ispolninen pe ki idnina ko leskoro pravedno nevo sveto (2. Pet. 3:13). Te šaj te pomožinel e manušenge te ovel len doverba ko leskere vetuvanja, o Jehova dengja o haberi kova so šaj te spasinel lengoro životo — o šukar haberi bašo Carstvo. O Isus angleder vakergja kaj adava haberi „ka propovedinel pe ko celo sveto, bašo svedoštvo sa e narodonge“ (Mat. 24:14). O Devel organiziringja ple čačutne slugen te den „svedoštvo“, javere lafencar, te propovedinen leskoro haberi ko okolu 240 phuvja. O Jehova mangela so poviše manuša te šunen o predupreduvanje hem te spasinen pe tari „bura“ so avela, keda ov ka anel pli pravedno presuda (Sof. 1:14, 15; 2:2, 3).

Sprema adava, o najvažno pučibe nane dali o Jehova dela e manušenge dovolno vreme te šaj te šunen leskere predupreduvanja. O dokazija jasno sikavena kaj ov otsekogaš kerela sine adava. O važno pučibe tano: Dali ola ka šunen e Devleskoro predupreduvanje džikote panda isi vreme? Amen siem e Devleskere glasnikija, adaleske ponadari da te pomožina so šaj poviše manušenge te preživinen o krajo akale svetoskoro.