1. Soske e Jehovaskere sluge tane bahtale? (Dikh i slika ko početok tari statija.)

E JEHOVASKERE SVEDOKIJA tane bahtalo narodo. Sekogaš keda tane zaedno — ko sostanokija, ko kongresija ili keda družinena pe — ola tane bahtale, asana hem kerena lafi. Soske tane doborom bahtale? I glavno pričina tani adaleske so džanena e Jehova, e bahtale Devle. Ola služinena leske hem trudinena pe te postapinen sar leste (1. Tim. 1:11; Ps. 16:11). Taro Jehova avela o bahtalipe, adaleske ov mangela amen da te ova bahtale hem dela amen but pričine bašo adava (5. Moj. 12:7; Prop. 3:12, 13).

2, 3. a) So značinela te ove bahtalo? b) Soske avdive tano pharo te ova bahtale?

² A sar tano tuja? Dali tu sian bahtalo? Te ove bahtalo značinela te osetine tut šukar hem te ove zadovolno ko životo. I Biblija sikavela kaj okolen so isi len bereketi taro Jehova šaj te oven čače bahtale. Ama, ko  sveto ko kova so živinaja avdive, šaj te ovel amenge pharo te ova bahtale. Soske?

³ Nesave phare situacie ko životo šaj te len amaro bahtalipe. Na primer, šaj mulo nekoj taro tle najpaše ili tano isklučimo taro sobranie, šaj razvedingjan tut taro tlo bračno partneri ili našavgjan tli buti. Isto agjaar, šaj te kerel tuke pharo te ove bahtalo ako ki tli familija često akošena tumen, ako tle kolege ili součenikija asana tuke, ako sian progonimo ili ko zatvor adaleske so služinea e Jehovaske. Ili šaj isi tut problemija sastipaja, nesavo hronično nasvalipe ili depresija. Ama ma bistre kaj o Isus Hristos, „o bahtalo hem edinstveno Vladeteli“, mangipaja utešingja e manušen hem pomožingja lenge te oven bahtale (1. Tim. 6:15; Mat. 11:28-30). Ki Propoved ki gora, o Isus spomningja nekobor osobine so šaj te pomožinen amenge te ova bahtale čak keda isi amen but problemija adaleske so živinaja ko sveto e Satanaskoro.

4, 5. So valjani te kera te šaj te ova hem te ačhova bahtale?

⁴ I prvo buti so spomningja la o Isus tani but važno. Ov vakergja: „Bahtale tane okola soj svesna kaj valjani lenge o Devel, soske o Carstvo soj ko nebo tano lengoro“ (Mat. 5:3). Sar šaj te sikava kaj siem svesna kaj valjani amenge o Devel? Agjaar so ka proučina i Biblija, ka šuna e Devle hem i služba e Jehovaske ka čhiva la ko prvo than ko amaro životo. Akala bukja ka pomožinen amenge te ova bahtale. Ola ka bajraren amari vera kaj panda hari ka ispolninen pe e Devleskere vetuvanja. A i but šuži nadež baši koja so pišinela ki Biblija ka ohrabrinel amen (Tit 2:13).

⁵ Ako mangaja te ačhova bahtale bizi razlika so slučinela pe amenge ko životo, mora ponadari da te kera pozoralo amaro amalipe e Jehovaja. O apostol Pavle pišingja: „Sekogaš oven bahtale ko Gospodari [o Jehova]. Hem palem vakerava, oven bahtale!“ (Fil. 4:4). Ako mangaja te ova paše amala e Jehovaja, valjani te ovel amen e Devleskiri mudrost. I Biblija vakerela: „Bahtalo tano o manuš so ka arakhel mudrost hem o manuš so isi le sposobnost haljojbaske... Oj tani kaš e životoskoro okolenge so ka prifatinen la hem okola so zorale ka ikeren pe ki late ka oven vikime bahtale“ (Izr. 3:13, 18).

6. So javer valjani te kera te šaj te ačhova bahtale?

⁶ Ama, te šaj te ačhova bahtale, but tano važno ponadari da te primenina adava so sikljovaja tari Biblija. O Isus sikavgja kobor tano važno akava keda vakergja: „Ako džanena akala bukja, bahtale sien keda kerena len“. (Jovan 13:17; čitin Jakov 1:25.) Ako mangaja te ova paše e Devlea hem  te ačhova bahtale mora te kera adava. Ama, sar šaj te ova bahtale keda isi but bukja kola so šaj te len amaro bahtalipe? Te dikha so javer vakergja o Isus ki Propoved ki gora.

7. Sar šaj okola so tugujnena te oven bahtale?

⁷ „Bahtale tane okola so tugujnena, soske ola ka oven utešime“ (Mat. 5:4). Šaj pučaja amen: „Sar šaj nekoj te ovel bahtalo keda tugujnela?“ O Isus na mislingja ko sarine so tugujnena. But lošna manuša tugujnena bašo problemija so isi len ko akava „but pharo vreme“ (2. Tim. 3:1). Ama, ola mislinena samo peske a na bašo Jehova, adaleske našti te oven paše e Jehovaja hem te oven bahtale. O Isus kerela sine lafi bašo adala soj svesna kaj valjani lenge o Devel. Ola tugujnena soske dikhena kaj but manuša otfrlinena e Devle hem na živinena agjaar sar so mangela ov. Isto agjaar, džanena kaj tane grešna hem haljovena kaj o lošna bukja so slučinena pe ko sveto tane adaleske so o manuša tane nesovršena. O Jehova dikhela adalen so iskreno tugujnena, ov utešinela len ple Lafea hem dela len bahtalipe hem životo. (Čitin Ezekiel 5:11; 9:4.)

8. Sar adava so ka ove krotko ka kerel tut bahtalo?

⁸ „Bahtale tane o krotka, soske ola ka nasledinen i Phuv“ (Mat. 5:5). Sar adava so ka ove krotko ka kerel tut bahtalo? But manuša ponašinena pe grubo hem nasilno, a adava šaj te anel dži ko but problemija. Ama keda šunena bašo čačipe, ola meninena pe hem uravena i „nevi ličnost“. Akana ola sikavena sočuvstvo hem mangipe, ljubeznost, poniznost, ačhovena smirime hem strpliva (Kol. 3:9-12). Adava anela lenge andruno mir, e javerencar tane ko šukar odnosija hem bahtale tane. Isto agjaar, e Devleskoro Lafi vetinela kaj ola ka „nasledinen i Phuv“ (Ps. 37:8-10, 29).

9. a) So mislingja o Isus keda vakergja kaj o krotka „ka nasledinen i Phuv“? b) Soske šaj te oven bahtale okola soj „bokhale hem žedna baši pravednost“?

⁹ Ki koja smisla o krotka „ka nasledinen i Phuv“? E Isuseskere učenikija soj pomazime ka nasledinen i Phuv ki adaja smisla so ka vladinen upri late sar carija hem sveštenikija (Otk. 20:6). Milionija javera kolen so nane len nadež te živinen upre ko nebo ka nasledinen i Phuv keda ka ovel lenge dozvolimo te živinen večno ki late. Ola ka oven sovršena hem ka ovel len mir hem bahtalipe. Akala tane o manuša baši kaste so o Isus vakergja: „Bahtale tane okola soj bokhale hem žedna baši pravednost“ (Mat. 5:6). Lengiri želba baši pravednost ka ovel celosno zadovolimi keda o Jehova ka cidel sa o lošnipe (2. Pet. 3:13). Ko nevo sveto, o pravedna manuša ka oven bahtale hem nikogaš više nane te tugujnen bašo lošna bukja so kerena len o lošna manuša (Ps. 37:17).

10. So značinela te ove milostivo?

¹⁰ „Bahtale tane o milostiva, soske ka ovel lenge sikavdi milost“ (Mat. 5:7). Te ove milostivo značinela te ove prijatno, ljubezno hem sočuvstvitelno, javere lafencar te ovel tuke žal okolenge so cidena muke. Ama, i milost tani poviše  nego samo čuvstvo. Sprema i Biblija, te ove milostivo značinela te kere nešto te šaj te pomožine e javerenge.

11. So sikljovaja tari sporedba bašo milostivo Samarjani?

¹¹ Čitin Luka 10:30-37. E Isuseskiri sporedba bašo milostivo Samarjani but jasno sikavela so značinela te ovel pe milostivo. O Samarjani tari žal hem taro sočuvstvo pomožingja e manušeske so sine ki nevolja. Otkeda dengja akaja sporedba, o Isus vakergja: „Dža hem tu da ker agjaar“. Adaleske, šaj te puča amen: „Dali kerava adava so kergja o milostivo Samarjani? Keda o javera cidena muke, šaj li te kerav nešto te pomožinav lenge? Na primer, šaj li te pomožinav e pophurenge ko sobranie, e udovicenge ili e čhavenge kaskere so roditelija na služinena e Jehovaske? Šaj li te utešinav okolen so isi len depresija“? (1. Sol. 5:14; Jak. 1:27).

12. Sar adava so ka ova milostiva e javerencar ka kerel amen bahtale?

¹² Soske siem bahtale keda siem milostiva? Keda sikavaja milost amen daja e javerenge, a o Isus vakergja kaj o dejbe kerela amen bahtale. Isto agjaar, džanaja kaj adalea keraja e Jehovaskiri volja. (Dela 20:35; čitin Evreite 13:16.) Baši okova soj tano milostivo, o cari o David vakergja: „O Jehova ka zaštitinel le hem ka ikerel le ko životo. Ka ovel pendžardo sar bahtalo ki phuv“ (Ps. 41:1, 2). Isto agjaar, ako siem milostiva hem sočuvstvitelna sprema o javera, o Jehova ka ovel milostivo sprema amende hem šaj te ova bahtale zasekogaš (Jak. 2:13).

13, 14. Soske tano važno te ovel amen „čisto vilo“?

¹³ O Isus vakergja: „Bahtale tane okola so isi len čisto vilo, soske ola ka dikhen e Devle“ (Mat. 5:8). Te šaj te ovel amen čisto vilo mora te oven amen čista misle hem ispravna želbe. Akava tano but važno ako mangaja o Jehova te prifatinel amari služba. (Čitin 2. Korinkjanite 4:2; 1. Tim. 1:5.)

 ¹⁴ Okolen so isi len čisto vilo šaj te oven paše e Jehovaja, kova so vakergja: „Bahtale tane okola so thovgje ple dugačka šeja“ (Otk. 22:14). So značinena o lafija „thovgje ple dugačka šeja“? E pomazanikonge značinela kaj o Jehova dikhela len sar čista, ka del len besmrtno životo ko nebo hem zasekogaš ka oven bahtale. Bašo baro mnoštvo, kolen so isi nadež te živinen ki Phuv, značinela kaj o Jehova dozvolinela lenge te oven leskere amala soske dikhela len sar pravedna. Baši lende i Biblija vakerela: „Thovgje ple dugačka šeja hem parnargje len ko rat e Bakhreskoro“ (Otk. 7:9, 13, 14).

15, 16. Sar šaj „te dikhen e Devle“ okola so isi len čisto vilo?

¹⁵ O Jehova vakergja: „Našti o manuš te dikhel man hem te ačhovel dživdo“ (2. Moj. 33:20). Tegani sar šaj okola so isi len čisto vilo te „dikhen e Devle“? O grčko lafi kova soj akate prevedimo „te dikhel“ šaj te značinel nekoj te zamislinel, te haljovel ili te džanel. Znači, „te dikha e Devle“ značinela te haljova savi ličnost tano ov hem te manga leskere osobine (Ef. 1:18). O Isus sovršeno sikavela sine e Devleskere osobine hem adaleske šaj sine te vakerel: „Koj dikhlja ma man, dikhlja me Dade da“ (Jovan 14:7-9).

¹⁶ Osven adava, „dikhaja e Devle“ keda haljovaja sar pomožinela amenge ko amaro životo (Jov 42:5). Isto agjaar šaj „te dikha e Devle“ keda koncentririnaja amen ko but šuže bukja so vetingja o Jehova okolenge so ačhovena čista hem verno služinena leske. A o pomazanikija doslovno ka dikhen e Jehova keda ka voskresninen hem ka džan ko nebo (1. Jov. 3:2).

17. Soske tane bahtale okola so kerena mir?

¹⁷ O Isus vakergja akava da: „Bahtale tane okola so kerena mir“ (Mat. 5:9). Keda amen prvo keraja nešto te šaj te ova ko mir e javerencar, šaj te ova bahtale. O učeniko o Jakov pišingja: „A i pravednost anela plodi okolenge so kerena o mir keda tani sejmi ko mirno vreme“ (Jak. 3:18). Znači, ako tuke pharo te nakhe šukar nekasaja ko sobranie ili ki familija, molin e Jehova te pomožinel tuke te kere mir. Tegani, o Jehova ka del tut plo sveti duh kova so ka pomožinel tuke te sikave o hristijanska osobine hem tu ka ove pobahtalo. O Isus sikavgja kobor tano važno te kera mir keda vakergja: „Ako ingarea tli žrtva ko žrtveniko hem adari setinea tut kaj tle phrale isi le nešto protiv tute, mukh tli žrtva anglo žrtveniko, hem dža prvo smirin tut tle phralea, a palo adava iran tut hem de tlo poklon“ (Mat. 5:23, 24).

18, 19. Soske o hristijanja šaj te oven bahtale iako tane progonime?

 ¹⁸ „Bahtale sien keda baši mande vredžinena tumen, progoninena tumen hem vakerena razna lošna hovavne bukja protiv tumende.“ So manglja te vakerel o Isus akalea? Ov ponadari vakergja: „Oven bahtale hem osetinen tumen but šukar, soske bari tani tumari nagrada ko nebo. Soske agjaar progoninena sine e prorokon angleder tumende“ (Mat. 5:11, 12). Keda o apostolija sine marde hem sine lenge zabranimo te propovedinen, ola gele peske bahtale taro Sudsko sovet. Normalno, ola na uživingje adaleske so sine marde. Ama sine bahtale soske „sine len čest te oven mučime“ ko anav e Isuseskoro (Dela 5:41).

¹⁹ Avdive, e Jehovaskere sluge isto agjaar tane bahtale džikote istrajnena ko progonstvija so isi len bašo e Isuseskoro anav. (Čitin Jakov 1:2-4.) Isto sar o apostolija, amen da na uživinaja te ova mučime ili progonime. Ama, ako ačhovaja verna e Jehovaske, ov ka del amen hrabrost te istrajna. Razmislin so slučingja pe jekhe phraleske so vikinela pe Henrik Dornik. Ko avgust 1944 berš, ov hem leskoro phral sine bičhalde ko koncentraciono logori. Lengere protivnikija vakergje: „Ko ništo našti te ubedina len. Lengoro mučibe kerela len bahtale“. O Henrik objasningja: „Iako na sine man želba te ovav mučimo, adava so hrabro hem dostoinstveno izdržinava sine o mučibe adaleske so mangava sine te ačhovav verno e Jehovaske, čače kergja man bahtalo... O molitve taro vilo kergje man panda popaše e Jehovaja hem ov sikavgja mange kaj šaj te ovel man doverba ki leste“.

20. Soske siem bahtale džikote služinaja e „bahtale Devleske“?

²⁰ Keda radujnaja e Jehova, „o bahtalo Devel“, šaj te ova bahtale čak ako isi amen progonstvo, ako i familija protivinela pe amenge, ako nasvaljovaja ili phujrovaja (1. Tim. 1:11). Isto agjaar, bahtale siem soske amaro Devel kova „so našti te hovavel“, dengja amen but šuže vetuvanja (Tit 1:2). Keda o Jehova ka ispolninel ple vetuvanja, nane ni te setina amen ko problemija so isi amen akana. Ustvari, našti ni te zamislina amenge kobor šužo ka ovel o životo ko raj hem kobor bahtale ka ova! Čače, ka uživina „ko baro mir“ (Ps. 37:11).